តុលាការកំពូល នៅថ្ងៃទី៨ ខែកុម្ភៈ សម្រេចបន្តលើកពេលប្រកាសសាលដីកាលើបណ្ដឹងសុំនៅក្រៅឃុំបណ្ដោះអាសន្នរបស់យុវជនចលនាមាតាធម្មជាតិ ៣នាក់ ទៅថ្ងៃចន្ទ ទី១៥ ខែកុម្ភៈសប្ដាហ៍ក្រោយ។ មន្ត្រីតុលាការបញ្ជាក់ហេតុផលថា ការលើកពេលនេះ ដោយសារជាប់រវល់។
នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គការលីកាដូ (LICADHO) លោក អំ សំអាត មានប្រសាសន៍ថា ការលើកពេលប្រកាសសាលដីកាជាលើកទី២ ហើយបន្តឃុំខ្លួនសកម្មជនបរិស្ថានទាំង ៣នាក់នេះ ធ្វើឲ្យប៉ះពាល់ដល់សិទ្ធិរបស់ពួកគាត់ ដែលត្រូវការរស់នៅក្រៅឃុំបណ្ដោះអាសន្នជាចាំបាច់។ លោកពិនិត្យឃើញថា សកម្មជនបរិស្ថានទាំង ៣នាក់ មានលក្ខខណ្ឌគ្រប់គ្រាន់ក្នុងការទទួលបានសិទ្ធិរស់នៅក្រៅឃុំបណ្ដោះអាសន្នតាមការស្នើសុំ ហើយលើសពីនេះ តុលាការគួរតែទម្លាក់ចោលការចោទប្រកាន់លើពួកគាត់ទៀតផង ព្រោះពួកគាត់គ្រាន់តែចូលរួមការពារធនធានធម្មជាតិ ពុំបានប្រព្រឹត្តល្មើសច្បាប់អ្វីឡើយ។ ទោះជាយ៉ាងណាក្ដី លោកកត់សម្គាល់ថា សំណុំរឿងដែលមានចរិតលក្ខណៈនយោបាយបែបនេះ គឺតុលាការកម្រដោះលែងណាស់៖ « ដូចយើងដឹងហើយថា ក្រុមអង្គការផ្នែកសិទ្ធិមនុស្ស និងបរិស្ថានជាតិ និងអន្តរជាតិ រួមមានទាំងក្រុមអ្នកជំនាញរបស់អង្គការសហប្រជាជាតិផង ក៏បានទាមទារឲ្យទម្លាក់បទចោទប្រកាន់លើយុវជនមាតាធម្មជាតិ ក៏ដូចជាយុវជនផ្សេងៗ ទៀត មានយុវជនខ្មែរថាវរៈជាដើម ដែលត្រូវបានចាប់ខ្លួនកន្លងមក ព្រោះគេថា ការចាប់ខ្លួននេះ គឺវាប៉ះពាល់ដល់សេរីភាពជាមូលដ្ឋាន និងការចូលរួមរបស់ប្រជាពលរដ្ឋក្នុងកិច្ចការពារសង្គម ជាពិសេស កិច្ចការពារធនធានធម្មជាតិ បរិស្ថាន និងលើកកម្ពស់សិទ្ធិមនុស្ស » ។
តុលាការកំពូល បានបើកសវនាការលើបណ្តឹងសុំនៅក្រៅឃុំរបស់យុវជនចលនាមាតាធម្មជាតិទាំង ៣នាក់ គឺលោក ថុន រដ្ឋា កញ្ញា ឡុង គន្ធា និង កញ្ញា ភួង កែវរស្មី កាលពីព្រឹកថ្ងៃទី១ ខែកុម្ភៈ ហើយគ្រោងនឹងចេញសេចក្ដីសម្រេច នៅថ្ងៃទី៨ ខែកុម្ភៈ។
អាជ្ញាធររបបក្រុងភ្នំពេញ បានចាប់ឃុំខ្លួនសកម្មជនបរិស្ថានវ័យក្មេង ៣នាក់ កាលពីដើមខែកញ្ញា ឆ្នាំ២០២០ កន្លងទៅ ខណៈពួកគេប្រកាសធ្វើយុទ្ធនាការទាមទាររដ្ឋាភិបាលឱ្យបញ្ឈប់លុបបឹងតាមោក ដែលស្ថិតនៅជាយរាជធានីភ្នំពេញ។ មកទល់ពេលនេះ យុវជនទាំង ៣នាក់ បានជាប់ពន្ធនាគារជាង ៥ខែហើយ។ សំណុំរឿងនេះមានជនជាប់ចោទ ២នាក់ទៀត ដែលស្ថិតនៅក្រៅឃុំ គឺស្ថាបនិកចលនាមាតាធម្មជាតិ លោក អាឡិច ហាន់ដ្រូហ្គន់សាឡេស ដេវីដសុន (Alejandro Gonzalez Davidson) និងយុវជនខ្មែរថាវរៈ កញ្ញា ជា គន្ធីន ដែលធ្លាប់បង្ហាញមុខក្នុងវីដេអូរបស់ក្រុមមាតាធម្មជាតិ ទាក់ទងនឹងការលុបបឹងតាមោក។ តុលាការបានចោទប្រកាន់ពួកគេពីបទ "ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម" ដែលប្រឈមនឹងការជាប់ពន្ធនាគាររហូតដល់ ២ឆ្នាំ។
សាលាដំបូងរាជធានីភ្នំពេញ គ្រោងនឹងបើកសវនាការលើអង្គសេចក្ដីនៃសំណុំរឿងរបស់សកម្មជនបរិស្ថានទាំងពីរនាក់នេះ នៅថ្ងៃទី២៤ កុម្ភៈខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។