៦ឆ្នាំក្រោយ លោក សុខ អាន ធ្វើមរណកាលទៅកូនប្រុសរបស់អតីតរដ្ឋមន្ត្រីដៃស្ដាំដ៏មានឥទ្ធិពលរបស់លោក ហ៊ុន សែន មួយរូបបានទទួលតំណែងជារដ្ឋមន្ត្រី។ នេះទំនងថាសករាជថ្មីនៃគ្រួសារត្រកូល សុខ អាន បានចាប់ផ្ដើមឡើងវិញនៅក្នុងជួរថ្នាក់ដឹកនាំកំពូលៗនៅកម្ពុជា។
លោក ហ៊ុន សែន ដែលចាត់ចែងអំណាចសម្រាប់កូនប្រុស និងមនុស្សជំនាន់ក្រោយរបស់លោកបានសម្រេចឱ្យកូនប្រុសទី៤ របស់ លោក សុខ អាន គឺលោក សុខ សូកេន បានធ្វើជារដ្ឋមន្ត្រីក្រសួងទេសចរណ៍។
តើលោកអាចនឹងជួយឱ្យវិស័យទេសចរណ៍កម្ពុជាកែប្រែមុខមាត់ដែរ ឬយ៉ាងណា?
តើតួនាទីរបស់ លោក សុខ សូកេន នេះជួយយ៉ាងណាខ្លះដល់ លោក ហ៊ុន ម៉ាណែត គ្រួសារត្រកូល សុខ អាន និងការពង្រឹងអំណាចតពូជតវង្សត្រកូលនៅកម្ពុជា ?
ការទទួលបានតួនាទីជារដ្ឋមន្ត្រីទេសចរណ៍របស់លោក សុខ សូកេន កូនប្រុសលោក សុខ អាន នៅក្នុងជួររដ្ឋាភិបាលលោក ហ៊ុន ម៉ាណែត នេះក៏មិនខុសពីរដ្ឋមន្ត្រីវ័យក្មេងផ្សេងទៀតដែរ គឺជាការរៀបចំដោយលោក ហ៊ុន សែន ទាំងស្រុង។
ប៉ុន្តែតើឱកាសដែលលោក ហ៊ុន សែន ផ្ដល់ឱ្យគ្រួសារអតីតរដ្ឋមន្ត្រីដៃ១០០របស់លោកនេះ នឹងធ្វើឱ្យគ្រួសារនេះមានឥទ្ធិពលឡើងវិញដែរ ឬយ៉ាងណា?
ប្រវត្តិការសិក្សា
លោក សុខ សូកេន កើតនៅឆ្នាំ១៩៨៣ នៅភ្នំពេញ ជាកូនទី៤ របស់ លោក សុខ អាន និងអ្នកស្រី ថេង អាយអាន្នី។ លោក សុខ សូកេន ជាកូនភ្លោះជាមួយ លោក សុខ សូកាន ដែលមានតួនាទីជារដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់។
មិនខុសពីកូនៗមន្ត្រីគ្រាក់ៗនៃរបបដឹកនាំ ដែលបំផ្លាញប្រជាធិបតេយ្យ និងសិទ្ធិមនុស្សនៅកម្ពុជាដែរ លោក សុខ អាន ក៏បញ្ជូនកូនៗឱ្យទៅរៀននៅប្រទេសឈានមុខខាងប្រជាធិបតេយ្យ។
