សកម្មជនដីធ្លីឡពាងម្នាក់រងការគំរាមសម្លាប់ពីអ្នកភូមិជាមួយគ្នាដែលធ្វើការយាមដីឱ្យក្រុមហ៊ុន ខេ.ឌី.ស៊ី របស់អ្នកស្រី ជា ខេង ភរិយារដ្ឋមន្ត្រីក្រសួងរ៉ែ និងថាមពល លោក ស៊ុយ សែម។ សង្គមស៊ីវិលស្នើដល់អាជ្ញាធរចុះស៊ើបអង្កេតរកឱ្យឃើញមូលហេតុពិតប្រាកដ ក្នុងរឿងនេះ និងផ្ដន្ទាទោសអ្នកគំរាមទៅតាមច្បាប់។
តំណាងសហគមន៍ឡពាង ដែលមានជម្លោះដីធ្លីដ៏រ៉ាំរ៉ៃជាមួយក្រុមហ៊ុន ខេ.ឌី.ស៊ី លោក ស្ងួន ញឿន ឱ្យអាស៊ីសេរីដឹងថា រូបលោក ត្រូវឈ្មោះ ជួន ឃីម ជាសន្តិសុខយាមឱ្យក្រុមហ៊ុន ស្រែកសម្លុត និងគំរាមសម្លាប់ ខណៈលោកនិងកូនដើររកត្រីនៅតាមអូរក្បែររបងថ្មក្រុមហ៊ុន ខេ.ឌី.ស៊ី កាលពីយប់ថ្ងៃទី១៣ មិថុនា។
លោក ស្ងួន ញឿន រៀបរាប់ថា នៅពេលឈ្មោះ ជួន ឃីម ស្រែកពីចង្ហាយថា នឹងសម្លាប់ចោលមួយគ្រួសារ កូនប្រុសរបស់ ជួន ឃីម ឈ្មោះ រិទ្ធិ ក៏បានស្ទុះទៅយកកាំបិតបម្រុងទៅកាប់លើរូបលោក និងកូនតូច៣នាក់ទៀត ប៉ុន្តែត្រូវអាក់ខានទៅវិញ ដោយសារឈ្មោះ ជួន ឃីម ជាឪពុកបានឃាត់។
សកម្មជនដីធ្លីរូបនេះ អះអាងថា ឈ្មោះ ជួន ឃីម ប្រើពាក្យសម្ដីគំរាមសម្លាប់ និងប្រមាថដល់អាយុជីវិត ថាកាប់នឹងកាំបិត ឬបាញ់នឹងកាំភ្លើងខ្យល់ មិនសំដៅចំពោះតែរូបលោកម្នាក់ទេអ្នកភូមិផ្សេងទៀត ក៏អាចជាគោលដៅដែរ៖ «ពួកខ្ញុំឃើញទង្វើទាំងអស់នេះ គឺជាទង្វើខុសច្បាប់មួយដោយសារប្រមាថនូវជីវិតរបស់ខ្ញុំ ប៉ុន្តែខ្ញុំបានដាក់ពាក្យទៅអាជ្ញាធរឬមេប៉ុស្តិ៍តាចេសហ្នឹង ក៏អត់ឃើញមានចំណាត់ការយ៉ាងណាទេ។ ហើយនេះជាទង្វើអាក្រក់មួយចំពោះក្រុមហ៊ុនដែលបានធ្វើ។ មិនធ្វើចំពោះខ្ញុំប៉ុណ្ណឹងទេ ប្រជាពលរដ្ឋក៏គេរាយការណ៍ប្រាប់ដែ។ នេះគ្រួសារខ្ញុំហើយ ដែលប៉ះផ្ទាល់។ ប្រជាពលរដ្ឋក៏រាយការណ៍រឿយៗដែរ ឱ្យអ្នកណាទៅជិតរបងទៅជិតដីក្រុមហ៊ុន ត្រូវប្រមាថបាញ់មួយកាំភ្លើងខ្យល់ ឬក៏កាំភ្លើងអីជាដើមអ៊ីចឹង»។
