ប្រធានព្រឹទ្ធសភាលោក ហ៊ុន សែន មានមន្ត្រីជំនិតមួយរូប ដែលជាតារាហ្វេសប៊ុក (Facebook)។ មន្ត្រីរូបនោះតែងបង្ហោះរូបភាពរបស់ខ្លួនស្ទើរជារៀងរាល់ថ្ងៃ អមជាមួយនឹងសារផ្សេងៗ និងការលើកសរសើរការដឹកនាំរបស់ក្រុមគ្រួសារត្រកូលហ៊ុន។ មន្ត្រីម្នាក់នេះក៏ជាអ្នកជួយបង្កើតហ្វេសប៊ុកឱ្យលោក ហ៊ុន សែន ផងដែរ។ តើមន្ត្រីជំនិតរបស់លោក ហ៊ុន សែន រូបនេះ ជានរណា?
លោក ដួង តារា បច្ចុប្បន្ន ឡើងឋានៈដល់រដ្ឋលេខាធិការនៃទីស្ដីការគណៈរដ្ឋមន្ត្រី។ លោកក្លាយជាមន្ត្រីធំក្នុងជួររដ្ឋាភិបាល មិនមែនដោយសារអតីតភាព ឬប្រវត្តិតស៊ូនយោបាយជាមួយគណបក្សប្រជាជនកម្ពុជានោះទេ ប៉ុន្តែគឺដោយសារលោកជាអ្នកបង្កើត និងកាន់ទំព័រហ្វេសប៊ុក (Facebook) ផ្លូវការឱ្យលោក ហ៊ុន សែន គឺទំព័រហ្វេសប៊ុកជាភាសាអង់គ្លេស Samdach Hun Sen of Cambodia។
លោក ដួង តារា ថ្លែងប្រាប់អាស៊ីសេរីថា លោកមានកិត្តិយសដែលបានធ្វើការឱ្យលោក ហ៊ុន សែន។
លោក ដួង តារា៖«អ្វីដែលខ្ញុំធ្វើការជូនសម្ដេចនាយករដ្ឋមន្ត្រី[ហ៊ុនសែន]កន្លងមកនេះ គឺខ្ញុំធ្វើការដោយក្ដីគោរពស្រឡាញ់ដ៏ខ្ពង់ខ្ពស់ចំពោះសម្ដេចប្រមុខដឹកនាំ សេចក្ដីគោរពស្រឡាញ់ដ៏ខ្ពង់ខ្ពស់ចំពោះប្រជាពលរដ្ឋខ្មែរ ដែលខ្ញុំមានឱកាសបានជួយសង្គមជាតិយើង»។
ក្រៅពីកាន់ទំព័រហ្វេសប៊ុកឱ្យលោក ហ៊ុន សែន ហើយនោះ លោក ដួង តារា គឺជាអ្នកឈ្លបយកការណ៍តាមប្រព័ន្ធបច្ចេកវិទ្យាឱ្យលោក ហ៊ុន សែន ហើយក៏ជាអ្នកតាមដាន និងកំណត់មុខសញ្ញាសមាសភាពអ្នកចូលរួមសម្ដែងការទទួលស្វាគមន៍លោក ហ៊ុន សែន រាល់ពេលលោកធ្វើទស្សនកិច្ចនៅក្រៅប្រទេសផងដែរ។ បើនិយាយពីបុគ្គលខ្លួនលោកវិញ លោក ដួង តារា ជាមនុស្សចូលចិត្តបង្ហាញពីចិត្តធម៌ជួយអ្នកក្រីក្រ ហើយថតដាក់ហ្វេសប៊ុក ដែលមជ្ឈដ្ឋានមួយចំនួនរិះគន់លោកថា ជាមនុស្សពូកែសម្ដែង។
