ប្រធានដែនជម្រកសត្វព្រៃឡង់ខេត្តស្ទឹងត្រែងបានចេញលិខិតបំភ្លឺមួយថ្លែងការពារថា មន្ត្រីបរិស្ថានដែលឃាត់ខ្លួនពលរដ្ឋពីរនាក់ ករណីកាប់រានព្រៃឡង់ខុសច្បាប់ ហើយតម្រូវឱ្យបង់ប្រាក់ សរុបជិត ៤.០០០ដុល្លារ គឺជាការអនុវត្តច្បាប់ស្តីពីតំបន់ការពារធម្មជាតិ ដើម្បីយកថវិកាចូលរដ្ឋ។
ប្រធានដែនជម្រកសត្វព្រៃឡង់ខេត្តស្ទឹងត្រែងថ្មីៗនេះ បានសរសេរលិខិតបំភ្លឺថ្លែងការពារ ប្រធានមន្ទីរបរិស្ថានខេត្តស្ទឹងត្រែង លោកស្រេង ជាហេង ដែលរងការចោទថា ដឹកនាំមន្ត្រីក្រោមឱវាទជំរិតទារលុយពីពលរដ្ឋ ២នាក់ ដែលលួចកាប់ទន្ទ្រានព្រៃឡង់ចំនួន ៤ពាន់ដុល្លារ ដោយក្នុងម្នាក់ៗ ត្រូវបង់ ២ពាន់ដុល្លារដុល្លារ (២.០០០) ជាថ្នូរដោះលែងឱ្យរួចខ្លួនវិញ។
ប្រធានដែនជម្រកជម្រកសត្វព្រៃឡង់ ខេត្តស្ទឹងត្រែង លោក ទូច វិចិត្រ បានសរសេរលិខិតបំភ្លឺ កាលពីថ្ងៃទី១៨ កញ្ញាឱ្យដឹងថា ជនសង្ស័យ ២នាក់ឈ្មោះ វែន វុទ្ធី វ័យ ៥៣ឆ្នាំ និងឈ្មោះ វ៉ន ថា វ័យ ៤២ឆ្នាំ មន្ត្រីជំនាញ បានពិន័យអន្តរការណ៍ ដើម្បីយកថវិកាចូលរដ្ឋ ផ្អែកតាមមាត្រា ៥៩ នៃច្បាប់ស្ដីពីតំបន់ការពារធម្មជាតិ និងអប់រំណែនាំធ្វើកិច្ចសន្យា។
លោកបញ្ជាក់ថា ការបង្គាប់ឱ្យបង់ប្រាក់ពិន័យបែបនេះ ក្រោយពីមន្ត្រីបរិស្ថានរកឃើញថា ជនសង្ស័យទាំងនេះ បានកាប់ទន្ទ្រានព្រៃឡង់ នៅចំណុចអូរម្រះ ក្នុងភូមិអន្លង់ភេ ឃុំអន្លង់ភេ ស្រុកថាឡាបរិវ៉ាត់ ខេត្តស្ទឹងត្រែង រួចក៏ដោះលែងពួកគាត់វិញ។
លិខិតដែលវិទ្យុអាស៊ីសេរីទទួលបាន មានបង្កាន់ដៃបង់ប្រាក់ ពិន័យតែឈ្មោះ វ៉ន ថា ម្នាក់ប៉ុណ្ណោះ គឺបង្គាប់ឱ្យវិន័យជាប្រាក់រៀលចំនួន ជិត ៨លានរៀល (៧.៩៧០.០០០) ឬស្មើជិត ២ពាន់ដុល្លារអាមេរិក។
ប្រការនេះ គឺផ្ទុយពីកំណត់ហេតុ របស់ប្រធានដែនជម្រកសត្វព្រៃឡង់ លោក ទូច វិចិត្រ ដែលសរសេរថា ជនសង្ស័យទាំងពីរនាក់នេះ ត្រូវពិន័យជាប្រាក់ក្នុងម្នាក់ៗ ជិត ៨លានរៀលសរុបជិត ៤ពាន់ដុល្លារ ស្របតាមមាត្រា ៥៩ ចំណុច ១ នៃច្បាប់ស្ដីពីតំបន់ការពារធម្មជាតិ ដោយអប់រំណែនាំ និងប្រគល់ដីដែលកាប់រានជូនរដ្ឋវិញ។
វិទ្យុអាស៊ីសេរីមិនទាន់អាចទាក់ទង សុំការបំភ្លឺរឿងនេះបន្ថែម ពីប្រធានមន្ទីរបរិស្ថានខេត្តស្ទឹងត្រែង លោក ស្រេង ជាហេង បាននៅឡើយទេ នៅថ្ងៃទី២៥ មិថុនា។
