អ្នកជំនាញផ្នែកសុខភាពព្រមានអំពីគ្រោះថ្នាក់នៃការបរិភោគសាច់ឆៅដោយមិនបានចម្អិនឱ្យឆ្អិនល្អថា អាចបណ្ដាលឱ្យប៉ះពាល់ដល់សុខភាព។ ពួកគាត់អះអាងថា ការបរិភោគសាច់ឆៅអាចបង្កឱ្យអ្នកទទួលទានពុលអាហារដូចជា ក្អួតចង្អោរ រមួលពោះ ក្ដៅខ្លួន ឈឺក្បាល និងរាករូសជាដើម។
ការបរិភោគសាច់ឆៅ ឬចំអិនមិនឱ្យឆ្អិនល្អត្រូវបានមនុស្សមួយចំនួនយល់ឃើញថា ជាការរក្សានូវប្រូតេអ៊ីនឱ្យបានច្រើនដើម្បីប៉ូវកម្លាំង និងមានវីតាមីនជួយដល់សុខភាព។ ករណីនេះជំរុញឱ្យអ្នកផលិតមាតិកា និងអ្នកបង្កើតគេហទំព័ររកលុយនៅតាមបណ្ដាញសង្គមមួយចំនួននាំគ្នាថតវីដេអូបរិភោគសាច់ឆៅស្រស់ៗ ដូចជា សាច់គោ សាច់មាន់ អយស្ទ័រ និងគ្រឿងសមុទ្រឆៅជាដើម ដើម្បីទាក់ទាញអ្នកទស្សនា។ ប៉ុន្តែផ្ទុយទៅវិញអ្នកជំនាញសុខភាពមើលឃើញថា ការបរិភោគសាច់ឆៅនេះបង្កគ្រោះថ្នាក់ដល់អាយុជីវិត។
ប្រធានសមាគមគ្រូពេទ្យគុណធម៌កម្ពុជាលោកវេជ្ជបណ្ឌិត អ៊ូច វុឌ្ឍី ពន្យល់ប្រាប់វិទ្យុអាស៊ីសេរីតាមបណ្ដាញសង្គមតេឡេក្រាមថា ការបរិភោគសាច់ឆៅ ឬគ្រឿងសមុទ្រឆៅអាចបង្កឱ្យអ្នកបរិភោគឆ្លងវីរុសច្រើនពីក្នុងសាច់ឆៅទាំងអស់នោះ ជាពិសេស វីរុសផ្ដាសាយបក្សី វីរុសកូវីដ និងវីរុសណូរ៉ូ (Noro Virus) ដែលជាមេរោគចម្លងថ្មី។ លោកវេជ្ជបណ្ឌិតពន្យល់បន្ថែមថា សាច់ឆៅ ឬគ្រឿងសមុទ្រស្រស់ៗអាចបរិភោគឆៅបាន គឺទាល់តែឆ្លងកាត់ការវាយតម្លៃពីពេទ្យជំនាញផ្នែកសត្វ និងមន្ទីរពិសោធន៍ត្រឹមត្រូវដើម្បីធានាថា សាច់ឆៅទាំងនោះគ្មានមេរោគ ឬវីរុសដែលបង្កគ្រោះថ្នាក់ដល់សុខភាព។
លោកវេជ្ជបណ្ឌិត អ៊ូច វុឌ្ឍី៖«កុំចូលចិត្តពិសា បរិភោគអយស្ទ័រឆៅ ពីព្រោះវីរុសណូរ៉ូវីរុសនេះគឺជា វីរុសមួយបង្កទៅជាហានិភ័យខ្ពស់អាចបង្កទៅជាជំងឺរលាកផ្លូវរំលាយអាហារដូចជា ក្រពះ ពោះវៀន ហើយប៉ះពាល់ខួរក្បាលសតិស្មារតី មួយទៀតវាអាចសំងំបង្កទៅជាជំងឺមហារីកពោះវៀន»។
