ក្រុមយុវជនចលនាមាតាធម្មជាតិធ្វើយុទ្ធនាការបំផុសឱ្យសាធារណជន ចូលរួមផ្ញើសារទៅទំព័រហ្វេសប៊ុកក្រសួងបរិស្ថាន ជំរុញឱ្យក្រសួងបរិស្ថាន ដាក់កោះក្នុងដែនសមុទ្រកម្ពុជា ដែលធំជាងគេបន្ទាប់ពីកោះត្រល់មួយនេះ ជាឧទ្យានជាតិសមុទ្រ។
សកម្មជនចលនាមាតាធម្មជាតិ កញ្ញា មាន លីសា ប្រាប់វិទ្យុអាស៊ីសេរីនៅថ្ងៃទី៥ ខែមករា ថា យុទ្ធនាការផ្ញើសារនេះ ចាប់ផ្ដើមធ្វើនៅថ្ងៃទី៤ ខែមករា រហូតដល់ថ្ងៃទី១១ ខែមករា ដោយតម្រូវអ្នកចូលរួមយុទ្ធនាការនេះផ្ញើសារដោយផ្ទាល់ទៅកាន់ទំព័រហ្វេសប៊ុកក្រសួងបរិស្ថានថា តើក្រសួងបរិស្ថានត្រូវការរយៈពេលប៉ុន្មានខែ ប៉ុន្មានឆ្នាំទៀត ក្នុងការដាក់កោះកុងក្រៅជាឧទ្យានជាតិសមុទ្រ? កញ្ញាបន្តថា ការដាក់កោះកុងក្រៅជាឧទ្យានជាតិសមុទ្រ មិនត្រឹមតែអាចធានាពីចីរភាពធនធានធម្មជាតិនៅកោះកុងក្រៅ តែប៉ុណ្ណោះទេ តែក៏អាចទាក់ទាញភ្ញៀវទេសចរជាតិ អន្តរជាតិ ឱ្យទៅលេងកម្សាន្ត ដើម្បីទទួលបានចំណូលថវិកាជាតិផងដែរ។
តោះ!!!កុំឱ្យស្ងាត់រឿងកោះកុងកុងក្រៅពេក យើងនាំគ្នាសួរក្រសួងបរិស្ថានមើលគាត់ធ្វើការដល់ណាហើយ?...
Posted by Mother Nature Cambodia on Wednesday, January 3, 2024
កញ្ញា មាន លីសា៖ «ខ្ញុំសំណូមពរឱ្យចូលរួមលេងទាំងអស់គ្នាក្រែងបានរង្វាន់ទៅលេងនៅកោះកុងក្រៅ បានអាវកោះកុងក្រៅ ស្ទីកឃ័រ(Sticker)កោះកុងក្រៅ ហើយចូលរួមទាំងអស់គ្នាដើម្បីកោះកុងក្រៅ ដែលជាសម្បត្តិរបស់យើងទាំងអស់គ្នា មិនមែនរបស់បុគ្គលណាម្នាក់ទេ ហើយសំណូមពរទៅក្រសួងយើងមានរយៈពេល៧ថ្ងៃ មានអ្នកឆាតទៅសួរ អាចនឹងលើសរយនាក់ អ៊ីចឹងសុំឱ្យមានការឆ្លើយតបពីលោករដ្ឋមន្ត្រី អ៊ាង សុផល្លែត សុំកុំយកការធ្វើការរបស់រដ្ឋមន្ត្រីអាណត្តិចាស់ មកធ្វើការនៅអាណត្តិថ្មីនេះ សូមឱ្យឆ្លើយតបជាមួយពួកយើង»។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងបរិស្ថាន លោក ផៃ ប៊ុនឈឿន ដើម្បីបកស្រាយជុំវិញរឿងនេះបាននៅឡើយទេ នៅថ្ងៃទី៥ ខែមករា។
រដ្ឋាភិបាលដឹកនាំដោយអតីតនាយករដ្ឋមន្ត្រីលោក ហ៊ុន សែន បានប្រគល់សិទ្ធិវិនិយោគកោះកុងក្រៅទាំងមូលដោយស្ងាត់ៗ កាលពីឆ្នាំ២០១៩ ទៅឱ្យក្រុមហ៊ុនកោះកុងអេសអ៊ីហ្សិត (Koh Kong SEZ) របស់ឧកញ៉ា លី យ៉ុងផាត់ ដែលជាសមាជិកព្រឹទ្ធសភាបក្សកាន់អំណាច និងជាសេដ្ឋីបនល្បែងស្និទ្ធនឹងលោកនាយករដ្ឋមន្ត្រី ហ៊ុន សែន។
ទោះជាយ៉ាងណា បន្ទាប់ពីក្រុមយុវជនចលនាមាតាធម្មជាតិ ធ្វើយុទ្ធនាការជិះកង់សង្គ្រោះកោះកុងក្រៅ កាលពីឆ្នាំ២០២០ ក្រសួងបរិស្ថានបែរជាប្រកាសថា ក្រសួងបានបញ្ជូនមន្ត្រីជំនាញចុះសិក្សាស្រាវជ្រាវ រៀបចំឯកសារ និងទិន្នន័យទាក់ទិននឹងកោះកុងក្រៅតាំងពីឆ្នាំ២០១៦។ បន្ថែមពីនេះក្រសួងបរិស្ថានថា នឹងអាចប្រកាសតំបន់កោះកុងក្រៅនេះជាឧទ្យានជាតិសមុទ្រនៅអំឡុងឆ្នាំ២០២១ ក្រោយបញ្ចប់ការសិក្សារួច។ ប៉ុន្តែរយៈពេលជាង ៦ឆ្នាំមកនេះ ក្រសួងមិនបានបង្ហាញជាសាធារណៈអំពីលទ្ធផលនៃការសិក្សាស្រាវជ្រាវ ឬប្រកាសតំបន់កោះកុងក្រៅ ជាឧទ្យានជាតិសមុទ្រ ដូចការសន្យានោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។