សកម្មជនដីធ្លីបឹងកក់ លោកស្រី ង៉ែត ឃុន ថា តុលាការក្រុងភ្នំពេញព្រមានចាប់ខ្លួនលោកស្រី ប្រសិនបើលោកស្រីនៅតែបន្តតវ៉ា ឬថតវីដេអូនៅមុខតុលាការទាមទារឱ្យដោះលែងកូនលោកស្រីតទៅទៀត។ មន្ត្រីសង្គមស៊ីវិលថា ការគំរាមកំហែងរបស់តុលាការមកលើពលរដ្ឋ ដែលតវ៉ាដោយសន្តិវិធីនេះ គឺផ្ទុយពីខ្លឹមសាររដ្ឋធម្មនុញ្ញ។
ដោយហាក់គ្មានសង្ឃឹម ចំពោះប្រព័ន្ធតុលាការថា នឹងផ្តល់យុត្តិធម៌ជូនគ្រួសារ និងកូនស្រី គឺលោកស្រី អេង សុខា កំពុងជាប់ឃុំ សកម្មជនដីធ្លីបឹងកក់ លោកស្រី ង៉ែត ឃុន មិត្តភ័ក្ដិ និងសាច់ញាតិសរុបចំនួន ៤នាក់ បានប្រមូលផ្តុំតវ៉ាអហិង្សាជាថ្មីទៀត នៅមុខសាលាដំបូងរាជធានីភ្នំពេញ នៅថ្ងៃទី១៣ ខែមីនា ដើម្បីទាមទារឱ្យតុលាការដោះលែងកូនស្រី ប៉ុន្តែ ការតវ៉ានេះ ពួកគាត់ត្រូវបានតុលាការកោះហៅទៅគំរាមមិនឱ្យចេញមកតវ៉ានៅខាងមុខតុលាការនោះទេ។
សកម្មជនដីធ្លីបឹងកក់ លោកស្រី ង៉ែត ឃុន ប្រាប់វិទ្យុអាស៊ីសេរីថា លោកស្រីមិនព្រមបញ្ឈប់សកម្មភាពតវ៉ាទាមទារតុលាការឱ្យដោះលែងកូនលោកស្រី បើទោះជាចៅក្រមសាលាដំបូងរាជធានីភ្នំពេញគំរាមចាប់ខ្លួន ប្រសិនបើលោកស្រីបន្តសកម្មភាពក៏ដោយ។ លោកស្រីថា ការគំរាមរបស់តុលាការភ្នំពេញនេះ គឺជារឿង ដែលមិនអាចទទួលយកបាន ព្រោះកូនស្រីលោកស្រីត្រូវបានអាជ្ញាធរចាប់ខ្លួនទាំងអយុត្តិធម៌ហើយ តុលាការបែរជាមិនឱ្យលោកស្រីចេញមុខតវ៉ាទៅវិញ។
លោកស្រី ង៉ែត ឃុន៖ «ហើយគេថា បើមកៗ នៅមិនស្ដាប់អាជ្ញាធរណែនាំយើងអីៗ ទេ គេមានវិធានការតទៅទៀត ហើយដល់អ៊ីចឹង ខ្ញុំថា ខ្ញុំម៉េចអស់ចិត្ត ខ្ញុំម៉េចសុខចិត្ត បើកូនខ្ញុំគ្រាន់តែមកទាមទារយុត្តិធម៌សម្រាប់ខ្ញុំតើ គេវាយខ្ញុំបែកក្បាលហើយ ប្រព័ន្ធតុលាការអត់ចាប់ជនដៃដល់ ចាប់ជនល្មើសមកផ្ដន្ទាទោស ហើយយកតែអ្នករងគ្រោះមកដាក់ទោសអ៊ីចឹង ខ្ញុំមិនអាចស្ងប់ មិនសុខចិត្តទេ»។
