នាទីវេទិកាអ្នកស្ដាប់វិទ្យុអាស៊ីសេរី នៅយប់ថ្ងៃអង្គារ ទី១១ ខែមីនា បានជជែកពិភាក្សាលើប្រធានបទ៖ ហេតុអ្វីបានជារដ្ឋាភិបាលកម្ពុជាគ្រប់គ្រងអំពើឆបោកតាមអនឡាញលែងបាន?
សមិទ្ធផលធំមួយដែលរដ្ឋាភិបាលកម្ពុជាទទួលបានក្នុងសម័យកាលគ្រប់គ្រងប្រទេសដោយនាយករដ្ឋមន្ត្រីកូន គឺលោក ហ៊ុន ម៉ាណែត នេះ គឺវិបត្តិញាំញីកាន់តែខ្លាំងឡើងៗ នៃឧក្រិដ្ឋកម្មឆបោកតាមអនឡាញ។ កេរ្តិ៍ឈ្មោះរបស់ប្រទេសក្រីក្រមួយនេះ កំពុងរងនូវភាពអាប់ឱន និងអាម៉ាស់នៅលើឆាកអន្តរជាតិ ដោយសារត្រូវក្រុមឧក្រិដ្ឋជន ជាពិសេសជន ជាតិចិនមួយចំនួន យកទៅប្រើប្រាស់ធ្វើជាឈ្នាន់សម្រាប់ប្រព្រឹត្តអំពើឆបោកលុយពីពិភពលោកក្នុងទំហំទឹកប្រាក់វាល់លានដុល្លារ។
ប្រទេសខ្លះបានហាមប្រាម ឬព្រមានពលរដ្ឋរបស់ខ្លួនឱ្យប្រុងប្រយ័ត្ននៅពេលធ្វើដំណើរមកលេង ឬមករកការងារធ្វើនៅកម្ពុជា។ កាន់តែធ្ងន់ធ្ងរជាងនេះទៀត ប្រទេសថៃដែលជាប្រទេសភូមិផងរបងជាមួយកម្ពុជា បច្ចុប្បន្ននេះកំពុងពិនិត្យមើលលទ្ធភាពនៃការសាងសង់ជញ្ជាំង ឬរបងនៅតំបន់ព្រំដែនមួយចំនួនជាប់កម្ពុជា ដើម្បីទប់ស្កាត់បញ្ហាឆបោកតាមអនឡាញនេះ ក្រោយអាជ្ញាធរនៃប្រទេសនេះបានបញ្ជាឱ្យកាត់ផ្ដាច់ការផ្គត់ផ្គង់ប្រព័ន្ធអគ្គិសនី ទូរគមនាគមន៍ និងសេវាអ៊ីនធឹណិតនៅតំបន់ប៉ោយប៉ែត។ នៅកម្ពុជាឯណេះវិញ ផលប៉ះពាល់បានធ្លាក់មកដល់ម្ចាស់ផ្ទះខ្លួនឯង ក្នុងនោះពលរដ្ឋខ្មែរមួយចំនួនត្រូវបានក្រុមឧក្រិដ្ឋជនសម្លាប់បំបិទមាត់។
តើបញ្ហាឆបោកតាមអនឡាញប្រព្រឹត្តចេញពីទឹកដីកម្ពុជា ឈានដល់ចំណុចដែលរដ្ឋាភិបាលគ្រប់គ្រងលែងបាន ហើយត្រូវប្រកាសអាសន្នហើយឬនៅ?
តើកម្ពុជាគួរចាត់វិធានការបែបណាខ្លះដើម្បីដោះស្រាយបញ្ហាប្រឈមដ៏ស្មុគស្មាញនេះឱ្យបានជោគជ័យ?
សូមលោកអ្នកនាងចុចស្ដាប់សំឡេង នៃកិច្ចពិភាក្សារវាងលោក មាន ឫទ្ធិ ជាមួយលោក ឌី ថេហូយ៉ា ប្រធានផ្នែកប្រឆាំងការជួញដូរមនុស្ស និងទេសន្តរប្រវេសក៍ នៃអង្គការ សង់ត្រាល់ និងលោក ប៉ោ មករា អ្នកសិក្សាស្រាវជ្រាវបញ្ហាសង្គម និងនយោបាយ ដែលបានជជែកពិភាក្សាអំពីរឿងនេះ ក្នុងនាទីវេទិកាអ្នកស្ដាប់វិទ្យុអាស៊ីសេរី នៅរាត្រីថ្ងៃអង្គារ ទី១១ ខែមីនា ឆ្នាំ២០២៥៕