នៅវ័យជំទង់បងប្អូនភ្លោះទាំង២នាក់នេះបានដឹកដៃគ្នាទៅរៀនថ្នាក់មធ្យមសិក្សានៅសហរដ្ឋអាមេរិក។ ក្រោយចប់ថ្នាក់វិទ្យាល័យនៅអាមេរិក លោក សុខ សូកេន បានបន្តសិក្សាថ្នាក់បរិញ្ញាបត្រផ្នែកវិស្វករ និងពាណិជ្ជកម្ម នៅសាកលវិទ្យាល័យមែនប៊ន (Melbourne University) នៅប្រទេសអូស្ត្រាលី (Australia) បន្ទាប់មកបានត្រឡប់ទៅបន្តការសិក្សាថ្នាក់ក្រោយឧត្តមសិក្សាផ្នែកគ្រប់គ្រងហិរញ្ញវត្ថុ និងអភិវឌ្ឍន៍អចលនទ្រព្យ នៅសហរដ្ឋអាមេរិកវិញ។ លោក សុខ សូកេន បានបញ្ចប់ថ្នាក់បរិញ្ញាបត្រជាន់ខ្ពស់ផ្នែករដ្ឋបាលសាធារណៈ ពីមហាវិទ្យាល័យគោលនយោបាយសាធារណៈ លីគាន់យូ (Lee Kuan Yew) នៃសកលវិទ្យាល័យជាតិសិង្ហបុរី។ ក្រោយបានឆ្លងកាត់ការសិក្សារាប់ឆ្នាំនៅប្រទេសប្រជាធិបតេយ្យ ចុងក្រោយលោក សុខ សូកេន បែរងាកទៅចុះឈ្មោះរៀនថ្នាក់បណ្ឌិតនៅសាកលវិទ្យាល័យប៉េកាំងក្នុងប្រទេសចិនកុម្មុយនីស្តវិញ ដែលនេះទំនងមកពីការកើនឡើងឥទ្ធិពលចិននៅកម្ពុជា ស្របពេលលោក សុខ សូកេន កំពុងមានតួនាទីក្នុងលេខាធិការដ្ឋានជាតិកម្ពុជាសម្រាប់កិច្ចសហប្រតិបត្តិការមេគង្គ-ឡានឆាង។
ការងារ និងគ្រួសារ
មន្ត្រីរដ្ឋាភិបាលស៊ីប្រាក់ខែពីការបង់ពន្ធរបស់ពលរដ្ឋត្រូវបំពេញតួនាទី ដើម្បីប្រយោជន៍ជាតិ ប្រយោជន៍ពលរដ្ឋ ប៉ុន្តែផ្ទុយទៅវិញលោក សុខ សូកេន មិនធ្លាប់អៀនខ្មាសទាល់តែសោះក្នុងការបង្ហាញថា លោកជាប្រធានក្រុមការងារយុវជននៃគណៈកម្មាធិការគណបក្សក្រសួងការបរទេស និងសហប្រតិបត្តិការអន្តរជាតិ និងបានចំណាយពេលច្រើនចុះពង្រឹងបក្ស ហើយជាញឹកញយលោកតែងចុះទៅខេត្តតាកែវ។ លោក សុខ សូកាន ក៏ត្រូវចុះមូលដ្ឋានក្រោមឆ័ត្រសហភាពសហព័ន្ធយុវជនកម្ពុជា ស.ស.យ.ក របស់លោក ហ៊ុន ម៉ានី កូនប្រុសរបស់លោក ហ៊ុន សែន ដែរ។
លោក សុខ សូកេន ថែមទាំងផ្ញើសារ ដែលបង្ហាញពីទឹកចិត្តស្ម័គ្រស្មោះជាមួយក្រុមយុវជនកំពុងមានឥទ្ធិពលមួយនេះ។
លោក សុខ សូកេន៖ «ស្ថានភាពបរិបទកម្ពុជាឥឡូវនេះសព្វថ្ងៃនេះគឺមានលក្ខណៈពិសេសសម្រាប់យុវជនរបស់យើងតាមរយៈសហភាពសហព័ន្ធ យុវជនកម្ពុជា ក្នុងការចូលរួម ក្នុងការរក្សានូវស្ថិរភាពនយោបាយក៏ដូចជាការរក្សាសន្តិភាព និងការអភិវឌ្ឍន៍ប្រទេសជាតិ»។
