បទពាក្យ ៧
១. នំខ្មែរនំម៉ែបង្កើតមក លីវយីគោកធ្លកម្ចាស់ក្សត្រិយ៍ ស្ដេចដំបូងគេដ៏ល្បាញល្បី គ្រងទឹកគ្រងដីថែប្រជា។
២. នំខ្មែរមានរសឆ្ងាញ់ពិសា តំណាងដូនតាពីសួគ៌ា បានហូបនំខ្មែរគាប់ទ័យា នាំភាពរមនាសុខសួស្ដី។
៣. នំខ្មែរមានអ្វីខ្លះទៅមិត្ត? កវីសូមគិតគូរស្រដី បង្ហាញប្រាប់ញាតិទាំងប្រុសស្រី ខំឈ្លកលកលៃបង្ហាញប្រាប់។
៤. មាននំបញ្ចុក ក្រុប ក្រូច កង នំពងអន្សង ត្នោត ដំណាប់ នំដុត នំពុម្ព ម៉ែបង្ហាត់ នំខ្មែរមិនបាត់ ដូរប្រាក់រៀល។
៥. មាននំអន្សម គ្រក់ គម កូរ នំខ្មែរសំបូរនំល្ពៅ ជាល នំទៀន អំបុក គ្មានគេដៀល នំនាំប្រាក់រៀលកើនសេដ្ឋកិច្ច។
៦. មាននំកាតំ ពពាយ ខ្ញី នំហ៊ានស្រដី ខ្មែរកុំភ្លេច គួរខ្មែរលើកស្ទួយត្បូងជើងលិច កើតក្រែងរិលរេចក្រោយលែងស្គាល់។
៧. មាននំអាកោ បត់ អំបែង នំស្លឹកស្រស់ក្មេង គ្មានពិភាល់ នំបត់ នំលត សុទ្ធគេស្គាល់ បានស្រង់រសផ្ទាល់ភ្លេចលែងបាន។
៨. មាននំអំបែង ចាក់ចុរ ធ្មៃ ជាតិខ្មែរឈ្លាសវៃ ច្នៃឲ្យថ្កាន នំអំបែងខ្មែរស្គាល់សន្តាន នាំខ្មែរសុខសាន្តពេញបូរី។
៩. មាននំច័ក្កច័ន ត្រចៀកព្នង នំចាហួយផង ការ៉េមកី នំតាប៉ែ ភឹង សង់ខ្យាស្រី ហូបបានគ្រប់វ័យមិនជិនណាយ។
១០. មាននំក្រឡាន ពោត ប៉េងប៉ោះ ជ័រគល្បីអស់ទីជិតឆ្ងាយ នំបេ កង់ខ្វៀននាំសប្បាយ ខ្មែរនៅជិតឆ្ងាយឲ្យរាប់អាន។
១១. មាននំបំពង បង្អែមត្នោត ចេកខ្ទិះ គេកោតថា ថ្កើងថ្កាន លាយរសខ្ទិះដូងឆ្ងាញ់រកគ្មាន សន្តានព្រេងលានពេញនិយម។
១២. មាននំផ្កាស្នោនំតាឡៃ ខ្មែរខំកែច្នៃល្អសក្ដិសម ស្ទួយជាតិឲ្យខ្ពស់យសឧត្ដម ថ្លៃថ្លាមនោរម្យក្រៃកន្លង។
១៣. មាននំប៉ាក្រុង នំកន្ទ្រាំ ចេកចៀនភូមិខ្ញុំ សមម៉ត់ហ្មង បើបានភ្លក់ហើយឈប់រំលង ញាតិមិត្តប្អូនបងស្នេហ៍រាល់ថ្ងៃ។
១៤. មាននំចាក់ចុរនំចេកបុក នំនាំខ្ពស់មុខនាំឈ្លាសវៃ នំខ្មែរបុរាណនំប្រពៃ ធាតុផ្សំមិនថ្លៃងាយរកបាន។
១៥. មាននំត្រៀបបាយ នំត្រឡាច នំហូបមិនខ្លាចទុក្ខរុកក្នុងប្រាណ ហូបនាំសុខភាពគ្រប់សន្ដាន នំនាំខ្មែរបានសួគ៌សិរី។
១៦. មាននំប្រអួល នំជើងជ្រូក បានឃើញសូមលូកភ្លក់ពីរបី បានជ្រាបរសឆ្ងាញ់ចេញស្រដី សូមអ្នកលកលៃលក់ឲ្យខ្លះ។
១៧. មាននំសែសយ ត្រាវ សណ្ដែក បំពួនស្ករ ប្លែករសឆ្ងាញ់ណាស់ បានហូបរួចហើយចង់ឃើញម្ចាស់ លះភាពអៀនខ្មាសចង់ហូបទៀត។
១៨. មាននំដំឡូង កំពឹសចៀន កូនខ្មែរខំរៀនច្នៃគ្រប់ស្នៀត រកឃើញនំខ្មែរថ្មីថែមទៀត រាស្ត្រខ្មែរជ្រកជ្រៀតទាញយកផល។
១៩. មាននំផ្លែអាយនំកើតក្ដី នំជនប្រុសស្រីធ្លាប់បានយល់ ហូបពេលត្រជាក់សុខលែងខ្វល់ ហូបតិចឆ្ពោះដល់ឆ្ងាញ់ជាប់ចិត្ត។
២០. មាននំម្សៅជ្រែ ក្រឡោជី នំផ្សំធាតុពីម្សៅមីស្អិត នំបំពងខ្លាញ់ កន្ទក់ល្អិត នំឆ្ងាញ់ជាប់ចិត្តលំអងរំចេក។
២១. មាននំគ្រាប់ស្លែង ក្រម៉ៅថត នំសុំទីចតទីដំណេក ចតនៅស្រុកខ្មែរពន្លឺផ្លេក បំបាត់ភាពស្រេករសនំខ្មែរ។
២២. ទាំងនេះជានំរបស់យើង សូមថែដាក់ទ្រើងកុំគេចកែ លក់ទិញច្នៃស្ទួយនំកេរខ្មែរ ឲ្យល្បីហូរហែដូចដូនតា៕៚