លោក ដួង តារា បានបញ្ចប់ការសិក្សាថ្នាក់បរិញ្ញាបត្រទស្សនវិជ្ជា និងអក្សរសាស្ត្រខ្មែរនៅសាកលវិទ្យាល័យភូមិន្ទភ្នំពេញ កាលពីឆ្នាំ១៩៩៧ និងមានវិញ្ញាបនបត្រសិក្សាវគ្គខ្លីៗមួយចំនួនទៀត។ លោកធ្លាប់រស់នៅ និងធ្វើការនៅរដ្ឋវ៉ាស៊ីនតោន (Washington State) សហរដ្ឋអាមេរិក ចន្លោះពីឆ្នាំ២០០០ ដល់ឆ្នាំ ២០០៩។ នេះបើយោងតាមប្រវត្តិរូបសង្ខេបមួយច្បាប់ ដែលអាស៊ីសេរីទទួលបាន។ ក្នុងប្រវត្តិរូបនោះទៀតសោត លោកព្យាយាមបង្ហាញថា លោកជាមនុស្សមានចំណេះ ជំនាញ និងបទពិសោធន៍ការងារជោគជាំ។
ប៉ុន្តែប្រភពដែលធ្លាប់ស្គាល់ និងដឹងពីសកម្មភាពរបស់លោក ដួង តារា ក្នុងពេលលោករស់នៅរដ្ឋវ៉ាស៊ីនតោននោះ បានរៀបរាប់ប្រាប់វិទ្យុអាស៊ីសេរីក្នុងលក្ខខណ្ឌមិនបញ្ចេញឈ្មោះព្រោះបារម្ភពីសុវត្ថិភាពថា លោក ដួង តារា ហាក់មិនមានជំនាញ និងអាជីពច្បាស់លាស់ឡើយ។
ប្រភពថ្លែងលាក់ឈ្មោះ៖«គាត់ធ្វើនេះបន្តិច ធ្វើនោះបន្តិចអ៊ីចឹងទៅ។ គាត់ធ្លាប់ធ្វើការនៅAsian Counseling Referral Service (ACRS)ជាកន្លែងមួយផ្ដល់ជាធនធានដល់សហគមន៍ខ្មែរមួយដែរ ប៉ុន្តែដូចជាមិនជាប់លាប់នោះទេ។ បងប្អូនដែលធ្លាប់ធ្វើការនៅក្នុងហ្នឹងជាបុគ្គលិកហ្នឹង ក៏មានការរិះគន់ច្រើនលើរបៀបដែលគាត់ធ្វើការ ទាំងសីលធម៌ក្នុងការធ្វើការ និងឥរិយាបថប្រាស្រ័យទាក់ទងជាមួយខ្មែរក្នុងសហគមន៍»។
ប្រភពដដែលរៀបរាប់ទៀតថា លោក ដួង តារា ជាមនុស្សគិតពីប្រយោជន៍ផ្ទាល់ខ្លួនជាធំ។ ជាឧទាហរណ៍លោកធ្លាប់បង្កើតសារមន្ទីរប្រល័យពូជសាសន៍ខ្មែរក្រហមមួយកន្លែងនៅទីក្រុងសៀអាថល (Seattle) នៃរដ្ឋវ៉ាស៊ីនតោន ដើម្បីកៀរគរថវិកាពីសហគមន៍ខ្មែរនៅទីនោះ ប៉ុន្តែដោយសារគ្មានទំនុកចិត្តពីពលរដ្ឋក្នុងសហគមន៍ សារមន្ទីរនោះក៏រលាយទៅវិញក្នុងរយៈខ្លី។