នៅមុនពេលធ្វើជារដ្ឋលេខាធិការក្រសួងការបរទេសនៅឆ្នាំ២០១៦ លោក សុខ សូកេន ធ្លាប់ជាមន្ត្រីនៅក្រុមប្រឹក្សាអភិវឌ្ឍន៍កម្ពុជា ចាប់ពីឆ្នាំ២០០៩។ កាលពីឆ្នាំ២០០៨ ដល់ ២០០៩ លោក សុខ សូកេន ធា្លប់ជាមន្ត្រីនៅនាយកដ្ឋានជំរុញពាណិជ្ជកម្ម និងជានាយកទីស្ដីការក្រសួងពាណិជ្ជកម្មរបស់លោក ចម ប្រសិទ្ធិ។ ក្នុងពេលនោះហើយ ដែលលោក សុខ សូកេន បានរៀបការជាមួយកូនស្រីលោករដ្ឋមន្ត្រី គឺអ្នកស្រី ចម ក្រស្នា។ បច្ចុប្បន្នលោក សូកេន មានកូន៤នាក់ ស្រី៣នាក់ ប្រុសម្នាក់។ ចំណងអាពាហ៍ពិពាហ៍នេះ បង្ហាញច្បាស់ពីការផ្សារសាច់ឈាមជាមួយគ្រួសារ លោក ចម ប្រសិទ្ធ នៅពេលលោក សុខ អាន នៅមានអំណាចពេញដៃជាមន្ត្រីដៃស្ដាំ ឬដៃ១០០ របស់ លោក ហ៊ុន សែន។
បណ្ដាញគ្រួសារត្រកូលលោក សុខ អាន
ស្របពេលដែលអាពាហ៍ពិពាហ៍របស់ លោក សុខ សូកេន បង្ហាញពីចំណងទាក់ទងគ្រួសារ សុខ អាន និង ចម ប្រសិទ្ធ នេះ កូនប្រុសមួយរូបទៀតរបស់ លោក សុខ អាន លោក សុខ ពុទ្ធិវុធ ឯណោះក៏រៀបការជាមួយកូនស្រី លោក ហ៊ុន សែន គឺអ្នកស្រី ហ៊ុន ម៉ាលី ដែរ។ ក្រៅតែជាកូនប្រសារបស់បុរសខ្លាំង លោក ហ៊ុន សែន ហើយកូនច្បងលោក សុខ អាន រូបនេះក៏បានតំណែងជា រដ្ឋលេខាធិការក្រសួងប្រៃសណីយ៍ និងទូរគមនាគមន៍។
ចំណែកបងប្រុសភ្លោះរបស់ លោក សូកេន គឺលោក សុខ សូកាន ដែលជារដ្ឋលេខាធិការ ក្រសួងដែនដី ក៏បានរៀបការជាមួយកូនស្រីរបស់សេដ្ឋីនៅក្នុងស្រុកអ្នកឧកញ៉ា សំអាង វឌ្ឍនៈ ម្ចាស់ក្រុមហ៊ុន វឌ្ឍនៈ ដែលក្ដោបក្ដាប់មុខជំនួញធំៗជាច្រើននៅកម្ពុជារាប់តាំងពីដីធ្លី សំណង់អាគារ ធនាគារ និងស្រាបៀរ។
ជាមួយគ្នានេះ កូនប្រុសពៅលោក សុខ អាន គឺ លោក សុខ សង្វារ កំពុងកាន់តំណែងជាអនុរដ្ឋលេខាធិការនៅក្រសួងទេសចរណ៍ ដែលលោក លោក សុខ សូកេន នឹងទៅធ្វើជារដ្ឋមន្ត្រី។
ចំណែកកូនស្រីច្បងរបស់លោក សុខ អាន ឈ្មោះ សុខ សោម៉ា ជាម្ចាស់ក្រុមហ៊ុនរបស់គ្រួសារ សុខ អាន គឺក្រុមហ៊ុន សូម៉ា គ្រុប មានដើមទុនរាប់លានដុល្លារ ដែលពីមុន លោក សុខ ពុទ្ធិវុធ ជាអគ្គនាយក ហើយលោកបានផ្ទេរទៅឱ្យអ្នកស្រី ចម ក្រស្នា ជាប្អូនថ្លៃវិញ។
