[អានអត្ថបទជា ភាសាអង់គ្លេស៖ Red flags abound in Prince Group's offshore dealings]
នេះគឺជាអត្ថបទទី២ក្នុងចំណោមសេចក្តីរាយការណ៍ចំនួន៣ភាគអំពីសម្ព័ន្ធក្រុមហ៊ុន ព្រីនស៍ គ្រូប។ សូមចុចត្រង់នេះ ដើម្បីអាន អត្ថបទទី១ នៃសេចក្តីរាយការណ៍ស៊ើបអង្កេតរបស់យើង។
ចាប់តាំងពីក្រោយពេលបង្កើតសម្ព័ន្ធក្រុមហ៊ុន ព្រីនស៍ គ្រូប (Prince Group) ដំបូងកាលពី៨ឆ្នាំមុន ឈ្មោះរបស់សម្ព័ន្ធក្រុមហ៊ុននេះបានក្លាយជាយីហោពាណិជ្ជកម្មដ៏ធំបំផុតមួយដែលគេឃើញមាននៅគ្រប់ទីកន្លែងក្នុងប្រទេសកម្ពុជា។ ឈ្មោះរបស់ក្រុមហ៊ុននេះ គ្របដណ្ដប់ស្ទើរគ្រប់ច្រកល្ហកនៃទីផ្សារពាណិជ្ជកម្មនៅកម្ពុជា រាប់ចាប់តាំងពីអគារពាណិជ្ជកម្ម សប់ភីង ម៉ល (Shopping Malls) ផ្សារទំនើប ធនាគារ កាស៊ីណូ អាផាតធឺមិន (Apartments) រោងកុន អគារការិយាល័យ យន្តហោះឯកជន នាវាកម្សាន្ត ផលិតកម្មខ្សែភាពយន្ត សណ្ឋាគារ ក្រុមហ៊ុនផ្តល់ទុនផ្សងរកស៊ីសម្រាប់អាជីវកម្មដំបូង (Venture Capital Firms) រហូតដល់ សេវាកម្មដឹកជញ្ជូន ភោជនីយដ្ឋាន និងវិស័យជាច្រើនទៀត។
វិសាលភាពនៃអាជីវកម្មរបស់សម្ព័ន្ធក្រុមហ៊ុននេះ ក៏ត្រូវបានពង្រីកឆ្ងាយហួសពីដែនដីនៃប្រទេសកម្ពុជាដែរ។ ថ្នាក់ដឹកនាំរបស់សម្ព័ន្ធក្រុមហ៊ុននេះ មានផលប្រយោជន៍ផ្នែកគ្រប់គ្រងអាជីវកម្មក្នុងក្រុមហ៊ុនយ៉ាងហោចណាស់ចំនួន៣ ដែលបានចុះបញ្ជីនៅលើទីផ្សារភាគហ៊ុនក្រុងហុងកុង (Hong Kong Stock Exchange)។ ប្រធានសម្ព័ន្ធក្រុមហ៊ុន ព្រីនស៍ គ្រូប លោក ចេន ហ្ស៊ី (Chen Zhi) ជាជនជាតិចិនអាយុ៣៦ឆ្នាំ ដែលជាបុគ្គលដ៏អាថ៌កំបាំងម្នាក់ បានឡើងតួនាទីខ្ពស់ជាបន្តបន្ទាប់រហូតក្លាយជាទីប្រឹក្សាជាន់ខ្ពស់ម្នាក់របស់នាយករដ្ឋមន្ត្រីបច្ចុប្បន្ន និងអតីតនាយករដ្ឋមន្ត្រីកម្ពុជា។ លោកគឺជាម្ចាស់កម្មសិទ្ធិមួយភាគបួននៃក្រុមហ៊ុនលក់ស៊ីហ្គារ (Cigar) លំដាប់ជាតិរបស់ប្រទេសគុយបា (Cuba) ដែលមានតម្លៃ ២,៨ ពាន់លានដុល្លារ និងជាម្ចាស់អគារការិយាល័យតម្លៃ ១១៤លានដុល្លារ ស្ថិតក្នុងម្តុំអ្នកមានបំផុតមួយនៅទីក្រុងឡុងដ៍ (London) នៃចក្រភពអង់គ្លេស។
ជារួម វិទ្យុអាស៊ីសេរីបានរកឃើញទ្រព្យសម្បត្តិតម្លៃជាង ១,៥ពាន់លានដុល្លារ និងការវិនិយោគនៅក្នុងប្រទេសចំនួន៣១ ដែលអ្នកគ្រប់គ្រងជាន់ខ្ពស់របស់សម្ព័ន្ធក្រុមហ៊ុន ព្រីនស៍ គ្រូប មានភាគហ៊ុននៅក្នុងប្រទេសទាំងនោះ។
ទោះបីជាយ៉ាងណា សម្ព័ន្ធក្រុមហ៊ុននេះ មិនដែលបញ្ចេញឱ្យដឹងនូវព័ត៌មានទាំងស្រុងនៃទ្រព្យសម្បត្តិរបស់ខ្លួនទាំងនេះឡើយ។ សម្ព័ន្ធក្រុមហ៊ុននេះ អះអាងថា កំណើនរាប់ពាន់លានដុល្លារនៃទ្រព្យសម្បត្តិរបស់ក្រុមហ៊ុនក្នុងរយៈពេល៨ឆ្នាំចុងក្រោយនេះ គឺដោយសារតែការអនុវត្តអាជីវកម្មប្រកបដោយសុភនិច្ឆ័យ ហើយរហូតមកទល់ពេលថ្មីៗនេះ គឺដោយសារតែការរីកចម្រើនឥតឈប់ឈរយ៉ាងឆាប់រហ័សនៃទីផ្សារអចលនទ្រព្យនៅក្នុងប្រទេសកម្ពុជា។
ក៏ប៉ុន្តែ ការស៊ើបអង្កេតមួយរបស់វិទ្យុអាស៊ីសេរីដែលរួមមានការពិនិត្យមើលលើកំណត់ត្រារបស់តុលាការ ឯកសារធនាគារ បង្កាន់ដៃទូទាត់ប្រាក់ និងបទសម្ភាសន៍ជាមួយអ្នកធ្លាប់បម្រើការងារក្នុងនៅក្រុមហ៊ុននេះ ប្រាប់ឱ្យដឹងពីរឿងរ៉ាវផ្សេងពីនេះ។
ក្នុង អត្ថបទទី១នៃសេចក្ដីរាយការណ៍ជាភាគរបស់យើង វិទ្យុអាស៊ីសេរី ពិនិត្យមើលការកើនឡើងយ៉ាងឆាប់រហ័សនៃចំណងទំនាក់ទំនង ឬខ្សែបណ្តាញនយោបាយ និងឧក្រិដ្ឋភាពដែលសម្ព័ន្ធក្រុមហ៊ុន ព្រីនស៍ គ្រូប រងការចោទប្រកាន់។
នៅក្នុងអត្ថបទទី២នៃសេចក្ដីរាយការណ៍ស៊ើបអង្កេតនេះ យើងនឹងពិនិត្យមើលថាតើសម្ព័ន្ធក្រុមហ៊ុន ព្រីនស៍ គ្រូប បានបង្វិលលុយរាប់លានដុល្លារយ៉ាងលាក់លៀមនៅជុំវិញពិភពលោកតាមរបៀបមួយដែលក្រុមអ្នកជំនាញនិយាយថា បានធ្វើឡើងក្នុងទម្រង់ជាច្រើននៃការលាងលុយកខ្វក់ បានដោយរបៀបណា។
