ក្រុមយុវជនចលនាមាតាធម្មជាតិប្រមាណ១០នាក់ នៅរសៀលថ្ងៃទី០៩ មេសា បន្តស្ទង់មតិពលរដ្ឋក្នុងគោលបំណង ស្វែងរកសំឡេងគាំទ្រពីប្រជាពលរដ្ឋដើម្បីជំរុញឱ្យរដ្ឋាភិបាលដាក់កោះកុងក្រៅជាឧទ្យានជាតិសមុទ្រ។
ក្រុមយុវជនចលនាមាតាធម្មជាតិបន្តស្វែងរកសំឡេងពីប្រជាពលរដ្ឋនៅសួនមុនវត្តបទុមវតី ក្បែរព្រះបរមរាជវាំង ក្រោមការឃ្លាំមើលពីជនស្លៀកពាក់ស៊ីវិល និងមានការរំខានពីជនមិនស្គាល់អត្តសញ្ញាណម្នាក់ និងកាយវិការចាប់អូសទាញយុវជនតាមថតរូប ដើម្បីធ្វើឱ្យពួកគេឈប់ស្ទង់មតិ ហើយងាកមកជួយការងារជនមិនស្គាល់អត្តសញ្ញាណនោះវិញ។ សកម្មជនបរិស្ថានចាត់ទុកទង្វើនេះថា គឺជារឿងអសីលធម៌ និងបង្កឱ្យប្រជាពលរដ្ឋភិតភ័យមិនហ៊ានផ្ដល់សំឡេងគាំទ្រដល់ពួកគេ។
សកម្មជនចលនាមាតាធម្មជាតិ កញ្ញា មាន លីសា ថ្លែងថា ការគំរាមកំហែងទាំងអស់នេះមិនបានធ្វើឱ្យកញ្ញា បោះបង់ការខិតប្រឹងប្រែងជួយបរិស្ថាននោះទេ។ កញ្ញារំពឹងថា ឱកាសក្រោយនឹងមានការចូលរួមពីមន្ត្រីមានសមត្ថកិច្ចដើម្បីចូលរួមការពារសុវត្ថិភាព និងជួយសម្រួលចរាចរណ៍ឱ្យពលរដ្ឋនៅតាមដងផ្លូវជាជាងចោទប្រកាន់ និងរារាំងយុវជនមិនឱ្យចូលរួមការពារធនធានធម្មជាតិ។
កញ្ញា មាន លីសា៖ «គឺនិយាយស្ដាប់គ្នាអត់បានហ្មង គាត់ព្យាយាមនិយាយគំហុកឱ្យយើងខ្លាំងមែនទែនហ្មង គាត់បាញ់ទឹកលាងការ៉ូគាត់ឱ្យយើងទៅឡាយ(live)ឱ្យគាត់ ឱ្យទៅថតឡាយដែលយើងកំពុងឡាយកម្មវិធីរបស់យើង គាត់ថាម៉េចពួកយើង ម៉េចក៏អត់ឡាយនៅពេលគាត់ធ្វើសកម្មភាពទាំងអស់នឹង ទាំងដែរនេះជាកម្មវិធីរបស់យើងកំពុងឡាយស្ទង់មតិ ហើយឱ្យយើងទៅឡាយឱ្យគាត់ម៉េចបានទៅ និយាយទៅនិយាយសម្លុតអត់ស្ដាប់គ្នាហ្មងអាជ្ញាធរ»។
រយៈពេល ៣ថ្ងៃនៃការស្ទង់មតិអំពីបរិស្ថាន និងធនធានធម្មជាតិ សំឡេងគាំទ្ររបស់ប្រជាពលរដ្ឋទទួលបានជាង ១ពាន់សំឡេង (១.២៥៤) និងមានការចូលរួមឃ្លាំមើលពីមន្ត្រីសង្គមស៊ីវិលមួយចំនួន។
បើទោះបីជាមានការរំខាន និងការឃ្លាំមើលពីជនស្លៀកពាក់ស៊ីវិលយ៉ាងណាក៏ដោយ ក៏ក្រុមយុវជននៅតែបន្តយុទ្ធនាការស្ទង់មតិនេះជារហូតដល់ចប់កម្មវិធី។
ពួកគេជំរុញឱ្យក្រសួងបរិស្ថានពន្លឿននីតិវិធីដើម្បីដាក់បញ្ចូលកោះកុងក្រៅជាឧទ្យានជាតិសមុទ្រ និងស្នើឱ្យអាជ្ញាធរជួយត្រួតពិនិត្យការពារសុវត្ថិភាពរបស់ពួកគេ ដោយសារពួកគេតែងត្រូវបានអាជ្ញាធរ និងជនស្លៀកពាក់ស៊ីវិលតាមថតរូប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។