ឧទ្យានជាតិបទុមសាគរ ក្នុងខេត្តកោះកុង ដែលជាមរកតធម្មជាតិបន្សល់ទុក តាំងពីជំនាន់សម្តេចព្រះបាទ នរោត្តម សីហនុ កំពុងទទួលរងការឈូសឆាយព្រៃជាច្រើនពាន់ហិកតារ។
ក្រុមយុវជនស្រឡាញ់បរិស្ថាន ស្នើឱ្យរដ្ឋាភិបាលបញ្ឈប់ ការលក់ផ្ទៃដីក្នុងតំបន់ឧទ្យានជាតិទៅឱ្យបុគ្គលឯកជន។
ឧទ្យានជាតិបទុមសាគរដែលជាបណ្ដុំធនធានធម្មជាតិស្រស់បំព្រង សត្វព្រៃ និងព្រៃឈើធំធេងជាប់មាត់សមុទ្រ កំពុងទទួលរងការឈូសឆាយព្រៃដ៏ធំមហិមានៅរយៈពេលជាង ៣ឆ្នាំកន្លងទៅនេះ។
ការបំផ្លាញព្រៃឈើខ្នាតធំនេះ ដោយសារលោកនាយករដ្ឋមន្ត្រី ហ៊ុន សែន បានស៊ីញេពុះលក់ដីព្រៃ ក្នុងដែនអភិរក្សនៅតំបន់នោះ ដើម្បីលក់ឱ្យក្រុមហ៊ុនឯកជន និងក្រុមឧកញ៉ា មានអំណាចស្រេចតែចិត្ត ដោយគ្មានការផ្សព្វផ្សាយឱ្យបានទូលំទូលាយ។ នេះបើយោងតាមការស្រាវជ្រាវ របស់ក្រុមយុវជនចលនាមាតាធម្មជាតិ។
ក្រុមយុវជនចលនាមាតាធម្មជាតិ នៅថ្ងៃទី១៩ កក្កដា បានធ្វើដំណើរដល់ទីតាំងតំបន់អភិរក្សនេះ ប្រទះឃើញព្រៃឈើធំល្វឹងល្វើយមានផ្ទៃដីជាច្រើនពាន់ហិកតារ ឋិតក្នុងតំបន់ឧទ្យានជាតិបទុមសាគរ ក្នុងស្រុកបទុមសាគរ បានក្លាយជាវាលរហោឋានធំធេង។
ក្រុមយុវជនចលនាមាតាធម្មជាតិ លោក លី ចាន់ដារ៉ាវុត និយាយថា តំបន់ឧទ្យានបុទុមសាគរ ត្រូវបានកំណត់ជាដែនអភិរក្ស គួរតែការពារឱ្យគង់វង្ស ក៏ប៉ុន្តែរដ្ឋាភិបាលបែរជាកាត់ផ្ទៃដីជាង ១៤ម៉ឺន ៤ពាន់ហិកតារ (១៤៤.៨៨២) លក់ឱ្យវិស័យឯកជនទៅវិញ។
លោកថា ពេលនេះច្បាប់បានអនុញ្ញាតឱ្យ លោកនាយករដ្ឋមន្ត្រី ហ៊ុន សែន តែម្នាក់ អាចមានសិទ្ធិលក់ឧទ្យានជាតិ កន្លែងណាក៏បាន ដោយងាយស្រួល ធ្វើឱ្យឧទ្យានជាតិជាច្រើនកន្លែងប្រឈមការបាត់បង់ព្រៃឈើទ្រង់ទ្រាយធំ៖
លោក លី ចាន់ដារ៉ាវុត៖ «បទុមសាគរក្លាយជាឧទ្យានជាតិ ត្រូវតែបានការពារ បែរជាកាត់លក់ឱ្យបុគ្គលឯកជនវិញដោយសារច្បាប់បានផ្ដល់អំណាច នាយករដ្ឋមន្ត្រីតែម្នាក់ គាត់អាចស៊ីញេលក់កន្លែងណាក៏បាន។ វាជាភាពកម្សោយនៃការអនុវត្តច្បាប់ដែលមនុស្សម្នាក់ មានសិទ្ធិលក់ឧទ្យានជាតិដោយងាយស្រួល»។
ចលនាមាតាធម្មជាតិ បានបង្ហោះសារតាមបណ្ដាញសង្គមហ្វេសប៊ុក (Facebook) នៅថ្ងៃទី ១៩ កក្កដា ភ្ជាប់នឹងរូបភាពថតពីលើអាកាស បង្ហាញពីសកម្មភាពឈូសឆាយព្រៃឈើ ក្នុងតំបន់ឧទ្យានជាតិបុទុមសាគរ ដែលបង្កឡើងដោយក្រុមហ៊ុនឯកជនមួយចំនួនរួមមាន ក្រុមហ៊ុនចិនយូញៀន ឌីវេលឡូបមិន (Union Development Group)ហៅកាត់ថា UDG ក្រុមហ៊ុន រ៉ូយ៉ាល់គ្រុប (Roral Group) របស់ឧកញ៉ា គិត ម៉េង និងក្រុមហ៊ុនផ្សេងៗ ទៀត តាមរយៈការផ្ដល់ដីសម្បទានសេដ្ឋកិច្ច ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន។
មកទល់ពេលនេះ សកម្មភាពឈូសឆាយព្រៃដ៏ធំល្វឹងល្វើយ និងដុតកម្ទេចព្រៃឱ្យក្លាយជាវាល ដើម្បីសាងសង់រីសត (Resort) ផ្ទះវីឡា កន្លែងកម្សាន្តបែបអភិជន និង ពុះដីឡូលក់ នៅតែបន្តយ៉ាងសស្រាក់សស្រាំ។