ប្រធានប៉ុស្តិ៍នគរបាលឃុំតាជេស លោក ចាន់ ដារ៉ា ប្រាប់អាស៊ីសេរីថា លោកបានទៅកត់កំណត់ហេតុនៅផ្ទះលោក ស្ងួន ញឿន នៅថ្ងៃទី១៩ មិថុនា ហើយនិងកោះហៅឈ្មោះ ជួន ឃីម ទៅសួរនាំនៅប៉ុស្តិ៍នគរបាល ក្នុងរឿងគំរាមសម្លាប់នេះ៖ «ខ្ញុំបានទទួលព័ត៌មានអ្នកគ្រូ ហើយគាត់ថាចាំគាត់មកពីបង្ហាត់វិញ ចាំជួបខ្ញុំអ៊ីចឹង។ ហើយតិចទៀត ខ្ញុំចេញទៅហ្នឹងហើយ ទៅផ្ទះគាត់ឥឡូវហ្នឹងដែរ ដើម្បីធ្វើពាក្យបណ្ដឹងពីគាត់អ៊ីចឹងណាបង។ ហើយបានយើងដាក់លិខិតអញ្ជើញហៅភាគីម្ខាងទៀត ដើម្បីឱ្យគាត់មកជជែកគ្នា មកពីយ៉ាងមិចអីយ៉ាងមិច»។
អាស៊ីសេរី មិនអាចទាក់ទងលោក ជួន ឃីម ដើម្បីបកស្រាយការចោទប្រកាន់នេះ បាននៅឡើយ។
ជុំវិញរឿងនេះ មន្ត្រីសម្របសម្រួលសមាគមអាដហុកប្រចាំខេត្តកំពង់ឆ្នាំង លោក សំ ច័ន្ទគា ពន្យល់ថា ការប្រើពាក្យសម្ដីបែបនេះ គឺជាបទល្មើសរួចទៅហើយ នៅពេលដែលជនណាម្នាក់គំរាមសម្លាប់អ្នកដទៃ។ លោក សំ ច័ន្ទគា យល់ថា អាជ្ញាធរនៅថ្នាក់មូលដ្ឋាន គួរចុះស៊ើបអង្កេតរកឱ្យឃើញមូលហេតុពិតប្រាកដ ក្នុងរឿងនេះ និងផ្ដន្ទាទោសតាមច្បាប់ចំពោះជនដែលគំរាមសម្លាប់អ្នកដទៃ ប្រសិនបើរឿងនោះជាបទល្មើសប្រាកដមែន៖ «ក្នុងច្បាប់ករណីដែលយើងប៉ុនប៉ង ឬក៏ប្រើសម្ដី អាកប្បកិរិយាបែបហ្នឹង គឺជាការគំរាមសម្លាប់ហើយ។ ខាងសមត្ថកិច្ច គេអង្កេតស្រាវជ្រាវរកថា តើវាជាចេតនា ឬមិនចេតនា ជារឿងរបស់ជំនាញ»។
នៅក្នុងក្រមព្រហ្មទណ្ឌនៃព្រះរាជាណាចក្រកម្ពុជា ត្រង់មាត្រា ២៣៣ ចែងថា ការគំរាមកំហែងថា នឹងសម្លាប់ កាលបើការគំរាមកំហែងនេះ ធ្វើឡើងម្ដងហើយម្ដងទៀត ឬសម្ដែងចេញតាមលិខិត រូបភាព ឬវត្ថុអ្វីមួយ ត្រូវផ្ដន្ទាទោសដាក់ពន្ធនាគារពី ៦ខែ ទៅ ២ឆ្នាំ និងពិន័យជាប្រាក់ពីមួយលានរៀល ទៅ ៤លានរៀល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។