យុវតីស្រឡាញ់បរិស្ថានមិនបោះបង់ឆន្ទៈការពារធនធានធម្មជាតិទេ បើទោះត្រូវក្រសួងបរិស្ថានចោទថា សកម្មភាពរបស់ពួកគេថា អាចខុសច្បាប់យ៉ាងណាក្ដី។ ក្រុមយុវតីអះអាងបែបនេះឆ្លើយតបនឹងក្រសួងបរិស្ថាន ដែលចាត់ទុកការទាមទារឱ្យក្រសួងសាមីមួយនេះការពារ និងរក្សាទុកតំបន់មានសក្ដានុពលធនធានធម្មជាតិជាឧទ្យានជាតិថា ជាសកម្មភាពផ្ទុយពីច្បាប់។
ក្រុមយុវតីស្នើឱ្យក្រសួងបរិស្ថានយកចិត្តទុកដាក់ការពារធនធានធម្មជាតិឱ្យគង់វង្សសម្រាប់ក្មេងជំនាន់ក្រោយ និងបើកឱកាសឱ្យយុវជនមានសិទ្ធិពេញលេញចូលរួមការពារធនធានធម្មជាតិជាជាងរារាំង និងគំរាមកំហែងក្រុមយុវជន។
យុវតីស្រឡាញ់បរិស្ថាន កញ្ញា មាន លីសា ប្រាប់វិទ្យុអាស៊ីសេរីថា ក្រសួងបរិស្ថានគួរយកពេល និងធនធានទៅចំណាយដើម្បីដោះស្រាយបញ្ហាការបំផ្លិចបំផ្លាញធនធានធម្មជាតិ និងឈប់លាបពណ៌ក្រុមយុវជនស្រឡាញ់បរិស្ថានតទៅទៀត។ កញ្ញាថាប្រតិកម្មតបនឹងក្រុមយុវជនរបស់ក្រសួងបរិស្ថានបង្ហាញថាក្រសួងរើសអើងក្រុមយុវជន បើប្រៀបធៀបនឹងក្រុមយុវជន ដែលដឹកនាំដោយកូនៗរបស់លោកនាយករដ្ឋមន្ត្រី។ កញ្ញាថា ចាំបាច់ណាស់ ដែលក្រសួងត្រូវគោរពសិទ្ធិយុវជន ដែលជាពលរដ្ឋជំនាន់ក្រោយក្នុងផ្នែកការពារធនធានធម្មជាតិ ដែលជាភោគទ្រព្យរួមរបស់ជាតិ ដែលមានចែងក្នុងរដ្ឋធម្មនុញ្ញ។
កញ្ញា មាន លីសា៖ «ចំពោះយុវជន ដែលចូលរួមជាមួយរដ្ឋាភិបាលក្ដី តាមរយៈលោក ហ៊ុន ម៉ាណែត តាមរយៈយុវជន ស.ស.យ.ក ក្ដី ដែលចូលរួមកិច្ចការសង្គមដូចជា ស៊ីហ្គេម ឬក៏មហាសង្ក្រាន្តអីផ្សេងៗ គឺការចូលរួមហ្នឹងចូលរួមដូចគ្នា ហើយត្រឡប់មកវិញក៏យើងជាយុវជនចូលកិច្ចការសង្គមដូចគ្នា គ្រាន់តែយើងលើកឡើងនូវរឿង ដែលជាអំពើពុករលួយនៅក្នុងធនធានធម្មជាតិបរិស្ថានទាំងអស់ហ្នឹង បែរជាមកបន្ទច់បង្អាក់យើង បែរជាមិនប្រតិបត្តិចំពោះយើង ដូចដែលប្រតិបត្តិចំពោះយុវជន ដែលនៅខាង ស.ស.យ.ក ឬដែលចុះចូលជាមួយរដ្ឋាភិបាលវិញ។ អីចឹងយើងមើលឃើញថាវាគឺជាការមិនស្មើភាពគ្នាចំពោះមុខច្បាប់ទេ»។
ក្រសួងបរិស្ថានកាលពីថ្ងៃទី២៤ ខែឧសភា បានចេញសេចក្ដីប្រកាសព័ត៌មាន ដោយចោទប្រកាន់ក្រុមយុវជន ដែលភាគច្រើនជាយុវតី ដែលចេញមុខដាក់ញត្តិទៅក្រសួងនេះថា ជាបណ្ដាញអង្គការចាត់តាំងខុសច្បាប់ប្រើឈ្មោះ «មាតាធម្មជាតិ» ដឹកនាំដោយលោក អាឡិចហាន់ដ្រូ ហ្គាន់សាឡេស ដេវិតសុន (Alejandro Gonzalez Davidson) ដែលក្រសួងនេះចាត់ទុកថាពុំមានលក្ខណៈសម្បត្តិជាអង្គការមិនមែនរដ្ឋាភិបាល។ សេចក្ដីប្រកាសព័ត៌មានដដែលចោទប្រកាន់ថា រាល់សកម្មភាពរបស់ក្រុមអង្គការនេះផ្ទុយពីច្បាប់ និងប្រាសចាកឧត្តមប្រយោជន៍ជាតិ។ លើសពីនេះក្រសួងបរិស្ថានព្រមានថា អ្នកចូលរួមធ្វើសកម្មភាពជាមួយក្រុមនេះត្រូវទទួលខុសត្រូវចំពោះមុខច្បាប់។
