ក្រុមយុវជនរិះគន់អាជ្ញាធរបណ្តោយឱ្យមានកាកសំណល់កខ្វក់អណ្ដែតលើទឹកស្ទឹងសៀមរាប ដែលធ្វើឱ្យប៉ះពាល់ដល់អារម្មណ៍ភ្ញៀវទេសចរ និងសុខភាពពលរដ្ឋ។ ពួកគេស្នើឱ្យអាជ្ញាធរស្ដារ ឬកែលម្អសោភ័ណភាពបរិស្ថាននៅតាមដងស្ទឹងឱ្យបានស្អាត។ មន្ត្រីសង្គមស៊ីវិល និងយុវជនបរិស្ថានយល់ថាការរកឃើញរបស់ក្រុមយុវជនជាបន្តបន្ទាប់នេះជាចំណុចល្អ ដែលអាជ្ញាធរគួរតែដោះស្រាយ ដើម្បីចូលរួមកែលម្អចំណុចខ្វះខាតរបស់ខ្លួន។
ក្រុមយុវជនយល់ថា អាជ្ញាធរមិនគួរទុកឱ្យទឹកស្ទឹងសៀមរាបកខ្វក់ផ្ទុកដោយសំរាមស្អុយនោះទេ។ ពួកគេចង់ឃើញទឹកស្ទឹងសៀមរាបមានទឹកថ្លាទាក់ទាញភ្ញៀវទេសចរ ដោយមិនមែនជាស្ទឹងសំបូរ និងទឹកលូទឹកស្អុយឡើយ។ យុវជនបញ្ជាក់ការលើកឡើងទាំងនោះកើតចេញពីក្តីស្រឡាញ់របស់លោកចំពោះបរិស្ថាន ពុំមានចេតនាញុះញង់ និងបង្ខូចកេរ្តិ៍ឈ្មោះរដ្ឋាភិបាលនោះទេ។
យុវជនធ្វើការងារសង្គមលោក ស្វាយ សំណាង ប្រាប់វិទ្យុអាស៊ីសេរីនៅថ្ងៃទី១៧ ខែមេសាថាអំឡុងពេលលោកទៅលេងកម្សាន្តនៅខេត្តសៀមរាប គឺលោកបានចុះអង្កេតបញ្ហាបរិស្ថាននៅតាមបណ្តោយដងស្ទឹងខេត្តនេះ។ លោករកឃើញថា អាជ្ញាធរបានសម្អាតទឹកស្ទឹងបានស្អាតសម្រាប់រៀបចំកម្មវិធីជិះទូកនៅមុខព្រះរាជដំណាក់ក្នុងឱកាសពិធីបុណ្យចូលឆ្នាំខ្មែរ។ ប៉ុន្តែលោកថាទីតាំងចាប់ពីមុខវត្តដំណាក់ និងមុខផ្សារចាស់រហូតដល់ភ្នំក្រោមវិញ អាជ្ញាធរមិនបានសម្អាត ឬស្ដារសំរាមនោះទេ។ លោកបន្តថា ស្មៅ និងស្លែដុះលាយឡំនឹងកាកសំណល់ស្លឹកឈើ និងប្លាស្ទិកអណ្ដែតពាសពេញផ្ទៃទឹក ដែលធ្វើឱ្យទឹកល្អក់ខ្មៅ ហើយជះក្លិនស្អុយដល់អ្នកដំណើរ និងភ្ញៀវ។ លោក ស្វាយ សំណាង នៅតែសង្ស័យថា ទឹកកខ្វក់ដែលមានជះក្លិនស្អុយទំនងចេញពីបំពង់លូផ្ទុកកាកសំណល់ណាមួយដែលមិនបានឆ្លងកាត់ប្រព័ន្ធចម្រោះត្រឹមត្រូវ។
លោក ស្វាយ សំណាង៖ «យើងមើលឃើញថា ការអនុវត្ត ការព្រងើយកន្តើយរបស់ថ្នាក់ដឹកនាំមន្ត្រី អាជ្ញាធរដែលមានកាតព្វកិច្ចការពារ និងសម្អាតបរិស្ថានក្រុងហ្នឹង ខ្ញុំមើលឃើញថា វាហាក់ពុំមានប្រសិទ្ធភាពទេ ហើយព្រងើយកន្តើយចំពោះមតិរបស់យុវជនដែលលើកឱ្យមន្ត្រីទាំងអស់នោះគាត់ដោះស្រាយ សំណួរសួរថា នៅពេលមន្ត្រីទាំងនោះគាត់ដោះស្រាយ គាត់រៀបចំបានស្អាត សួរថា តើមុខមាត់អ្នកណាគេ គឺមុខមាត់របស់អាជ្ញាធរទាំងអស់នោះទេ ហើយមិនមែនមុខមាត់ក្រុមយុវជនដែលនិយាយពីបញ្ហានេះបញ្ហានោះជូនពួកគាត់(អាជ្ញាធរ)ទេ»។
