សកម្មជនចលនាមាតាធម្មជាតិព្រួយបារម្ភពីការកាប់បំផ្លាញព្រៃឈើនៅកោះកុងក្រៅធ្វើឱ្យបាត់បង់ជីវចម្រុះ និងធនធានធម្មជាតិ។ ពួកគាត់អះអាងថា ការបំផ្លាញព្រៃឈើនៅតំបន់ទេសចរណ៍កោះកុងក្រៅនេះ គឺដោយសារតែក្រសួងបរិស្ថានធ្វើការយឺតយ៉ាវក្នុងការដាក់បញ្ចូលកោះកុងក្រៅជាឧទ្យានជាតិសមុទ្រ។
សកម្មជនចលនាមាតាធម្មជាតិបានចេញវីដេអូ បង្ហាញពីការកាប់បំផ្លាញធនធានធម្មជាតិនៅកោះកុងក្រៅ ដែលមានអ្នកមានអំណាចជាអ្នកកាងពីក្រោយ។ ក្នុងវីដេអូរយៈពេលជិត៥នាទី ពួកគាត់បានរៀបរាប់ពីកាប់បំផ្លាញឈើខុសច្បាប់នៅតំបន់កោះកុងក្រៅ ហើយតំបន់ដែលរងកាប់ទន្ទ្រានច្រើនជាងគេ គឺនៅឆ្នេរទី១ នៃកោះកុងក្រៅជាប់នឹងបន្ទាយទាហានតែម្ដង។
«ភាគច្រើនបណ្ដាញឈ្មួញរកស៊ីឈើខុសច្បាប់ដែលមានមូលដ្ឋាននៅខេត្តកោះកុងបានបញ្ជូនគាត់ឱ្យទៅរកកាប់ឈើប្រណិតៗនៅលើកោះកុងក្រៅគាត់បានបន្តទៀតថា គាត់និងគ្នីគ្នារបស់គាត់ត្រូវបានដឹកចេញពីដីគោកដោយធ្វើដំណើរតាមដងព្រែកនានានៅក្បែរកោះកុងក្រៅហើយមានទាហានការពារដើម្បីទៅរកឈើប្រណិតៗនៅក្នុងតំបន់ភ្នំព្រៃជ្រៅៗដែលមិនទាន់ត្រូវបានកាប់បំផ្លាញ»។
ការចេញផ្សាយវីដេអូបង្ហាញពីក្ដីបារម្ភរបស់សកម្មជនបរិស្ថានកាលពីថ្ងៃទី១០ ខែកញ្ញានេះ គឺដោយសារក្រសួងបរិស្ថាននៅតែមិនទាន់ដាក់បញ្ចូលកោះកុងក្រៅជាឧទ្យានជាតិសមុទ្រ ដែលធ្វើឱ្យឈ្មួញរកស៊ីឈើខុសច្បាប់មានឱកាសចូលកាប់ទន្ទ្រានព្រៃឈើដោយសេរី។
សកម្មជនចលនាមាតាធម្មជាតិ កញ្ញា មាន លីសា ប្រាប់វិទ្យុអាស៊ីសេរីនៅថ្ងៃទី១២ កញ្ញា ថា គោលបំណងនៃការធ្វើវីដេអូនេះ គឺដើម្បីបង្ហាញពីការកាប់បំផ្លាញព្រៃឈើនៅលើកោះដែលធំជាងគេនៅកម្ពុជា ដែលអាចប្រឈមនឹងការវិនាស ប្រសិនបើរដ្ឋាភិបាលនៅតែមិនអើពើចំពោះបញ្ហានេះ។ កញ្ញាបន្តថា ប្រសិនបើរដ្ឋាភិបាលមិនដាក់កោះកុងក្រៅជាឧទ្យានសមុទ្រនោះគឺប្រៀបដូចជាក្រសួងបរិស្ថានកំពុងក្បត់ពាក្យសន្យារបស់ខ្លួនចំពោះពលរដ្ឋ។
កញ្ញា មាន លីសា៖ «យើងនៅតែទាមទារដដែលដរាបណាកោះកុងក្រៅនៅមិនទាន់ក្លាយជាឧទ្យានជាតិសមុទ្រទេ ពួកយើងមិនឈប់ដាច់ ចលនាមាតាធម្មជាតិ នឹងធ្វើយុទ្ធនាការដើម្បីឱ្យមានការឆ្លើយតបពីព្រោះវាជាការទទួលខុសត្រូវរបស់រដ្ឋ ហើយឥឡូវនៅក្នុងអាណត្តិថ្មីក្នុងថ្នាក់ដឹកនាំថ្មីដែលមានរដ្ឋមន្ត្រីក្រសួងបរិស្ថានថ្មី លោក អ៊ាង សុផល្លែត យើងសង្ឃឹមហើយ និងជឿជាក់ថា គាត់នឹងយកសំណើដែលធ្វើការស្នើរាប់ឆ្នាំមកដោះស្រាយ មកធ្វើការឆ្លើយតប»។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងបរិស្ថាន លោក ផៃ ប៊ុនឈឿន ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី១២ កញ្ញា។