សេចក្ដីប្រកាសព័ត៌មានរបស់ក្រសួងបរិស្ថាននេះធ្វើឡើងបន្ទាប់ពីក្រុមយុវជន រួមនឹងយុវជនចលនាមាតាធម្មជាតិ នាំគ្នាចេញមុខទាមទារទៅក្រសួងបរិស្ថានជាញឹកញាប់ ទាំងតាមរយៈប្រព័ន្ធផ្សព្វផ្សាយ និងដាក់ញត្តិទៅក្រសួងបរិស្ថានឱ្យការពារធនធានធម្មជាតិ បញ្ឈប់កាត់ឆ្វៀលដីតំបន់ឧទ្យានជាតិទៅឱ្យក្រុមហ៊ុនឯកជន ដូចជាឧទ្យានជាតិព្រះសុរាម្រិតកុសុមៈគិរីរម្យ ដកហូតកោះកុងក្រៅមកជាសម្បត្តិរដ្ឋ និងរក្សាទុកជាឧទ្យានជាតិសមុទ្រជាដើម។
ចុងក្រោយនេះក្រុមយុវជនមកពីអង្គការស្ថាប័នមួយចំនួននាំគ្នាជិះកង់ លើកកម្ពស់យល់ដឹងជាសាធារណៈទាក់ទងកិច្ចការពារធនធានធម្មជាតិតំបន់ឧទ្យានជាតិ និងដាក់ញត្តិទៅក្រសួងបរិស្ថានដែរ នៅមុនទិវាបរិស្ថានពិភពលោក ថ្ងៃទី៤ ខែមិថុនា។
យុវតីម្នាក់ទៀត កញ្ញា ធួន ស្រីពៅ ថ្លែងថា ក្រុមយុវជនមាតាធម្មជាតិបានយល់ដឹងច្បាស់ថា ចូលរួមការពារធនធានធម្មជាតិជាសិទ្ធិសេរីភាពរបស់ពលរដ្ឋ ដែលមិនមែនជារឿងខុសច្បាប់ទេ។ កញ្ញា ស្រីពៅ ថា ការគំរាមកំហែងទាំងឡាយរបស់អាជ្ញាធរមិនមានឥទ្ធិពលបន្ទច់បង្អាក់ឆន្ទៈយុវតីដូចកញ្ញាឱ្យបោះបង់ការងារតស៊ូមតិដ៏ត្រឹមត្រូវនេះឡើយ។ កញ្ញាមានចម្ងល់ថាតើក្រសួងបរិស្ថានបំពេញការងាររាល់ថ្ងៃ ដើម្បីពលរដ្ឋ ឬដើម្បីបុគ្គលមានលុយ មានអំណាច។
កញ្ញា ធួន ស្រីពៅ៖ «ខ្ញុំគិតថា ក្រសួងគឺជាអ្នកបម្រើប្រជាពលរដ្ឋ ខ្ញុំគិតថាក្រសួងនឹងមិនបម្រើបុគ្គលមានអំណាចណាម្នាក់ទេ។ អញ្ចឹងក្នុងពេលដែលពួកគាត់ដោះស្រាយបញ្ហាហ្នឹងខ្ញុំគិតថា ល្អជាជាងដែលគាត់ប្រកាសព័ត៌មានចោទប្រកាន់លាបពណ៌មកលើពួកយើងដូចរាល់ដង។ អាចថា មិនមែនជាការគំរាមកំហែងលើកទី១ ឬលើកទី២ទេ។ និយាយទៅឱ្យតែសកម្មភាពរបស់ពួកយើងទៅ ពួកយើងតែងតែរងការគំរាមកំហែង។ សម្រាប់ខ្ញុំវាមិនមែនជារឿងមួយ ជាពាក្យមួយ ដែលអាចមកបង្អាក់សកម្មភាពរបស់យើងបាន។ ព្រោះវាគ្រាន់តែជាការចោទប្រកាន់រំលោភលើសេរីភាពរបស់ពួកយើង។ ពួកយើងមានសេរីភាពពេញលេញនៅក្នុងរដ្ឋធម្មនុញ្ញ»។
ច្បាប់រដ្ឋធម្មនុញ្ញជំពូក៣ មាត្រា ៣១ ចែងថាប្រជាពលរដ្ឋខ្មែរមានសិទ្ធិស្មើភាពគ្នាចំពោះមុខច្បាប់ មានសិទ្ធិសេរីភាព និងករណីយកិច្ចដូចគ្នាទាំងអស់ ដោយឥតមានប្រកាន់ពូជសាសន៍ ពណ៌សម្បុរ ភេទភាសា ជំនឿសាសនា និងនិន្នាការនយោបាយ ដើមកំណើត ឋានៈសង្គម ឬស្ថានភាពឯទៀតឡើយ។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងបរិស្ថាន លោក នេត្រ ភក្ត្រា ដើម្បីសុំការឆ្លើយតបបន្ថែមអំពីរឿងនេះបានទេ នៅថ្ងៃទី៣១ ខែឧសភា។
