អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី២៩ សីហា បន្តសវនាការស្ដាប់សក្ខីកម្មរបស់អតីតយុទ្ធជនខ្មែរក្រហមមួយរូប ដែលតាំងខ្លួនជាដើមបណ្ដឹងរដ្ឋប្បវេណីនៅក្នុងសំណុំរឿង០០២ វគ្គ២។ ដើមបណ្ដឹងរដ្ឋប្បវេណីសាលាក្ដីខ្មែរក្រហមថា លោក មាស មុត ពាក់ព័ន្ធនឹងការសម្លាប់មនុស្ស។
ដើមបណ្ដឹងរដ្ឋប្បវេណីថ្មីដែលមានឈ្មោះ សេង សឿន ប្រាប់អង្គជំនុំជម្រះសាលាដំបូងនៅរសៀលថ្ងៃទី២៩ សីហា ថា អតីតមេបញ្ជាការទ័ពជើងទឹកខ្មែរក្រហមឈ្មោះ មាស មុត ធ្លាប់បានចេញបញ្ជាសម្លាប់មនុស្សនៅក្នុងរបបកម្ពុជាប្រជាធិបតេយ្យ៖ «ខ្ញុំបានដឹងតែមួយទេ ពេលដែលខ្ញុំមកដល់ក្រចេះ ខ្ញុំបានជួបម្នាក់ដែលនៅភូមិជាមួយខ្ញុំ រៀនជាមួយគ្នា។ ភូមិកំណើតនៅឃុំពពេល ស្រុកត្រាំកក់ ហ្នឹង វាមានតួនាទីសមាជិកតំបន់ទទួលបន្ទុកខាងយោធា។ ពេលនោះខ្ញុំទៅជួបបានម្ដងហ្នឹង រំលងបានបីថ្ងៃ បង មុត ប្រាប់ខ្ញុំថា អើអញធ្វើការឱ្យហើយ អាអឿង ថានៅភូមិជាមួយ សឿន ឯងឬ? ខ្ញុំថា បាទ! នៅភូមិជាមួយខ្ញុំ។ អើអញដោះស្រាយឱ្យហើយ។ គឺ ម៉ៅ អឿង នៅភូមិជាមួយខ្ញុំ ដែលពេលហ្នុង មាស មុត គាត់ផ្ទាល់ហ្មង គាត់ថា គាត់ឱ្យនីរសារគាត់បាញ់សម្លាប់វាចោល ហើយគាត់ប្រាប់ខ្ញុំ»។
ការថ្លែងភ្ជាប់លោក មាស មុត ទៅនឹងការសម្លាប់មនុស្សនោះ គឺលោក សេង សឿន អះអាងថា លោកបានទៅធ្វើការនៅតំបន់ ៥០៥ ក្នុងខេត្តក្រចេះ នៅចុងឆ្នាំ១៩៧៨ ជាពេលដែលលោក មាស មុត ទៅត្រួតត្រានៅទីនោះ។ លោកបញ្ជាក់បន្ថែមថា ពេលនោះជាពេលដែលកងទ័ពវៀតណាម ជិតចូលលុកលុយកម្ពុជា ហើយជាពេលដែលកម្មាភិបាលខ្មែរក្រហមនៅតំបន់នោះជាច្រើន ត្រូវបានបក្សកុម្មុយនិស្តកម្ពុជា បោសសម្អាត។ លោក សេង សឿន បដិសេធចំពោះសហព្រះរាជអាជ្ញាថា លោកមិនបានដឹងអំពីជោគវាសនារបស់កម្មាភិបាលថ្នាក់ក្រោមទេ ពេលបោសសម្អាតនោះ៖ «ពេលហ្នុងរួចខ្លួនគណៈស្រុកតែពីរហ្នឹង។ ឯពីរទៀតដែលខ្ញុំទៅទាន់ហ្នឹង ចំពេលហ្នឹងបង មុត គាត់ថា មិនមែនបោសសម្អាតទេ គាត់ចាប់បញ្ជូនឱ្យឡើងយន្តហោះទៅភ្នំពេញទៅ។ អាហ្នឹងនៅស្រុកជាមួយខ្ញុំដែរ គឺអា ភ័ណ នៅស្រុកកំណើតគេហៅអា ចិន។ ខ្ញុំបានស្គាល់តែពីរហ្នឹង ហើយពីរនាក់ដែលបង មុត ឱ្យឡើងយន្តហោះទៅ មិនដឹងថា ទៅឯណាទេ។ ប៉ុន្តែដឹងតែថា ទៅដល់ភ្នំពេញហើយ។ បែបបាត់ខ្លួន។ ខ្ញុំសួរនៅស្រុកភូមិថា អត់ឃើញ»។