លោក លី ចាន់ដារ៉ាវុត បន្ថែមថា ពួកលោក បានជិះម៉ូតូ ដោយប្រើពេលកន្លះម៉ោង នៅមិនទាន់ផុត កន្លែងឈូសឆាយព្រៃនៅឡើយ។ រីឯពលរដ្ឋជាច្រើនគ្រួសារ រស់នៅក្នុងភូមិតានួន ឃុំតានួន ក្នុងដែនអភិរក្សនេះ បែរជាប្រឈមការបណ្តេញចេញទៅវិញ៖
លោក លី ចាន់ដារ៉ាវុត៖ «បានដឹង បានស្គាល់ មានធនធានធម្មជាតិ ស្រុកខ្មែរមានធនធានស្រស់បំព្រង គួរឱ្យសោកស្ដាយ សម្ដេចតា(សីហនុ)ខំការពារព្រៃឈើ មួយជីវិតរបស់ព្រះអង្គ ឥឡូវរលាយខ្ទេចខ្ទី នៅជំនាន់របស់យើង»។
វិទ្យុអាស៊ីសេរីមិនទាន់អាចទាក់ទងសុំការបកស្រាយរឿងនេះ ពីប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផានអ្នកនាំពាក្យក្រសួងបរិស្ថាន លោក នេត្រ ភក្ត្រា និងអភិបាលខេត្តកោះកុង អ្នកស្រី មិថុនា ភូថង បាននៅឡើយទេ នៅថ្ងៃទី១៩ កក្កដា ដោយទូរស័ព្ទហៅចូលតែគ្មានអ្នកលើក។
ចំណែកតំណាងក្រុមហ៊ុនឯកជនដែលទទួលសិទ្ធិវិនិយោគ ក្នុងតំបន់ឧទ្យានជាតិនេះ ក៏មិនអាចទាក់ទងបានដែរ។
ក្រុមយុវជនថា ពួកគាត់នឹងផលិតវីដេអូបង្ហាញពីបញ្ហានេះ បង្ហោះតាមបណ្ដាញសង្គមនៅពេលឆាប់នេះ ដើម្បីទាមទារឱ្យរដ្ឋាភិបាល ផ្អាកការលក់ដីក្នុងតំបន់ឧទ្យានជាតិបន្តទៀត ខណៈបច្ចុប្បន្នមាន ឧទ្យានជាតិបូកគោ ឧទ្យានជាតិគិរីរម្យ ឧទ្យានជាតិកែប និង ឧទ្យានជាតិបទុមសាគរ ត្រូវបានពុះលក់ និងឈូសឆាយព្រៃទ្រង់ទ្រាយធំជាបន្តបន្ទាប់។
ជុំវិញរឿងនេះ មន្ត្រីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុក លោក ប៉ែន ប៊ុណ្ណារ៍ យល់ថា ព្រៃឈើក្នុងតំបន់ឧទ្យានជាតិ បែរជាបាត់បង់នៅជំនាន់នេះ គឺជាការទទួលខុសត្រូវ របស់ប្រមុខដឹកនាំរដ្ឋ ក្នុងទំព័រប្រវត្តិសាស្ត្រ។
លោក ប៉ែន ប៊ុណ្ណារ៍៖ «រដ្ឋាភិបាលសូមបញ្ឈប់ការផ្ដល់ដីសម្បទានសេដ្ឋកិច្ចពាក់ព័ន្ធនឹងព្រៃឈើបន្តទៀត កន្លងមក អត់មានអ្វីចំណេញ ក្រុមហ៊ុនដែលបំផ្លាញព្រៃឈើហើយ ដកខ្លួនចេញ ដោយមិនមានសំណងមករដ្ឋវិញ។ សូម្បីអ្នកដឹកនាំរដ្ឋយើង ធ្លាប់ប្រកាសហើយ ការផ្ដល់ដីសម្បទានសេដ្ឋកិច្ចមិនផ្ដល់លើដីព្រៃស្រោង និងពាក់កណ្ដាលស្រោង»។
ឧទ្យានជាតិបទុមសាគរបានចុះបញ្ជីជាតំបន់អភិរក្ស ដោយព្រះរាជក្រឹត្យព្រះបាទនរោត្តម សី ហនុ កាលពីឆ្នាំ១៩៩៣ មានផ្ទៃដីជិត ២សែនហិកតារ (១៨៣.៤០៨) ឋិតក្នុង ខេត្តកោះកុងលាតសន្ធឹងជាប់មាត់សមុទ្រ។ ឧទ្យានជាតិនេះជាតំបន់ធម្មជាតិ និងជាដែនជម្រកសត្វព្រៃ មច្ឆជាតិ អមដោយឆ្នេរខ្សាច់សក្បុស លាតសន្ធឹងធំល្វឹងល្វើយសម្បូរទៅដោយព្រៃកោងកាង។
ក្រុមយុវជនបន្ថែមថា រដ្ឋាភិបាលគួរតែខ្មាសដូនតា ដែលមិនអាចការពារធនធានទាំងនោះបាននៅសម័យនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។