ទាក់ទិនបញ្ហានេះ មន្ត្រីសម្របសម្រួលគម្រោងនៃសមាគមបណ្ដាញយុវជនកម្ពុជា (CYN) លោក អូត ឡាទីន សង្ស័យថា ការណ៍ដែលក្រសួងបរិស្ថានពន្យារពេលដាក់បញ្ចូលកោះកុងក្រៅជាឧទ្យានជាតិសមុទ្រអាចជាប់ពាក់ព័ន្ធនឹងឈ្មួញរកស៊ីឈើខុសច្បាប់នៅតំបន់កោះកុងក្រៅ។ លោកបន្តថា ក្រសួងបរិស្ថានគួរតែពិចារណាដាក់កោះកុងក្រៅជាឧទ្យានជាតិសមុទ្រតាមការស្នើសុំរបស់យុវជនស្រឡាញ់បរិស្ថាន និងទទួលស្គាល់ពីការកាប់បំផ្លាញធនធានធម្មជាតិនៅក្នុងតំបន់នោះ។
លោក អូត ឡាទីន៖ «នៅក្នុងអាណត្តិថ្មីនេះបើយើងក្រឡេកមើលភាគច្រើនមន្ត្រីវ័យក្មេងច្រើនទៅសុទ្ធសឹងតែអ្នករៀនសូត្របានជ្រៅជ្រះ ហើយខ្ញុំស្នើសុំដល់រដ្ឋាភិបាលតាមរយៈក្រសួងបរិស្ថានហ្នឹងសូមឱ្យប្រើប្រាស់មន្ត្រីជំនួយមន្ត្រីបច្ចេកទេសទាំងអស់ហ្នឹងធ្វើយ៉ាងណាដាក់គោលដៅការពារធនធានធម្មជាតិឱ្យបានតែម្ដងហើយធ្វើការសហការគ្នាដោយមិនរើសមុខ»។
កន្លងទៅក្រុមយុវជនស្រឡាញ់បរិស្ថានតែងធ្វើយុទ្ធនាការចែកខិត្តប័ណ្ណអំពីកោះកុងក្រៅ និងដាក់ញត្តិជាច្រើនលើកទៅក្រសួងបរិស្ថានដើម្បីស្នើសុំឱ្យរដ្ឋាភិបាលដាក់បញ្ចូលកោះកុងក្រៅជាឧទ្យានជាតិសមុទ្រ ក្នុងគោលបំណងការពារសម្បត្តិជាតិ។ ប៉ុន្តែក្រសួងបរិស្ថានតែងច្រានចោលសំណើរបស់ពួកគេ និងបែរជាចាត់ទុកទង្វើរបស់យុវជនទាំងនេះថាប្រាសចាកពីឧត្ដមប្រយោជន៍ជាតិ និងផ្ទុយពីច្បាប់ស្ដីពីអង្គការ សមាគមមិនមែនរដ្ឋាភិបាល ហើយគំរាមចាត់វិធានការតាមផ្លូវច្បាប់ទៀតផង។
កោះកុង ឬអ្នកស្រុកនិយមហៅថាកោះកុងក្រៅ មានទីតាំងស្ថិតនៅឃុំជ្រោយប្រស់ ស្រុកកោះកុង មានចម្ងាយប្រមាណ ៣០គីឡូម៉ែត្រ ពីក្រុងខេមរភូមិន្ទ ទីរួមខេត្តកោះកុង។ កោះនេះមានផ្ទៃ ១០៣គីឡូម៉ែត្រក្រឡា និងសម្បូរដោយធនធានធម្មជាតិចម្រុះរួមមានព្រៃឈើ ឆ្នេរខ្សាច់សក្បុស ទឹកសមុទ្រថ្លាឈ្វេង កូនភ្នំ ទឹកជ្រោះ ព្រមទាំងសត្វព្រៃ និងសត្វសមុទ្រជាច្រើនប្រភេទ។ ក្រុមយុវជនអះអាងថា ពួកគេនៅតែប្រកាន់គោលជំហរទាមទារឱ្យរដ្ឋាភិបាលដាក់កោះកុងក្រៅជាឧទ្យានសមុទ្របើទោះជារងការគំរាមកំហែងពីអាជ្ញាធរយ៉ាងណាក៏ដោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។