លោកស្រី ង៉ែត ឃុន ថា បើទោះជាលោកស្រីមានអាយុ ៨៤ឆ្នាំ និងមានជំងឺជាប់ខ្លួនក្ដី លោកស្រីមិនព្រមចុះចាញ់ ចំពោះការគំរាមកំហែងពីអាជ្ញាធរភ្នំពេញនោះទេ។ លោកស្រីថា នឹងបន្តធ្វើសកម្មភាពយ៉ាងហោចណាស់ចំនួន ៣ ទៅ ៤ដង នៅមុខសាលាដំបូងរាជធានីភ្នំពេញរហូតដល់កូនស្រីរបស់លោកស្រីទទួលបានសេរីភាពឡើងវិញ។
ជុំវិញករណីនេះ សកម្មជនសង្គម លោក អ៊ុក ពេជ្យសំណាង ដែលចូលរួមតវ៉ាឱ្យមានការដោះលែងលោកស្រី អេង សុខា លើកឡើងថា ករណីគំរាមកំហែងពីសំណាក់តុលាការក្រុងភ្នំពេញ គឺជាការធ្វើទុក្ខបុកម្នេញលើគ្រួសារលោកស្រី ង៉ែត ឃុន ម្ដងហើយម្ដងទៀត។ លោកថា តុលាការបានចាប់ខ្លួន លោកស្រី អេង សុខា ទាំងអយុត្តិធម៌ ហើយតុលាការបែរជាគំរាមម្ដាយលោកស្រីមិនឱ្យតវ៉ាទៀត។ លោកថា រូបភាពទាំងនេះបង្ហាញថា ពលរដ្ឋខ្មែរមិនមានសិទ្ធិសេរីភាព ដូចដែលមានចែងក្នុងរដ្ឋធម្មនុញ្ញនោះទេ។
លោក អ៊ុក ពេជ្យសំណាង៖ «ខ្ញូំមកចូលរួមស្ដាប់ ខ្ញុំមកចូលរួមឱ្យចម្លើយ ហើយខ្ញុំមកចូលរួមផ្ដាំទៅមតិអ្នកស្ដាប់ទាំងអស់នៅលើពិភពលោក និងអ្នកស្ដាប់ទាំងអស់នៅក្នុងស្រុកខ្មែរ ម៉េចក៏គ្រួសាររងគ្រោះនៅបន្តរងគ្រោះ ហើយម៉េចអ្នក ដែលបង្កអុកឡុកធ្វើសេចក្ដីសម្រេចតាមអ្វី ដែលតុលាការនោះចេះតែបន្តអ៊ុកឡុកគ្រប់សកម្មភាពគ្រួសារហ្នឹងមកដាក់គុក»។
កាលពីថ្ងៃទី៣១ ខែមករា សមត្ថកិច្ចបានចាប់ខ្លួនលោកស្រី អេង សុខា ដោយហិង្សាទាំងគ្មានដីកា។ ការចាប់ខ្លួននេះ ធ្វើឡើងអំឡុងពេលលោកស្រីកំពុងតវ៉ានៅមុខសាលាដំបូងរាជធានីភ្នំពេញ បង្ហាញពីការឈឺចាប់ ដែលតុលាការមិនផ្ដល់យុត្តិធម៌ជូនម្ដាយ គឺលោកស្រី ង៉ែត ឃុន ដែលកំពុងរងបណ្ដឹងក្នុងតុលាការ ពាក់ព័ន្ធបញ្ហាដីធ្លី កាលពីជាង ១០ឆ្នាំមុន។ ក្រោយមក សាលាដំបូងរាជធានីភ្នំពេញបានឃុំខ្លួនលោកស្រី អេង សុខា ជាបណ្ដោះអាសន្ននៅពន្ធនាគារព្រៃស ដោយចោទអំពីបទ «បំផ្លិចបំផ្លាញទ្រព្យសម្បត្តិអ្នកដទៃ»។
វិទ្យុអាស៊ីសេរីមិនអាចទាក់ទងអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ដើម្បីឆ្លើយតបជុំវិញរឿងនេះបានទេ នៅថ្ងៃទី១៣ ខែមីនា ដោយសារហៅទូរស័ព្ទចូល តែគ្មានអ្នកទទួល។
