យុវតីម្នាក់ក្នុងចំណោមយុវតី៦នាក់ទៀត គឺកញ្ញា ធួន ស្រីពៅ បានលះបង់សេចក្ដីសុខផ្ទាល់ខ្លួនចូលរួមជិះកង់ជុំវិញព្រៃឡង់ និងព្រៃព្រះរកា ចម្ងាយ៦០០គីឡូម៉ែត្រ ដើម្បីការពារបរិស្ថាន។ ធួន ស្រីពៅ ថ្លែងថា បើទោះជាជួបការលំបាកជាច្រើនក៏ដោយ ក៏កញ្ញានៅតែធ្វើដំណើរទៅដល់គោលដៅដដែល។ កញ្ញានៅតែបន្តដោយស្នាមញញឹម និងភាពក្លាហានថា ការធ្វើបែបនេះ ដើម្បីផ្ញើសារទៅកាន់សាធារណជនថា «ស្ត្រីមិនមែនជាមនុស្សទន់ខ្សោយ»ដូចការលើកឡើងនោះទេ។
មានវ័យអាយុ២០ កញ្ញា ធួន ស្រីពៅ បានតស៊ូជិះកង់ជុំវិញព្រៃឡង់ដែលឆ្លងកាត់ខេត្តចំនួនបួន គឺខេត្តកំពង់ធំ ព្រះវិហារ ស្ទឹងត្រែង និងខេត្តក្រចេះ រហូតដល់ថ្ងៃបញ្ចប់។ ការជិះកង់នេះបានចាប់ផ្ដើមតាំងពីថ្ងៃទី១០ ដល់ថ្ងៃទី២០ ខែឧសភា កន្លងទៅ។ កញ្ញាយល់ថា ការចូលរួមដើម្បីបរិស្ថាន និងព្រៃឈើនៅកម្ពុជាជាកាតព្វកិច្ចដែលយុវជនត្រូវតែបំពេញ។
កញ្ញា ធួន ស្រីពៅ មានដើមកំណើតនៅស្រុកស្រីស្នំ ខេត្តសៀមរាប ជាយុវតីមានភាពរុះរាយរាក់ទាក់ ស្រឡាញ់យុត្តិធម៌សង្គម ហើយតែងតែចូលរួមគ្រប់សកម្មភាពការពារបរិស្ថាន។ កញ្ញា ធួន ស្រីពៅ បានឱ្យវិទ្យុអាស៊ីសេរីដឹងថា សំឡេងស្ដ្រីដើម្បីយុត្តិធម៌សង្គមមានតិចតូចណាស់ ស្របពេលដែលសង្គមសព្វថ្ងៃមិនសូវផ្ដល់តម្លៃដល់ស្ត្រី។ យុវតីរូបនេះបន្តថា បើសិនជាស្ត្រីភាគច្រើនផ្ដេកផ្ដួលទៅការលើកឡើងរបស់សង្គមប្រាកដណាស់ស្ត្រី នឹងស្ថិតនៅក្នុងក្រសែភ្នែករបស់សាធារណជនថាជា «មនុស្សទន់ខ្សោយ»។
កញ្ញា ធួន ស្រីពៅ បន្តថា ការងារដើម្បីផលប្រយោជន៍រួមមិនត្រូវមានការរើសអើងគ្នានោះទេ ខណៈដែលស្ត្រីក៏គួរតែចូលរួមឱ្យបានច្រើន ដើម្បីលើកកម្ពស់ភាពជាស្ត្រីរឹងមាំនៅក្នុងសង្គម។ យុវតីរូបនេះអំពាវនាវសុំឱ្យសាធារណជនទម្លាក់ការគិតអវិជ្ជមានដែលថា «ស្ត្រីបង្វិលចង្ក្រានមិនជុំ» ដោយផ្ទុយមកវិញ ស្រីជាមនុស្សរឹងមាំអាចធ្វើបានដូចបុរសដែរ ហើយស្ត្រីពិតជាចូលរួមចំណែក ដើម្បីអភិវឌ្ឍន៍ប្រទេសជាតិបាន។ «»