លោក ដួង តារា៖«ទីមួយ ដូចជាភាពមិនស្មោះត្រង់របស់គាត់ ដែលយើងសង្កេតឃើញទូទៅ។ ទីពីរ គាត់ជាមនុស្សឱកាសនិយម ពេលខ្លះដូចថា បើមានឱកាស គាត់សុំលុយកាក់ពីបងប្អូនខ្មែរ។ ឬក៏របៀបដែលគាត់បង្កើតសារមន្ទីរប្រល័យពូជសាសន៍(Killing Field)ដាក់ឈ្មោះគាត់ជានាយកប្រតិបត្តិ(Executive Director)ដើម្បីទទួលបានកម្រៃក្នុងការទទួលលុយមូលនិធិដែលចូលមក ហើយបែងចែកប្រាក់ខែសម្រាប់ខ្លួនគាត់ធំជាងគេអ៊ីចឹង។ ចំណុចមួយទៀត ទាក់ទងនឹងការរត់ពន្ធមនុស្សឱ្យមករស់នៅសហរដ្ឋអាមេរិកតាមរយៈអាពាហ៍ពិពាហ៍ ក៏ធ្លាប់មានរឿងអាស្រូវនេះដែរ»។
វិទ្យុអាស៊ីបានសាកសួរព័ត៌មានខ្លះៗពីលោក ដួង តារា អំពីការរស់នៅ និងសកម្មភាពរបស់លោកនៅទីក្រុងសៀអាថល (Seattle) នៃរដ្ឋវ៉ាស៊ីនតោន ប៉ុន្តែលោកមិនផ្ដល់ព័ត៌មានទាំងនោះទេ ដោយលោកនិយាយថា លោកឆ្លើយសំណួរផ្សេងច្រើនមកហើយ។
ចំពោះការរិះគន់ទាំងឡាយលើរូបលោកវិញ លោក ដួង តារា ថ្លែងថា លោកមិនទោមនស្សនឹងមតិទាំងនោះទេ។
លោក ដួង តារា៖«ការដែលអ្នកដទៃ ឬអ្នករិះគន់ទាំងឡាយ ដែលគេរិះគន់ខ្ញុំ គេគិតថា ខ្ញុំមានគំនិតទុច្ចរិតចង់ធ្វើធំ ធ្វើអ្វីនោះ គឺខ្ញុំមិនដែលគិតអ៊ីចឹងទេ។ ខ្ញុំមិនដែលចង់បានអ៊ីចឹងទេ។ អ្វីដែលខ្ញុំមានឱកាសធ្វើនៅជិតសម្ដេចនាយករដ្ឋមន្ត្រីនេះ គឺជាការផ្ដល់ឱកាសដ៏ធំធេងហើយសម្រាប់រូបខ្ញុំ ដើម្បីមានឱកាសជួយប្រជាពលរដ្ឋនៅក្នុងសង្គមជាតិយើងនេះ គឺជាសេចក្ដីដែលខ្ញុំចង់បានបំផុតហើយ»។
លោក ដួង តារា ថ្លែងទៀតថា លោកចង់បណ្ដុះគ្រាប់ពូជនៃអំពើល្អ និងចែករំលែកក្ដីស្រឡាញ់រវាងខ្មែរ និងខ្មែរ ហេតុដូច្នេះហើយបានជាលោកតែងតែបង្ហោះរូបភាពនៃសកម្មភាពមនុស្សធម៌នានាលើបណ្ដាញសង្គម អមជាមួយប្រយោគមួយឃ្លាថា « គ្រប់យ៉ាងល្អប្រសើរនៅក្នុងជីវិតរស់នៅ និងការងារ គឺចាប់ផ្ដើមពីអំពើល្អ ដោយចិត្តជ្រះថ្លាមិនបៀតបៀនជីវិតអ្នកដទៃ » ។
យ៉ាងណាក៏ដោយចុះ មានរឿងរ៉ាវមួយចំនួនដែលបង្ហាញថា អ្វីដែលលោកបានធ្វើ គឺខុសពីការនិយាយអះអាងទាំងនេះ។
