ក្រុមយុវជនចលនាមាតាធម្មជាតិ នៅថ្ងៃទី៦ ឧសភា បានបង្ហោះវីដេអូ បង្ហាញពីសម្រស់កោះកុងក្រៅ និងបន្តទាមទារឲ្យរដ្ឋាភិបាល ដាក់កោះកុងក្រៅជាឧទ្យានជាតិសមុទ្រ។
ក្នុងវីដេអូដដែលនោះ ក្រុមយុវជន រៀបរាប់ពីធនធានធម្មជាតិដែលមាននៅលើកោះនោះរួមមាន ព្រៃឈើពណ៌បៃតង ទឹកជ្រោះ ឆ្នេរខ្សាច់សក្បុស និងបង្ហាញសារទាមទារមួយចំនួនផងដែរ។ ក្នុងនោះមានបដាមួយសរសេរថា ពួកគេចង់ឃើញកោះកុងក្រៅ ដាក់ជាឧទ្យានជាតិសមុទ្រ។
ការទាមទាររបស់ក្រុមយុវជនកន្លងទៅ ដោយសារក្រសួងបរិស្ថាន កាលពីខែមិថុនា ឆ្នាំ២០២០ បានបញ្ជូនមន្ត្រីជំនាញចុះសិក្សាស្រាវជ្រាវ រៀបចំឯកសារ និងទិន្នន័យទាក់ទិននឹងកោះកុងក្រៅ តាំងពីឆ្នាំ២០១៦ ហើយក្រសួងថា នឹងអាចប្រកាសតំបន់កោះកុងក្រៅនេះជាឧទ្យានជាតិសមុទ្រនៅអំឡុងឆ្នាំ២០២១ ក្រោយបញ្ចប់ការសិក្សារួច។ ប៉ុន្តែរយៈពេលជាង ៧ឆ្នាំមកនេះ ក្រសួងមិនបានបង្ហាញជាសាធារណៈអំពីលទ្ធផលនៃការសិក្សាស្រាវជ្រាវ ឬប្រកាសតំបន់កោះកុងក្រៅជាឧទ្យានជាតិសមុទ្រ ដូចការសន្យារបស់ក្រសួងឡើយ។ បញ្ហានេះធ្វើឱ្យក្រុមយុវជន បារម្ភពីការបាត់បង់តំបន់ធម្មជាតិមួយនេះ ខណៈតំបន់នោះបានប្រគល់ឱ្យសមាជិកព្រឹទ្ធសភាមកពីគណបក្សប្រជាជនកម្ពុជាឧកញ៉ា លី យ៉ុងផាត់ សម្រាប់អភិវឌ្ឍន៍។
កោះកុង ឬអ្នកស្រុកនិយមហៅថាកោះកុងក្រៅ មានទីតាំងស្ថិតនៅឃុំជ្រោយប្រស់ ស្រុកកោះកុង មានចម្ងាយប្រមាណ ៣០គីឡូម៉ែត្រ ពីក្រុងខេមរភូមិន្ទ ទីរួមខេត្តកោះកុង។ កោះកុងក្រៅគ្របដណ្ដប់ដោយព្រៃឈើក្រាស់ឃ្មឹក អមដោយទឹកជ្រោះជាច្រើនកន្លែង មានជីវចម្រុះជាច្រើនប្រភេទ ជាពិសេស កោះនេះមានឆ្នេរខ្សាច់សក្បុស និងទឹកសមុទ្រពណ៌ខៀវស្រងាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។