ក្រុមយុវជនចលនាមាតាធម្មជាតិគ្រោងធ្វើស្ទង់មតិលើបណ្ដាញសង្គម (Facebook) ដើម្បីស្វែងរកការគាំទ្រ ពីប្រជាពលរដ្ឋដែលចង់បានការការពារតំបន់កោះកុងក្រៅ ដើម្បីការពារនិងថែរក្សាធនធានធម្មជាតិ និងតំបន់កោះដ៏កម្រមួយនេះ។
យុទ្ធនាការស្ទង់មតិលើទំព័រហ្វ៊េសប៊ុកនៃចលនាមាតាធម្មជាតិនេះ នឹងស្ទង់មតិពលរដ្ឋតាមរយៈការចុចសញ្ញាមេដៃ ឬLike ក្នុងសំណួរថាតើបងប្អូនប្រជាពលរដ្ឋចង់ឲ្យមានការថែរក្សាធនធានធម្មជាតិនៅតំបន់កោះកុងក្រៅដែរឬទេ?
ក្រុមយុវជនចលនាមាតាធម្មជាតិអះអាងថា យុទ្ធនាការតាមអនឡាញនេះ នឹងជំរុញឲ្យរដ្ឋាភិបាលកាន់តែយកចិត្តទុកដាក់នឹងពិចារណាឡើងវិញ នៅពេលឃើញពលរដ្ឋចូលរួមកាន់តែច្រើន។សមាជិកក្រុមយុវជនចលនាមាតាធម្មជាតិ យុវជន ថុន រដ្ឋា ថ្លែងពីគោលបំណងនៃយុទ្ធនាការថា ក្រុមយុវជនចង់ឲ្យសំឡេងអ្នកចូលរួមយុទ្ធនាការតាមអនឡាញនេះ មានចំនួនកាន់តែច្រើន និងបានលឺដល់រដ្ឋាភិបាលអំពីការឈឺឆ្អាល និងការគាំទ្រពីប្រជាពលរដ្ឋដែលចង់ឲ្យដាក់កោះកុងក្រៅជាតំបន់ការពារដោយច្បាប់ ឬជាឧទ្យានជាតិ កុំឲ្យមានក្រុមហ៊ុនណាមួយកាន់កាប់យកជាកម្មសិទ្ធិឯកជន ដែលនាំឲ្យបាត់បង់ធនធានជាតិដ៏កម្រមួយនេះ៖ «យើងចង់ឲ្យសំឡេងបងប្អូនបានលឺដល់អ្នកដែលមានសិទ្ធិសម្រេច។ សម្ដេច ហ៊ុន សែន គាត់ជាមនុស្សតែម្នាក់ទេ ដែលគាត់មានសិទ្ធថែរក្សាតំបន់ហ្នឹង ហើយក៏គាត់មានសិទ្ធិដកអាជ្ញាប័ណ្ណពីក្រុមហ៊ុនអេសអ៊ីហ្សិត របស់ឧកញ៉ា លី យ៉ុងផាត់ ថែរក្សាឲ្យកោះហ្នឹងក្លាយជាទ្រព្យសម្បត្តិរបស់ប្រទេសជាតិ និងរក្សាភាពដើមនៃកោះ»។
យុទ្ធនាការតាមអនឡាញស្ទង់មតិ លើទំព័រហ្វ៊េសប៊ុកនៃចលនាមាតាធម្មជាតិ គ្រោងចាប់ផ្ដើមធ្វើនៅថ្ងៃទី២៧ សីហា សប្ដាហ៍ក្រោយ។
ក្រុមយុវជនមាតាធម្មជាតិបន្តធ្វើយុទ្ធនាការ ផ្សព្វផ្សាយឲ្យពលរដ្ឋចូលរួមការពារកោះកុងក្រៅតាមវិធីប្រមូលការគាំទ្រលើបណ្ដាញសង្គមនេះ ស្របពេលដែលយុវជនកំពុងបន្តធ្វើយុទ្ធនាការចែករូបភាពជាច្រើន អំពីទេសភាពកោះកុងក្រៅទៅប្រជាពលរដ្ឋ តាមទីប្រជុំជន និងទីផ្សារនានា នៅរាជធានីភ្នំពេញ។ រូបភាពទាំងនោះមានដូចជា រូបភាពឆ្នេរខ្សាច់ ទឹកជ្រោះ និងសត្វព្រៃអមជាមួយធម្មជាតិជាដើម។ យុវជនមាតាធម្មជាតិបារម្ភថា កោះដ៏ធំរបស់កម្ពុជាមួយនេះកំពុងប្រឈមការបំផ្លិចបំផ្លាញ ក្នុងពេលដ៏ខ្លី ដែលទាមទារឲ្យពលរដ្ឋរួមគ្នានិយាយ និងការពារ ដើម្បីកុំឲ្យយឺតពេល។
រដ្ឋាភិបាលបានប្រគល់សិទ្ធិវិនិយោគកោះនេះទាំងមូលដោយស្ងាត់ៗ ទៅឱ្យក្រុមហ៊ុនកោះកុង អេសអ៊ីហ្សិត (Koh Kong SEZ) របស់ឧកញ៉ា លី យ៉ុងផាត់ ដែលជាសមាជិកព្រឹទ្ធសភានៃគណបក្សកាន់អំណាច និងជាអ្នកជំនួញស្និទ្ធនឹងលោកនាយករដ្ឋមន្ត្រី ហ៊ុន សែន។
