កងរាជអាវុធហត្ថខេត្តស្ទឹងត្រែងនៅល្ងាចថ្ងៃទី២៥ វិច្ឆិកា បានដោះលែងសកម្មជនបរិស្ថាន ៥នាក់ និងអ្នកសារព័ត៌មានម្នាក់ ក្រោយពីសួរនាំរយៈពេល២ថ្ងៃជាប់គ្នា ក្នុងទីបញ្ជាការដ្ឋានកងរាជអាវុធហត្ថខេត្តស្ទឹងត្រែង។ ប៉ុន្តែក្រោយពីការដោះលែង ពួកគេហាក់ព្យាយាមរក្សាភាពស្ងៀមស្ងាត់។
ក្រោយការដោះលែងសកម្មជនការពារព្រៃឈើ និងអ្នកសារព័ត៌មានទាំងនោះ មានទឹកមុខស្លេកស្លាំង ភ្នែកខ្មៅ និងញញឹមរាក់ទាក់ទៅកាន់អ្នកទ្រ និងអ្នកឃ្លាំមើល ប៉ុន្តែពួកគេមិននិយាយអ្វី ដែលជាប់ទាក់ទងនឹងបញ្ហានៃការចាប់ខ្លួននោះទេ។
អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (Adhoc) លោក យិន ម៉េងលី ប្រាប់វិទ្យុអាស៊ីសេរី នៅថ្ងៃទី២៥ វិច្ឆិកា ថា សំណុំរឿងនេះមិនមែនជាបទល្មើសដែលត្រូវចោទប្រកាន់នោះទេ ហើយបច្ចុប្បន្នសកម្មជនការពារបរិស្ថានទាំងនោះនៅតែរក្សាភាពស្ងៀមស្ងាត់ ទំនងជាមានគំនាបពីខាងក្នុង។
លោក យិន ម៉េងលី៖ «អត់មានបទល្មើសដែលត្រូវធ្វើការចោទប្រកាន់ទេព្រោះឥឡូវនេះពួកគាត់ស្ងៀមវាស្ងាត់មិននិយាយអ្វីទាំងអស់ដែលធ្វើឱ្យយើងមានការលំបាកហាក់បីដូចជាពួកគាត់កំពុងមានគំនាបមួយចេញពីខាងក្នុងមក។
មន្ត្រីអាវុធហត្ថបានឃាត់ខ្លួននិងសាកសួរសកម្មជនបរិស្ថាន លោក អ៊ូច ឡេង លោក ហេង ស្រស់ លោក ព្រុំ ម៉ៅ លោកក មន ម៉ាប់ (ហៅ ផុន) លោក អូត ឡាទីន និងអតីតអ្នកសារព័ត៌មាន ភ្នំពេញប៉ុស្តិ៍ និងបច្ចុប្បន្នជាអ្នកសារព័ត៌មានឯករាជ្យលោក តាត ឧត្តម។
លោក យិន ម៉េងលី បញ្ជាក់ថា ក្រោយពីការដោះលែងសមត្ថកិច្ចបានប្រគល់វត្ថុតាង និងម៉ូតូជូនពួកគាត់វិញ។ រីឯសម្ភារៈផ្សេងទៀតរួមមាន ទូរសព្ទដៃ និងឧបករណ៍បង្ហោះលើអាកាស (Drone) ជាដើម លោកនៅមិនទាន់ដឹងនៅឡើយទេ។
ពួកគាត់ទាំងនោះត្រូវបានមន្ត្រីអាវុធហត្ថឃាត់ខ្លួន កាលពីថ្ងៃទី ២៣ វិច្ឆិកា ដោយចោទពីបទ ចូលតំបន់ហាមឃាត់ដោយគ្មានការអនុញ្ញាតក្នុងពេលពួកគាត់កំពុងឃ្លាំមើលបទល្មើស កាប់ព្រៃឈើ។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី បដិសេធមិនអធិប្បាយជុំវិញរឿងនេះទេ ដោយលោកថា ជានីតិវិធីរបស់តំណាងអយ្យការ។
លោក អេង ហ៊ី៖ «ពាក់ព័ន្ធរឿងហ្នឹងគឺដឹកនាំសម្របសម្រួល ត្រូវសួរនាំព្រះរាជអយ្យកាឬអយ្យការរង។ អ៊ីចឹង!សូមឱ្យសួរទៅអ្នកនាំពាក្យរបស់ខាងអយ្យការ ឬតំណាងអយ្យការទៅ»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះពីអ្នកនាំពាក្យតំណាងអយ្យការអមសាលាដំបូង ខេត្តស្ទឹងត្រែង លោក ជា សុភ័ក្ត្រ បាននៅឡើយទេនៅថ្ងៃទី ២៥ វិច្ឆិកា។