អ្នកខេត្តសៀមរាប រូបនេះបានបន្តថា បើទោះជាមានការគាំទ្រពីគ្រួសារ បងប្អូនឱ្យចូលរួមកិច្ចការងារបរិស្ថាន និងកិច្ចការងារសង្គមក៏ដោយ ប៉ុន្តែក៏មានការមិនគាំទ្រពីសំណាក់មិត្តភក្ដិ និងគ្រូបង្រៀនផងដែរ។ កញ្ញាបានលើកឡើងថា ការជិះកង់ដើម្បីការពារបរិស្ថានមិនអាចរំពឹងថាមានការគាំទ្រច្រើនពីសំណាកប្រជាពលរដ្ឋទាំងអស់នោះទេ ប៉ុន្តែកញ្ញា នៅតែពេញចិត្ត ហើយសង្ឃឹមថា ការខិតប្រឹងប្រែងមួយនេះ នឹងក្លាយជាគំរូភាពសម្រាប់អ្នកជំនាន់ក្រោយ។ «»
យុវតីរាងល្អិតរូបនេះ ជាកូនកសិករក្រីក្រម្នាក់ ដែលកំពុងសិក្សាថ្នាក់បរិញ្ញាបត្រនៅសាកលវិទ្យាល័យភូមិន្ទភ្នំពេញ ជំនាញអភិវឌ្ឍន៍ជនបទ ឆ្មាំទី២។ កញ្ញាបន្តថា ទោះជាមានជីវភាពខ្វះខាតក៏ដោយ ក៏កញ្ញានៅតែប្រឹងប្រែងបន្តសិក្សានៅរាជធានីភ្នំពេញដដែល។ កញ្ញាបានលើកឡើងថា ការបណ្ដុះឱ្យនិស្សិតយល់ដឹងពីបញ្ហាសង្គម និងការចូលដើម្បីបរិស្ថានគឺមិនមាននោះទេនៅសាលា ខណៈដែលនិស្សិតភាគច្រើនគិតតែពីរៀនមេរៀនដែលគ្រូបង្រៀនប៉ុណ្ណោះ ដែលបណ្ដាលឱ្យពួកគេមិនសូវមានគំនិតជាតិនិយមនោះទេ។ កញ្ញាបន្តថា ទោះជាមានការបារម្ភពីសុវត្ថិភាពផ្ទាល់ខ្លួនឯងខ្លះ ក៏ប៉ុន្តែ នៅបន្តធ្វើការងារដើម្បីយុត្តិធម៌សង្គម និងបរិស្ថាន។ «»
ចំណែកប្រធានផ្នែកស្រាវជ្រាវ និងតស៊ូមតិនៃសមាគមបណ្ដាញយុវជនកម្ពុជា លោក ហេង គីមហុង ដែលជាអ្នករៀបចំឱ្យមានយុទ្ធនាការជិះកង់៦០០គីឡូម៉ែត្រដើម្បីបរិស្ថាន ជុំវិញព្រៃឡង់ បានឱ្យប្រាប់វិទ្យុអាស៊ីសេរីថា ការចូលរួមរបស់ស្ត្រីនៅក្នុងយុទ្ធនាការនេះបានបង្ហាញពីគំរូភាពយ៉ាងល្អដល់ស្ត្រីដទៃ។ លោកបន្តថា ជាពិសេស យុវតី ធួន ស្រីពៅ មានការប្ដេជ្ញាចិត្តខ្ពស់ ទោះជាឆ្លងកាត់កម្ដៅថ្ងៃក្ដៅខ្លាំង និងមេឃភ្លើងជាហូរហែក៏ដោយ ក៏កញ្ញាមិនដែលគិតថា ចង់បោះបង់ការជិះកង់នោះទេ។ «»
លោកបន្តថា នៅក្នុងយុទ្ធនាការជិះកង់ដើម្បីបរិស្ថាន មិនមែនជារឿងដែលងាយស្រួលនោះទេ ប៉ុន្តែ កញ្ញាស្រីពៅ ក្នុងចំណោមស្ត្រី៦នាក់ផ្សេងទៀតនោះ បន្តជិះរហូតដល់ថ្ងៃបញ្ចប់កាលពីថ្ងៃទី២០ ខែឧសភា។ លោកបន្តថា នេះជាបេសកកម្មមួយរបស់ស្ត្រីនៅកម្ពុជាដើម្បីបរិស្ថាន។ លោកបន្ថែមថា ស្ត្រីជាកម្លាំងចលករសម្រាប់ការអភិវឌ្ឍន៍សង្គមជាតិ ដែលមិនអាចអត់បាន។ «»
