សាធារណជនសម្ដែងក្ដីរីករាយដែលលោកនាយករដ្ឋមន្ត្រី ហ៊ុន សែន ថ្ងៃទី៧ ខែសីហានេះបានចេញបញ្ជាឱ្យរក្សាទុកដីព្រៃតំបន់ភ្នំតាម៉ៅដោយឱ្យក្រុមហ៊ុនបញ្ឈប់ការឈូសឆាយនិងដាំដើមឈើនៅតំបន់នោះឡើងវិញ។ បញ្ជារបស់លោកនាយករដ្ឋមន្ត្រីឱ្យបញ្ឈប់រាល់ការឈូសឆាយបំផ្លាញព្រៃអភិរក្សការពារដោយព្រះរាជក្រិត្យនៅតំបន់ភ្នំតាម៉ៅនេះធ្វើឡើងក្រោយពេលសាធារណជនទូទៅ រួមមាន អង្គការសង្គមស៊ីវិលនិងយុវជនស្រឡាញ់បរិស្ថានផងបានធ្វើយុទ្ធនាការនិងបញ្ចេញមតិយ៉ាងផុលផុស ប្រឆាំងនឹងការបំផ្លាញធនធានធម្មជាតិដ៏មានតម្លៃនៅទីនោះ។
ពលរដ្ឋរស់នៅភូមិកណ្ដឹង ឃុំកណ្ដឹង ក្បែរព្រៃតំបន់ភ្នំតាម៉ៅ លោកស្រី ភួង សុធី ប្រាប់វិទ្យុអាស៊ីសេរីថាប្រជាជនបាននាំគ្នាថែរក្សាព្រៃតំបន់ភ្នំតាម៉ៅជាង ២០ឆ្នាំមកហើយពោលគឺតាំងពីព្រៃមានកម្ពស់ត្រឹមក្បាលជង្គង់ហើយនៅពេលគេឈូសឆាយគេចំណាយពេលត្រឹមតែ ១សប្ដាហ៍ បានបំផ្លាញព្រៃឈើអស់រាប់រយហិកតារ។ យ៉ាងណាក៏ដោយ ទោះបីជាព្រៃត្រូវបានឈូសឆាយកម្ទេចបែបនេះហើយក្ដីក៏លោកស្រីថាលោកស្រីសប្បាយចិត្តពេលបានដំណឹងថារដ្ឋាភិបាលបញ្ឈប់ការឈូសឆាយហើយគ្រោងនឹងឱ្យដាំឈើឡើងវិញ៖ « ពេលខ្ញុំដឹងក្ដីមក ដើមឈើនៅតូចៗ ទេ។ ឥឡូវថែរក្សាវាបានដើមឈើធំៗ អស់ហើយហ្នឹង ឥឡូវបានថា គាត់អត់នេះអ៊ីចឹង វាអរ អរឡើងថា ចង់ស្រក់ទឹកភ្នែក »។
មុនពេលលោកនាយករដ្ឋមន្ត្រី ហ៊ុន សែន ចេញបញ្ជាឱ្យបញ្ឈប់ការឈូសឆាយដីព្រៃតំបន់ភ្នំតាម៉ៅនៅព្រឺកថ្ងៃទី៧ ខែសីហានេះ ក្រុមយុវជនខ្មែរថាវរៈនិងក្រុមយុវជនចលនាមាតាធម្មជាតិបានចេញធ្វើការតស៊ូមតិពីរកន្លែងផ្សេងគ្នា។ អ្នកនាង ឈឿន ដារ៉ាវី ប្រាប់វិទ្យុអាស៊ីសេរីថាក្រុមយុវជនខ្មែរថាវរៈ ៩នាក់ក្នុងនោះមានស្រី ៣នាក់បានទៅលត់ជង្គង់សំពះនៅមុខគ្រឿងចក្រឱ្យបញ្ឈប់ការឈូសឆាយព្រៃតំបន់ភ្នំតាម៉ៅតែគ្រឿងចក្រនៅតែបន្តឈូសឆាយហើយបន្ទាប់ពីដឹងថាលោកនាយករដ្ឋមន្ត្រីបញ្ជាឱ្យបញ្ឈប់ការឈូសឆាយទើបអ្នកបញ្ជាគ្រឿងចក្រទាំងនោះឈប់សកម្មភាព។ អ្នកនាង ឈឿន ដារាវី បន្ថែមថា នេះគឺជាគំរូភាពជោគជ័យបានមកពីការចូលរួមបញ្ចេញមតិរបស់មហាជនហើយសំណូមពរដល់សាធារណជនឱ្យបន្តភាពក្លាហានបញ្ចេញមតិដើម្បីដោះស្រាយបញ្ហាផ្សេងៗ ទៀត ដែលកំពុងកើតមានក្នុងសង្គមកម្ពុជា៖« អារម្មណ៍ម្នាក់ៗ ពេលហ្នឹង អរ គឺហោះសម្បើមហៃ ដល់ថ្នាក់លោតកញ្ឆេងពេញហ្នឹងភ្លាមៗ គឺរំភើបណាស់ ហើយជាមួយពលរដ្ឋ ដែលយើងបានជួបតាមផ្លូវ ក៏បានប្រាប់ថា ឥឡូវគេនឹងឈប់ឈូសហើយ គឺម្នាក់ៗ សប្បាយ ហើយមានសង្ឃឹមឡើងវិញភ្លាមទៅណា! អ៊ីចឹង អ្វីដែលពួកយើងធ្វើ គឺជោគជ័យ » ។
ចំណែកសកម្មជនបរិស្ថានចលនាមាតាធម្មជាតិបានធ្វើយុទ្ធនាការសង្គ្រោះភ្នំតាម៉ៅដោយជិះស៊ីក្លូពីក្រុងភ្នំពេញទៅសួនសត្វភ្នំតាម៉ៅ។ យុទ្ធនាការនេះមានយុវជនចូលរួមជាង ១០នាក់ហើយពួកគេបានប្រើពាក្យស្លោកថាអភិរក្សតំបន់ភ្នំតាម៉ៅឱ្យដូចអភិរក្សស៊ីក្លូ។
អ្នកគ្រប់គ្រងគម្រោងសង្គ្រោះនិងថែរក្សាសត្វព្រៃនៃអង្គការសម្ព័ន្ធសត្វព្រៃ លោក និច ម៉ាក់ (Nick Marx) ប្រាប់វិទ្យុអាស៊ីសេរីថាលោករីករាយដែលលោកនាយករដ្ឋមន្ត្រី ហ៊ុន សែន បញ្ជាឱ្យរក្សាព្រៃតំបន់ភ្នំតាម៉ៅហើយអរគុណដល់សាធារណជន ដែលបានជួយបញ្ចេញមតិនិងធ្វើយុទ្ធនាការសង្គ្រោះព្រៃភ្នំតាម៉ៅនៅលើហ្វេសប៊ុក (Facebook) រហូតមកដល់ពេលនេះ។ ជាមួយគ្នានេះ លោកបន្ថែមថាអង្គការសម្ព័ន្ធសត្វព្រៃកំពុងត្រៀមពិភាក្សាជាមួយក្រុមហ៊ុន ឡេង ណាវ៉ាត្រាដើម្បីដាំដើមឈើឡើងវិញ នៅកន្លែងដែលបានឈូសឆាយហើយលោកក៏ស្វាគមន៍អង្គការនានា សហការជាមួយអង្គការលោក ដើម្បីដាំឈើដែរ៖ « ខ្ញុំយំ សប្បាយឡើងយំ ខ្ញុំអរគុណប្រជាជនទាំងអស់ ជួយអើជួយចង់ការពារព្រៃ។ ខ្ញុំអរគុណអ្នកកាសែត និងមួយទៀត ខ្ញុំអរគុណ ឡេង ណាវ៉ាត្រា និងសម្ដេច ហ៊ុន សែន » ។
ហ្វេសប៊ុកផេក លោកនាយករដ្ឋមន្ត្រីលោក ហ៊ុន សែន នៅថ្ងៃទី៧ ខែសីហា បានបង្ហោះសារថាដោយមានសំណូមពរជាច្រើនមករដ្ឋាភិបាលនិងក្នុងនាមលោកជាអ្នកមានទំនួលខុសត្រូវខ្ពស់បំផុតនៃរាជរដ្ឋាភិបាលលោកចេញបញ្ជាឱ្យរក្សាព្រៃក្បែសួនសត្វភ្នំតាម៉ៅនិងបញ្ឈប់ការឈូសឆាយដីព្រៃហើយដាំព្រៃឈើឡើងវិញ នៅកន្លែងដែលបានឈូសឆាយ។ភ្លាមៗ បន្ទាប់ពីលោកនាយករដ្ឋមន្ត្រីបានបង្ហោះបញ្ជានេះពលរដ្ឋបានបញ្ចេញសារសាទរនិងអរគុណដល់លោក ហ៊ុន សែន។ ជាមួយគ្នានេះ ពលរដ្ឋក៏បានសំណូមពរដល់រដ្ឋាភិបាលបញ្ឈប់ក្រុមហ៊ុនផ្សេងៗ ដែលកំពុងបំផ្លាញព្រៃឈើនៅតំបន់ផ្សេងទៀតដែរ។ ក្នុងនោះម្ចាស់គណនីហ្វេសបុកលោក ហេង គីមហុង បានខំមិន (comment) ថា «ខ្ញុំសូមអរគុណណាស់សម្តេចតែខ្ញុំសូមឱ្យសម្តេចពិនិត្យមើលនៅព្រៃមេត្តាធម្មជាតិមួយទៀតនៅខេត្តកំពង់ស្ពឺនៅក្នុងស្រុកឱរ៉ាល់»។