លោក ដួង តារា បានរួមចំណែកធ្វើឱ្យអន្តរាយដល់ទ្រព្យសម្បត្តិនៃគ្រួសាររបស់អតីតរដ្ឋលេខាធិការក្រសួងវប្បធម៌ និងវិចិត្រសិល្បៈ លោក ថៃ នរៈសត្យា។ នេះបើយោងតាមសំណេរដ៏វែងអន្លាយលើហ្វេសប៊ុករបស់លោក ថៃ នរៈសត្យា កាលពីថ្ងៃទី ១៩ ខែមិថុនា ឆ្នាំ ២០១៩ ដែលរៀបរាប់ពីរឿងរ៉ាវស្នេហាបែកបាក់គ្នារវាងលោក និងអតីតភរិយា អ្នកស្រី ងិន ម៉ានីយ៉ា។ លោក ថៃ នរៈសត្យា បានទម្លាយថា លោក ដួង តារា មានទំនាក់ទំនងស្អិតល្មួតជាមួយអតីតភរិយារបស់លោកជាច្រើនឆ្នាំមកហើយ។ លោកបន្តថា ពួកគេបានឃុបឃិតគ្នាកម្ទេចផ្ទះវីឡារបស់កូនៗលោក ដើម្បីធ្វើជាផ្ទះល្វែងចំនួន ៣ ល្វែង ក្នុងនោះលោក ដួង តារា ទទួលបានចំណែកផ្ទះមួយល្វែងនៅចំកណ្ដាល។
លោក ដួង តារា បានបង្ហោះសារតបទៅវិញថា អតីតប្រពន្ធរបស់លោក ថៃ នរៈសត្យា ជាអ្នកកំណត់ឱ្យលោកទទួលបានផ្ទះល្វែងកណ្ដាលនោះ ហើយលោកក៏មិនបានឱ្យគាត់វាយកម្ទេចផ្ទះវីឡាចាស់នោះចោលដែរ។ លោក ដួង តារា បានចាត់ទុកសំណេររបស់លោក ថៃ នរៈសត្យា ថា ជាការមួលបង្កាច់កេរ្តិ៍ឈ្មោះរបស់លោក ប៉ុន្តែលោកបញ្ជាក់ថា លោកនឹងអនុគ្រោះឱ្យលោក ថៃ នរៈសត្យា។
យ៉ាងណាក៏ដោយចុះ លោក ថៃ នរៈសត្យា បានអស់តំណែងភ្លាមមួយរំពេច ក្រោយលោកទម្លាយរឿងរ៉ាវប្រេះឆាក្នុងគ្រួសារ ដែលមានជាប់ពាក់ព័ន្ធនឹងលោក ដួង តារា នេះ។ នៅថ្ងៃដដែលនោះ លោក ហ៊ុន សែន បានដកលោកពីតួនាទីជារដ្ឋលេខាធិការនៃក្រសួងវប្បធម៌ ខណៈលោក ដួង តារា វិញ នៅបន្តការងារជាជំនួយការផ្ទាល់របស់លោក និងជាអនុរដ្ឋលេខាធិការនៃទីស្ដីការគណៈរដ្ឋមន្ត្រី។ មួយឆ្នាំក្រោយមកទៀត លោក ហ៊ុន សែន ក៏បានតែងតាំងលោក ដួង តារា ជារដ្ឋលេខាធិការនៃទីស្ដីការគណៈរដ្ឋមន្ត្រី។
ក្រៅពីរឿងអាស្រូវមួយនេះហើយ ឥលូវនេះ លោក ដួង តារា ក៏កំពុងជាប់ជំពាក់ក្នុងរឿងអាស្រូវធំមួយទៀតដែរ។ នោះគឺជាករណីឆបោកលុយពលរដ្ឋជាច្រើនគ្រួសារក្នុងគម្រោងវិនិយោគដីធ្លី និងផ្ទះសម្បែងរបស់ក្រុមហ៊ុនភូមិខ្មែរគ្រុប (Phum Khmer Group) នៅខេត្តស្វាយរៀង។ លោក ដួង តារា ធ្លាប់ប្រាប់ពលរដ្ឋថា ក្រុមហ៊ុនភូមិខ្មែរគ្រុបនឹងមិនបោកប្រាស់ពួកគាត់ទេ។