ចំណែកប្រជាពលរដ្ឋរស់នៅក្រុងសៀមរាបលោក សោម វុទ្ធី ថ្លែងថា លោក និងពលរដ្ឋមួយចំនួនមិនពេញចិត្តនោះទេ ពេលឃើញទឹកស្ទឹងសំបូរដោយសំរាមដែលធ្វើឱ្យប៉ះពាល់បរិស្ថាន និងអារម្មណ៍ភ្ញៀវដើរលេងកម្សាន្តនៅតំបន់ទេសចរណ៍ប្រវត្តិសាស្ត្រនេះ។ លោកយល់ថា បញ្ហាទឹកស្ទឹងសៀមរាបកខ្វក់បានកើតឡើយដដែលៗ ហើយមានច្រើនឆ្នាំមកហើយ តែអាជ្ញាធរមិនសូវយកចិត្តទុកដាក់ដោះស្រាយឱ្យមានប្រសិទ្ធភាពនៅឡើយ។
លោក សោម វុទ្ធី៖ «(ស្ទឹងសៀមរាប)ជាកន្លែងដែលប្រជាពលរដ្ឋធ្វើដំណើរកម្សាន្ត ជាទីក្រុងបៃតង តែប្រជាពលរដ្ឋឃើញថា ទឹកស្ទឹងកខ្វក់ពេញដោយស្លែផ្សេងៗដែលមិនសម្អាតវាគឺមានក្លិនដែរ ប៉ះពាល់សុខភាពពុកម៉ែបងប្អូនយើងដែរ។ ក្លិនមិនល្អ មានស្លែចេញពីក្នុងស្ទឹងហើយប្រជាពលរដ្ឋជិះកាត់ទៅគាត់មិនសូវសប្បាយចិត្តទេ ពេលឃើញរបៀបហ្នឹង»។
វិទ្យុអាស៊ីសេរីមិនអាចទាក់ទងអភិបាលក្រុងសៀមរាបលោក នួន ពុទ្ធារ៉ា និងអភិបាលខេត្តសៀមរាបលោក ទៀ សីហា ដើម្បីបកស្រាយជុំវិញមតិរិះគន់នេះបានទេ នៅថ្ងៃទី១៧ ខែមេសា ដោយទូរស័ព្ទចូលជាច្រើនលើកតែពុំមានអ្នកទទួល។
កាលពីដើមឆ្នាំ២០២២ អតីតសកម្មជនចលនាមាតាធម្មជាតិលោក ថុន រដ្ឋា បានចេញផ្សាយវីដេអូបង្ហាញទីតាំងលូបង្ហូរទឹកកខ្វក់ជាច្រើនកន្លែង ហូរចូលដងស្ទឹងសៀមរាប ហើយលោកសង្ស័យថា ទឹកកខ្វក់ដែលមានជះក្លិនស្អុយចេញពីបំពង់លូផ្ទុកដោយកាកសំណល់រលួយនោះ មិនបានឆ្លងកាត់ប្រព័ន្ធចម្រោះនោះទេ។ យុវជនស្រឡាញ់បរិស្ថានរូបនេះធ្លាប់ឱ្យដឹងថា ទឹកកខ្វក់ទាំងនោះហូរចេញពីមន្ទីរពេទ្យ ផ្សារ សណ្ឋាគារ ផ្ទះសំណាក់ ភោជនីយដ្ឋាន និងផ្ទះប្រជាពលរដ្ឋ ខណៈលោករកឃើញថា អាងចម្រោះទឹកសំណល់ក្រុងសៀមរាបមួយកន្លែងមានទំហំ១២ហិកតារ ចំណាយលុយអស់១៤លានដុល្លារ និងដាក់ឱ្យប្រើប្រាស់នៅឆ្នាំ២០១០ បានក្លាយជាអាងចិញ្ចឹមត្រី។
