អយ្យការសាលាដំបូងរាជធានីភ្នំពេញ ចេញសេចក្ដីថ្លែងការណ៍នៅថ្ងៃទី២៦ ឧសភា ដែលវិទ្យុអាស៊ីសេរី ទទួលបាននៅរាត្រីនេះ គឺបង្គាប់ឲ្យមន្ត្រីនគរបាលយុត្តិធម៌ ស្វែងរកចាប់ខ្លួនលោក កឹម សុខា មកចំពោះមុខអយ្យការសាលាដំបូងរាជធានីភ្នំពេញ ក្នុងក្របខ័ណ្ឌនៃការស៊ើបអង្កេតបទល្មើសជាក់ស្ដែង។
នៅក្នុងសេចក្ដីថ្លែងការណ៍ចំនួនពីរទំព័រ បានបញ្ជាក់មូលហេតុពីការបង្គាប់ឲ្យមន្ត្រីនគរបាល ស្វែងរកចាប់ខ្លួនលោក កឹម សុខា នេះ ដោយលើកហេតុផលថា លោក កឹម សុខា មិនបានចូលខ្លួនទៅបំភ្លឺនៅតុលាការចំនួនពីរលើក ពាក់ព័ន្ធនឹងអំពើសញ្ចារកម្មក្នុងនាមជាសាក្សី ក្រោយពីអយ្យការបានស្ដាប់ចម្លើយរបស់នាង ខុម ចាន់តារាទី ហៅ ស្រីមុំ នៃសំណុំរឿងព្រហ្មទណ្ឌលេខ ១២៨០ ចុះថ្ងៃទី៨ ខែមីនា ឆ្នាំ២០១៦។
អយ្យការអមសាលាដំបូងរាជធានីភ្នំពេញពិនិត្យឃើញថា ការប្រព្រឹត្តរបស់លោក កឹម សុខា ដែលមិនចូលខ្លួនមកបំភ្លឺតាមការកោះហៅរបស់តំណាងអយ្យការទាំងពីរលើកនេះ គឺជាបទល្មើសតាមមាត្រា៥៣៨ នៃក្រមព្រហ្មទណ្ឌនៃព្រះរាជាណាចក្រកម្ពុជា ដែលចែងថា រាល់បុគ្គលណាដែលត្រូវបានកោះហៅឲ្យមកឆ្លើយជាសាក្សីនៅមុខអយ្យការ ឬចៅក្រមស៊ើបសួរ ឬមុខតុលាការព្រហ្មទណ្ឌ ហើយមិនព្រមចូលខ្លួនតាមដីកាកោះហៅនោះ ដោយគ្មានមូលហេតុសមស្រប ត្រូវផ្ដន្ទាទោសដាក់ពន្ធនាគារពី ១ខែទៅ ៦ខែ និងពិន័យជាប្រាក់ពី ១សែនទៅ ១លានរៀល។ សកម្មភាពនៃការមិនព្រមចូលខ្លួននៅព្រឹកថ្ងៃទី២៦ ឧសភា គឺជាបទល្មើសជាក់ស្ដែង ស្របតាមខ្លឹមសារមាត្រា៨៦ នៃក្រមនីតិវិធីព្រហ្មទណ្ឌ ដែលចែងអំពីនិយមន័យបទឧក្រិដ្ឋ ឬមជ្ឈិមជាក់ស្ដែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។