សាច់ញាតិជនរងគ្រោះ និងមន្ត្រីសង្គមស៊ីវិលគាំទ្រឱ្យសាលាឧទ្ធរណ៍ភ្នំពេញ តម្កល់កាលដីកាសំណុំរឿងឃាតកម្មលើគូដណ្ដឹងវ័យក្មេងពីរនាក់ ដែលបង្កឡើងដោយអតីតឧកញ៉ា ស្រី ស៊ីណា ទុកជាបានការដដែល។ ពួកគាត់រំពឹងថា តុលាការនឹងឆាប់បិទបញ្ចប់សំណុំរឿងនេះ ហើយត្រូវបង្គាប់ឱ្យជនបង្កឆាប់ផ្ដល់សំណងជំងឺចិត្តមកឱ្យគ្រួសារជនរងគ្រោះទៅតាមសេចក្ដីសម្រេចរបស់សាលាដំបូងរាជធានីភ្នំពេញ។
សំណុំរឿងឃាតកម្មបាញ់សម្លាប់គូរស្នេហ៍វ័យក្មេងពីនាក់ ស្ថិតនៅបុរី ប៉េងហួត បឹងស្នោ ខណ្ឌច្បារអំពៅ ដែលបង្កឡើងដោយអតីតឧកញ៉ា ស្រី ស៊ីណា គឺអស់រយៈជាង ១០ខែមកហើយ។ នៅពេលនេះជនត្រូវចោទគឺ លោក ស្រី ស៊ីណា បានប្ដឹងជំទាស់ទៅសាលាឧទ្ធរណ៍ ជុំវិញសេចក្ដីសម្រេចរបស់សាលាដំបូងរាជធានីភ្នំពេញកន្លងមក ហើយត្រូវបើកសវនាការជាលើកទី១ នៅថ្ងៃទី១៤ ខែមីនា ប៉ុន្តែ សវនាការនេះ ត្រូវពន្យារពេលទៅថ្ងៃទី២៣ ខែមេសាវិញ ដោយសារតែលោក ស្រី ស៊ីណា រកមេធាវីការពារក្ដីមិនទាន់បាន។
ប្អូនស្រីជនរងគ្រោះ លោក ឡុង លីសុង គឺកញ្ញា ឡុង លីហ័រ ប្រាប់វិទ្យុអាស៊ីសេរី នៅថ្ងៃទី១៤ ខែមីនា យ៉ាងខ្លីថា កញ្ញាថា មិនដឹងត្រូវនិយាយបែបណានោះទេ លើករណីនេះ ប៉ុន្តែ កញ្ញាគាំទ្រឱ្យសាលាឧទ្ធរណ៍ភ្នំពេញរក្សាសាលដីកាសម្រេចរបស់សាលាដំបូងរាជធានីភ្នំពេញ នៅដដែល។
ជុំវិញរឿងនេះអ្នកនាំពាក្យសាលាឧទ្ធរណ៍ លោក ឃុន លាងម៉េង ប្រាប់វិទ្យុអាស៊ីសេរី នៅថ្ងៃទី១៤ ខែមីនា ថា សំណុំរឿងឃាតកម្ម ពាក់ព័ន្ធនឹងអតីតឧកញ្ញ៉ា ស្រី ស៊ីណា នេះ ពុំមានការវិវត្តអ្វីនោះទេ ព្រោះសវនាការ ដែលត្រូវបើកលើសំណុំរឿងនេះ នៅថ្ងៃទី១៤ ខែមីនា បានពន្យារពេល ទៅថ្ងៃទី៣១ ខែមេសាវិញ ដោយសារតែលោក ស្រី ស៊ីណា រកមេធាវីការពារក្ដីអត់ទាន់បាន។
សាលាដំបូងរាជធានីភ្នំពេញនៅថ្ងៃទី២៣ខែធ្នូ បានប្រកាសសាលក្រមចំនួន៣ របស់អតីតឧកញ៉ា ស្រី ស៊ីណា គឺសំណុំរឿងឃាតកម្ម ប៉ុនប៉ងឃាតកម្ម និងប្រើប្រាស់អាវុធខុសច្បាប់ និងបទរំលោភលើលំនៅឋាន ដោយក្រុមប្រឹក្សាជំនុំជម្រះ នៃសាលាដំបូងរាជធានីភ្នំពេញ បានសម្រេចផ្ដន្ទាទោស ជនជាប់ចោទ ឈ្មោះ ស្រី ស៊ីណា ឱ្យជាប់ពន្ធនាគារចំនួន ៣១ ឆ្នាំនិងផ្ដល់សំណងជំងឺចិត្តដល់សាច់ញាតិជនរងគ្រោះបាត់បង់ជីវិត និងជនរងគ្រោះដែលរងរបួសចំនួន២លាន៥សែន៥ម៉ឺនដុល្លារ។
ទាក់ទិនរឿងនេះ ប្រធានសមាគមការពារសិទ្ធិមនុស្ស អាដហុក លោក នី សុខា យល់ឃើញថា សំណុំរឿងឃាតកម្មលើគូរដណ្ដឹងពីរនាក់ កាលពីខែមិថុនា កន្លងមកនេះ មានការចាប់អារម្មណ៍ពីសំណាក់មហាជនច្រើន។ ទន្ទឹមនឹងនោះ លោកថា មហាជនក៏បានគាំទ្រ ចំពោះសេចក្ដីសម្រេចរបស់សាលាដំបូងរាជធានីភ្នំពេញ។ លោកថា ចំពោះការប្ដឹងជំទាស់របស់ជនត្រូវចោទ គឺជាសិទ្ធិសេរីភាព ប៉ុន្តែ សាលាឧទ្ធរណ៍ភ្នំពេញ ត្រូវតែរកភស្តុតាងឱ្យបានរឹងមាំ ក្នុងករណី ដែលមានការប្រែប្រួលមួយចំនួនលើសំណុំរឿងមួយនេះ។
លោក នី សុខា៖ «ប្រសិនបើវាមានលក្ខណៈប្រែប្រួល ទល់តែសាលាឧទ្ធរណ៍នឹងមានមូលដ្ឋាននៅក្នុងការសម្រេច ថាតើវាមានមូលដ្ឋានអីខ្លះនៅក្នុងការធ្វើឱ្យសាលក្រមនឹងមានការប្រែប្រួលឡើងវិញ។ ខ្ញុំគិតថារឿងទាំងអស់នេះសាលាឧទ្ធរណ៍ នឹងមានការពិចារណានៅក្នុងកម្រិតខ្ពស់ទាក់ទងបញ្ហានេះ ព្រោះបញ្ហានេះវាជះឥទ្ធិពលដល់បញ្ហានៅក្នុងសង្គមនឹងច្រើន ហើយក៏មានការតាមដានពីមហាជនក៏ច្រើនដែរ»។
កាលពីរសៀលថ្ងៃទី១៧ ខែមិថុនា អតីតឧកញ៉ា ស្រី ស៊ីណា បានប្រើកាំភ្លើងខ្លីបាញ់ជាច្រើនគ្រាប់បណ្ដាលឱ្យគូស្នេហ៍វ័យក្មេង ២នាក់បាត់បង់ជីវិត និងមនុស្សពីរនាក់ទៀតរងរបួសនៅក្នុងផ្ទះរបស់ជនរងគ្រោះ ស្ថិតនៅបុរី ប៉េង ហួត បឹងស្នោ ក្នុងខណ្ឌច្បារអំពៅ ដែលផ្ដើមចេញពីទំនាស់បន្តិចបន្តួចរឿងស្នួហាលខោអាវឆ្លងចូលព្រំដីគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។