ការប្រគល់សិទ្ធិវិនិយោគនេះ ធ្វើឡើងតាំងពីឆ្នាំ២០១៩ តែរដ្ឋាភិបាលមិនបានបង្ហាញព័ត៌មាននេះជាសាធារណៈឡើយ ទាល់តែក្រុមយុវជនចាប់ផ្ដើមធ្វើយុទ្ធនាការជិះកង់សង្គ្រោះកោះកុងក្រៅ កាលពីខែមិថុនា កន្លងទៅដោយមានការរារាំងពីអាជ្ញាធរខេត្តកោះកុង ទើបរដ្ឋាភិបាលសម្រេចទម្លាយព័ត៌មាននេះ។ ប៉ុន្តែការទម្លាយព័ត៌មាននេះ រដ្ឋាភិបាលមិនបានបញ្ជាក់ឱ្យលម្អិតនោះទេ គឺគ្រាន់តែរំលេចនៅក្នុងលិខិតបង្កើតគណៈកម្មការថ្មីមួយ ដើម្បីត្រួតពិនិត្យគម្រោងអភិវឌ្ឍកោះកុងរបស់ក្រុមហ៊ុនអេសអ៊ីហ្សិតប៉ុណ្ណោះ។
អ្នកនាំពាក្យក្រសួងបរិស្ថាន លោក នេត្រ ភក្ត្រា ធ្លាប់បានចោទប្រកាន់ថា ក្រុមយុវជនធ្វើយុទ្ធនាការជាបន្តបន្ទាប់ គឺដើម្បីញុះញង់ឲ្យមានចលាចលសង្គម ជានយោបាយទុច្ចរិត និងបង្កើតឲ្យមានអនាធិបតេយ្យសង្គមប៉ុណ្ណោះ។ លោកអះអាងដដែលៗថា រដ្ឋាភិបាលបានបង្កើតឲ្យមានគណៈកម្មាធិការត្រួតពិនិត្យការអភិវឌ្ឍន៍កោះកុងក្រៅ ដែលមានការចូលរួមពីក្រសួងបរិស្ថាន ក្រសួងកសិកម្ម និងក្រសួងធនធានទឹក និងឧតុនិយម និងធ្វើការសិក្សាអំពីផលប៉ះពាល់នៃការអភិវឌ្ឍនេះ។
ប៉ុន្តែយុវជនមាតាធម្មជាតិ យុវជន ថុន រដ្ឋា ថ្លែងថា ពួកគេមិនព្រួយបារម្ភឬភ័យខ្លាចឡើយចំពោះការចោទប្រកាន់បែបនេះ ពីព្រោះសកម្មភាពដែលយុវជនធ្វើស្របនឹងគោលការណ៍ច្បាប់ រួមទាំងទិសដៅរបស់រដ្ឋាភិបាលក្នុងការការពារធនធានធម្មជាតិ។ យុវជនរូបនេះ សំណូមពរឲ្យពលរដ្ឋចូលរួមទាំងអស់គ្នា ដោយមិនអាចរំពឹងតែទៅលើយុវជនមួយក្រុមនោះទេ៖ «បើសិនណាជាយើងបានធ្វើទាក់ទងសន្តិសុខអី សូមជួយប្រាប់ផងថាខុសនឹងច្បាប់អីខ្លះ ហើយថាតើគោលបំណងអីដែលតែងតែចោទប្រកាន់ពួកយើង ក្នុងនាមជាយុវជនដែលគ្រាន់តែបញ្ចេញសិទ្ធិនិងចង់ការពារទ្រព្យសម្បត្តិកេរ្តិ៍មរកតសម្រាប់ប្រទេសជាតិដែលបន្សល់ពីដូនតាយើងហើយយើងចង់រក្សាវាទៅកាន់មនុស្សជំនាន់ក្រោយ»។
កោះកុងក្រៅ មានផ្ទៃ ១០៣គីឡូម៉ែត្រការ៉េ មានទីតាំងស្ថិតនៅឃុំជ្រោយប្រស់ ស្រុកកោះកុង ចម្ងាយប្រមាណ ៣០គីឡូម៉ែត្រ ពីក្រុងខេមរភូមិន្ទ ទីរួមខេត្តកោះកុង។ កោះនេះសម្បូរដោយសក្ដានុពលផ្នែកធនធានធម្មជាតិ ព្រៃឈើ និងជីវចម្រុះជាច្រើនប្រភេទ។
ក្រុមយុវជនចលនាមាតាធម្មជាតិអះអាងថា ការចូលរួមរបស់ពលរដ្ឋក្នុងយុទ្ធនាការនេះ ពិតជាសំខាន់ដែលជាផលវិជ្ជមានអាចរក្សាកេរ្តិ៍មរកតធនធានធម្មជាតិរបស់ខ្មែរទុកសម្រាប់ពលរដ្ឋជំនាន់នេះ និងមនុស្សជំនាន់ក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។