ក្រុមហ៊ុន ឡេង ណាវ៉ាត្រា បានចាប់ផ្ដើមឈូសឆាយដីព្រៃតំបន់ភ្នំតាម៉ៅ កាលពីថ្ងៃទី១ ខែសីហា ហើយក្រុមហ៊ុនបានសម្រុកឈូសឆាយទាំងយប់ទាំងថ្ងៃដោយគិតមកដល់ថ្ងៃនេះក្រុមហ៊ុនបានឈូសឆាយដីព្រៃអស់ជិត ៤០០ហិកតារ។ សាធារណៈជនបានថ្កោលទោសចំពោះការផ្ដល់សិទ្ធិដល់ក្រុមហ៊ុនឯកជនវិនិយោគឈូសឆាយដីព្រៃតំបន់ភ្នំតាម៉ៅដែលមានទំហំជាង ២ពាន់ហិកតាព្រោះព្រៃនៅតំបន់នេះជាជម្រកសត្វព្រៃនិងបក្សីជិតផុតពូជហើយវាក៏ផ្ដល់អនុផលព្រៃឈើដល់ប្រជាពលរដ្ឋរស់នៅតំបន់ក្បែរនោះដែរ។ ជាពិសេស ព្រៃតំបន់ភ្នំតាម៉ៅជាព្រៃអភិរក្សការពារដោយព្រះរាជក្រឹត្យទៀតផង។
អង្គការសង្គមស៊ីវិលកន្លងមកតែងតែរិះគន់រដ្ឋាភិបាលថាមិនបានសិក្សាស្រាវជ្រាវឱ្យបានត្រឹមត្រូវមុនផ្ដល់ដីសម្បទានដល់ក្រុមហ៊ុនវិនិយោគនោះទេហើយប្រការនេះតែងតែនាំឱ្យអ្នកបរិស្ថាននិងប្រជាពលរដ្ឋដែលរស់នៅកន្លែងអភិវឌ្ឍត្រូវរងគ្រោះ។ ជាមួយគ្នានេះ ការផ្ដល់ដីព្រៃតំបន់ឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ ដែលជាទ្រព្យសម្បត្តិសាធារណៈរបស់រដ្ឋក៏មិនបានអនុវត្តឱ្យបានត្រឹមត្រូវតាមច្បាប់ផងដែរ ព្រោះកន្លងមក ក្រុមហ៊ុនបានចូលឈូសឆាយដីព្រៃតំបន់ភ្នំតាម៉ៅដោយសំអាងលើអនុក្រឹត្យអន្ដរកាលចេញពីទីស្ដីការគណៈរដ្ឋមន្ត្រីដែលចុះហត្ថលេខាដោយលោកនាយករដ្ឋមន្រ្តី ហ៊ុន សែន តែប៉ុណ្ណោះ។ តាមច្បាប់ភូមិបាល រដ្ឋសភាត្រូវបង្កើតឱ្យមានច្បាប់អនុបយោគជាមុនសិនហើយប្រើច្បាប់អនុបយោគនេះដើម្បីផ្ទេរទ្រព្យសម្បត្តិសាធារណៈរបស់រដ្ឋទៅជាទ្រព្យសម្បត្តិឯកជនរបស់រដ្ឋមុននឹងផ្ដល់ឱ្យក្រុមហ៊ុនឯកជនវិនិយោគ។ អ្នកច្បាប់ថា ការប្រើប្រាស់អនុក្រឹត្យអន្តរកាលជំនួសឱ្យច្បាប់អនុបយោគដែលរដ្ឋសភាខកខានមិនបានអនុម័តរាប់សិបឆ្នាំកន្លងមកនេះ គឺមិនត្រឹមត្រូវតាមច្បាប់ឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។