លោក ដួង តារា៖«ខ្ញុំមកថ្ងៃនេះ ដើម្បីបញ្ជាក់អំពីភាពត្រឹមត្រូវ។ ហើយបងប្អូន អាចថតរូបជាមួយខ្ញុំអាចទុក ថាបើខ្ញុំទិញរបស់នៅទីនេះ បើមិនបានទេ គឺឯកឧត្ដម ដួង តារា អ្នកធានា គឺខ្ញុំធានាជូនបងប្អូន។ គឺក្រុមហ៊ុននេះ គឺមិនរកស៊ីបោកប្រាស់ជាមួយបងប្អូនអតិថិជននៅខេត្តស្វាយរៀងនោះទេ»។
ក្រុមហ៊ុនភូមិខ្មែរគ្រុបត្រូវបានបង្កើតឡើងកាលពីឆ្នាំ២០១៦ ដោយមានលោក សោម សុធា ជាម្ចាស់ក្រុមហ៊ុន។ ក្រុមហ៊ុនមួយនេះវិនិយោគលើវិស័យកសិកម្ម គម្រោងដីឡូតិ៍ និងផ្ទះល្វែង ព្រមទាំងការដាក់លុយយកចំណេញការប្រាក់ ជាដើម។ ប៉ុន្តែក្រោយវិបត្តិជំងឺកូវីដ-១៩ ក្រុមហ៊ុនបានលើកឡើងថា មានបញ្ហាសេដ្ឋកិច្ច និងមិនបានបំពេញតាមលក្ខខណ្ឌសន្យា ដូចជា ផ្ដល់ការប្រាក់ និងសាងសង់ផ្ទះឱ្យអតិថិជន នោះឡើយ រហូតដល់ពួកគាត់ផ្ទុះការតវ៉ា ហើយម្ចាស់ក្រុមហ៊ុនលោក សោម សុធា ត្រូវបានអាជ្ញាធរចាប់ដាក់ពន្ធនាគារ។ ចំណែកលោក ដួង តារា ដែលធ្លាប់ចេញមុខធានាអះអាងឱ្យក្រុមហ៊ុននោះវិញ លោកបែរជាបដិសេធថា លោកមិនជាប់ពាក់ព័ន្ធជាមួយក្រុមហ៊ុននេះឡើយ។
លោក ដួង តារា៖«ចំពោះក្រុមហ៊ុន គឺថា ខ្ញុំបញ្ជាក់ពីការធានាថា បងប្អូនទិញថ្ងៃហ្នឹង បានថ្ងៃហ្នឹងពិតប្រាកដមែន។ អ៊ីចឹងចំពោះក្រុមហ៊ុនដែលគាត់បានបើកយូរណាស់មកហើយ ខ្ញុំមិនដែលបានដឹងថា តើគាត់បានបើកពីពេលណាមក គឺខ្ញុំអត់ដឹងទេ ហើយទីពីរចំពោះក្រុមវិនិយោគរបស់គាត់ ៤-៥-៦ នាក់ ដែលគាត់ដាក់លុយរកស៊ីជាមួយគ្នា ក៏ខ្ញុំមិនបានដឹងដែរ។ ហើយអ្វីដែលខ្ញុំនិយាយនេះ គឺមិនមែននិយាយធានាចំពោះអ្នកវិនិយោគរបស់គាត់ ហើយក៏ខ្ញុំមិនបានធានាដល់អ្នកទិញរបស់គាត់ទាំងអស់ដែរ»។
ទោះជាមានការបដិសេធបែបនេះក្ដី ពលរដ្ឋជាច្រើនដែលចាញ់បោកក្រុមហ៊ុនភូមិខ្មែរគ្រុប (Phum Khmer Group) បានទាមទារឱ្យលោក ដួង តារា ចេញមុខទទួលខុសត្រូវរឿងនេះ ព្រោះលោកជាអ្នកសន្យានៅចំពោះមុខពលរដ្ឋ។