ជំនួញប្រទាក់ក្រឡាតាំងពីទឹកផឹករហូតដល់បច្ចេកវិទ្យាថាមពលទំនើប
ប្រពន្ធលោក សុខ សូកេន អ្នកស្រី ចម ក្រស្នា ដែលធំធាត់ និងរៀនសូត្រនៅសហរដ្ឋអាមេរិកនិយមនិយាយភាសាអង់គ្លេសជាងភាសាខ្មែរក្នុងទំនាក់ទំនងសាធារណៈ។ ជាអគ្គនាយកក្រុមហ៊ុន សោម៉ា គ្រុប នេះអ្នកស្រីក្ដោបក្ដាប់ជំនួញសំខាន់ៗ និងមានទំនាក់ទំនងជិតស្និទ្ធនឹងបណ្ដាមន្ត្រីក្រសួងពាក់ព័ន្ធ ដែលមានបណ្ដាញសមាជិកគ្រួសារចាក់ស្រេះគ្នា។
ក្រុមហ៊ុននេះមានបុត្រសម្ព័ន្ធជាច្រើនតាំងពីវិស័យសំណង់ កសិកម្ម បច្ចេកវិទ្យា ពាណិជ្ជកម្ម អប់រំ បដិសណ្ឋារកិច្ច អភិវឌ្ឍអចលនវត្ថុ ថាមពល និងទឹកស្អាតជាដើម។ ក្នុងនោះក្រុមហ៊ុន សោម៉ាហ្វាម (SOMA FARM) មានកសិដ្ឋានចិញ្ចឹមមាន់យកស៊ុត ចិញ្ចឹមគោ ផលិតប្រេងដូង និងផ្កាកេសរកូល។ មុខជំនួញផ្កាកេសកូល ឬអ័រគីដេ នេះទំនងមិនមែនចៃដន្យទេ នៅពេលរដ្ឋាភិបាលបង្កើតឱ្យមានមជ្ឈមណ្ឌលស្រាវជ្រាវ និងអភិរក្សកេសរកូល សុខអាន ភ្នំគូលែន ក្នុងខេត្តសៀមរាប។ សោម៉ាហ្វាមនេះ ក៏នាំចូលទំនិញជាច្រើនទៀតពីក្រៅប្រទេស តាំងពីកាហ្វេកញ្ចប់ ទឹកបន្ទាលកន្ទុយក្រពើ នំឃុកឃី និងសារាយសមុទ្រ។ ចំណែកក្រុមហ៊ុនអង្ករអប្សរា APSARA RICE) ជាក្រុមហ៊ុនផលិតអង្ករម្លិះរ៉ូយ៉ាល់ម្កុដ សម្រាប់នាំចេញ។ ក្រុមហ៊ុនគួរឱ្យចាប់អារម្មណ៍មួយទៀតគឺក្រុមហ៊ុន CAMBODIA POWER TRANSMISSION LINES ជាក្រុមហ៊ុន ដែលផ្គត់ផ្គង់បណ្ដាញបញ្ជូនថាមពលនៅភាគពាយ័ព្យប្រទេសគឺក្នុងខេត្ត សៀមរាប បាត់ដំបង និងបន្ទាយមានជ័យ កាលពីឆ្នាំ២០០៦ និងឆ្នាំ២០១៥ ក្នុងរយៈពេល៣០ឆ្នាំ ដោយចុះកិច្ចសន្យាជាមួយអគ្គិសនីកម្ពុជា។ ក្នុងវិស័យនេះ ក៏មានក្រុមហ៊ុន ថាមពលសោម៉ា (SOMA ENERGY) ផ្គត់ផ្គង់ថាមពលអគ្គីសនី ដើរដោយពន្លឺព្រះអាទិត្យ។ បន្ថែមពីនេះក៏មានក្រុមហ៊ុនផ្គត់ផ្គង់ទឹកស្អាត (SOMA KOBELCO) សហការជាមួយក្រុមហ៊ុន ជប៉ុន មានរោងចក្រទឹកស្អាតនៅកោះដាច់។ ក្រៅពីនេះក៏មាន ក្រុមហ៊ុនសោម៉ា ពាណិជ្ជ (SOMA TRADING) ដែលនាំចេញនាំចូលមុខទំនិញរបស់ក្រុមហ៊ុនដ៏ធំមួយនេះ។
