ក្រុមហ៊ុនដែលទទួលបានសិទ្ធិវិនិយោគលើដីតំបន់ឧទ្យានសួនសត្វភ្នំតាម៉ៅ និងមជ្ឈមណ្ឌលសង្គ្រោះសត្វព្រៃបានចាប់ផ្ដើមកាប់ដើមឈើធំៗក្នុងព្រៃតំបន់នេះ។ សកម្មជនបរិស្ថាន និងមន្ត្រីសង្គមស៊ីវិល ព្រួយបារម្ភការប៉ះពាល់ដល់សត្វព្រៃដែលធ្លាប់បានជួយសង្គ្រោះ និងអភិរក្សនៅក្នុងព្រៃនេះ និងស្នើដល់រដ្ឋាភិបាលរក្សាព្រៃតំបន់ភ្នំតាម៉ៅកុំឱ្យបាត់បង់។
ក្រុមហ៊ុនឡេងណាវ៉ាត្រា ដែលទទួលបានសិទ្ធិវិនិយោគពីក្រុមហ៊ុន ហ្វ្រេស មីល ឯ.ក នៅព្រៃមជ្ឈមណ្ឌលអភិរក្ស និងសង្គ្រោះសត្វព្រៃភ្នំតាម៉ៅ បានចាប់ផ្ដើមកាប់ព្រៃក្នុងតំបន់នេះ កាលពីថ្ងៃទី២៨ កក្កដា។
អ្នកគ្រប់គ្រងគម្រោងសង្គ្រោះ និងថែរក្សាសត្វព្រៃនៃអង្គការសម្ព័ន្ធសត្វព្រៃ លោក និច ម៉ាក់ (Nick Marx) ប្រាប់អាស៊ីសេរីឱ្យដឹងថា លោកតក់ស្លុតជាខ្លាំងនៅពេលទទួលបានដំណឹងពីការកាប់ព្រៃតំបន់ភ្នំតាម៉ៅ ព្រោះកាលពីឆ្នាំ២០០៩ អង្គការសម្ព័ន្ធសត្វព្រៃ បានចុះកិច្ចសន្យា (MOU) សហការជាមួយគ្នា ដើម្បីការពារព្រៃតំបន់ភ្នំតាម៉ៅដែលមានទំហំ ២,៣០០ហិកតារ តែនៅពេលគេកាប់ព្រៃ បែរជាមិនជូនដំណឹងដល់លោក។ លោកបន្ថែមថា លោកព្រួយបារម្ភជាខ្លាំង ដល់ជីវិតសត្វព្រៃដែលកំពុងរស់នៅក្នុងតំបន់នេះ ដោយក្នុងនោះក៏មានសត្វព្រៃកម្រជិតផុតពូជ ដូចជាសត្វប្រើស រមាំង ឈ្លូស ដែលអង្គការសម្ព័ន្ធសត្វព្រៃបានជួយសង្គ្រោះ និងដោះលែងនៅទីនោះ។ ជាមួយគ្នានេះ លោកយល់ថា រដ្ឋាភិបាលគួរអភិវឌ្ឍព្រៃតំបន់ភ្នំតាម៉ៅទៅជាតំបន់អេកូទេសចរណ៍វិញប្រសើរជាង បំផ្លាញព្រៃឈើទាំងនេះ៖ «កាប់ព្រៃឥឡូវ ខ្ញុំគិតថាគេបំផ្លាញ យ៉ាប់ហ្មងយ៉ាប់ គេអត់ខ្វល់ រដ្ឋនៅស្រុកខ្មែរអត់ខ្វល់បរិស្ថាន អត់ខ្វល់ព្រៃ ខ្វល់តែលុយ»។
ជុំវិញរឿងនេះ សកម្មជនចលនាមាតាធម្មជាតិ កញ្ញា ភួន កែវរស្មី ហួសចិត្ត មិននឹកស្មានថា ឧកញ៉ាដែលមានជំនួញច្រើនមុខ មានទ្រព្យសម្បត្តិស្ដុកស្ដម្ភ តែបែរជាមកបំផ្លាញ និងដណ្ដើមយកជម្រកសត្វព្រៃទៅវិញ។ បើទោះបីជាក្រុមហ៊ុនចាប់ផ្ដើមកាប់ព្រៃឈើ ហើយមានគម្រោងឈូសឆាយដីត្រឹមតែ៥០០ហិកតារក្ដី កញ្ញាយល់ឃើញថា វានឹងប៉ះពាល់ដល់ការស់នៅរបស់សត្វដែលកំពុងរស់នៅក្នុងព្រៃក្រៅរបងសួនសត្វភ្នំតាម៉ៅយ៉ាងខ្លាំងដែរ ព្រោះព្រៃក្រៅរបងសួនសត្វភ្នំតាម៉ៅមានត្រឹមតែ១,៩០០ហិកតារប៉ុណ្ណោះ៖ «អាជីវកម្មរបស់គាត់ហ្អាស មានទាំងកសិផលផង ដីឡូតិ៍ ផ្ទះល្វែង មានទាំងផលិតកម្មចម្រៀងផង ខ្ញុំថាមុខរបរជាច្រើនដែលគាត់កំពុងតែក្ដោបក្ដាប់ទៅហើយ ហៃខ្ញុំមិននឹកស្មានថា ខ្វះដីអភិវឌ្ឍរហូតទៅដល់ទៅដណ្ដើមផ្ទះ សត្វដែលគ្នាកំពុងតែនៅសុខៗ ហើយហាក់ដូចជាមិនដែលបង្កការរំខានមកដល់មនុស្ស ហើយក៏ជាកន្លែងដែលសម្រាប់ឱ្យប្រជាពលរដ្ឋទៅលំហែកម្សាន្តទស្សនាសត្វ»។
វិទ្យុអាស៊ីសេរីមិនអាចទាក់ទងអភិបាលខេត្តតាកែវ លោក អ៊ូច ភា ដើម្បីសុំអត្ថាធិប្បាយអំពីការកាប់ព្រៃឈើនៅតំបន់ភ្នំតាម៉ៅបានទេ នៅថ្ងៃទី៣០ កក្កដា ដោយទូរស័ព្ទចូលតែពុំមានអ្នកទទួល។
កាលពីថ្ងៃទី១៤ មករា កន្លងទៅ ទីស្ដីការគណៈរដ្ឋមន្ត្រី លោក ខូយ ឃុនហ៊ួរ បានចុះហត្ថលេខា ស្នើសុំដោះដូរដីស្ថានីយចិញ្ចឹមគោពូជភ្នំតាម៉ៅទំហំ ៣០០ហិកតារ និងដីស្ថិតនៅទីតាំងឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ ៥០០ហិកតារ ដើម្បីវិនិយោគឱ្យក្រុមហ៊ុន ខ្មែរ ហ្វ្រេស មីល ឯ.ក និងអនុញ្ញាតផ្ទេរកម្មសិទ្ធិឱ្យក្រុមហ៊ុន និងដៃគូសហការមុនធ្វើការអភិវឌ្ឍ ដោយផ្អែកតាមចំណាររបស់លោកនាយករដ្ឋមន្ត្រី ហ៊ុន សែន។
ឧទ្យានជាតិសួនសត្វភ្នំតាម៉ៅ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ មានផ្ទៃដី ២ ពាន់ ៣រយ ហិកតារ (២.៣០០) ត្រូវបានចុះបញ្ជីជាតំបន់អភិរក្សពីក្រសួងកសិកម្ម កាលពីឆ្នាំ១៩៩៥ ឋិតក្នុងស្រុកបាទី ខេត្តតាកែវ។ តំបន់អភិរក្សនេះ មានសត្វព្រៃកម្រជាច្រើនប្រភេទកំពុងរស់នៅ និងបង្កកំណើត រួមមាន ខ្លាឃ្មុំច្រើនជាងគេលើពិភពលោក ដោយមានកម្មវិធីបង្កាត់កូនក្រពើភ្នំ ឱ្យរស់នៅក្នុងព្រៃ នៅតំបន់នោះ ដែលជាសត្វកម្រជិតផុតពូជ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។