យ៉ាងហោចណាស់តំបន់ប្រភពទឹកសំខាន់របស់កម្ពុជាចំនួន៤ មានទន្លេបាសាក់រាជធានីភ្នំពេញ ព្រែកក្ដាម ខេត្តកំពង់ចាម និងអ្នកលឿងរងផលប៉ះពាល់យ៉ាងខ្លាំងដល់ការប្រកបរបរកសិកម្មរបស់ពលរដ្ឋ ការបម្លាស់ទីរបស់ត្រី និងការធ្វើដំណើរតាមដងទន្លេ។
សេចក្ដីថ្លែងការណ៍របស់គណៈកម្មការទន្លេមេគង្គកាលពីថ្ងៃទី១២ ខែកុម្ភៈ ឱ្យដឹងថា កម្រិតទឹកបានចាប់ផ្ដើមធ្លាក់ចុះតាំងពីចុងឆ្នាំ២០២០ រហូតមកដល់ពីខែមករា ឆ្នាំ២០២១នេះ ដោយយ៉ាងហោចណាស់ទឹកធ្លាក់ចុះ ០,២០ម៉ែត្រ នៅក្នុងមួយថ្ងៃ។ បញ្ហានេះបណ្ដាលមកពីភ្លៀងធ្លាក់តិច ការផ្លាស់ប្ដូរលំហូរទឹកនៅតំបន់មេគង្គខាងលើដែលបណ្តាលមកពីដំណើរការនៃទំនប់វារីអគ្គិសនីនៅតាមដៃទន្លេ ហើយដើមហេតុសំខាន់មួយទៀត គឺការរាំងខ្ទប់ទឹករបស់ទំនប់វារីអគ្គិសនីជីងហុង (Jinghong) ក្នុងខេត្តយូណានរបស់ប្រទេសចិន។ មិនមែនតែកម្ពុជាទេ ប៉ុន្តែប្រទេសក្នុងតំបន់ទន្លេមេគង្គ ដូចជា ថៃ ឡាវ និងវៀតណាមក៏រងផលប៉ះពាល់នេះដែរ។
នាយកទទួលបន្ទុកផ្នែកគាំទ្របច្ចេកទេសនៃគណៈកម្មការទន្លេមេគង្គ លោកបណ្ឌិត វីណៃ វ៉ាំងភីមូន (Winai Wangpimoon) លើកឡើងក្នុងសេចក្តីថ្លែងការណ៍នោះថា បើបញ្ហានេះនៅតែបន្តអូសបន្លាយតទៅទៀត នឹងធ្វើឱ្យប៉ះពាល់ដល់សន្តិសុខស្បៀងរបស់ប្រជាជន ដែលរស់នៅតាមដងទន្លេ និងប្រព័ន្ធអេកូឡូស៊ី។ លោកស្នើទៅប្រទេសចិន និងប្រទេសតាមដងទន្លេមេគង្គទាំងអស់ រួមគ្នាចែករំលែកគម្រោងគ្រប់គ្រងទន្លេមេគង្គ និងរួមគ្នាដោះស្រាយបញ្ហានេះ។
ជុំវិញបញ្ហានេះ អាស៊ីសេរីបានព្យាយាមសុំការបំភ្លឺបន្ថែមពីអ្នកនាំពាក្យក្រសួងបរិស្ថានលោក នេត ភក្ត្រា អ្នកនាំពាក្យក្រសួងធនធានទឹកលោក ចាន់ យុត្ថា អ្នកនាំពាក្យរដ្ឋាភិបាលលោក ផៃ ស៊ីផាន ប៉ុន្តែទូរស័ព្ទចូលគ្មានអ្នកទទួលហើយលេខខ្លះហៅមិនចូលនៅថ្ងៃទី១៤ ខែកុម្ភៈ។
ដូចគ្នាទៅរបាយការណ៍របស់គណៈកម្មការទន្លេមេគង្គ ប្រធានសហគមន៍នេសាទបឹងបេ៦ ដែលស្ថិតនៅតាមដងទន្លេមេគង្គ ស្រុកកងមាស ខេត្តកំពង់ចាម លោក អ៊ាង ណាំ ប្រាប់អាស៊ីសេរីថា រយៈពេលពីរឆ្នាំចុងក្រោយនេះ ទឹកទន្លេថយចុះរហូត។ លោកថា ពេលនេះអ្នកនេសាទក៏ពិបាករកត្រី ហើយអ្នកធ្វើស្រែប្រាំងក៏គ្មានទឹកធ្វើស្រែដែរ៖ << ខែ៨ ខែ៩បានទឹកចូលមក ចូលតែមកតែរយៈពីរបីសប្ដាហ៍ចេញទៅវិញអស់ចូលយឹតតែចេញទៅវិញឆាប់។ យើងដឹងថា ត្រីចាប់ពងកូនពីពាក់កណ្ដាលខែ៧ក៏ប៉ុន្តែវាធ្វើឱ្យខករដូវត្រីពងដល់ខែ៨ ខែ៩បានទឹកមកចឹងពងកូនក៏រាំងស្ទះដែរ»។
ទន្លេមេគង្គមានប្រភពទឹកពីខ្ពង់រាបទីបេហូរកាត់ប្រទេសចំនួន៦គឺប្រទេសចិន ភូមា ថៃ ឡាវ កម្ពុជា និងវៀតណាម មុននឹងហូរធ្លាក់ទៅកាន់សមុទ្រចិនខាងត្បូង។
អ្នកជំនាញកិច្ចការតំបន់ទន្លេមេគង្គលើកឡើងថា កត្តាប្រែប្រួលអាកាសធាតុ ការគ្មានភ្លៀងធ្លាក់ និងការសាងសង់ទំនប់វារីអគ្គិសនីដ៏សម្បើមនៅតាមប្រទេសខ្សែទឹកខាងលើនៃទន្លេមេគង្គ ជាពិសេសប្រទេសចិន និងឡាវកំពុងតែធ្វើឲ្យផ្ទៃបឹងទន្លេសាបត្រូវរីងរាក់ខ្លាំងមិនធ្លាប់មានពីមុនមកនៅរដូវវស្សា។ ពាក់ព័ន្ធនឹងបញ្ហាវិបត្តិទឹកទន្លេមេគង្គនេះ សកម្មជនបរិស្ថាន លោក អាឡិច ធ្លាប់លើកឡើងថា លោកចង់ឃើញរដ្ឋាភិបាលរបស់លោកនាយករដ្ឋមន្ត្រី ហ៊ុន សែន ហ៊ានចេញមុខប្ដឹងមហាយក្សចិន និងប្រទេសឡាវទាមទារសំណងពីផលខូចខាតបង្កឲ្យមានវិបត្តិទឹកបណ្ដាលមកពីការសាងសង់ទំនប់វារីអគ្គិសនីដ៏សម្បើមនៅខ្សែទឹកខាងលើនៃផ្ទៃអាងទន្លេមេគង្គ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។