សំឡេងកិនថ្មភ្នំ ចេញពីការដ្ឋានកិនថ្មក្នុងតំបន់បាភ្នំខេត្តព្រៃវែង នៅតែបង្កការរំខានប៉ះពាល់ដល់ការសិក្សារបស់សិស្សានុសិស្សរាប់រយនាក់ក្នុងតំបន់នោះ។ ពលរដ្ឋ និងមន្ត្រីសង្គមស៊ីវិលបារម្ភថា បញ្ហានេះងាយនឹងធ្វើឱ្យកុមារបោះបង់ការសិក្សា។
ពលរដ្ឋនិងមន្ត្រីសង្គមស៊ីវិលអំពាវនាវឱ្យរដ្ឋាភិបាលសិក្សាឡើងវិញ ពីអាជីវកម្មកាយកម្ទេចភ្នំក្នុងតំបន់បាភ្នំ ខេត្តព្រៃវែង មានសំឡេងលាន់ឮខ្លាំងៗ រំខានដល់ការសិក្សា របស់សិស្សានុសិស្ស ដែលកំពុងរៀននៅសាលាបឋមសិក្សាសុបិន្តស្វាយសាមសិប ឋិតក្នុងភូមិស្វាយសាមសិប ឃុំជើងភ្នំ។ មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ប្រចាំខេត្តព្រៃវែង លោក អ៊ាង គឹមលី ប្រាប់វិទ្យុអាស៊ីសេរីនៅថ្ងៃទី២៧ វិច្ឆិកា ថាក្រសួងអប់រំនិងអាជ្ញាធរខេត្តព្រៃវែងគួរតែរកមធ្យោបាយដោះស្រាយបញ្ហានេះព្រោះសំឡេងឮខ្លាំងៗចេញពីការដ្ឋានកិនថ្មនៅកៀកនឹងសាលារៀនធ្វើឱ្យសិស្សានុសិស្សពិបាកនឹងផ្ដោតអារម្មណ៍រៀន។
អ្នកស្រីបារម្ភថាបញ្ហានេះប្រសិនបើអាជ្ញាធរមិនដោះស្រាយទេវានឹងប៉ះពាល់ដល់អនាគតកុមារ។
អ្នកស្រី អ៊ាង គឹមលី៖«ច្រកដែលការពារព្រៃឈើបានបើរាជរដ្ឋាភិបាលនៅតែបណ្ដែតបណ្ដោយឱ្យមន្ត្រីថ្នាក់ក្រោមធ្វើតែម្នាក់ឯង នោះព្រៃឈើមិនអាចគង់វង្សបានទេ។ ទាល់តែមានប្រជាពលរដ្ឋកៀកស្មាកាន់ដៃគ្នាដើរ។ តែប៉ុណ្ណេះក៏សង្ឃឹមថាព្រៃឈើយើងអាចសល់ខ្លះដែរ។ ច្បាប់មានហើយ ប៉ុន្តែអ្នកអនុវត្តច្បាប់មិនត្រឹមត្រូវ ព្រោះគេនៅតែពាក់វ៉ែនតាខ្មៅលូកដៃក្រុមតុទទួលអំណោយច្រើនដែរ»។
កន្លងទៅព្រះសង្ឃ និងពលរដ្ឋបានធ្វើដំណើរដល់ទីតាំង អាជីវកម្មកាយកម្ទេចភ្នំ និងការដ្ឋានកិនថ្មរបស់ក្រុមហ៊ុនចិនមួយកន្លែងឋិតនៅកៀកនឹងសាលាបឋមសិក្សាសុបិន្ដស្វាយ៣០។ ពលរដ្ឋថាកន្លងទៅលោកគ្រូអ្នកគ្រូបានសរសេរលិខិតស្នើឱ្យអាជ្ញាធរមូលដ្ឋានដោះស្រាយទុក្ខកង្វល់រួមរបស់ពលរដ្ឋ ជាពិសេសសិស្សានុសិស្សរៀនមិនចូលដោយសារតែការរំខានដោយសំឡេងនិងហុយធូលី ដី។
អ្នកភូមិថាស្ទើរជារៀងរាល់ថ្ងៃឱ្យតែដល់ម៉ោងរៀនគេឃើញលោកគ្រូអ្នកគ្រូបិទទ្វារនិងបង្អួចសាលាដើម្បីកាត់បន្ថយសំឡេងរំខាននិងការហុយកម្ទេចថ្មប៉ះពាល់ដល់កុមារដែលកំពុងរៀន។