ពលរដ្ឋមួយរូប លោក ឡុង ប៊ុនធឿន ថ្លែងថា លោក និងពលរដ្ឋផ្សេងទៀត ជឿជាក់លើក្រុមហ៊ុន ដោយសារមានលោក ដួង តារា ជាអ្នកធានាអះអាងនេះឯង។
លោក ឡុង ប៊ុនធឿន៖«បងប្អូនអតិថិជនទាំងអស់ រួមទាំងខ្ញុំ ទុកចិត្តគាត់[ដួង តារា]ដោយសារតែគាត់និយាយអ៊ីចឹង ទើបគាត់ហ៊ានទិញ។ ដល់ឥឡូវ វាអត់ដូចពាក្យដែលគាត់និយាយពីដំបូងហ្នឹង បានជាចង់តវ៉ាទៅគាត់ សួរគាត់ ឱ្យគាត់ជួយរកដំណោះស្រាយ ដើម្បីឱ្យគាត់ជួយដោះស្រាយ ដូចដែលពាក្យគាត់ធានាថា បាន បើទិញមិនបាន គាត់អ្នកធានា»។
ទាក់ទងនឹងរឿងការវិនិយោគឆបោកនេះ ពលរដ្ឋរងគ្រោះនៅខេត្តស្វាយរៀងអាចនឹងខកចិត្ត នៅពេលឮការបកស្រាយរបស់លោក ដួង តារា ប៉ុន្តែសម្រាប់អ្នកធ្លាប់ស្គាល់ និងដឹងពីសកម្មភាពរបស់លោកពីមុនមកនោះ ករណីបែបនេះមិនមែនជារឿងចម្លែកនោះទេ។
ប្រភពថ្លែងលាក់ឈ្មោះ៖«បងប្អូនយើងនៅខាងក្រៅដែលស្គាល់ ជាពិសេសនៅរដ្ឋវ៉ាស៊ីនតោន ដែលស្គាល់ចរិតលក្ខណៈរបស់គាត់ គឺមិនសូវមានភាពចម្លែកនោះទេ ដោយសារគេស្គាល់ចរិតរបស់គាត់ពីមុនមក។ ប៉ុន្តែដែលយើងឃើញផលប៉ះពាល់ហ្នឹងធ្ងន់ធ្ងរដល់ប្រជាពលរដ្ឋ ជាពិសេសអ្នកក្រីក្រ គ្នារងគ្រោះដោយសារតែការរកស៊ីរបស់គាត់ ខ្ញុំគិតថា វាជារឿងមួយអកុសលមែនទែនសម្រាប់ជាតិយើង ដែលប្រជាពលរដ្ឋក្រហើយ មានអ្នកទៅជាន់ក ដោយយកតួនាទី យកតំណែងអស់ហ្នឹងទៅគាបសង្កត់គាត់ទៀត។ បើក្នុងសង្គមប្រជាធិបតេយ្យ កិច្ចការទាំងអស់ហ្នឹង បុគ្គលដែលប្រព្រឹត្តលក្ខណៈឆបោកអ៊ីចឹង ប្រហែលជាមិនរួចខ្លួនទេ»។
ថ្វីបើមានរឿងអាស្រូវ និងបញ្ហាចម្រូងចម្រាស់ជាប់ខ្លួនក៏ដោយ លោក ដួង តារា នៅតែអាចរស់នៅយ៉ាងសុខសាន្ត និងប្រើជីវិតដ៏ហ៊ឺហាជាមន្ត្រីជាន់ខ្ពស់រដ្ឋាភិបាល បើតាមអ្វីដែលលោកបង្ហោះនៅលើបណ្ដាញសង្គមហ្វេសប៊ុក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។