ការស៊ើបអង្កេតរបស់វិទ្យុអាស៊ីសេរី បានលាតត្រដាងឱ្យដឹងថា ក្រុមហ៊ុនមួយដែលគ្រប់គ្រងដោយលោក ចេន ហ្ស៊ី គឺក្រុមហ៊ុន Amiga Entertainment ចុះបញ្ជីនៅលើកោះ Isle of Man ដែលស្ថិតនៅចន្លោះចក្រភពអង់គ្លេស (U.K.) និងប្រទេសអៀរឡង់ (Ireland)មែនទែនទៅ គឺជាក្រុមហ៊ុនសំបកមួយ ដែលប្រើប្រាស់យុទ្ធវិធីនៃការលាងលុយកខ្វក់ដែលជាប់សង្ស័យទាំងនេះ។
ការស៊ើបអង្កេតរបស់វិទ្យុអាស៊ីសេរីនេះ រកឃើញភស្តុតាងដូចគ្នាមិនខុសពី ការចោទប្រកាន់នានាដែលធ្វើឡើងដោយរដ្ឋអាជ្ញាចិន ដែលថា ទឹកប្រាក់ភាគច្រើនដែលសម្ព័ន្ធក្រុមហ៊ុន ព្រីនស៍ គ្រូប បានប្រើដើម្បីកសាងអាណាចក្រពាណិជ្ជកម្មរបស់ខ្លួន គឺបានមកតាមរយៈអំពើឆបោក រួមទាំងលុយរាប់រយលានដុល្លារដែលត្រូវបានគេបង្វិលចេញពីបនល្បែងស៊ីសងខុសច្បាប់ និងបណ្ដាញលាងលុយកខ្វក់ដ៏ទូលំទូលាយផងដែរ។
វិទ្យុអាស៊ីសេរី បានព្យាយាមទាក់ទងលោក ចេន ហ្ស៊ី ច្រើនលើកច្រើនសា តែពុំទទួលបានជោគជ័យ។ ក៏ប៉ុន្តែ សម្ព័ន្ធក្រុមហ៊ុន ព្រីនស៍ គ្រូប បដិសេធរាល់ការចោទប្រកាន់នានាមកលើក្រុមហ៊ុន និងប្រធានរបស់ខ្លួន។ អ្នកនាំពាក្យម្នាក់របស់សម្ព័ន្ធក្រុមហ៊ុននេះ ក៏បានឆ្លើយតបទៅនឹងការចោទប្រកាន់នានាពាក់ព័ន្ធនឹងអំពើខុសច្បាប់ដែលតុលាការចិនបានអះអាង។ អ្នកនាំពាក្យរូបនោះ អះអាងថា សម្ព័ន្ធក្រុមហ៊ុន ព្រីនស៍ គ្រូប គឺជាជនរងគ្រោះនៃការលួចអត្តសញ្ញាណ និងថា ក្រុមឧក្រិដ្ឋជនបានប្រើប្រាស់អត្តសញ្ញាណសាជីវកម្មរបស់ខ្លួនដើម្បីប្រតិបត្តិការសកម្មភាពមិនស្របច្បាប់នានា។
ឪពុកមាសម្បូរទ្រព្យម្នាក់
នៅខែធ្នូ ឆ្នាំ២០១៨ ក្រុមហ៊ុនមួយជាកម្មសិទ្ធិរបស់ស្ថាបនិកសម្ព័ន្ធក្រុមហ៊ុន ព្រីនស៍ គ្រូប លោក ចេន ហ្ស៊ី ឈ្មោះ Amiga Entertainment បានដាក់ពាក្យបើកកុងធនាគារនៅធនាគារមួយឈ្មោះ Cayman National Bank នៅលើកោះ Isle of Man។ ធនាគារនេះ បានបដិសេធពាក្យសុំបើកកុងធនាគាររបស់សម្ព័ន្ធក្រុមហ៊ុននេះ បើទោះបីជា គិតត្រឹមពេលនោះ សម្ព័ន្ធក្រុមហ៊ុន ព្រីនស៍ គ្រូប បានដើរតួនាទីដ៏សំខាន់មួយនៅលើទីផ្សារនៃប្រទេសកម្ពុជាយ៉ាងណាក្តី។ ១១ខែក្រោយមក ឯកសារបែកធ្លាយមួយដែលបានមកពី ការលួចចូលយកទិន្នន័យរបស់ធនាគារនេះ ផ្តល់នូវតម្រុយឱ្យដឹងពីមូលហេតុនៃការបដិសេធនេះ។
ការលាងលុយកខ្វក់ គឺជាវីធីប្រែក្លាយលុយដែលបានមកតាមរយៈមធ្យោបាយខុសច្បាប់នានាឱ្យមើលទៅហាក់ដូចជាស្របច្បាប់វិញ។ ជាទូទៅដំណើរការលាងលុយកខ្វក់នេះ ពាក់ព័ន្ធនឹងការបង្វិលលុយចុះឡើងៗតាមរយៈសេរីនៃប្រតិបត្តិការសាច់ប្រាក់បែបប្រឌិត ដែលជាញឹកញាប់ឆ្លងកាត់តាមយុត្តាធិការជាច្រើន ដើម្បីបំភ័ន្តថា លុយទាំងនោះគឺជាផលិតផលបានមកពីសកម្មភាពអាជីវកម្មស្របច្បាប់។
សារអេឡិចត្រូនិក (អ៊ីមែល) ទិន្នន័យប្រតិបត្តិការសាច់ប្រាក់ និងឯកសារដទៃទៀត ដែលមាននៅក្នុងឯកសារបែកធ្លាយនោះ ហើយដែលត្រូវបានចែករំលែកដោយអង្គការមិនរកប្រាក់ចំណេញ ធ្វើការដើម្បីទម្លាយព័ត៌មានសម្ងាត់ ឈ្មោះ Distributed Denial of Secretsបង្ហាញឱ្យឃើញពីបរាជ័យនៃការប៉ុនប៉ងរបស់ក្រុមហ៊ុន Amiga Entertainment ក្នុងការបើកកុងធនាគារមួយនៅធនាគារ Cayman National Bank។ ឯកសារបែកធ្លាយនោះ បង្ហាញថា សម្ព័ន្ធក្រុមហ៊ុន ព្រីនស៍ គ្រូប ពុំមានបំណងលាតត្រដាងឱ្យដឹងពីប្រភពលុយរបស់ខ្លួនទេ សូម្បីតែនៅពេលដាក់ពាក្យបើកកុងធនាគារក៏ដោយ។
