អតីតសកម្មជនចលនាមាតាធម្មជាតិដែលទើបចេញពីពន្ធនាគារលោក ថុន រដ្ឋា បានបង្ហោះវីដេអូលើកទី១ នៅលើហ្វេកបុករបស់ខ្លួន ដោយបង្ហាញពីទីតាំងលូបង្ហូរទឹកកខ្វក់មានផ្ទុកដោយកាកសំណល់ស្អុយរលួយហូរចូលក្នុងស្ទឹងសៀមរាប ដោយមិនបានឆ្លងកាត់ការចម្រោះត្រឹមត្រូវនោះទេ ដែលនាំឲ្យប៉ះពាល់ដល់សុខុមាលភាពសាធារណៈ និងតំបន់ទេសចរណ៍ប្រវត្តិសាស្ត្រ។ យុវជនស្រឡាញ់បរិស្ថានរូបនេះ ស្នើដល់អាជ្ញាធរយកចិត្តទុកដាក់ដោះស្រាយបញ្ហានេះ។ ប៉ុន្តែអាជ្ញាធរក្រុងសៀមរាបថា ការលើកឡើងនោះ ជាការភាន់ច្រឡំ ព្រោះស្ថានភាពស្ទឹងសៀមរាបបច្ចុប្បន្នមានសោភ័ណ្ឌភាពស្អាត និងមិនមានការបង្ហូរទឹកកខ្វក់នោះទេ។
អតីតសកម្មជនចលនាមាតាធម្មជាតិម្នាក់ដែលទើបចេញពីពន្ធនាគារ និងជាប់បម្រាមរបស់តុលាការផងនោះ បានចេញផ្សាយវីដេអូថ្មីជាលើកទី១ បង្ហោះលើទំព័រហ្វេសប៊ុកផ្ទាល់ខ្លួនកាលពីថ្ងៃទី១១ ខែកុម្ភៈ បង្ហាញទីតាំងលូបង្ហូរទឹកកខ្វក់ជាច្រើនកន្លែងហូរចូលដងស្ទឹងសៀមរាប ហើយលោកសង្ស័យថា ទឹកកខ្វក់ដែលមានជះក្លិនស្អុយចេញពីបំពង់លូផ្ទុកដោយកាកសំណលរលួយនោះ មិនបានឆ្លងកាត់ប្រព័ន្ធចម្រោះនោះទេ។
ក្នុងវីដេអូមានរយៈពេលជិត៣នាទី របស់យុវជនស្រឡាញ់បរិស្ថានរូបនេះបន្តថា ទឹកកខ្វក់ទាំងនោះហូរចេញពីមន្ទីរពេទ្យ ផ្សារ សណ្ឋាគារ ផ្ទះសំណាក់ ភោជនីយដ្ឋាន និងផ្ទះប្រជាពលរដ្ឋ ខណៈលោករកឃើញថា អាងចម្រោះទឹកសំណល់ក្រុងសៀមរាបមួយកន្លែងមានទំហំ១២ហិតា ចំណាយលុយអស់១៤លានដុល្លារ និងដាក់ឱ្យប្រើប្រាស់នៅឆ្នាំ២០១០ បានក្លាយជាអាងចិញ្ចឹមត្រីទៅវិញ។
លោក ថុន រដ្ឋា បារម្ភថា ទឹកស្អុយដែលបង្ហូរចូលស្ទឹងទេសចរណ៍ប្រវត្តិសាស្រ្តនេះ ហើយបន្តហូរចូលបឹងទន្លេសាប ដោយមិនបានចម្រោះត្រឹមត្រូវធ្វើឱ្យប៉ះពាល់មុខមាត់កម្ពុជា និងបំផ្លាញជីវៈចម្រុះនៅក្នុងទឹក។ ជាមួយគ្នា ទឹកនេះត្រូវបានប្រើប្រាស់ដើម្បីស្រោចដំណាំ ដំាបន្លែ ចិញ្ចឹមត្រី និងនេសាទ ដែលប៉ះពាល់ធ្ងន់ធ្ងរដល់សុខភាពសាធារណៈផងដែរ។ យុវជនរូបនេះបញ្ជាក់ថា ក្នុងនាមរូបលោកជាយុវជនស្រឡាញ់សន្តិភាពពេញលេញ និងស្រឡាញ់បរិស្ថានស្អាតនោះ លោកចង់ឃើញទឹកស្ទឹងសៀមរាបមានទឹកថ្លាទាក់ទាញភ្ញៀវទេសចរណ៍ ដោយមិនមែនជាស្ទឹងទឹកលូនោះទេ។ ដូច្នេះលោកស្នើដល់អាជ្ញាធរពិនិត្យ ដោះស្រាយបញ្ហានេះ និងបើកដំណើរអាងចម្រោះទឹកកខ្វក់ឡើងវិញ៖ «គ្រាន់តែការចូលរួមដើម្បីការពារធនធានធម្មជាតិមិនមែនជាអំពើខុសច្បាប់ មិនមែនជាបទល្មើស ជាការរួមចំណែកមួយក្នុងនាមយើងជាពលរដ្ឋសកម្ម យុវជនសកម្មដែលឈឺឆ្អាលរឿងធនធានធម្មជាតិ បើទោះបីមានការភ័យខ្លាចតែខ្ញុំនៅតែទៅមុខ ខ្ញុំជឿជាក់លើវីដេអូដែលនិយាយពីបញ្ហាបរិស្ថានចេញក្តីស្រឡាញ់ក្នុងនាមជាយុវជនដែលស្រឡាញ់បរិស្ថានរបស់ខ្លួនឯង»។
ជាមួយគ្នានេះដែរ អាជីវករនៅក្រុងសៀមរាប លោក យឹម សុង៉ា ប្រាប់វិទ្យុអាស៊ីសេរីនៅថ្ងៃទី១២ ខែកុម្ភៈថា សោភ័ណ្ឌភាពតាមស្ទឹងសៀមរាប មិនបានជួយទាក់ទាញភ្ញៀវទេសចរណ៍ជាតិនិងអន្តរជាតិជាច្រើនឆ្នាំមកហើយ ដោយសារខ្វះការយកចិត្តទុកដាក់ពីអាជ្ញាធរពាក់ព័ន្ធ។ លោកបន្តថា បញ្ហានេះ កើតឡើងដោយសារការបង្ហូរកាកសំណល់កខ្វក់ហូរចេញពីលូ និងមិនបានសម្អាតភក់នៅបាតស្ទឹងឱ្យបានត្រឹមត្រូវ៖ «ស្ទឹងនេះមិនបានសម្អាតឱ្យបានត្រឹមត្រូវមែន ទីមួយបង្ហូរទឹកស្អុយចូល ទីពីរមានកាកសំណល់ផ្សេងៗជាច្រើន ទីបីនៅបាតស្ទឹងហ្នឹងមានជាមួយភក់អត់ស្អាតច្រើន និយាយចំទៅស្ទឹងសៀមរាបហ្នឹងអត់បានសម្អាតឱ្យស្អាតទេ ហើយវាប៉ះពាល់ដល់ភ្ញៀវទេសចរណ៍មែន។ ខ្ញុំរស់នៅសៀមរាបស្នើសុំអាជ្ញាធរគួរមានវិធានការ»។
ឆ្លើយតបរឿងនេះ អភិបាលក្រុងសៀមរាបលោក នួន ពុទ្ធារ៉ា ប្រាប់វិទ្យុអាស៊ីសេរីថា កន្លងមកអាជ្ញាធរ បានយកចិត្តទុកដាក់លើបញ្ហាបរិស្ថានទីក្រុងដើម្បីទាក់ទាញភ្ញៀវទេសចរណ៍។ លោកអះអាងថា ដងស្ទឹងសៀមរាបបច្ចុប្បន្នមានសោភ័ណ្ឌភាពស្អាត ហើយទឹកក្នុងស្ទឹង គឺហូរចេញពីលូទឹកភ្លៀងប៉ុណ្ណោះ ដោយមិនមានការបង្ហូរទឹកកង្វក់ពីការប្រើប្រាស់ដូចការលើកឡើងនោះទេ ព្រោះអាជ្ញាធរបានរៀបចំប្រព័ន្ធនៃការបង្ហូរទឹកលូទាំងពីរដាច់ដោយឡែកពីគ្នា។ រីឯអាងចម្រោះទឹកមួយកន្លែងនៅភូមិកន្រ្តក់ សង្កាត់ស្វាយដង្គំវិញ លោកបញ្ជាក់ថា កំពុងដំណើរការធម្មតា ហើយអាជ្ញាធរខេត្តក៏គ្រោងរៀបចំទីតាំងចម្រោះទឹកមួយកន្លែងទៀតនៅស្រុកប្រាសាទបាគង នៅពេលខាងមុខនេះ ដើម្បីពង្រីកសមត្ថភាពចម្រោះទឹកផងដែរ៖ «វីដេអូនេះ ខ្ញុំនឹងពិនិត្យមើលដោយសារខ្ញុំអត់ទាន់ឃើញ តែឥឡូវប្រព័ន្ធលូយើងមានពីរផ្សេងគ្នា មួយលូកខ្វក់ដែលចេញតាមការប្រើប្រាស់របស់បងប្អូនមួយខ្សែផ្សែង ហើយលូទឹកភ្លៀងមួយខ្សែងផ្សេង អត់មានបញ្ចូលគ្នាទេ រាល់កន្លែងបញ្ចូលដងស្ទឹងទាំងអស់សុទ្ធតែទឹកភ្លៀងមិនមែនទឹកលូទេ ឥឡូវទាក់ទងដងស្ទឹងយើងស្អាតហើយបរិស្ថានក្នុងក្រុងទាំងអស់កំពុងរៀបចំកំណែទម្រង់ឡើងវិញពាក់ព័ន្ធការថែរក្សាបរិស្ថាន»។
ទោះយ៉ាងណា លោក ថុន រដ្ឋា បញ្ជាក់ថា វីដេអូនេះ កើតចេញពីក្តីស្រឡាញ់របស់លោកចំពោះបរិស្ថាន ពុំមានចេតនាញុះញង់ និងបង្ខូចកេរឈ្មោះរដ្ឋាភិបាលនោះទេ។ លើសពីនេះលោករីករាយក្នុងការបង្ហាញទីតាំងទាំងនោះទៅកាន់អាជ្ញាធរ ដើម្បីផ្តល់ដំណោះស្រាយ និងទទួលបានគាំទ្រពីសំណាក់ពលរដ្ឋ។
កន្លងទៅយុវជនចលនាមាតាធម្មជាតិធ្លាប់បានបង្ហោះវីឌីអូ ទាមទារឲ្យរដ្ឋាភិបាលបញ្ឈប់ការលុបបឹងធម្មជាតិ និងការពារបរិស្ថាន បណ្ដាលឲ្យតុលាការចោទប្រកាន់ពួកគេពីបទញុះញង់ បទរួមគំនិតក្បត់ និងបទប្រមាថព្រះមហាក្សត្រជាដើម។ ប៉ុន្តែក្រោយមានការថ្កោលទោសពីសហគមន៍អន្តរជាតិ រដ្ឋាភិបាលបានដោះលែងពួកគេឲ្យនៅក្រៅឃុំបណ្ដោះអាសន្នកាលពីចុងឆ្នាំ២០២១ ក្រោមលក្ខខណ្ឌតឹងរ៉ឹងជាច្រើនរបស់តុលាការ។ យ៉ាងណាក៏ដោយចុះ ពួកគាត់ តែបន្តធ្វើកិច្ចការពារបរិស្ថានតទៅទៀត ពីព្រោះសកម្មភាពទាំងនោះ ដើម្បីបម្រើផលប្រយោជន៍សាធារណៈ និងការពារដោយរដ្ឋធម្មនុញ្ញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។