ជំនួញនាំអង្ករចេញ ផ្គត់ផ្គង់បណ្ដាញបញ្ជូនថាមពល ផលិតទឹកស្អាត និងក្រុមហ៊ុននាំទំនិញចេញចូលនេះក៏មិនមែនចៃដន្យដែរ នៅពេលដែលលោក ចម ប្រសិទ្ធ ធ្លាប់ជារដ្ឋមន្ត្រីក្រសួងពាណិជ្ជកម្ម និងក្រោយមកជារដ្ឋមន្ត្រីក្រសួងឧស្សាហកម្ម និងសិប្បកម្ម ព្រមទាំងលោក សុខ ពុទ្ធិវុធ ជាប្រធានសហព័ន្ធស្រូវអង្ករកម្ពុជា។ មួយវិញទៀត អ្នកស្រី ចម ក្រស្នា ក៏មានបងស្រី ដែលគ្រោងនឹងឡើងជារដ្ឋមន្ត្រីក្រសួងពាណិជ្ជកម្ម បន្ទាប់ពីបានធ្វើជារដ្ឋលេខាធិការក្រសួងនេះជាច្រើនឆ្នាំ។ រីឯបងប្រុស គឺលោក ចម បូរិន្ទ វិញជារដ្ឋលេខាធិការ នៅក្រោមបង្គាប់របស់ លោក ចម ប្រសិទ្ធិ ជាឪពុកដែរ។
រដ្ឋមន្ត្រីថ្មីត្រូវប្រឈមមុខនឹងវិបត្តិកម្រិតប្រទេស
ងាកមកវិស័យទេសចរណ៍វិញ នៅកម្ពុជាវិស័យនេះមិនអាចប្រកួតប្រជែងជាមួយប្រទេសក្បែរខាងវៀតណាម និងថៃបាន។ នៅក្រោយវិបត្តិកូវីដ-១៩ វិស័យនេះក៏កាន់តែធ្លាក់ចុះបន្ថែមទៀត។
ទោះជាយ៉ាងណាមកដល់ពេលនេះ លោក សុខ សូកេន មិនទាន់បង្ហាញផែនការគ្រប់គ្រងវិស័យនេះទេ ហើយក៏គេនៅមិនអាចស្មានដឹងថា ឈាមថ្មីរបស់គណបក្សប្រជាជនកម្ពុជារូបនេះ នឹងមានមហិច្ឆតាយ៉ាងណានៅក្នុងវិស័យនេះដែរ។
ប៉ុន្តែនៅក្នុងវិស័យការបរទេសវិញលោក សុខ សូកេន អះអាងថា លោកជាស្លឹកឈើ ដែលជ្រុះមិនឆ្ងាយពីគល់។
លោក សុខ សូកេន៖ «ឪពុករបស់ខ្ញុំបានទៅធ្វើទូតនៅប្រទេសឥណ្ឌា តាំងពីឆ្នាំ១៩៨៦ ហើយខ្ញុំក៏មានឱកាសទៅនៅប្រទេសឥណ្ឌារយៈពេល៣ឆ្នាំ។ អ៊ីចឹងនោះគឺជាអ្វី ដែលបានដក់នៅក្នុងអារម្មណ៍របស់ខ្ញុំតាំងពីតូចមករហូត»។
ប្រធានសហព័ន្ធសហជីពកម្មករនិយោជិត វិស័យទេសចរណ៍កម្ពុជា លោក ម៉ម រិទ្ធី មើលឃើញថា ដើម្បីទាក់ទាញភ្ញៀវទេសចរណ៍អន្តរជាតិ និងបង្កើនចំនួនទេសចរណ៍ជាតិចាំបាច់ត្រូវមានផែនការយុទ្ធសាស្ត្រថ្មី។