នៅពេលណាដែលបុគ្គលម្នាក់ ឬអាជីវកម្មមួយ ដាក់ពាក្យសុំបើកកុង ឬគណនីធនាគារ ឬធ្វើប្រតិបត្តិការទូទាត់សាច់ប្រាក់ក្នុងទ្រង់ទ្រាយធំមួយ មន្ត្រីធនាគារ ត្រូវសួរនាំថាតើលុយទាំងនោះបានមកពីប្រភពណា និងត្រូវផ្ទៀងផ្ទាត់អំណះអំណាងទាំងនោះឱ្យបានប្រសើរបំផុតតាមដែលពួកគេអាចធ្វើទៅបាន។ ដំណើរការនេះ ធ្វើឡើងដើម្បីបង្ការកុំឱ្យឧក្រិដ្ឋជនមានលទ្ធភាពចូលទៅប្រើប្រាស់ប្រព័ន្ធហិរញ្ញវត្ថុ និងចាយវាយលុយដែលពួកគេបានមកតាមវិធីទុច្ចរិតនានា។ ក្នុងសំណុំរឿងរបស់ក្រុមហ៊ុន Amiga Entertainment ការពិនិត្យពិច័យរកភាពមិនប្រក្រតីនានា (Due Diligence) ដែលធ្វើឡើងដោយធនាគារ Cayman National Bank បង្ហាញឱ្យឃើញពីរបៀបដែលសម្ព័ន្ធក្រុមហ៊ុនខ្នាតយក្សមួយនេះ មានចេតនាតិចតួចបំផុតក្នុងការចែករំលែកព័ត៌មានអំពីប្រភពដើមនៃមូលនិធិរបស់ខ្លួន។
នៅអំឡុងពេលដាក់ពាក្យសុំបើកកុងធនាគារនេះ ក្រុមហ៊ុនមេរបស់ក្រុមហ៊ុន Amiga គឺជាប្រតិបត្តិករកាស៊ីណូអនឡាញមួយនៅលើកោះ Isle of Man មានឈ្មោះថាក្រុមហ៊ុន Ableton Prestige Global Limited។ សារអេឡិចត្រូនិកមួយផ្ញើទៅកាន់ធនាគារ Cayman National Bank ដោយនាយកក្រុមហ៊ុន Ableton គឺលោក ចន ខរធីន (John Corteen) ក្នុងចំណោមឯកសារបែកធ្លាយ លាតត្រដាងថា ម្ចាស់ក្រុមហ៊ុន Ableton គឺជាប្រធានសម្ព័ន្ធក្រុមហ៊ុន ព្រីនស៍ គ្រូប រួមមាន លោក ចេន ហ្ស៊ី និងប្រពន្ធរបស់លោក គឺអ្នកស្រី លី ឆាយយ៉ីន (Li Caiyun)។ លោក ចន ខរធីន បានបញ្ចូលតំណភ្ជាប់នៃការផ្សាយពាណិជ្ជកម្មមួយរបស់សម្ព័ន្ធក្រុមហ៊ុន ព្រីនស៍ គ្រូប នៅក្នុង កាសែត ភ្នំពេញ ប៉ុស្តិ៍(Phnom Penh Post) ទៅក្នុងឯកសារនោះ ដើម្បីផ្តល់«ព័ត៌មានលម្អិតខ្លះៗអំពីអាជីវកម្មនានារបស់លោក ចេន ហ្ស៊ី»។
ធនាគារ Cayman National Bank បានឆ្លើយតបវិញដោយស្នើសុំព័ត៌មានបន្ថែមអំពីប្រភពដើមនៃទ្រព្យសម្បត្តិរបស់លោក ចេន ហ្ស៊ី។
ឯកសារកំណត់ត្រាផ្ទៃក្នុងរបស់ធនាគារ Cayman National Bank ដែលសង្ខេបចម្លើយរបស់តំណាងលោក ចេន ហ្ស៊ី ចុះកាលបរិច្ឆេទខែកក្កដា ឆ្នាំ២០១៩ បានសរសេរថា «ទាក់ទងទៅនឹងប្រភពទ្រព្យសម្បត្តិរបស់លោក ចេន ហ្ស៊ី ដំបូងឡើយ លោក ចេន ហ្ស៊ី បានទទួលកម្ចីផ្ទាល់ខ្លួនមួយចំនួន ២លានដុល្លារ ពីឪពុកមារបស់លោក ដើម្បីបើកក្រុមហ៊ុនអចលនទ្រព្យមួយឈ្មោះ ខេមបូឌាន ហេង ស៊ីន រៀល អ៊ីស្ទេត អ៊ិនវេសមិន (Cambodian Heng Xin Real Estate Investment Co., Ltd.) ក្នុងអំឡុងពេលមួយក្នុងឆ្នាំ២០១១»។
យោងតាមអ្នកជំនាញផ្នែកឧក្រិដ្ឋកម្មហិរញ្ញវត្ថុ លោក ក្រាម បាររ៉ូ (Graham Barrow) ដែលបានចំណាយពេល ២៥ឆ្នាំ បម្រើការងារឱ្យធនាគារ និងឧស្សាហកម្មសេវាកម្មហិរញ្ញវត្ថុធំៗជាច្រើន ការពន្យល់របស់លោក ចេន ហ្ស៊ី អំពីប្រភពដើមនៃទ្រព្យសម្បត្តិរបស់លោកបែបនេះ មិនអាចទទួលយកបានឡើយចំពោះធនាគារភាគច្រើន។
លោក ក្រាម បាររ៉ូ បាននិយាយប្រាប់វិទ្យុអាស៊ីសេរីថា៖ «ការណ៍ដែលអះអាងថាឪពុកមាម្នាក់បានឱ្យអ្នកខ្ចីលុយ២លានដុល្លារ គឺជាអំណះអំណាងបែបទូលំទូលាយមួយដែលមិនសមស្របទាល់តែសោះដើម្បីឱ្យស្ថាប័នហិរញ្ញវត្ថុណាមួយទទួលយកហេតុផលរបស់ខ្លួន ដោយសារតែពួកគេត្រូវការយល់ដឹងអំពីប្រភពទាំងមូលនៃលុយទាំងនោះ ពោលគឺមិនមែនជាប្រភពអន្តរកាលឡើយ»។ លោក ក្រាម បាររ៉ូ បន្តថា៖ «ការណ៍នេះនាំឱ្យមានចំណាប់អារម្មណ៍ថា ពួកគេមិនចង់ឱ្យអ្នកណាម្នាក់ដឹងពីប្រភពនៃទ្រព្យសម្បត្តិរបស់ពួកគេកាន់តែស៊ីជម្រៅឡើយ»។
ប្រមាណជាង២ខែក្រោយឯកសារលើសំណុំរឿងរបស់លោក ចេន ហ្ស៊ី ត្រូវបានគេកត់ត្រាទុក មន្ត្រីត្រួតពិនិត្យផ្នែកអនុលោមភាពនៅធនាគារ Cayman National Bank បានស្នើសុំព័ត៌មានលម្អិតបន្ថែមទៀត តាមរយៈសារអេឡិចត្រូនិកមួយចុះថ្ងៃទី០៧ ខែតុលា ឆ្នាំ២០១៩។ មន្ត្រីធនាគាររូបនោះចង់ដឹងពីឈ្មោះឪពុកមារបស់លោក ចេន ហ្ស៊ី ដែលបានផ្តល់កម្ចីឱ្យលោក ចេន ហ្ស៊ី នូវទឹកប្រាក់ចំនួន ២លានដុល្លារ កាលពីឆ្នាំ២០១១ និងថាតើឪពុកមារូបនោះបានលុយទាំងនេះមកពីណា។