លោកវេជ្ជបណ្ឌិត អ៊ូច វុឌ្ឍី បញ្ជាក់ថា គ្រឿងសមុទ្រឆៅដូចជា បង្គា ក្ដាម និងមឹកជាដើម ត្រូវបានអាជីវករមួយចំនួនយកទៅកែច្នៃទៅជាអាហារប្រភេទ បុកល្ហុង ភ្លា ដែលធ្វើឱ្យអ្នកទិញយកមកបរិភោគងាយនឹងឆ្លងវីរុស ពីព្រោះសាច់ឆៅមានផ្ទុកវីរុសហើយវាមិនអាចស្លាប់នៅក្នុងសីតុណ្ហភាពត្រជាក់ដូចជា យកសាច់ទៅបង្កក ឬ ក្លាស្សេនោះទេ។
ពាក់ព័ន្ធនឹងការបរិភោគសាច់ឆៅបង្កឱ្យមានគ្រោះថ្នាក់ដល់សុខភាពនេះ ក្រសួងសុខាភិបាល កាលពីថ្ងៃទី១៩ ខែធ្នូ បានចេញសេចក្តីប្រកាសព័ត៌មានក្រើនរំលឹកដល់ពលរដ្ឋដែលនិយមបរិភោគគ្រឿងសមុទ្រ ជាពិសេសអយស្ទ័រឆៅ ថាអាចឆ្លងវីរុសណូរ៉ូ ដែលជាវីរុសបម្លែងថ្មីរកឃើញដោយអង្គការសុខភាពពិភពលោក WHO។
វីរុសថ្មីប្រភេទណូរ៉ូនេះត្រូវបានអង្គការសុខភាពពិភពលោករកឃើញថា អាចចម្លងពីមនុស្សម្នាក់ទៅម្នាក់ទៀតតាមរយៈ ការប៉ះពាល់ផ្ទាល់ជាមួយវីរុស អ្នកមើលថែទាំអ្នកជំងឺ ការបរិភោគអាហារ ឬការប្រើប្រាស់សម្ភារៈរួមគ្នា។ រោគសញ្ញានៃវីរុសនេះ នឹងកើតមានចន្លោះពី១២ ទៅ៤៨ម៉ោង បន្ទាប់ពីប៉ះពាល់ផ្ទាល់ជាមួយវីរុស ហើយរោគសញ្ញាវីរុសនេះមានដូចជា រាក ក្អួត ចង្អោរ ចុកពោះ និងមានអាការក្តៅខ្លួន និងឈឺក្បាល។
អង្គការWHO បង្ហាញថា ជារៀងរាល់ឆ្នាំមានមនុស្សរងគ្រោះជិត៧រយលាន (៦៨៥) ករណីដែលបង្កដោយវីរុសណូរ៉ូ ហើយបណ្តាលធ្វើឱ្យមនុស្សប្រមាណ២សែននាក់ស្លាប់ (២០០.០០០) ក្នុងនោះមានកុមារចំនួន៥ម៉ឺននាក់ (៥០.០០០) ដែលប៉ះពាល់ដល់សេដ្ឋកិច្ចនៅលើពិភពលោកប្រមាណ៦០ពាន់លានដុល្លារ ដោយសារតែការថែទាំសុខភាព និងថ្លៃខាតបង់សេដ្ឋកិច្ច។
ដើម្បីចៀសវាងឆ្លងវីរុសណូរ៉ូនេះ អ្នកជំនាញណែនាំឱ្យអ្នកចូលចិត្ត ឬនិយមបរិភោគគ្រឿងសមុទ្រឆៅ គឺត្រូវចំអិនឱ្យបានឆ្អិនល្អ និងលាងសម្អាតដៃឱ្យបានត្រឹមត្រូវ ពីព្រោះវីរុសប្រភេទនេះមានភាពសុំា និងមិនងាយស្លាប់នោះទេ ហើយករណីអ្នកឆ្លងមេរោគនេះ ត្រូវស្នាក់នៅផ្ទះ ឬទៅមន្ទីរសុខភាពដើម្បីព្យាបាល។
អ្នកជំនាញសុខភាពពិភពលោកអះអាងថា អ្នកឆ្លងវីរុសណូរ៉ូនេះ អាចជាសះស្បើយរយៈពេលចន្លោះពី ១ ទៅ៣ថ្ងៃ បន្ទាប់អ្នកជំងឺបានចម្លងវីរុសនេះទៅអ្នកដទៃ ប៉ុន្តែចំពោះកុមារអាយុក្រោម៥ឆ្នាំ មនុស្សចាស់ និងអ្នកមានប្រព័ន្ធការពាររាងកាយខ្សោយ ងាយនឹងរងគ្រោះធ្ងន់ធ្ងរ។
ប្រធានសមាគមគ្រូពេទ្យគុណធម៌កម្ពុជាលោកវេជ្ជបណ្ឌិត អ៊ូច វុឌ្ឍី ព្រមានថា ក្រៅពីវីរុសណូរ៉ូនេះ នៅក្នុងសាច់ឆៅក៏មានបាក់តេរី ប៉ារ៉ាស៊ីត ឬជាតិពុលនៅក្នុងគ្រឿងសមុទ្រដែលបង្កឡើងដោយការបង្ហូរកាក់សំណល់វេជ្ជសាស្ត្រចូលក្នុងសមុទ្រដែលបណ្តាលឱ្យអ្នកបរិភោគរលាកផ្លូវរំលាយអាហារប៉ះពាល់ទៅដល់ខួរក្បាល និងបង្កឱ្យកើតជំងឺមហារីកពោះវៀនជាដើម។
លោកវេជ្ជបណ្ឌិត អ៊ូច វុឌ្ឍី៖«ខ្ញុំសូមផ្តាំហើយកុំថា ប៉ារ៉ាស៊ីត វីរុស សូម្បីតែបាក់តេរី សូម្បីតែមេរោគផ្សេងៗក៏វាអាចសំងំនៅក្នុងសាច់ឆៅនឹងផងដែរ។ អ៊ីចឹងដើម្បីចៀសផុតពីជំងឺតម្កាត់ផ្សេងៗគួរណាបងប្អូនយកទៅចម្អិនឱ្យបានត្រឹមត្រូវ និងទុកដាក់ឱ្យបានត្រឹមត្រូវត្រង់ហ្នឹងដែលយើងអាចចៀសផុតពីជំងឺផ្សេងៗ»។
ចំពោះស្ត្រីមានផ្ទៃពោះ កុមារ និងមនុស្សចាស់ដែលបរិភោគសាច់ឆៅអាចធ្វើឱ្យពួកគាត់ពុលអាហារ រាករូស ប្រឈមនឹងគ្រោះថ្នាក់ដល់ទារកក្នុងផ្ទៃដោយសារតែភាពសុំានៃសារពាង្គកាយរបស់ពួកគាត់ខ្សោយមិនអាចប្រឆាំងនឹងវីរុស ឬប៉ារ៉ាស៊ីតដែលមាននៅក្នុងសាច់ឆៅ។
អតីតមន្ត្រីជាន់ខ្ពស់នៃមន្ទីរសុខាភិបាល និងជាប្រធានប្រតិបត្តិគណបក្ស ភ្លើងទៀនខេត្តប៉ៃលិន លោក ខឹម មុនីកុសល ថ្លែងថា កត្តាដែលធ្វើឱ្យពលរដ្ឋនាំគ្នាបរិភោគសាច់ឆៅមានឈាមស្រស់ៗ ឬគ្រឿងសមុទ្រឆៅអាចបណ្តាលមកពីអ្នកផលិតមាតិកាមួយចំនួនផលិត និងចែកចាយការបរិភោគសាច់ឆៅនោះដែរ។ លោកបន្តថា រដ្ឋាភិបាល និងក្រសួងពាក់ព័ន្ធគួរតែពន្យល់ពលរដ្ឋឱ្យច្បាស់លាស់ពីការទទួលទានសាច់ឆៅ ជាជាងផ្សព្វផ្សាយតាមបណ្តេញសង្គមហ្វេសប៊ុកគឺមិនគ្រប់គ្រាន់នោះទេ។
