សកម្មជនបរិស្ថានប្រមាណ ៦នាក់ ត្រូវបានអាជ្ញាធរឃាត់ខ្លួននៅថ្ងៃទី២៣ ខែវិចិ្ឆកា ឃុំតាឡាត ស្រុកសេសាន។ មន្ត្រីខេត្តស្ទឹងត្រែង អះអាងថា ការឃាត់ខ្លួននេះ គឺជាការអនុវត្តនីតិវិធីរបស់សមត្ថកិច្ច និងកម្លាំងជំនាញពាក់ព័ន្ធ។
សង្គមស៊ីវិល និងសកម្មជនបរិស្ថាន ជំរុញអាជ្ញាធររដ្ឋាភិបាលលោក ហ៊ុន ម៉ាណែត ឱ្យដោះលែងសកម្មជនបរិស្ថានវិញ ដោយពួកគាត់ចាត់ទុកការឃាត់ខ្លួននេះថា ជាការគំរាមកំហែងលើសកម្មភាពការពារធនធានធម្មជាតិ។
បណ្ដាញសហគមន៍ព្រៃឡង់ខេត្តព្រះវិហារ លោក ខេម សុឃី ប្រាប់វិទ្យុអាស៊ីសេរី នៅថ្ងៃទី២៣ ខែវិច្ឆិកាថា សកម្មជនបរិស្ថានទាំងនេះ ត្រូវបានអាជ្ញាធរឃាត់ខ្លួន នៅចំណុចភូមិក្រឡាពស់ ឃុំតាឡាត ស្រុកសេសាន ខេត្តស្ទឹងត្រែង។ រីឯមូលហេតុ នៃការឃាត់ខ្លួនវិញ នៅមិនទាន់ដឹងច្បាស់នៅឡើយទេ។
ព័ត៌មានបឋម ដែលវិទ្យុអាស៊ីសេរីទទួលបាន សកម្មជនបរិស្ថាន ដែលត្រូវអាជ្ញាធរឃាត់ខ្លួន រួមមាន លោក អ៊ូច ឡេង លោក ព្រុំ ម៉ៅ លោក មន ម៉ាប់ (ហៅ ផុន) លោក អូត ឡាទីន លោក តាត ឧត្តម និងលោក ហេង ស្រស់។
វិទ្យុអាស៊ីសេរីមិនទាន់អាចទាក់ទងគ្រួសាររបស់លោក អ៊ូច ឡេង និងអ្នកផ្សេងទៀតបាននៅឡើយទេ គិតមកដល់ពេលនេះ។
អ្នកនាំពាក្យសាលាខេត្តស្ទឹងត្រែង លោក ម៉ែន គុង ប្រាប់វិទ្យុអាស៊ីសេរីនៅថ្ងៃទី២៣ ខែវិច្ឆិកាថា ការឃាត់ខ្លួនលោក អ៊ូច ឡេង និងមនុស្សមួយចំនួនទៀត គឺជាការអនុវត្តនីតិវិធីរបស់សមត្ថកិច្ច និងកម្លាំងជំនាញពាក់ព័ន្ធ តាមផែនការ។ លោកមិនអត្ថាធិប្បាយអំពីសំណុំរឿង និងមូលហេតុ នៃការឃាត់ខ្លួន និងទីកន្លែងដែលត្រូវបញ្ជូនសកម្មជនបរិស្ថានទេ ដោយលោកថា សមត្ថកិច្ចជំនាញកំពុងអនុវត្តនីតិវិធី។
លោក ម៉ែន គុង៖ «ការអនុវត្តនីតិវិធី គឺមាន ជាសិទ្ធិសម្រេចរបស់មន្ត្រីនគរបាលយុត្តិធម៌ និងសមត្ថកិច្ចពាក់ព័ន្ធមិនអាចកំណត់ថា ពេលណាហើយ ហើយត្រូវផ្ដល់ព័ត៌មានជាក់លាក់ផ្ដល់ជូនទេ អាចទាក់ទងទៅខាងបរិស្ថាន ទាក់ទងទៅខាងបរិស្ថាន»។
វិទ្យុអាស៊ីសេរី មិនអាចទាក់ទងប្រធានមន្ទីរបរិស្ថានខេត្តស្ទឹងត្រែងលោក ស្រេង ជាហេង និងអ្នកនាំពាក្យក្រសួងបរិស្ថានលោក ខ្វៃ អាទិត្យា ដើម្បីសុំការបំភ្លឺ ជុំវិញរឿងនេះបានទេ នៅថ្ងៃទី២៣ ខែវិច្ឆិកា។
រីឯអ្នកនាំពាក្យកងរាជអាវុធហត្ថលើផ្ទៃប្រទេសលោក អេង ហ៊ី ប្រាប់វិទ្យុអាស៊ីសេរី នៅថ្ងៃទី២៣ ខែវិច្ឆិកាថា លោកកំពុងជាប់រវល់។
ប្រធានប្រតិបត្តិនៃសមាគមបណ្ដាញយុវជនកម្ពុជា (CYN) លោក ហេង គឹមហុង ប្រាប់វិទ្យុអាស៊ីសេរីនៅថ្ងៃទី២៣ ខែវិច្ឆិកាថា លោក និងអ្នកសង្កេតការណ៍ផ្សេងទៀត កំពុងតាមដានអំពីដំណើរការ នៃការអនុវត្តន៍នីតិវិធី នៃការចាប់ខ្លួនសកម្មជនបរិស្ថានទាំង ៦នាក់នេះ។