ទាក់ទិនរឿងនេះ ប្រធានសមាគមការពារសិទ្ធិមនុស្ស អាដហុក លោក នី សុខា ថា តុលាការ ឬរដ្ឋាភិបាលមិនអាចគំរាមកំហែងពលរដ្ឋ ដែលតវ៉ាដោយសន្តិវិធីនោះទេ។ លោកថា ក្នុងសង្គមប្រជាធិបតេយ្យ ពលរដ្ឋមានសិទ្ធិចេញធ្វើកូដកម្ម បាតុកម្មដោយសន្តិវិធី ដើម្បីទាមទារអាជ្ញាធររដ្ឋឱ្យដោះស្រាយ ហើយអាជ្ញាធររដ្ឋត្រូវតែទទួលយកសំណើរបស់ពលរដ្ឋ។
លោក នី សុខា៖ «នៅពេលណា ដែលមានការគំរាមកំហែងទៅលើពលរដ្ឋណាម្នាក់ក្នុងការដែលហាមឃាត់គេមិនឱ្យតវ៉ា មានន័យថា ឃាត់សិទ្ធិគេមិនឱ្យតវ៉ានោះ គឺជាការរំលោភបំពារបំពានធ្ងន់ធ្ងរ ទៅលើសិទ្ធិសេរីភាពរបស់ប្រជាពលរដ្ឋហើយ ពីព្រោះថា សិទ្ធិនៅក្នុងការតវ៉ា នៅក្នុងការទាមទារ គឺជាសិទ្ធិស្របច្បាប់របស់ប្រជាពលរដ្ឋ ហើយការតវ៉ាការទាមទារទាំងអស់នោះ ធ្វើឡើងដោយអហិង្សា កុំឱ្យតែប្រើប្រាស់នូវអំពើហិង្សា អាហ្នឹង គឺជាសិទ្ធិស្របច្បាប់របស់ប្រជាពលរដ្ឋ»។
លោកស្រី ង៉ែត ឃុន និងលោកស្រី អេង សុខា គឺជាជនរងគ្រោះបាត់បង់ដីធ្លី និងរងអំពើហិង្សាពីអាជ្ញាធរក្រុងភ្នំពេញជាច្រើនដង។ លោកស្រី ង៉ែត ឃុន ធ្លាប់ជាប់ពន្ធនាគារចំនួនពីរលើក គឺនៅឆ្នាំ២០១២ ជាប់ ១ខែ ហើយក្រោយមក នៅក្នុងឆ្នាំ២០១៤ ជាប់ ៥ខែ។ បន្ថែមលើសពីនេះ លោកស្រី ង៉ែត ឃុន ក៏ធ្លាប់ត្រូវបានក្រុមសន្តិសុខក្រុងភ្នំពេញវាយបែកក្បាលហូរឈាម ក្នុងពេលចេញតវ៉ារកដំណោះស្រាយដីធ្លីជាមួយក្រុមហ៊ុនស៊ូកាគូ (Shukaku) របស់ឧកញ៉ា ឡាវ ម៉េងឃីន ជាសមាជិកព្រឹទ្ធសភារបស់បក្សកាន់អំណាច ដែលរំលោភយកដីធ្លីផ្ទះសម្បែងរបស់គាត់ កាលពីជាង ១០ឆ្នាំមុន។
សាច់ញាតិ និងមន្ត្រីសង្គមស៊ីវិល ស្នើអាជ្ញាធរឱ្យដោះលែងលោកស្រី អេង សុខា ឱ្យមានសេរីភាពឡើងវិញ ពីព្រោះសកម្មភាពរបស់លោកស្រី អេង សុខា គ្មានចេតនាបំផ្លាញទ្រព្យសម្បត្តិសាធារណៈដូចការចោទប្រកាន់របស់តុលាការឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។