ទោះយ៉ាងណា យុវជនបរិស្ថានគឺលោក ថុន រដ្ឋា ថាបើសិនបញ្ហាបរិស្ថាន ជាពិសេសការបង្ហូរទឹកស្អុយចូលស្ទឹងទេសចរណ៍ ក្នុងខេត្តនេះនៅតែកើតឡើងនោះ លោកបារម្ភថា ធ្វើឱ្យប៉ះពាល់មុខមាត់ជាតិ និងភ្ញៀវទេសចរណ៍ជាតិ និងអន្តរជាតិកំពុងសម្រុកទៅលេងតំបន់អង្គរក្រោយវិបត្តិជំងឺកូវីដ-១៩។ លោកបន្តថា ការរកឃើញរបស់ក្រុមយុវជនជាបន្តបន្ទាប់នេះជាចំណុចល្អ ដែលអាជ្ញាធរគួរតែដោះស្រាយ ដើម្បីចូលរួមកែលម្អចំណុចខ្វះខាតរបស់ខ្លួន។
លោក ថុន រដ្ឋា៖ «ប៉ះពាល់ដល់ប្រទេសកម្ពុជានៅពេលមានតំបន់ទេសចរណ៍ដែលទាក់ទាញ ប៉ុន្តែមានអាងចម្រោះទឹកកខ្វក់បែរជាមានទឹកស្អុយ មានសំរាមជាដើមនៅតាមស្ទឹងធ្វើឱ្យប៉ះពាល់ដល់សោភ័ណភាពហ្នឹង ខណៈខេត្តសៀមរាបបច្ចុប្បន្ននេះកំពុងទាក់ទាញខ្លាំងសម្រាប់ភ្ញៀវទេសចរ»។
ជុំវិញរឿងនេះ មន្ត្រីឃ្លាំមើលការរំលោភសិទ្ធិមនុស្សនៃសមាគមការពារសិទ្ធិមនុស្សអាដហុក (Adhoc) ប្រចាំខេត្តសៀមរាបលោក សួស ណារិន មើលឃើញថា កន្លងមកអាជ្ញាធរបានរៀបចំសំអាតដងស្ទឹងមួយចំនួនហើយ។ ទោះយ៉ាងណា លោកយល់ថាចំណុចខ្វះខាតមួយចំនួនទៀតទាក់ទងបញ្ហាបរិស្ថានជាដើមអាជ្ញាធរត្រូវយកចិត្តទុកដាក់កែលម្អដងស្ទឹងឱ្យមានសោភ័ណភាពឱ្យដូចនឹងប្រទេសជិតខាងដើម្បីបម្រើដល់វិស័យទេសចរណ៍ និងសុខមាលភាពពលរដ្ឋ។
លោក សួស ណារិន៖ «យើងចង់ឱ្យអាជ្ញាធរហ្នឹងមានការអនុវត្តច្បាប់ដាក់ពិន័យសម្រាប់អ្នកដែលចោលសំរាម អ្នកប្រព្រឹត្តអ្វីដែលធ្វើឱ្យប៉ះពាល់ដល់សោភ័ណភាពស្ទឹង គឺយើងចង់ឱ្យមានការអនុវត្តច្បាប់ ដាក់ពិន័យកុំឱ្យនិយាយតែមាត់ទទេហើយទុកចោល ហើយធ្វើយ៉ាងណាដើម្បីធានាដល់ដងស្ទឹងយើងក្លាយជាការទាក់ទាញ»។
ក្រុមយុវជនជំរុញឱ្យអាជ្ញាធរខេត្តសៀមរាប លើកកម្ពស់សោភ័ណភាពបរិស្ថានស្ទឹងសៀមរាបដែលជាស្ទឹងប្រវត្តិសាស្ត្រ ដើម្បីពលរដ្ឋអាចប្រើប្រាស់ទឹកបាន និងទាក់ទាញភ្ញៀវទេសចរណ៍។ ពួកគេបារម្ភថា ទឹកកខ្វក់ សំរាមអណ្ដែតដែលមានក្លិនស្អុយទាំងនេះនឹងប៉ះពាល់ធ្ងន់ធ្ងរដល់សុខភាពមនុស្ស សត្វ ជីវចម្រុះ ការនេសាទត្រី និងការប្រើប្រាស់ទឹករបស់ប្រជាកសិករជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។