យោងតាមលោក អូលីវើរ ប៊ូលឡូហ្វ (Oliver Bullough) អ្នកនិពន្ធសៀវភៅមានចំណងជើងថា « ដែនដីប្រាក់៖ ហេតុអ្វីបានជាក្រុមចោរ និងក្រុមមនុស្សទុច្ចរិត គ្រប់គ្រងពិភពលោកបច្ចុប្បន្ននេះ ហើយតើត្រូវធ្វើដូចម្តេចដើម្បីដណ្ដើមយកពិភពលោកមកវិញ» (Moneyland: Why Thieves and Crooks Now Rule the World and How To Take It Back) និយាយថា លោក ចេន ហ្ស៊ី និងតំណាងរបស់លោក មិនដែលបានឆ្លើយតបចំពោះសំណួរទាំងនេះឡើយ ដែលនេះគឺជាភាពមិនប្រក្រតីមួយទៀត។
លោក អូលីវើរ ប៊ូលឡូហ្វ បានប្រាប់វិទ្យុអាស៊ីសេរីថា៖ «ប្រសិនបើនរណាម្នាក់សួរនាំអ្នកឱ្យពន្យល់អំពីទ្រព្យសម្បត្តិរបស់អ្នក តែអ្នកមិនឆ្លើយ ហើយអ្នកបែរជាដើរចេញទៅបាត់ ទង្វើដូច្នេះមិនមែនជាសញ្ញាល្អមួយឡើយ ពីព្រោះថាវាមិនពិបាកដល់ថ្នាក់ហ្នឹងទេក្នុងការពន្យល់នោះ»។
លោក ចន ខរធីន និងលោក ចេន ហ្ស៊ី មិនបានឆ្លើយតបទៅនឹងសំណើសុំអត្ថាធិប្បាយជាច្រើនលើកច្រើនសាលើបញ្ហានានាដែលត្រូវបានលើកឡើងក្នុងរឿងនេះឡើយ។ សារអេឡិចត្រូនិកជាច្រើនដងដែលបានផ្ញើទៅកាន់អាសយដ្ឋានដាក់នៅលើវែបសាយរបស់ក្រុមហ៊ុន Amiga ត្រូវបានបញ្ជូនត្រលប់មកវិញ ជាមួយនឹងសារ error ដែលការណ៍នេះបញ្ជាក់ថា សារនោះត្រូវបានបិទខ្ទប់ ឬប្លុក ខណៈសារអេឡិចត្រូនិកនានាផ្ញើទៅកាន់ក្រុមហ៊ុន Ableton ក៏មិនទទួលបានការឆ្លើយតបវិញនោះដែរ។
វិធីសាស្ត្រមិនសួរមិនប្រាប់
ប្រសិនបើមូលនិធិដ៏អាថ៌កំបាំងនេះ នាំឱ្យមានសញ្ញាព្រមានពីភាពមិនប្រក្រតីជាច្រើន នោះរចនាសម្ព័ន្ធកម្មសិទ្ធិនៃក្រុមហ៊ុន Amiga ក៏អាចនឹងក្លាយជាមុខសញ្ញាដ៏សង្ស័យបំផុតចំពោះរឿងរ៉ាវនៃភាពមិនប្រក្រតីដទៃទៀតដែរ។
នៅពេលបង្កើតសាជីវកម្មក្នុងខែតុលា ឆ្នាំ២០១៨ ក្រុមហ៊ុនមេចុងក្រោយរបស់ក្រុមហ៊ុន Amiga Entertainment គឺជាក្រុមហ៊ុនឈ្មោះ Infinite Deemarco Pte Ltd ចុះបញ្ជីនៅប្រទេសសិង្ហបុរី។ បុគ្គលដែលចុះឈ្មោះក្នុងទិន្នន័យក្រុមហ៊ុននៅសិង្ហបុរីធ្វើជាម្ចាស់កម្មសិទ្ធិរបស់ក្រុមហ៊ុន Infinite Deemarco នៅពេលនោះ គឺជាមេធាវីជនជាតិអាមេរិកាំងដើមកំណើតហ្វីលីពីនមួយរូប ឈ្មោះ ហេនរី យេហ៍ (Henry Yeh)។ បុគ្គលរូបនេះបាននិយាយប្រាប់វិទ្យុអាស៊ីសេរីថា លោកមិនដឹងថាតើហិរញ្ញប្បទានរបស់ក្រុមហ៊ុននោះមានប្រភពចេញមកពីណានោះទេ។
លោក ហេនរី យេហ៍ បាននិយាយថា៖ «គេប្រាប់ខ្ញុំថា លុយនោះចេញមកពីប្រទេសចិន ដោយសារតែ[ថ្នាក់ដឹកនាំ]របស់សម្ព័ន្ធក្រុមហ៊ុន ព្រីនស៍ គ្រូប សុទ្ធតែមានប្រភពចេញមកពីប្រទេសចិន»។ លោកបន្តថា៖ «ពួកគេមានសិទ្ធិគ្រប់បែបយ៉ាង មិនប្រាប់ខ្ញុំ ឬក៏ភូតកុហកខ្ញុំ ដោយសារតែខ្ញុំគ្រាន់តែជាបុគ្គលិកម្នាក់ប៉ុណ្ណោះ»។
ដោយទទួលស្គាល់ថាលោកគឺជាម្ចាស់កម្មសិទ្ធិដែលមានឈ្មោះតែនៅលើក្រដាសប៉ុណ្ណោះ លោក ហេនរី យេហ៍ បានផ្ដល់ជាតម្រុយឱ្យដឹងពីរបៀបដែលសម្ព័ន្ធក្រុមហ៊ុន ព្រីនស៍ គ្រូប ជារឿយៗ គ្រប់គ្រងបុត្រសម្ព័ន្ធរបស់ខ្លួន តាមរបៀបជាសេរីនៃសាជីវកម្មដែលមានតែសំបកជាច្រើន ដើម្បីធ្វើឱ្យទំនាក់ទំនងរវាងពួកគេជាមួយនឹងក្រុមហ៊ុនទាំងនេះ មើលទៅគ្មាននរណាដឹងថាមានប្រភពចេញមកពីម្ចាស់ភាគហ៊ុន និងអភិបាលនៃសម្ព័ន្ធក្រុមហ៊ុនរបស់ពួកគេឡើយ។ របាយការណ៍ឆ្នាំ២០២២ របស់ធនាគារពិភពលោក (World Bank) បានព្រមានថា រចនាសម្ព័ន្ធយ៉ាងដូច្នេះ គឺជាឱកាសនាំឱ្យមានការរំលោភច្បាប់។
វិធីសាស្ត្រ «មិនសួរមិនប្រាប់» ដើម្បីចាត់ចែងលុយរាប់ពាន់លានដុល្លារគឺជារឿងរ៉ាវដែលអ្នកនាង ឃីមប៊ឺលី ឃេយ ហ័ង (Kimberly Kay Hoang) ជាសាស្ត្រាចារ្យផ្នែកសង្គមវិទ្យានៃសាកលវិទ្យាល័យ ឆីកាហ្គោ (University of Chicago) ដែលបានចំណាយពេល១៨ខែ ឃ្លាំមើលការវិនិយោគបែបវិជ្ជាជីវៈនៅតំបន់អាស៊ីអាគ្នេយ៍ ដើម្បីនិពន្ធសៀវភៅមួយដែលមានចំណងជើងថា « សំណាញ់ពីងពាងនៃមូលធននិយម» (Spiderweb Capitalism) ធ្លាប់ដឹងឮ។ សៀវភៅនេះ លាតត្រដាងឱ្យឃើញពីមធ្យោបាយដែលអាជីវកម្មខ្នាតធំនៅក្នុងតំបន់នេះ អនុញ្ញាតឱ្យបុគ្គលមានខ្សែបណ្តាញនយោបាយ ច្របាច់បញ្ចូលគ្នានូវទ្រព្យសម្បត្តិមិនស្របច្បាប់របស់ពួកគេជាមួយនឹងសហគ្រាសអាជីវកម្មស្របច្បាប់នានា។