ដើមបណ្ដឹងរូបនេះឲ្យដឹងថា តំបន់ ៥០៥ នៅខេត្តក្រចេះ ជាតំបន់ស្វយ័តដែលឋិតនៅក្រោមការគ្រប់គ្រងរបស់គណៈមជ្ឈិមបក្សកុម្មុយនិស្តកម្ពុជា ផ្ទាល់ មិនមែននៅក្រោមគណៈភូមិភាគទេ។ លោកសន្និដ្ឋានថា ការដែលលោក មាស មុត ទៅគ្រប់គ្រង និងតែងតាំងកម្មាភិបាលនៅទីនោះ គឺជំនួស ប៉ុល ពត។ លោក សេង សឿន បញ្ជាក់លើឯកសាររបស់សហព្រះរាជអាជ្ញាដែលបង្ហាញថា អ្នកទាំងពីរនាក់ស្លាប់នៅគុកទួលស្លែង៖ «»។
លោក មាស មុត អតីតមេទ័ពជើងទឹកខ្មែរក្រហម បច្ចុប្បន្នជាជនជាប់ចោទរបស់សាលាក្ដីខ្មែរក្រហមមួយរូបនៅក្នុងសំណុំរឿងលេខ០០៣។ លោក មាស មុត ត្រូវបានសាលាក្ដីខ្មែរក្រហមចោទប្រកាន់ក្នុងសំណុំរឿង០០៣ ទាក់ទងនឹងឧក្រិដ្ឋកម្មមួយចំនួនមានជាអាទិ៍ បទមនុស្សឃាត រំលោភច្បាប់ព្រហ្មទណ្ឌកម្ពុជា ឆ្នាំ១៩៥៦ ឧក្រិដ្ឋកម្មប្រឆាំងមនុស្សជាតិ ដែលមានមនុស្សឃាត ការសម្លាប់រង្គាល ការធ្វើឲ្យទៅជាទាសករ ការឃុំឃាំង ការធ្វើទុក្ខបុកម្នេញដោយមូលហេតុនយោបាយ និងពូជសាសន៍ អំពើអមនុស្សធម៌នៅមន្ទីរសន្តិសុខកំពង់សោម ក្រចេះ និងមន្ទីរ «ស-២១»ការប្រព្រឹត្តលើជនជាតិវៀតណាម និងថៃ ហើយការរំលោភបំពានអនុសញ្ញាក្រុងហ្សឺណែវ ឆ្នាំ១៩៤៩ តាមរយៈការធ្វើបាប និងដកហូតសិទ្ធិរបស់ជនឈ្លើយសឹក។
លោក សេង សឿន អតីតជាយុទ្ធជននៅក្នុងជួរកងទ័ពខ្មែរក្រហម ដែលប្រយុទ្ធតតាំងទាហានសាធារណរដ្ឋខ្មែររបស់លោក លន់ នល់ តាំងពីឆ្នាំ១៩៧០ រហូតធ្លាក់ខ្លួនពិការនៅឆ្នាំ១៩៧៥។ លោកអះអាងថា លោកក៏ធ្លាប់ឃើញពួកខ្មែរក្រហមយកជនជាតិចិន ចាម និងវៀតណាម ទៅសម្លាប់នៅកោះគ ក្នុងខេត្តកណ្ដាល ដែរ។ លោកមានប្រសាសន៍ទៀតថា មូលហេតុដែលលោកសម្រេចចិត្តតាំងខ្លួនជាដើមបណ្ដឹងរដ្ឋប្បវេណីប្រឆាំងអតីតមេដឹកនាំជាន់ខ្ពស់ខ្មែរក្រហមនៅពេលនេះ គឺដោយសារតែលោកបាត់បង់បងថ្លៃ ៣រូបនៅក្នុងរបបខ្មែរក្រហមនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។