ព្រះសង្ឃគង់នៅវត្តមួយក្នុងខេត្តព្រៃវែង គឺព្រះតេជព្រះគុណ ផន ភាន់ មានថេរដីកាថាផលប៉ះពាល់នេះបានកើតមានឡើងជាច្រើនឆ្នាំមកហើយនៅមិនទាន់ឃើញអាជ្ញាធរដោះស្រាយនៅឡើយទេ។ ព្រះអង្គបន្ថែមថាអាជ្ញាធរហាក់មើលរំលងផលប៉ះពាល់នេះហើយចាត់ទុកថាបញ្ហានេះជារឿងតូចតាចធ្វើឱ្យអ្នកភូមិមិនសប្បាយចិត្តដោយសារកូនចៅរបស់ពួកគាត់រៀនមិនចូល។
ព្រះតេជព្រះគុណ ផន ភាន់៖«និយាយឱ្យខ្លីទៅកន្លែងណាដែលបំផ្លាញព្រៃឈើគេរារាំងហើយ គេមិនឱ្យយើងទៅទេ ព្រោះវាជាឆ្នាំងបាយលាភសក្ការៈរបស់គេ។ ដូចរូបខ្ញុំអ៊ីចឹងចុះទៅម្ដងម្កាលសោះបរិស្ថានតាមយាមរារាំងដែរហ្នឹង។ ប៉ុន្តែខ្ញុំមិនខ្លាចទេ ព្រោះខ្ញុំទៅការពារព្រៃមិនមែនទៅកាប់ឆ្ការព្រៃទេ»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះពីអ្នកនាំពាក្យក្រសួងអប់រំ អ្នកស្រី ឃួន វិច្ឆិកា បាននៅឡើយទេនៅថ្ងៃទី ២៧ វិច្ឆិកា ដោយទូរស័ព្ទហៅចូលតែគ្មានអ្នកលើក។
ក៏ប៉ុន្តែមេឃុំជើងភ្នំ លោក ឈុន ពុធគុណ មានប្រសាសន៍ថា លោកមិនទាន់ទទួលព័ត៌មាន ឬក៏ពាក្យបណ្តឹងពីលោកគ្រូ/អ្នកគ្រូ ជុំវិញរឿងនេះទេ។ តែយ៉ាងណាលោកថា លោកនឹងប្រជុំសមាជិកក្រុមប្រឹក្សាឃុំ ដើម្បីចាត់ឱ្យអាជ្ញាធរភូមិចុះទៅពិនិត្យករណីនេះឡើងវិញ។
ជុំវិញរឿងនេះប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី យល់ថាបញ្ហានេះគឺជាការទទួលខុសត្រូវរបស់អាជ្ញាធរមូលដ្ឋានដែលត្រូវយកចិត្តទុកដាក់ដោះស្រាយធ្វើយ៉ាងណាឱ្យសិស្សានុសិស្សទទួលបានបរិយាកាសសិក្សាល្អឡើងវិញ។
អ្នកស្រី អ៊ុក ឆាយ៉ាវី៖«ក្នុងវិស័យអប់រំប្រសិនបើមានការរំខានបែបនឹង ធ្វើឱ្យសិស្សានុសិស្សនៅសាលាមិនអាចទទួលបានការអប់រំបានប្រសើរល្អនោះទេ ដែលជាផ្នែកមួយធ្វើឱ្យការសិក្សារបស់ពួកគាត់អត់មានគុណភាពដែរ»។
ពលរដ្ឋបន្ថែមថា សំឡេងចេញពីការដ្ឋានកិនថ្ម ប៉ះពាល់ដល់ការសិក្សារបស់កុមារ បានកើតមានឡើងជាច្រើនឆ្នាំមកហើយ ដែលអ្នកភូមិ និងលោកគ្រូអ្នកគ្រូ តែងតែទទូចឱ្យអាជ្ញាធរមូលដ្ឋាន រកមធ្យោបាយដោះស្រាយ ក៏ប៉ុន្តែគ្មានដំណោះស្រាយនៅឡើយទេ។ រីឯអាជ្ញាធរតែងគេចវេះ មិនទទួលខុសត្រូវក្នុងការដោះស្រាយបញ្ហានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។