អ្នកនាង ឃីមប៊ឺលី ឃេយ ហ័ង បានប្រាប់វិទ្យុអាស៊ីសេរីថា ប្រធានអគ្គនាយក ដូចជា លោក ហេនរី យេហ៍ ខ្លួនឯង គិត «ដោយបានសន្មតពីរាល់ហានិភ័យផ្នែកឧក្រិដ្ឋកម្ម និងហានិភ័យផ្នែកកេរ្តិ៍ឈ្មោះទាំងអស់ ថានឹងទទួលបានមកវិញនូវតម្លៃតបស្នងយ៉ាងខ្ពស់តាមរយៈការធ្វើដូច្នេះ»។ នោះគឺជាថ្នូរនៅពេលពួកគេ «ជាទូទៅមិនសួរនាំសំណួរនានាទាក់ទងនឹងប្រភពដើម និងប្រភពនៃមូលនិធិទាំងនេះទេ»។ លោក ហេនរី យេហ៍ មិនត្រូវបានចោទប្រកាន់ពីការប្រព្រឹត្តខុសឡើយ។
យោងតាមទិន្នន័យសាជីវកម្មនៅកម្ពុជា និងសិង្ហបុរី ដែលវិទ្យុអាស៊ីសេរីបានពិនិត្យមើល ១៨ខែក្រោយពេលលោកបានបង្កើតក្រុមហ៊ុននោះ លោក ហេនរី យេហ៍ បានផ្ទេរភាគហ៊ុនរបស់លោកទៅឱ្យបុគ្គលម្នាក់ដែលកាន់កាប់តួនាទីជាអភិបាលនៅក្នុងក្រុមហ៊ុនចំនួន៣របស់សម្ព័ន្ធក្រុមហ៊ុន ព្រីនស៍ គ្រូប នៅកម្ពុជា។
អ្នកស៊ើបអង្កេតជាន់ខ្ពស់នៃអង្គការតម្លាភាពអន្តរជាតិ ប្រចាំចក្រភពអង់គ្លេស (Transparency International U.K) លោក ប៊េន ខោវដុក (Ben Cowdock) ក៏ជឿជាក់ដែរថា ការពណ៌នារបស់លោក ហេនរី យេហ៍ អំពីការរៀបចំចាត់ចែងនៅក្នុងក្រុមហ៊ុន Infinite Deemarco គឺជាមូលហេតុដ៏គួរឱ្យព្រួយបារម្ភ។
ដោយបានពន្យល់សង្ខេបអំពីរចនាសម្ព័ន្ធនៃកម្មសិទ្ធិរបស់ក្រុមហ៊ុន Infinite Deemarco លោក ប៊េន ខោវដុក បានប្រាប់វិទ្យុអាស៊ីសេរីថា៖ «ប្រសិនបើអ្នកមានប្រធានអគ្គនាយក និងម្ចាស់ភាគហ៊ុននៃក្រុមហ៊ុនមួយ ដែលមិនដឹងថាអាជីវកម្មរបស់ខ្លួនរកលុយបានមកពីណានោះ អាចថាពួកគេទាំងនោះធ្វេសប្រហែសខ្លាំង ឬក៏ថាពួកគេកំពុងដើរតួនាទីជំនួសមុខឱ្យមនុស្សណាម្នាក់ផ្សេងទៀត»។ លោកបន្តថា៖ «អ្នកទាំងឡាយណាដែលដាក់ឈ្មោះរបស់ពួកគេនៅលើឯកសារលិខិតស្នាមផ្លូវការជំនួសឱ្យភាគីទីបីណាមួយ ការធ្វើដូច្នេះគឺជាវិធីសាស្ត្រមួយដែលគេដឹងឮយ៉ាងទូលំទូលាយគឺដើម្បីបញ្ចៀសកុំឱ្យមានការពិនិត្យពិច័យជ្រុលហួសហេតុពីអាជ្ញាធរ»។
ម៉ាស៊ីនល្បែងស៊ីសង (Slot Machines) និងម៉ាស៊ីនលាងលុយកខ្វក់
នៅឆ្នាំ២០២០ ក្រុងប៉េកាំងបាន បង្កើតក្រុមការងារប៉ូលិសពិសេសមួយដើម្បីស៊ើបអង្កេតសម្ព័ន្ធក្រុមហ៊ុន ព្រីនស៍ គ្រូប។ សំណុំរឿងជាបន្តបន្ទាប់របស់តុលាការនៃប្រទេសចិនប្រឆាំងនឹងបុគ្គលិកថ្នាក់ក្រោមរបស់សម្ព័ន្ធក្រុមហ៊ុននេះ បានកំណត់ថា យ៉ាងហោចណាស់ទឹកប្រាក់ចំនួន ៥ពាន់លានយ័ន (៧០០លានដុល្លារ) នៃមូលនិធិរបស់សម្ព័ន្ធក្រុមហ៊ុន ព្រីនស៍ គ្រូប បានមកពីបនល្បែងខុសច្បាប់។
ការស៊ើបអង្កេតរបស់វិទ្យុអាស៊ីសេរីលើក្រុមហ៊ុន Amiga Entertainment ផ្តល់នូវព័ត៌មានបន្ថែមអំពីរបៀបដែលសម្ព័ន្ធក្រុមហ៊ុន ព្រីនស៍ គ្រូប បានព្យាយាមលាក់បាំងប្រភពលុយរបស់ខ្លួន។
គឺនៅក្នុងអាណត្តិដ៏ខ្លីរបស់លោក ហេនរី យេហ៍ ក្នុងនាមជាម្ចាស់ និងជាប្រធានអគ្គនាយកនៃក្រុមហ៊ុន Infinite Deemarco នេះហើយ ដែលក្រុមហ៊ុនមួយនេះ បានច្របាច់បញ្ចូលគ្នាជាមួយក្រុមហ៊ុន Amiga Entertainment បង្កើតបានជាបុត្រសម្ព័ន្ធរបស់សម្ព័ន្ធក្រុមហ៊ុននេះនៅលើកោះ Isle of Man។ លោក ហេនរី យេហ៍ បានប្រាប់វិទ្យុអាស៊ីសេរីថា ម៉ូដែលអាជីវកម្មរបស់ក្រុមហ៊ុន Amiga Entertainment គឺ «ដើម្បីបង្កើតកម្មវិធីល្បែងស៊ីសងស្រដៀងគ្នាដោយមិនរំលោភកម្មសិទ្ធិបញ្ញា (IPs)»។ សំខាន់នោះគឺដើម្បីផលិតបានវីដេអូហ្គេមលេងល្បែងស៊ីសងដែលមានតម្លៃថាកជាងវីដេអូហ្គេមលេងល្បែងស៊ីសងដែលមានស្រាប់។
