អង្គជំនុំជម្រះសាលាដំបូងនៃសាលាក្ដីខ្មែរក្រហម នឹងបើកសវនាការលើសំណុំរឿង០០២ វគ្គ២ បន្តនៅព្រឹកថ្ងៃច័ន្ទ ទី១៤ ធ្នូ ស្របពេលដែលកំពុងប្រឈមនឹងការខ្វះសាក្សី។ ការខ្វះសាក្សីក្នុងសំណុំរឿង០០២ វគ្គ២ គឺក្នុងពេលដែលអង្គជំនុំជម្រះសាលាដំបូង កំពុងធ្វើសវនាការទាក់ទងនឹងអង្គហេតុសម្លាប់ជនជាតិវៀតណាម ក្នុងរបបកម្ពុជាប្រជាធិបតេយ្យ។
អង្គជំនុំជម្រះសាលាដំបូងនៃសាលាក្ដីខ្មែរក្រហម ឲ្យដឹងថា អង្គជំនុំជម្រះកំពុងប្រឈមនឹងបញ្ហាខ្វះសាក្សី ឬដើមបណ្ដឹងរដ្ឋប្បវេណីមកផ្ដល់សក្ខីកម្មក្នុងសវនាការនៅសប្ដាហ៍នេះ។
ប្រធានអង្គជំនុំជម្រះសាលាដំបូង លោកចៅក្រម និល ណុន ប្រកាសក្នុងសវនាការកាលពីថ្ងៃសុក្រ ទី១១ ធ្នូ ថា សាក្សីមួយរូបដែលអង្គជំនុំជម្រះបានកំណត់កោះហៅឲ្យមកផ្ដល់សក្ខីកម្មតាមលំដាប់លំដោយនោះ មិនបានមកវិញ ដោយសារតែមានបញ្ហាសុខភាព៖ «ដើមបណ្ដឹងរដ្ឋប្បវេណី 2TCCP869 គាត់មានបញ្ហាសុខភាព។ គាត់មានជំងឺទីមួយ។ ទីពីរ គាត់មានចេតនាសុំលះបង់សិទ្ធិរបស់ខ្លួនជាដើមបណ្ដឹងរដ្ឋប្បវេណីនៅក្នុងរឿងក្ដីនេះ។ តើមេធាវីនាំមុខដើមបណ្ដឹងរដ្ឋប្បវេណីបញ្ជាក់ពីបញ្ហានេះ ជូនអង្គជំនុំជម្រះបានដឹងដែរឬទេ? ដើម្បីរៀបចំកាលវិភាគសវនាការនៅសប្ដាហ៍ក្រោយឲ្យបានសមស្រប និងអស់លទ្ធភាពនៃពេលវេលាដែលសេសសល់នៅក្នុងឆ្នាំនេះ»។
មេធាវីនាំមុខដើមបណ្ដឹងរដ្ឋប្បវេណី លោក ពេជ្រ អង្គ បញ្ជាក់ថា សាក្សីរូបនេះក្រៅពីមានបញ្ហាសុខភាព គាត់ក៏មានបញ្ហាភ័យខ្លាចដែរ៖ «មេធាវីរបស់គាត់ពិនិត្យឃើញថា គាត់មិនទុកចិត្ត ហើយមានការខ្លបខ្លាចនៅក្នុងការចូលមកឆ្លើយនៅចំពោះមុខអង្គសវនាការ នៅពេលមានមនុស្សច្រើន ហើយមានន័យថា ហាក់ដូចជាមានលក្ខណៈជាការបាក់ស្បាត នៅក្នុងការប្រឈមនឹងការឆ្លើយនៅចំពោះមនុស្សមានគ្នាច្រើន។ ហើយម្យ៉ាងទៀត ចេតនារបស់គាត់ ដោយសារថាគាត់មិនទុកចិត្តខ្លួនឯងដូច្នេះ ធ្វើឲ្យគាត់មិនមានបំណងនៅក្នុងការចូលមកឆ្លើយនៅចំពោះមុខអង្គសវនាការទេ។ ទោះជាកន្លងមក មេធាវីរបស់គាត់ធ្លាប់ណែនាំឲ្យជួបគ្រូពេទ្យចិត្តសាស្ត្រ ធីភីអូ (TPO) រួចមកហើយ»។