លោក ម៉ម រិទ្ធី៖ «យើងឃើញថា របាយការណ៍របស់ក្រសួងថា មានការកើនឡើង ប៉ុន្តែយើងឃើញថាភ្ញៀវវាស្ងាត់ ប្រជាជនរកស៊ីនៅក្នុងវិស័យទេសចរណ៍ហ្នឹងនៅតែមានបញ្ហាសេដ្ឋកិច្ចទាំងអស់ហ្មង បញ្ហាជាថ្នាក់ប្រទេសហើយឥឡូវនេះ។ បើពួកគាត់អត់ប្រែប្រួលយុទ្ធសាស្ត្រថ្មី ហើយយកតាមយុទ្ធសាស្ត្រចាស់ដដែល គឺអត់អីចម្លែកទេ រឿងហ្នឹងនៅតែដដែលហ្នឹង។ បើសិនតែរៀបចំតែថ្នាក់ជាតិ អត់ស៊ីជម្រៅទៅថ្នាក់មូលដ្ឋាន ផែនការមិនជោគជ័យទេ។ អ៊ីចឹងសំខាន់ត្រូវតែសិក្សាពីថ្នាក់មូលដ្ឋានទៅ កែរចនាសម្ព័ន្ធមន្ត្រីទាំងអស់ ដែលនៅខាងក្រោម តើពួកគាត់ធ្វើការកន្លងមកយ៉ាងម៉េច។ ទី២ ត្រូវតែមានការសិក្សាស្រាវជ្រាវពីថ្នាក់មូលដ្ឋានទៅលើ ដើម្បីឱ្យបានដឹងច្បាស់ពីឫសគល់ ដើមហេតុ ដែលធ្វើឱ្យប្រកួតប្រជែងជាមួយប្រទេសជិតខាងយើងអត់បាន»។
លោកថា ជារដ្ឋមន្ត្រីថ្មីផង និងជាយុវជនសម័យថ្មីផង លោក សុខ សូកេន គួរតែបង្ហាញសមត្ថភាព ឱ្យប្លែកពីមេដឹកនាំចាស់ៗ។
ចំណែកយុវជនចលនាមាតាធម្មជាតិ ដែលស្រឡាញ់បរិស្ថាន និងធនធានធម្មជាតិ លោក ថុន រដ្ឋា ស្នើឱ្យរដ្ឋមន្ត្រីថ្មីបន្តជំនាន់ យកចិត្តទុកដាក់ពង្រីកទេសចរណ៍ធម្មជាតិ។
លោក ថុន រដ្ឋា៖ «យើងចង់ឃើញជាងគេគឺការអភិវឌ្ឍទេសចរណ៍ ដែលផ្សារភ្ជាប់ជាមួយធម្មជាតិ ហើយសម្រាប់ប្រជាជនទូទៅ មិនមែនដូច ដែលយើងឃើញគឺវិស័យទេសចរណ៍ភាគច្រើនមានការកាប់បំផ្លាញ(ព្រៃឈើ)ជាពិសេសភោគទ្រព្យ វិស័យទេសចរណ៍ទាំងអស់ហ្នឹងបានធ្លាក់តែទៅលើក្រុម ឬបក្សពួកបុគ្គលមានអំណាច ឬក៏អាចមានរហូតទៅដល់ការយកដីឧទ្យានជាតិ ដែលជាសម្បត្តិរបស់ពួកយើងទាំងអស់គ្នា ជាពិសេសហ្នឹងក៏មានផលប៉ះពាល់ទៅដល់ប្រជាពលរដ្ឋមូលដ្ឋាន ដែលពួកគាត់អាស្រ័យផលទៅលើធនធានធម្មជាតិ»។
យ៉ាងណាក៏ដោយតំណែងថ្មីរបស់ លោក សុខ សូកេន នេះទំនងទៅណាមិនឆ្ងាយពីការរកស៊ីរបស់គ្រួសារ សុខ អាន និងប្រពន្ធរបស់លោកដែរ គឺក្រុមហ៊ុន សោម៉ា គ្រុម មានគម្រោងសម្រាប់អនាគតរួចជាស្រេចគឺទាក់ទងនឹងជំនួញបដិសណ្ឋារកិច្ច និងបង្កើតសណ្ឋាគារទំនើប និងប្រណិត។
