សម្រាប់ប្រិយមិត្តដែលនិយមតាមដានព័ត៌មានអន្តរជាតិ ប្រិយមិត្តប្រហែលជាបានជ្រាបហើយថា ប្រធានាធិបតីរុស្ស៊ី (Russia) លោក វ្លាឌីមៀ ពូទីន (Vladimir Putin) និង ប្រធានាធិបតីចិន (China) លោក ស៊ី ជីនពីង (Xi Jinping) បានជួបគ្នាដើម្បីសម្ដែងពីសាមគ្គីភាព បន្ទាប់ពីបានចូលរួមក្នុងពិធីបើកកីឡាអូឡាំពិករដូវរងា ២០២២ នៅក្រុងប៉េកាំង (Beijing)។
ពិធីនេះត្រូវបានក្រុមមេដឹកនាំនៃប្រទេសលោកខាងលិចភាគច្រើន នាំគ្នាធ្វើពហិការមិនចូលរួម ដោយសារតែករណីរំលោភបំពានសិទ្ធិមនុស្សនៅក្រុងហុងកុង (Hong Kong) នៅតំបន់ទីបេ (Tibet) និងតំបន់ស៊ីនជាំង (Xinjiang)។ ក៏ប៉ុន្តែ សម្រាប់ក្រុមមេដឹកនាំនៃបណ្ដាប្រទេសមួយចំនួនទៀតដែលមានទំនោរទៅរកការដឹកនាំប្រទេសតាមបែបផ្តាច់ការ ក្នុងនោះក៏រួមមានទាំងកម្ពុជាផង ពួកគេបានទៅចូលរួមពិធីបើកកីឡាអូឡាំពិករដូវរងា ២០២២ នេះ បើទោះបីជាប្រទេសរបស់ពួកគេពុំបានបញ្ជូនកីឡាករទៅចូលរួមប្រកួតប្រជែងក្នុងកីឡាអូឡាំពិករដូវរងានេះក៏ដោយ។
បុរសខ្លាំងទាំងពីរនាក់នេះ គឺលោក វ្លាឌីមៀ ពូទីន និង លោក ស៊ី ជីនពីង អាចក្លាយជាមេដឹកនាំកាន់អំណាចពេញមួយជីវិតនៃប្រទេសរបស់ពួកគេទាំងពីរ ដែលសុទ្ធតែមានអាវុធប្រល័យនុយក្លេអ៊ែរ។ ពួកលោកទាំងពីរមានទស្សនវិស័យដូចគ្នាអំពីការគ្រប់គ្រងប្រទេសតាមរបបផ្តាច់ការដោយឥតងាករេ ហើយក៏មានទស្សនៈដូចគ្នាដែរក្នុងការមើលមកក្រុមប្រទេសលោកខាងលិចប្រកបដោយការសង្ស័យ បើទោះជាមិនមែនក្នុងភាពជាសត្រូវក៏ដោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។