ឯកសារនានាដែលវិទ្យុអាស៊ីសេរីបានពិនិត្យមើល បង្ហាញឱ្យឃើញពីម៉ូដែលអាជីវកម្មពិតប្រាកដ ដែលមានភាពស្មុគស្មាញជាងនេះ។
វែបសាយរបស់ក្រុមហ៊ុន Amiga Entertainment អួតសរសើរពីកម្មវិធីលេងល្បែងស៊ីសងដែលក្រុមហ៊ុននេះផលិតឡើង។ កម្មវិធីលេងល្បែងស៊ីសងនីមួយៗផ្ដោតសំខាន់លើម៉ាស៊ីនល្បែងស៊ីសង (Slot Machine) មួយ ដែលពួកអ្នកលេងល្បែងនាំគ្នាចាក់ភ្នាល់ដោយសង្ឃឹមមកវិញថា រូបសញ្ញាដូចគ្នាមួយនឹងបង្ហាញឡើងនៅលើអេក្រង់។ ការលេងល្បែងដូច្នេះ គឺស្របច្បាប់នៅលើកោះ Isle of Man។ ក៏ប៉ុន្តែ ទិន្នន័យធនាគារដែលវិទ្យុអាស៊ីសេរីបានឃើញ បង្ហាញថា ក្រុមហ៊ុន Amiga បានផ្តល់អាជ្ញាប័ណ្ណបង្កើតកម្មវិធីល្បែងស៊ីសងទាំងនេះ ទៅឱ្យក្រុមហ៊ុននានានៅក្នុងប្រទេសចិនជាទីដែលរាល់ទម្រង់ទាំងអស់នៃការលេងល្បែងស៊ីសងត្រូវបានហាមប្រាមយ៉ាងតឹងរ៉ឹងបំផុត លើកលែងតែការលេងឆ្នោតផ្សងសំណាងរបស់រដ្ឋ។
កិច្ចសន្យាផ្តល់អាជ្ញាប័ណ្ណទាំងនោះបញ្ជាក់ថា ក្រុមហ៊ុនចិនត្រូវបង់ប្រាក់ចំនួន ៩៤០.០០០ ផោន (១លានដុល្លារ) ក្នុងមួយឆ្នាំ ជាថ្នូរនឹងការទទួលបានសិទ្ធិផ្សព្វផ្សាយពាណិជ្ជកម្មរកទីផ្សារលក់ម៉ាស៊ីនល្បែងស៊ីសងមួយរបស់ក្រុមហ៊ុន Amiga Entertainment ទៅដល់អតិថិជនរបស់ពួកគេ។ លើសពីនេះទៀត ក្រុមហ៊ុនចិន ត្រូវបង់ប្រាក់ ៣០% នៃចំណូលដែលពួកគេរកបាន។ (នៅពេលសួរនាំអំពីកិច្ចសន្យាទាំងនេះ លោក ហេនរី យេហ៍ បានឆ្លើយតបថា «ខ្ញុំមិនដឹងរឿងអ្វីទាល់តែសោះអំពីម៉ាស៊ីនល្បែងស៊ីសងដែលត្រូវគេចម្លងតាមដើម្បីរកលុយបានរាប់លានដុល្លារនោះទេ»)។
យោងតាមអតីតអ្នកធ្លាប់ធ្វើការឱ្យសម្ព័ន្ធក្រុមហ៊ុន ព្រីនស៍ គ្រូប ដែលយល់ដឹងអំពីការងារនៅក្នុងក្រុមហ៊ុន Amiga Entertainment និងក្រុមហ៊ុនមេរបស់ក្រុមហ៊ុននេះ ការក្លែងបន្លំគឺនៅត្រង់ថា ប្រតិបត្តិការសាច់ប្រាក់ទាំងនេះ ត្រូវបានគេប្រឌិតឡើង។ អ្នកធ្លាប់ធ្វើការឱ្យសម្ព័ន្ធក្រុមហ៊ុនដដែលនេះ ស្នើសុំមិនបញ្ចេញឈ្មោះដោយសារហេតុផលសុវត្ថិភាព។
បុគ្គលរូបនោះ បានប្រាប់វិទ្យុអាស៊ីសេរីថា៖ «[ក្រុមហ៊ុន Amiga Entertainment] គឺជាក្រុមហ៊ុនមួយដែលត្រូវបានប្រើប្រាស់ដើម្បីលាងលុយកខ្វក់»។ «ពួកគេបូមលុយទាំងអស់តាមរយៈក្រុមហ៊ុននេះ»។
ប្រភពដដែលអះអាងថា ក្រុមហ៊ុននានានៅប្រទេសចិន មិនបានប្រើប្រាស់ម៉ាស៊ីនល្បែងស៊ីសង ហើយក៏មិនបានបង់ថ្លៃអាជ្ញាប័ណ្ណឱ្យពួកគេឡើយ។ ផ្ទុយទៅវិញ កិច្ចសន្យាដែលចុះហត្ថលេខារវាងក្រុមហ៊ុន Amiga Entertainment និងក្រុមហ៊ុនចិននានា ត្រូវបានគេប្រើប្រាស់ដើម្បីធ្វើឱ្យស្របច្បាប់ដល់ការផ្ទេរសាច់ប្រាក់ក្នុងទំហំដ៏ច្រើនរវាងតំបន់អាស៊ីអាគ្នេយ៍ និងកោះ Isle of Man។
ជាទូទៅ អាជីវកម្មនានា បង្វិលប្រាក់ពីតំបន់មួយនៃប្រតិបត្តិការរបស់ពួកគេទៅតំបន់មួយទៀតតាមរយៈធនាគារមួយ។ ក៏ប៉ុន្តែ លុយដែលត្រូវបានគេផ្ញើទៅកាន់ក្រុមហ៊ុន Amiga Entertainment ផ្ទុយទៅវិញ បានមកពីប្រតិបត្តិករសេវាផ្ទេរលុយមួយនៅទីក្រុងហុងកុង (Hong Kong)។ មានឈ្មោះជាភ្នាក់ងារផ្ញើប្រាក់ ប្រតិបត្តិករសេវាផ្ទេរលុយ ដើរតួនាទីផ្ទេរមូលនិធិជាអន្តរជាតិជំនួសមុខឱ្យអតិថិជន ដែលជារឿយៗជាមនុស្ស ឬអាជីវកម្មខ្នាតតូចដែលពុំមានលទ្ធភាពទទួលបានសេវាកម្មធនាគារបែបប្រពៃណី។ ធនាគារខ្លះ ដូចជា ធនាគារ Western Union បានក្លាយជាធនាគារដែលពលរដ្ឋតាមខ្នងផ្ទះជាច្រើននាំគ្នាប្រើប្រាស់។ ផ្ទុយទៅវិញមានប្រតិបត្តិករតូចជាងនេះរាប់ពាន់នៅទូទាំងពិភពលោក ដូចជាប្រតិបត្តិករមួយដែលត្រូវបានប្រើប្រាស់ដោយអតិថិជនដែលអះអាងថាជាជនជាតិចិនរបស់ក្រុមហ៊ុន Amiga Entertainment ជាដើម។ ភ្នាក់ងារផ្ញើប្រាក់ គិតកម្រៃសេវាផ្ទេរប្រាក់ថ្លៃជាងធនាគារ។ មិនមែនជារឿងរ៉ាវធម្មតាទេសម្រាប់ក្រុមហ៊ុនធំមួយដែលបង្វិលលុយតាមរបៀបនេះ។ ទោះជាយ៉ាងណា ជាមួយនឹងការយកកម្រៃខ្ពស់ជាងនេះ ការចោទសួរសំណួរនានាអំពីប្រភពលុយក៏មានតិចជាងនេះដែរ។