លោក ខឹម មុនីកុសល៖«អ្វីដែលខ្ញុំសង្កេតឃើញអ្វីដែលម្ហូបអាហារយើងគួរចៀសវាងគឺ គ្រឿងសមុទ្រ។ គ្រឿងសមុទ្រហ្នឹងប្រសិនបើបរិភោគឆៅ គឺវាមានផលប៉ះពាល់ច្រើន គ្រឿងសមុទ្រប្រសិនបើមានមេរោគនៅក្នុងហ្នឹងស្រាប់ គឺងាយនឹងចម្លងណាស់វាអាចបង្កទៅជាជំងឺរលាកពោះវៀន រ៉ាំរ៉ៃទៅថ្ងៃអនាគតទៀត ដែលយើងអាចខាតបង់ថវិកា ខាតបង់ពេលវេលាដែលយើងមានជំងឺហើយអត់បានទៅធ្វើការ»។
វិទ្យុអាស៊ីសេរីមិនអាចទាក់ទង រដ្ឋលេខាធិការក្រសួងសុខាភិបាលអ្នកស្រី ឱ វណ្ណឌីន ដើម្បីសុំការបកស្រាយជុំវិញបញ្ហានេះបានទេនៅខថ្ងៃទី៦ ខែមករា។
ក្រុមអ្នកជំនាញឱ្យដំបូន្មានថា ដើម្បីការពារ និងទប់ស្កាត់ការឆ្លងរាលដាលវីរុស ឬបាក់តេរី ពលរដ្ឋខ្មែរគួរតែផ្លាស់ប្តូរទម្លាប់ពីការបរិភោគសាច់ឆៅ មកចម្អិនអាហារឱ្យបានឆ្អិនល្អមុនបរិភោគ និងលាងសម្អាតរបស់របរប្រើប្រាស់នៅក្នុងផ្ទះបាយឱ្យបានស្អាត។ ដើម្បីបង្កើតទម្លាប់ល្អក្នុងការបរិភោគអាហារ និងធ្វើឱ្យសុខភាពរឹងមាំពលរដ្ឋគួរតែចៀសវាងការទទួលទានសាច់ឆៅ ឬគ្រឿងសមុទ្រឆៅដែលយកទៅបង្កក ឬក្លាស្សេទុកយូរ ហើយស្តាប់តាមការណែនាំរបស់គ្រូពេទ្យ ពីព្រោះការប្រើប្រាស់ក្រូចឆ្មា ឬទឹកសូដាលាងសម្អាតសាច់ឆៅដើម្បីសម្លាប់មេរោគនោះ គឺជារឿងមិនត្រឹមត្រូវនោះទេ។
ចំពោះស្ត្រីមានផ្ទៃពោះ និងកុមារគួរតែបរិភោគបន្លែឆ្អិន ឬផ្លែឈើជំនួសឱ្យសាច់ឆៅវិញដើម្បីចៀសវាងឆ្លងវីរុស ឬប៉ារ៉ាស៊ីត ផ្សេងៗ ហើយធ្វើឱ្យទារកក្នុងផ្ទៃមានសុខភាពល្អ។ ករណីអ្នកឆ្លងវីរុស ឬកើតមានប៉ារ៉ាស៊ីតដែលបណ្តាលមកពីការបរិភោគសាច់ឆៅគួរតែឆាប់ទៅពិគ្រោះយោបល់ជាមួយគ្រូពេទ្យជំនាញដើម្បីស្វែងរកការព្យាបាល ពីព្រោះការទុកមេរោគ ឬប៉ារ៉ាស៊ីតនៅក្នុងខ្លួនយូរវានឹងវិវត្តទៅ ជាមេរោគថ្មី ហើយរីករាលដាលពេញសារពាង្គកាយដែលនាំឱ្យគ្រោះថ្នាក់ដល់អាយុជីវិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។