សកម្មជនការពារបរិស្ថាន លោក អ៊ុក ម៉ៅ ប្រាប់វិទ្យុអាស៊ីសេរីនៅថ្ងៃទី២៥ កញ្ញាថា តំបន់ព្រៃឡង់ ដែលមន្ត្រីបរិស្ថានអនុវត្តច្បាប់ ក្នុងសំណុំរឿងនេះ គឺជាកន្លែងដែលលោក ស្រេង ជាហេង ប្រធានមន្ទីរបរិស្ថានខេត្តស្ទឹងត្រែង ប្រើល្បិចចោទប្រកាន់លោក ប្ដឹងលោកទៅតុលាការ ដោយគ្មានមូលដ្ឋាន។
អ្នកការពារព្រៃឡង់រូបនេះ ចាត់ទុកពាក្យបណ្ដឹងនេះ ជាល្បិចមួលបង្កាច់ ដើម្បីគំរាមកំហែងលោក ព្រោះមន្ត្រីបរិស្ថាន មិនសប្បាយចិត្តនឹងសកម្មភាពរបស់ប្រជាសហគមន៍ ដែលតែងតែរិះគន់អាជ្ញាធរមិនអនុវត្តច្បាប់ព្រៃឈើ និងបណ្ដែតបណ្ដោយឱ្យកើតមានបទល្មើសឧក្រិដ្ឋព្រៃឈើ ក្នុងដែនសមត្ថកិច្ចរបស់ខ្លួន។
លោក អ៊ុក ម៉ៅ៖ «បំភាន់ដើម្បីលុបលាងកំហុសខ្លួនឯង។ បំភាន់ភ្នែកមតិមហាជន ពីដំបូងគាត់ថា បដិសេធយកលុយ ៤ពាន់ដុល្លារ។ ដល់ពេលចុងក្រោយមក គាត់ថា ពិន័យអន្តរការណ៍ចូលរដ្ឋ។ ដីទីតាំងហ្នឹង ប្ដឹងឈ្មោះខ្ញុំ ហើយតុលាការឱ្យស៊ើបអង្កេត ដល់ពេលស៊ើបទៅចាប់អ្នកផ្សេងយកលុយលែង ដល់ឈ្មោះខ្ញុំនៅតុលាការដដែល ដែលខ្ញុំអត់ដឹងអីសោះ»។
ជុំវិញរឿងនេះ មន្ត្រីពង្រឹងសិទ្ធិអំណាចសហគមន៍មូលដ្ឋាន នៃសមាគមអាដហុក ខេត្តស្ទឹងត្រែង លោក ប៉ែន ប៊ុណ្ណារ៍ ពន្យល់ថា ប្រសិនបើការបង់ប្រាក់ពិន័យមិនត្រឹមត្រូវតាមអ្វីដែល ពលរដ្ឋបានបង់ គឺជាការកេងប្រវ័ញ្ចថវិការដ្ឋខុសច្បាប់៖
លោក ប៉ែន បុណ្ណារ៍៖ «វាបាត់ពាក់កណ្ដាល វាមិនត្រឹមត្រូវតាមអ្វី ដែលពលរដ្ឋបង់ពិន័យអន្តរការណ៍វាជាកេងប្រវ័ញ្ចថវិកាជាតិ ព្រោះការផាកការពិន័យ ត្រូវចូលថវិកាជាតិ វាជាល្មើសព្រហ្មទណ្ឌ។ មន្ត្រីនគរបាលយុត្តិធម៌ ត្រូវទទួលខុសត្រូវចំពោះមុខច្បាប់ បើសិនជាខ្លួនហ៊ានកេងប្រវ័ញ្ចការផាកពិន័យអន្តរការណ៍ហ្នឹង»។
មន្ត្រីសង្គមស៊ីវិលរូបនេះបន្ថែមថា បណ្ដឹងចោទប្រកាន់លើសកម្មជនព្រៃឡង់រូបនេះ ជាការធ្វេសប្រហែសរបស់មន្ត្រីនគរបាលយុត្តិធម៌ ដែលកសាងសំណុំរឿងមិនត្រឹមត្រូវ។ លោកបញ្ជាក់ថា លោកនឹងប្ដឹងបរិហារលើប្រធានមន្ទីរបរិស្ថានខេត្តស្ទឹងត្រែង និងមន្ត្រីមួយចំនួនទៀត ដែលធ្វើឯកសារមិនត្រឹមត្រូវ ក្នុងសំណុំរឿងកាប់ទន្ទ្រានព្រៃឡង់ និងសំណុំរឿងបណ្ដែតបណ្ដោយឱ្យកើតមានបទល្មើសឧក្រិដ្ឋព្រៃឈើ ក្នុងដែនសមត្ថកិច្ចរបស់ខ្លួន៕
កំ ណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។