រីឯក្រុមអង្គការសង្គមស៊ីវិល ក្រុមយុវជន និងសហគមន៍ការពារព្រៃឈើប្រមាណ ១៥ នាក់ បានទៅឃ្លាំមើលនៅមុខបញ្ជាការដ្ឋានកងរាជអាវុធហត្ថខេត្ត នៅថ្ងៃទី ២៥ វិច្ឆិកាដើម្បីតស៊ូមតិទាមទារឱ្យដោះលែងអ្នកទាំង ៦នាក់នោះ។
ប្រជាសហគមន៍ការពារព្រៃឡង់ស្រុកថា ឡាបរិវ៉ាត់ ខេត្តស្ទឹងត្រែង លោក ប៊ុន វ៉ាន់នី ប្រាប់វិទ្យុអាស៊ីសេរីថា ចំណាត់ការរបស់អាជ្ញាធរនឹងគ្មានផលចំណេញដល់សង្គមជាតិនោះឡើយ ផ្ទុយទៅវិញ ជាទង្វើគំរាមកំហែង និងបំបាក់ស្មារតី លើអ្នកការពារធនធានធម្មជាតិ។ ចំណែកឯអ្នកបំផ្លាញធនធានធម្មជាតិ នៅតែបន្តប្រព្រឹត្តបទល្មើសព្រៃឈើដដែលៗ ដោយគ្មានចំណាត់ការច្បាស់លាស់នៅឡើយទេ។
លោក ប៊ុន វ៉ាន់នី៖«ការចាប់ពួកគាត់ហាក់ដូចជាផ្ដល់ឱកាសមួយទៅដល់ពួក ឈ្មួញរកស៊ីលើបទល្មើសខុសច្បាប់លើធនធានធម្មជាតិរបស់យើងកាន់តែច្រើនព្រោះសកម្មជនដែលការពារពួកគាត់គ្រាន់តែការពារសោះបែរជាចាប់។ គ្រប់យ៉ាងគឺពួកគាត់លះបង់សម្រាប់តែប្រជាជនយើងទាំងអស់គ្នាមិនមែនសម្រាប់តែប្រជាជននៅខេត្តស្ទឹងត្រែងទេ គឺនៅទូទាំងប្រទេស»។
យុវជនរស់នៅរាជធានីភ្នំពេញ លោក ហៀម ផេត យល់ថា សកម្មជនការពារបរិស្ថានទាំងនោះ បានប្តូរជីវិតការពារព្រៃឈើ និងឃ្លាំមើលបទល្មើសព្រៃឈើ ដើម្បីប្រយោជន៍រួម ដែលលោកថាអាជ្ញាធរគួរតែលើកទឹកចិត្ត និងសហការជាមួយពួកគាត់។
លោក ហៀម ផេត៖«រំលោភសិទ្ធិពួកគាត់ ហើយបំបិទសិទ្ធិសេរីភាពពួកគាត់ ដោយគ្រាន់តែការពារផលប្រយោជន៍រួម ចំណែកអ្នកដែលលួចបំផ្លាញធនធានធម្មជាតិ បែរជាច្បាប់នៅមូលដ្ឋានមិនចាប់ទៅវិញ»។
ក្នុងចំណោមពួកគាត់ទាំង៦នាក់ ដែលត្រូវអាជ្ញាធរឃាត់ខ្លួននោះ ក៏មាន លោក អ៊ូច ឡេង ដែលជាអ្នកការពារព្រៃឈើដ៏លេចធ្លោ និងធ្លាប់ទទួល បានពានរង្វាន់ឆ្នើមផ្នែកការពារបរិស្ថាន ឌឹ ហ្គោលមេន អ៊ិនវាយរ៉ូមិនថល ប្រាយ៍ (The Goldman Environmental Prize) ក្នុងឆ្នាំ២០១៦។ មន្ត្រីសង្គមស៊ីវិលសង្ស័យថាចំណាត់ការរបស់អាជ្ញាធរគឺជាការលាក់បាំងព័ត៌មានពីភាពមិនប្រក្រតីនៃការផ្តល់ដីសម្បទានសេដ្ឋកិច្ចឱ្យក្រុមហ៊ុន ធី.អេស.អិម.ដាប់បែលយូ ឯ.ក(TSM WW)ផ្ទុយពីបម្រាមរបស់រដ្ឋាភិបាលនិងការបំផ្លិចបំផ្លាញព្រៃឈើក្នុងតំបន់ភ្នំក្រឡាពស់ ក្នុងស្រុកសេសានខេត្តស្ទឹងត្រែង ជាប់ព្រំដែនខេត្តរតនគិរី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។