បុគ្គលរូបនោះ និយាយថា «ក្រុមហ៊ុនផ្ញើប្រាក់ មិនខ្វល់អំពីថាតើប្រភពពិតប្រាកដនៃលុយទាំងនោះបានមកពីទីណានោះទេ»។
ឯកសារថតចម្លងនៃបង្កាន់ដៃផ្ញើប្រាក់ កិច្ចសន្យា និងវិក្កយបត្រនានាដែលវិទ្យុអាស៊ីសេរី បានពិនិត្យមើល មានព័ត៌មានលម្អិតដែលប្រទាក់ក្រឡាគ្នាជាមួយនឹងការទូទាត់ប្រាក់ ហើយក៏អាចត្រូវបានកំណត់អត្តសញ្ញាណនៅក្នុងឯកសារបែកធ្លាយរបស់ធនាគារCayman National Bank ផងដែរ។ ដោយសារក្រុមហ៊ុន Amiga Entertainment មិនដែលធ្លាប់មានគណនីមួយជាមួយធនាគារនេះ ប្រតិបត្តិករសេវាកម្មផ្ទេរប្រាក់ ដែលទទួលទូទាត់ប្រាក់សម្រាប់ក្រុមហ៊ុននេះ គឺជាអតិថិជន។ (ការទូទាត់ប្រាក់ចំនួន៤លើក ដែលមានតម្លៃសរុប ៨៣០.០០០ដុល្លារ ត្រូវបានគេកំណត់អត្តសញ្ញាណដឹងថាធ្វើឡើងនៅក្នុងទិន្នន័យរបស់ធនាគារ Cayman National Bank ផ្ញើទៅឱ្យក្រុមហ៊ុន Amiga Entertainment Limited ទាំងអស់ មានលេខយោង CLA0878។ លេខយោងនេះ ក៏ជាលេខយោងទូទាត់ប្រាក់ដែលត្រូវបានប្រើប្រាស់នៅលើបង្កាន់ដៃផ្ញើប្រាក់ ដែលវិទ្យុអាស៊ីសេរីបានពិនិត្យមើលផងដែរ)។
មនុស្សដែលធ្លាប់ធ្វើការឱ្យសម្ព័ន្ធក្រុមហ៊ុន ព្រីនស៍ គ្រូប បាននិយាយសំដៅដល់អ្នកកាន់អាជ្ញាប័ណ្ណថា៖ «កោះ Isle of Man នឹងសួរនាំអំពីហេតុផលនៃការផ្ទេរប្រាក់នេះ ដូច្នេះអ្នកត្រូវតែមានអ្នកតំណាងនៅប្រទេសចិន»។ តាមការពិត ពួកគេបន្ថែមថា៖ «ប្រាក់នេះមិនដែលមានប្រភពដើមចេញមកពីប្រទេសចិនឡើយ»។
ប្រភពដដែលបន្តថា នៅពេលដែលលុយត្រូវបានគេផ្ញើទៅឱ្យគណនីរបស់ក្រុមហ៊ុន Amiga Entertainment នៅលើកោះ Isle of Man លុយទាំងនេះនឹងចាប់ផ្ដើមបង្វិលក្រោមរូបភាពជាច្រើននៃកម្មសិទ្ធិរបស់ក្រុមហ៊ុននេះ។
ទិន្នន័យសាជីវកម្មដែលវិទ្យុអាស៊ីសេរីបានឃើញ គាំទ្រដល់ការលើកឡើងរបស់ប្រភពនេះ និងបញ្ជាក់ថាគោលដៅចុងក្រោយនៃមូលនិធិនេះ គឺបញ្ជូនដល់លោក ចេន ហ្ស៊ី និងការិយាល័យគ្រួសាររបស់ប្រពន្ធលោកនៅប្រទេសសិង្ហបុរី។ លុយទាំងនេះនឹងត្រូវបានបង្ហាញជាប្រាក់ចំណេញស្របច្បាប់ពីការវិនិយោគរបស់ប្តីប្រពន្ធមួយគូនេះនៅក្នុងអាជីវកម្មជោគជ័យនៃការបើកបនល្បែងស៊ីសងនៅលើកោះ Isle of Man។
ឯកសារទិន្នន័យផ្ទៃក្នុងមួយនៃហិរញ្ញវត្ថុរបស់ក្រុមហ៊ុន Amiga Entertainment ដែលវិទ្យុអាស៊ីសេរីបានពិនិត្យមើល បញ្ជាក់ថា លុយច្រើនជាង ១០០លានដុល្លារត្រូវបានគេបង្វិលតាមរបៀបនេះ។
លោក ប៊េន ខោវដុក នៃអង្គការតម្លាភាពអន្តរជាតិ បាននិយាយថា ប្រតិបត្តិការសាច់ប្រាក់ទាំងនេះ ទំនងជាបង្កឱ្យមានការសង្ស័យខ្ពស់ ហើយលោកអំពាវនាវឱ្យកោះ Isle of Man ស៊ើបអង្កេតករណីនេះ។
លោក ប៊េន ខោវដុក បាននិយាយថា៖ «ប្រសិនបើនរណាម្នាក់លក់អាជ្ញាប័ណ្ណម៉ាស៊ីនល្បែងស៊ីសងទៅឱ្យប្រទេសមួយ ដែលសកម្មភាពនេះគឺជារឿងខុសច្បាប់នោះ ហើយទទួលយកការទូទាត់ប្រាក់មិនមែនតាមច្រកធនាគារធម្មតានោះ នេះគឺជាភាពមិនប្រក្រតីដ៏ចម្បងមួយដែលត្រូវការការស៊ើបអង្កេត»។
នាយកផ្នែកទំនាក់ទំនងនៃសម្ព័ន្ធក្រុមហ៊ុន ព្រីនស៍ គ្រូប លោក ហ្គាប្រ៊ីយែល តាន់ (Gabriel Tan) បានប្រាប់វិទ្យុអាស៊ីសេរីតាមសារអេឡិចត្រូនិកថា សម្ព័ន្ធក្រុមហ៊ុន «ផ្តោតអាទិភាពលើការវិនិយោគ និងការអភិវឌ្ឍន៍នៅក្នុងប្រទេសកម្ពុជា» និងថា សម្ព័ន្ធក្រុមហ៊ុន«មិនជាប់ពាក់ព័ន្ធនឹងការចោទប្រកាន់ដែលត្រូវបានលើកឡើងពាក់ព័ន្ធនឹងសកម្មភាពនានាក្នុង... ប្រទេសសិង្ហបុរី (Singapore) គុយបា (Cuba) ឬនៅកោះ Isle of Man ឡើយ»។