លោកចៅក្រម និល ណុន ថ្លែងថា ក្នុងពេលប្រឈមមុខខ្វះសាក្សីបន្ទាន់នេះ អង្គជំនុំជម្រះចង់យកសាក្សីពីររូបផ្សេងទៀត មានលេខកូដថា 2TCW846 និង 2TCW1000 ដែលនឹងត្រូវកោះហៅនៅដើមខែមករា ឆ្នាំ២០១៦ នោះ ឲ្យមកផ្ដល់សក្ខីកម្មនៅថ្ងៃច័ន្ទ ទី១៤ ធ្នូ ជំនួសវិញ ក៏ប៉ុន្តែទាំងភាគីសហព្រះរាជអាជ្ញា និងភាគីការពារក្ដីជនជាប់ចោទ សុទ្ធតែជំទាស់ដូចគ្នា មិនគាំទ្រឲ្យអង្គជំនុំជម្រះកោះហៅសម្រាប់ថ្ងៃច័ន្ទ ទេ។
មេធាវីការពារជនជាប់ចោទ នួន ជា គឺលោក វិកទ័រ កូប៉េ (Victor Koppe) កត់សម្គាល់ថា សាក្សី 2TCW1000 គួរតែរង់ចាំរហូតដល់ការស៊ើបអង្កេតចប់សិន៖ «ហើយម្យ៉ាងទៀត គឺដោយសារតែវាមានភាពស្មុគស្មាញផង។ បើសិនជាគាត់ត្រូវបានកោះហៅនៅសប្ដាហ៍ក្រោយ យើងខ្ញុំយល់ស្របជាមួយសហព្រះរាជអាជ្ញា មេត្តាកុំកោះហៅឲ្យចំថ្ងៃច័ន្ទ អី គឺកោះហៅគាត់នៅចុងសប្ដាហ៍ទៅ។ ខ្ញុំមិនដឹងថា តើមានការកំណត់ពេលវេលាសម្រាប់សាក្សីរូបនេះមួយ ឬក៏ពីរថ្ងៃនោះទេ»។
ចំណែកឯមេធាវីការពារក្ដីជនជាប់ចោទ ខៀវ សំផន គឺអ្នកស្រី អង់តា ហ្គីហ្សេ (Anta Guisse) ថ្លែងថា ខាងអ្នកស្រីមិនអាចរៀបចំខ្លួនទាន់សម្រាប់សាក្សីនេះទេ៖ «ចំពោះសាក្សី 2TCW846 នោះ គឺមិនការលំបាកអ្វីសម្រាប់យើងខ្ញុំទេ ប៉ុន្តែ 2TCW1000 ជាសាក្សីមួយរូបដែលនឹងត្រូវកោះហៅឲ្យផ្ដល់សក្ខីកម្មទៅតាមសំណើថ្មីៗនេះរបស់សហព្រះរាជអាជ្ញា។ យើងមានបញ្ហាខាងការរៀបចំខ្លួនហើយ។ ប្រសិនបើអង្គជំនុំជម្រះកោះហៅគាត់មកមុនខុសពីការគ្រោងទុកនោះ យើងជាមេធាវីការពារក្ដីពិបាករៀបចំខ្លួនណាស់។ អ៊ីចឹងបើអាចកោះហៅ សុំឲ្យកោះហៅ សុំមេត្តាកោះហៅនៅចុងសប្ដាហ៍»។
ទោះជាយ៉ាងណាក្ដី អង្គជំនុំជម្រះនៅមិនទាន់ប្រកាសឲ្យដឹងអំពីការស្ដាប់សាក្សីទាំងនេះនៅពេលណានៅឡើយ ហើយនៅថ្ងៃច័ន្ទ ទី១៤ ធ្នូ អង្គជំនុំជម្រះសាលាដំបូង នឹងធ្វើសវនាការស្ដាប់សក្ខីកម្មរបស់សាក្សីថ្មីមួយរូប ដែលមានរហស្សនាមថា 2TCW820។ សវនាការបន្ត គឺទាក់ទងនឹងការសម្លាប់ជនជាតិវៀតណាម នៅក្នុងរបបកម្ពុជាប្រជាធិបតេយ្យដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។