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងបរិស្ថាន លោក នេត្រ ភក្ត្រា ដើម្បីសុំអត្ថាធិប្បាយជុំវិញការចូលរួមរបស់ស្ត្រីលើវិស័យបរិស្ថានបានទេ ដោយទូរសព្ទចូលតែគ្មានអ្នកទទួល នៅថ្ងៃទី២៤ខែឧសភានេះ ។ ចំណែក លោកស្រី ស ស៊ីណែត អគ្គនាយិការងនៃអគ្គនាយកដ្ឋានអភិវឌ្ឍន៍សង្គមរបស់ក្រសួងកិច្ចការនារី ក៏មិនអាចឆ្លើយបាន ដោយថា កំពុងជាប់រវល់។
របាយការណ៍ជាតិស្ដីពីលទ្ធផលចុងក្រោយជំរឿនទូទៅប្រជាជនកម្ពុជាឆ្នាំ២០១៩ បានបង្ហាញថា កម្ពុជាមានចំនួនប្រជាជនសរុបមាន ១៥.៥លាននាក់ ក្នុងនោះប្រុសចំនួនជាង៧.៥លាននាក់ និងស្រីចំនួន៧.៩លាននាក់។
សង្គមស៊ីវិលតែងតែលើកឡើងថា តួនាទីរបស់ស្ត្រីនៅតាមស្ថាប័នក្រសួងធំៗមិនសូវមាននោះទេ ខណៈដែលស្ត្រីចូលរួមលើកិច្ចការងារសិទ្ធិមនុស្សក៏កាន់តែតិច។
នាយិកា អង្គការក្លាហាន កញ្ញា បុណ្យ រចនា បានប្រាប់វិទ្យុអាស៊ីសេរីនៅថ្ងៃទី២៤ ខែឧសភានេះថា ការចូលរួមរបស់ស្ត្រីគួរតែទទួលបានការលើកទឹកចិត្តខ្ពស់លើវិស័យចលនាសង្គម ជាពិសេសលើការតស៊ូមតិ ខណៈដែលមានស្ត្រីតិចតូចណាស់បានចូលរួមលើវិស័យទាំងនោះ។ កញ្ញាបន្តថា ស្ត្រីចូលរួមលើកិច្ចការបរិស្ថានគឺជាគំរូភាពដល់អ្នកជំនាន់ក្រោយ ក្នុងការផ្លាស់ប្ដូរផ្នត់គំនិតសង្គមដែលតែងតែដាក់សម្ពាធលើស្ត្រីថា ជាមនុស្សទន់ខ្សោយ។ «»
កញ្ញា ធួន ស្រី បានលើកឡើងថា អត្រានៃការចូលរួមរបស់ស្ត្រីមិនមានច្រើននោះទេនៅក្នុងសង្គមបច្ចុប្បន្ន ដែលធ្វើឱ្យសំឡេងស្ត្រី និងយុត្តិធម៌សង្គមកាន់តែធ្លាក់ចុះ ចំណែកការរំលោភបំពានលើស្ត្រីក៏ចេះតែបន្តកើតមានជាហូរហែ។ កញ្ញាស្នើឱ្យស្ត្រីគួរតែបន្តចូលរួមឱ្យបានច្រើន តាមរយៈការបញ្ចេញមតិ និងការប្រើប្រាស់សិទ្ធិរបស់ខ្លួនឯងឱ្យបានពេញលេញ។ «»
របាយការណ៍របស់អង្គការ Freedom House បានចេញផ្សាយកាលពីឆ្នាំ២០២១ថា ចំណាត់ថ្នាក់សេរីភាពនៅកម្ពុជាបន្តធ្លាក់ចុះបន្តទៀតនៅឆ្នាំ២០២១ ដោយទទួលបានពិន្ទុតែ២៤ លើ១០០ ដែលមានន័យថា ជាប្រទេសគ្មានសេរីភាព។ ការធ្លាក់ចុះ១ពិន្ទុបន្ថែមទៀតនេះ ដោយសារតែសិទ្ធិនយោបាយនៅកម្ពុជាទទួលបានតែ៥ពិន្ទុលើ៤០ ខណៈសិទ្ធិស៊ីវិលទទួលបានតែ១៩ពិន្ទុ លើ៦០។ សង្គមស៊ីវិល បារម្ភបីស្ថានភាពនៃការរំលោភសិទ្ធិមនុស្ស ជាផ្នែកមួយធ្វើឱ្យការចូលរួមរបស់ស្ត្រីមានការធ្លាក់ចុះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។