លោក ហ្គាប្រ៊ីយែល តាន់ បានបន្ថែមថា៖ «រាល់ប្រតិបត្តិការអាជីវកម្មរបស់លោក ចេន ហ្ស៊ី ទាំងអស់ គឺលោកប្រធាន ចេន ហ្ស៊ី អនុលោមយ៉ាងទៀងទាត់តាមច្បាប់នៃយុត្តាធិការដែលលោកប្រតិបត្តិការអាជីវកម្ម ព្រមទាំងតាមច្បាប់ទាំងឡាយណាដែលគ្របដណ្ដប់លើលោកក្នុងនាមជាពលរដ្ឋកម្ពុជាម្នាក់»។
ការផ្ញើសារអេឡិចត្រូនិកសុំអត្ថាធិប្បាយទៅកាន់អាសយដ្ឋានទាក់ទងដែលដាក់នៅលើវែបសាយរបស់ក្រុមហ៊ុន Amiga Entertainment ទទួលបានមកវិញនូវសារ error ដែលបញ្ជាក់ថាម៉ាស៊ីនកុំព្យូទ័រមេរបស់ក្រុមហ៊ុននេះ មិនត្រូវបានគេបង្កើតឡើងដោយត្រឹមត្រូវដើម្បីទទួលសារអេឡិចត្រូនិកឡើយ។
ពង្រាយទ្រព្យ
ថ្វីបើទទួលបានជោគជ័យពីអាជីវកម្មក្នុងនាមជាពលរដ្ឋចូលសញ្ជាតិកម្ពុជាម្នាក់ក៏ដោយ ក៏លោក ចេន ហ្ស៊ី និងអ្នកគ្រប់គ្រងជាន់ខ្ពស់នៃសម្ព័ន្ធក្រុមហ៊ុន ព្រីនស៍ គ្រូប ដទៃទៀត ក្នុងរយៈពេលប៉ុន្មានឆ្នាំចុងក្រោយនេះ បានចាប់ផ្តើមផ្លាស់ទីជីវិតរបស់ពួកគេចេញពីទីក្រុងភ្នំពេញ ឆ្ពោះទៅចក្រភពអង់គ្លេស និងសហរដ្ឋអាមេរិក។
ឈ្មោះរបស់លោក ចេន ហ្ស៊ី ត្រូវបានចុះបញ្ជីក្នុងទិន្នន័យសាជីវកម្មអង់គ្លេសថាជាម្ចាស់កម្មសិទ្ធិនៃអាគារការិយាល័យមួយកន្លែងតម្លៃ ១១៤លានដុល្លារ ស្ថិតនៅចំបេះដូងនៃសង្កាត់ហិរញ្ញវត្ថុក្នុងទីក្រុងឡុងដ៍ និងវិមានស្កឹមស្កៃមួយតម្លៃច្រើនជាង ២៥លានដុល្លារ ស្ថិតនៅលើវិថី Avenue Road ផ្តាច់មុខនៃទីក្រុងនេះ។
អ្នកគ្រប់គ្រងជាន់ខ្ពស់របស់សម្ព័ន្ធក្រុមហ៊ុន ព្រីសន៍ គ្រូប ម្នាក់ទៀត គឺជាម្ចាស់កម្មសិទ្ធិនៃក្រុមហ៊ុនអង់គ្លេសចំនួនពីរដែលជាម្ចាស់អាផាតធឺមិនចំនួន១៧ក្នុងទីក្រុងឡុងដ៍ ទិញក្នុងតម្លៃសរុប ៣២លានដុល្លារ។
នៅត្រើយម្ខាងទៀតនៃមហាសមុទ្រអាត្លង់ទិក (Atlantic Ocean) អ្នកគ្រប់គ្រងសម្ព័ន្ធក្រុមហ៊ុន ព្រីនស៍ គ្រូប បីនាក់ គឺជាម្ចាស់កម្មសិទ្ធិនៃវិមានស្កឹមស្កៃមួយចំនួននៅតំបន់ជាយក្រុង ឡូស អេនជឺឡេស (Los Angeles) ដែលមានតម្លៃសរុប ៨លានដុល្លារ។ អ្នកគ្រប់គ្រងម្នាក់ក្នុងចំណោមពួកគេ ក៏មានកម្មសិទ្ធិលើនាវាកម្សាន្តប្រវែង២៦ម៉ែត្រ ឈ្មោះ Sunseeker ដែលចតនៅឆ្នេរសមុទ្រនៃរដ្ឋកាលីហ្វ័រញ៉ា (California) រួមទាំងកន្លែងលក់ឡានប្រណីតមួយកន្លែង និងរោងចក្រផលិតឧបករណ៍ជំនួយផ្លូវភេទមួយនៅក្នុងរដ្ឋនេះផងដែរ។ នេះបើយោងតាមកំណត់ត្រារបស់តុលាការរដ្ឋកាលីហ្វ័រញ៉ា និងទិន្នន័យសាជីវកម្មដែលវិទ្យុអាស៊ីសេរីបានពិនិត្យមើល។
គេហដ្ឋានទំនើបៗក្នុងទីក្រុងឡុងដ៍ និងទីក្រុង ឡូស អេនជឺឡេស ជាទូទៅគឺជាកម្មសិទ្ធិរបស់ក្រុមអ្នកមានលុយលំដាប់កំពូល។ ក៏ប៉ុន្តែ ប្រភពមួយស្និទ្ធនឹងក្រសួងមហាផ្ទៃកម្ពុជា បញ្ជាក់អំពីការជំរុញចិត្តមួយផ្សេងទៀតដែលនាំឱ្យអ្នកគ្រប់គ្រងនៃសម្ព័ន្ធក្រុមហ៊ុន ព្រីនស៍ គ្រូប ធ្វើទេសន្តរប្រវេសន៍ ឬរើទៅទីនោះ។ នោះគឺដោយសារតែពួកគេត្រូវតែមានកន្លែងសុវត្ថិភាពមួយដើម្បីរត់គេចខ្លួនប្រសិនបើការស៊ើបអង្កេតរបស់ប្រទេសចិនមកលើសម្ព័ន្ធក្រុមហ៊ុននេះកាន់តែរីករាលដាលធំឡើង។
ប្រភពដែលនិយាយសុំមិនបញ្ចេញឈ្មោះដោយសារពួកគេមិនត្រូវបានអនុញ្ញាតឱ្យនិយាយជាសាធារណៈ ថ្លែងថា៖ «នៅឆ្នាំ២០១៩ ឯកអគ្គរដ្ឋទូតចិន បានប្រាប់លោក ចេន ហ្ស៊ី ឱ្យបញ្ឈប់រាល់សកម្មភាពឧក្រិដ្ឋកម្មទាំងអស់ ហើយមិនត្រូវជ្រៀតជ្រែកចូលក្នុងការស៊ើបអង្កេតទាំងឡាយណាមកលើមនុស្សរបស់លោកឡើយ»។ «រដ្ឋាភិបាលចិនមិនបានឈានទៅធ្វើបត្យាប័ន ឬចាប់បញ្ជូននរណាម្នាក់ឡើយចាប់តាំងពីមានការផ្ទុះរាលដាលនៃជំងឺកូវីដ១៩ ក៏ប៉ុន្តែរដ្ឋាភិបាលចិនអាចនឹងធ្វើដូច្នេះនាពេលអនាគត»៕
កែសម្រួលអត្ថបទជាភាសាអង់គ្លេសដោយ អាប៊ី ស៊ីហ្វ (Abby Seiff), ជីម ស្នាយឌឺរ (Jim Snyder), ម៉ាត់ ផេនីងថុន (Mat Pennington) និង បូអឺរ ដេង (Boer Deng) ។