យុវតីម្នាក់ទៀត កញ្ញា រាម ស្រីពេជ្ររតនា បញ្ជាក់ថា កញ្ញានឹងបន្តចូលរួមការងារការពារមិនឱ្យមានការបំផ្លិចបំផ្លាញបរិស្ថាន ធនធានធម្មជាតិតទៅទៀត ហើយក្រុមកញ្ញា នៅតែចង់បង្ហាញទៅពលរដ្ឋនិងក្រសួងបរិស្ថានថា សកម្មភាពទាំងនេះជាកាតព្វកិច្ចក្នុងនាមកញ្ញាជាពលរដ្ឋ។
កញ្ញា រាម ស្រីពេជ្ររតនា៖ «ពួកយើងសោកស្ដាយមួយត្រង់ថា ពួកយើងជាយុវជនជាឈាមខ្មែរ ជាពលរដ្ឋ ជាជនសាមញ្ញទេ មិនមែនមកពីអង្គការមួយណាចាត់តាំងឱ្យខ្ញុំទៅដង្ហែ ដើម្បីបានលុយពីបរទេស ដូចក្រសួងបរិស្ថានចេញនៅក្នុងសេចក្ដីថ្លែងការណ៍ ក៏មិនបានទទួលលុយពីអង្គការណាដែរ គឺយើងធ្វើដោយទឹកចិត្តមួយស្រឡាញ់ ហើយចង់ការពារទុកជាមុន ដោយសារយើងមានបទពិសោធន៍មួយកាលពីភ្នំតាម៉ៅ ពួកយើងមានភាពយឺតយ៉ាវ ធ្វើឱ្យសោកស្ដាយបាត់បង់ព្រៃច្រើន»។
ទាក់ទងនឹងការចោទប្រកាន់ក្រុមយុវជន ដែលចូលរួមការពារធនធានធម្មជាតិ ដោយស្ម័គ្រចិត្តនេះ ប្រធានសម្ព័ន្ធនិស្សិតបញ្ញវន្តខ្មែរ លោក កើត សារ៉ាយ ស្នើថា អាជ្ញាធរពិសេសក្រសួងបរិស្ថានគួរឈប់លាបពណ៌ក្រុមយុវជន អនុវត្តច្បាប់ឱ្យស្មើភាពគ្នាមិនមែនឱ្យតម្លៃតែលើសម្ដីអ្នកមាន លុយមានអំណាច ដើម្បីបញ្ចៀសគំនុំសង្គម។
លោក កើត សារ៉ាយ៖ «នៅពេលដែលពួកយើង អត់ធ្វើអីមួយ ដោយឈរលើគោលការណ៍ច្បាប់ ហើយយើងព្យាយាមធ្វើតាមតែសម្ដីអ្នកមានអំណាច អ្នកណាធំអ្នកហ្នឹងនិយាយទៅទឹកមាត់ប្រៃ។ អ្នកណាធំនិយាយទៅច្បាប់មានប្រសិទ្ធភាព អាហ្នឹងហើយវាធ្វើឱ្យគំនុំសង្គមកើត។ គំនុំសង្គមវាកើតចេញពីស្អី?វាកើតចេញពីជនរងគ្រោះ ដីធ្លីអត់ដោះស្រាយ កើតជាគំនុំ ពួកអ្នកវិនិយោគអត់មានខ្នងអត់មានបក្សពួក វិនិយោគអត់ឈ្នះគេ កកើតទៅជាគំនុំ ហើយគំនុំទាំងអស់នេះ ទោះជាវាមិនស្ដែងចេញនៅពេលនេះក្ដី ក៏វានឹងស្ដែងចេញនៅពេលអនាគតនៅពេលប្រទេសធ្លាក់ក្នុងស្ថានភាពអស្ថិរភាពនយោបាយធ្ងន់ធ្ងរ»។
លោក កើត សារ៉ាយ អំពាវនាវដល់យុវជនដែលស្រឡាញ់បរិស្ថានកុំចុះចាញ់ការគំរាមកំហែង ត្រូវពង្រឹងសកម្មភាពការពារសម្បត្តិធនធានធម្មជាតិតទៅទៀត។
ក្នុងពេលដែលសកម្មភាពរបស់ពួកគេ មិនបានអាជ្ញាធរទទួលស្គាល់បែបនេះក្ដី ក៏ក្រុមអ្នកស្រឡាញ់បរិស្ថាន ពិសេសក្រុមយុវតីនៅតែសង្ឃឹមថា សាធារណជននឹងបានយល់ដឹងពីបំណងពិតនៃសកម្មភាពពួកគេ និងចូលរួមលើកទឹកចិត្តពួកគេ៕
កំណត់ចំណាំចំពោះអ្នកបញ្ចេញមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិ ដែលមិនជេរប្រមាថដល់អ្នកដទៃប៉ុណ្ណោះ។