លោក ហេង គឹមហុង៖«ការឃាត់ខ្លួននេះ នៅហ្នឹងកន្លែង ហើយគេមិនទាន់បានថា នីតិវិធីម៉េចទេ។ អ៊ីចឹង ពួកខ្ញុំមិនអាចនឹងឆ្លើយយ៉ាងម៉េចទេ កំពុងរង់ចាំនៅឡើយថា តើគេនឹងដោះលែងនៅកងកម្លាំងទីស្នាក់ការចម្រុះ ឬគេនឹងបញ្ជូនមកខេត្ត»។
ចំណែកឯអនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (Adhoc) លោក យិន ម៉េងលី មានប្រសាសន៍ថា ការចុះទៅស្រាវជ្រាវ និងស៊ើបអង្កេតរបស់សកម្មជនបរិស្ថាន ពាក់ព័ន្ធនឹងការកាប់បំផ្លាញធនធានធម្មជាតិ យកមកលាតត្រដាងប្រាប់រដ្ឋាភិបាលអំពីបទល្មើស ដែលកំពុងកើតឡើង គឺមិនមែនជាបទល្មើសនោះទេ។
លោក យិន ម៉េងលី ប្រាប់វិទ្យុអាស៊ីសេរីនៅថ្ងៃទី២៣ ខែវិច្ឆិកាថា ប្រសិនបើពួកគាត់ធ្វើខុសនីតិវិធី ឬឆ្គាំឆ្គងអ្វីបន្តិចបន្តួច រដ្ឋាភិបាលគួរតែណែនាំ និងលើកទឹកចិត្តពួកគាត់ឱ្យបន្តសកម្មភាព ដើម្បីជួយទប់ស្កាត់បទល្មើសធនធានធម្មជាតិរបស់ប្រទេសជាតិ ដែលជាប្រយោជន៍ជាតិទាំងអស់គ្នា។
លោក យិន ម៉េងលី៖ «សកម្មភាពពួកគាត់ជាសកម្មភាពបរិស្ថានសុទ្ធសាធ ហើយត្រូវបានរារាំង ត្រូវបានឃាត់ខ្លួន ធ្វើឱ្យមតិជាតិ មតិអន្តរជាតិគេមើលឃើញ គេចេះតែឆ្ងល់ថា ហេតុអីសកម្មភាពបរិស្ថានក្លាយជាបទល្មើស ធ្វើការឃាត់ខ្លួនចោទប្រកាន់វិញថា តើមានអីនៅពីក្រោយបញ្ហាទាំងអស់ហ្នឹង។ ទី២ អាចជាការលើកទឹកចិត្តដល់ក្រុមឧក្រិដ្ឋជនព្រៃឈើ ក្រុមបំផ្លិចបំផ្លាញធនធានធម្មជាតិឱ្យកាន់តែធ្វើសកម្មភាពខ្លាំងឡើងថែមទៀត ដោយគិតថា មិនមានអ្នកណាហ៊ានធ្វើអីខ្លួនទេ»។
ក្នុងចំណោមសកម្មជនបរិស្ថាន ទាំង ៦នាក់ ដែលត្រូវអាជ្ញាធរឃាត់ខ្លួននោះ ក៏មានលោក អ៊ូច ឡេង ប្រធានអង្គការក្រុមកិច្ចការពិសេសសិទ្ធិមនុស្សកម្ពុជា និងជាម្ចាស់ពានរង្វាន់វីរជនបរិស្ថាន Goldman Environmental Prizeឆ្នាំ២០១៦ ដែរ។
លោក អ៊ូច ឡេង រួមជាមួយសកម្មជនបរិស្ថានផ្សេងទៀត ធ្លាប់ត្រូវបានអាជ្ញាធរឃាត់ខ្លួន និងបញ្ជូនទៅតុលាការ កាលពីថ្ងៃទី១៣ ខែមីនា ឆ្នាំ២០២០ ម្ដងរួចហើយ តាមបណ្ដឹងរបស់ក្រុមហ៊ុនស៊ីង បាយអូថេក (ខេមបូឌា) ខូអិលធីឌី (Think Biotech Co., Ltd)។ ប៉ុន្តែនៅថ្ងៃទី១៦ ខែមីនា ឆ្នាំ២០២០ តុលាការបានដោះលែងពួកគាត់វិញ ក្រោយពីធ្វើកិច្ចសន្យាផ្អាកសកម្មភាពការពារបរិស្ថានបណ្ដោះអាសន្ន និងដាក់ឱ្យស្ថិតក្រោមការឃ្លាំមើលរបស់តុលាការ។
អ្នកឃ្លាំមើលលើកឡើងថា រដ្ឋាភិបាលត្រកូល ហ៊ុន តែងតែប្រើវិធីគំរាមកំហែង និងចាប់ខ្លួនសកម្មជន នៅពេលមានកម្ដៅនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។