មាននិស្ស័យ តែទំនងជាគ្មានវាសនា
ទោះជាការឡើងជារដ្ឋមន្ត្រីរបស់ លោក សុខ សុកេន ជាជំហានធំមួយរបស់គ្រួសារ លោក សុខ អាន ក្ដីក៏អ្នកវិភាគនយោបាយមិនមើលឃើញថា លោកនឹងមានឥទ្ធិពលអ្វីលើគណៈរដ្ឋមន្ត្រីលោក ហ៊ុន ម៉ាណែត ទេ។
អ្នកវិភាគនយោបាយ លោក គឹម សុខ មើលឃើញថា លោក សុខ សូកេន រួមនឹងបងប្អូនរបស់លោក ផ្សេងទៀតមិនខ្លាំងដល់កម្រិតដូច លោក សុខ អាន ដែលជាគ្រូយុទ្ធសាស្ត្រ និងមានស្នាដៃជួយជ្រោមជ្រែងលោក ហ៊ុន សែន ប្រមូលអំណាចទាំងអស់ចេញពីក្រុមរដ្ឋមន្ត្រី ហើយបង្វិលមកដាក់នៅគណៈរដ្ឋមន្ត្រីស្ទើរទាំងស្រុង។
លោក គឹម សុខ៖ «ក្នុងការជួយ ហ៊ុន សែន គឺជាគ្រូរបស់ ហ៊ុន សែន បើទោះបីជា សុខ អាន មិនកាន់កងទ័ពក៏ដោយ ក៏ប៉ុន្តែ សុខ អាន រហូតទៅដល់រៀបគម្រោងក្នុងការកែទម្រង់កងទ័ពឱ្យ ហ៊ុន សែន ទៅទៀត។ មានន័យថា លោក សុខ អាន អាចមានឥទ្ធិពលខ្លះទៅលើកងទ័ពផង ប៉ុន្តែកូនរបស់ សុខ អាន វិញចំណុចនេះអត់មានទាល់តែសោះ ចំណុចគន្លឹះ២ហ្នឹង គឺគ្រូយុទ្ធសាស្ត្ររបស់រដ្ឋាភិបាលក៏កូន សុខ អាន អត់មាន ឥទ្ធិពលលើកងទ័ព ឬក៏កងកម្លាំងប្រដាប់អាវុធ ប៉ូលិស ទាហាន ឬក៏ប៉េអិមក្ដី ក៏កូនលោក សុខ អាន នៅឆ្ងាយណាស់ ប៉ុន្តែគឺ ក្រុមគ្រួសារត្រកូលហ៊ុន ទៅវិញទេក្ដាប់ណែន»។
មួយវិញទៀត លោក គឹម សុខ ថា លោក ហ៊ុន សែន នឹងមិនបើកឱ្យក្រុមមន្ត្រីអាចមានឥទ្ធិពលគំរាមកំហែងដល់ការកាន់អំណាចរបស់ លោក ហ៊ុន ម៉ាណែត បានទេ។
ទាក់ទងនឹងការំពឹងពីការងាររបស់រដ្ឋមន្ត្រីថ្មីនេះដែរ អ្នកឃ្លាំមើលថា ក្រុមមន្ត្រីគណបក្សប្រជាជនកម្ពុជា ទាំងចាស់ ទាំងក្មេងដូច លោក សុខ សូកេន នេះជាដើម មិនសូវជាយកចិត្តទុកដាក់ដល់ពលរដ្ឋទេ ពួកគេធ្វើការ ដើម្បីតែគណបក្ស ហើយមកដល់ដំណាក់កាលចុងក្រោយនេះ គឺដើម្បីតែពង្រឹងការបែងចែកអំណាចគ្នាតពូជត្រកូល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។