យុវជនខ្មែរថាវរៈម្នាក់ ត្រូវបានជនមិនស្គាល់មុខ ធាក់ផ្តួលម៉ូតូបោកក្បាលលើថ្នល់បណ្តាលឱ្យរងរបួសធ្ងន់ នៅតាមផ្លូវក្នុងរាជធានីភ្នំពេញ នៅព្រឹកថ្ងៃទី២៦ កញ្ញា។ មន្ត្រីសង្គមស៊ីវិលជំរុញឱ្យសមត្ថកិច្ចពាក់ព័ន្ធស្រាវជ្រាវនិងស៊ើបអង្កេត ស្វែងរកជនល្មើសយកមកអនុវត្តតាមផ្លូវច្បាប់ឱ្យបានច្បាស់លាស់ ដើម្បីបង្កើតជំនឿចិត្តជូនពលរដ្ឋ។
យុវជនដែលសកម្មលើកិច្ចការងារសង្គមនិងធនធានធម្មជាតិមួយរូប គឺកញ្ញា តូច ស្រីនិច ទៀត ត្រូវបានជនមិនស្គាល់មុខមានគ្នា៥នាក់ជិះម៉ូតូទំនើប ៤គ្រឿង បានធាក់ផ្តួលម៉ូតូបណ្តាលឱ្យរងរបួសធ្ងន់ នៅចំណុចផ្សារបឹងត្របែក រាជធានីភ្នំពេញ នៅព្រឹកថ្ងៃទី២៦ កញ្ញា ។ កញ្ញាទាមទារឱ្យអាជ្ញាធរពាក់ព័ន្ធវែកមុខចាប់ជនដៃដល់យកមកទទួលខុសត្រូវជុំវិញករណីហិង្សានេះ។
យុវជនខ្មែរថាវរៈកញ្ញា តូច ស្រីនិច ប្រាប់វិទ្យុអាស៊ីសេរីថា ករណីនេះ បានធ្វើឲ្យម៉ូតូរបស់កញ្ញា ដួលបោកក្បាលទៅនឹងថ្នល់ដោយរងរបួសធ្ងន់នៅត្រង់ក្បាលនិងដៃជើងផ្នែកខាងស្តាំ ប៉ុន្តែកញ្ញាមិនបានទៅមន្ទីរពេទ្យនោះទេ ដោយសារកញ្ញាគ្មានប្រាក់សម្រាប់ពិនិត្យ និងព្យាបាលរបួស។ យុវជនរូបនេះ ប្រាប់ថា កញ្ញានឹងដាក់ពាក្យបណ្តឹងនៅអាជ្ញាធរមានសមត្ថកិច្ចខាងមុខនេះ ដើម្បីចាប់ជនដៃដល់យកមកផ្ដន្ទាទោសតាមច្បាប់។
កញ្ញា តូច ស្រីនិច ព្រួយបារម្ភថា ករណីនេះពាក់ព័ន្ធការរឿងធ្វើទុក្ខបុកម្នេញនិងបំភិតបំភ័យយុវជនសង្គម ព្រោះវាគឺជាករណីតែមួយដូចករណីជនរងគ្រោះដែលជាសកម្មជនសង្គម និងសកម្មជននយោបាយផ្សេងទៀតដែរ។ កញ្ញាអះអាងថា អំឡុងពេលបួនថ្ងៃមុនពេលកើតហេតុនេះ កញ្ញាសង្កេតឃើញជនមិនស្គាល់អត្តសញ្ញាណតាមដាន និងឃ្លាំមើលសកម្មភាពរបស់កញ្ញាជាបន្តបន្ទាប់៖ «ខ្ញុំអត់បំពានអ្នកណាដែលធ្វើអាក្រក់ខ្ញុំក៏អត់បំពាន ខ្ញុំអត់មានទៅធ្វើអីគេ គ្រាន់តែអ្វីដែលរងភាពអយុត្តិធម៌ អ្វីមានការឈឺចាប់ចេញពីចិត្តខ្ញុំនឹងធ្វើ បើខ្ញុំដាក់ចិត្តធ្វើខ្ញុំអត់ខ្លាចព្រោះថាខ្ញុំអត់ខុសខ្ញុំអត់បានទៅជេរឬ ទៅប្រមាថអ្នកណាម្នាក់ក៏ខ្ញុំអត់បានធ្វើ ខ្ញុំធ្វើតាមក្តីស្រឡាញ់ហើយក្តីស្រម៉ៃរបស់ខ្ញុំចង់ឱ្យប្រទេសរីកចម្រើន មិនមែនធ្វើដើម្បីផលប្រយោជន៍ខ្ញុំ»។
ករណីនេះកើតឡើងបន្ទាប់ពី កញ្ញាផ្តល់បទសម្ភាសន៍ឱ្យវិទ្យុអាស៊ីសេរីកាលពីថ្ងៃទី២៤ កញ្ញា ទាក់ទងការរឹតត្បិតនិងការធ្វើទុក្ខបុកម្នេញពីសំណាក់អាជ្ញាធរលើយុវជនសង្គម និងយុវជនបក្សប្រឆាំង ដែលពួកគេមិនអាចចូលរួមកសាង និងអភិវឌ្ឍសង្គម។ ទោះជាយ៉ាងណា ស្រីនិច បញ្ជាក់ថាទោះបីរងនូវហិង្សានិងតាមដានពីសំណាក់ជនមិនស្គាល់មុខ ឬអាជ្ញាធរក៏ដោយកញ្ញានៅតែប្តេជ្ញាចិត្តបន្តចូលរួមការពារផលប្រយោជន៍សង្គមដដែល។
វិទ្យុអាស៊ីសេរីមិនអាចទាក់ទង អ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមខឿន និងអ្នកនាំពាក្យប៉ូលិសក្រុងភ្នំពេញ លោក សាន សុខសីហា ដើម្បីសាកសួរពីការស៊ើបអង្កេត រឿងនេះបានទេ នៅថ្ងៃទី២៦ កញ្ញា ដោយទូរស័ព្ទចូលតែពុំមានអ្នកទទួល។
ប៉ុន្តែកន្លងមកករណីហិង្សាលើសកម្មជនសង្គម និងគណបក្សប្រឆាំងសមត្ថកិច្ចតែងតែស្នើឱ្យជនរងគ្រោះដាក់ពាក្យបណ្តឹង និងសហការជាមួយសមត្ថកិច្ច និងទុកចិត្តលើសមត្ថកិច្ច។ ប៉ុន្តែជនគ្រោះអះអាងថា អាជ្ញាធរមិនដែលបង្ហាញលទ្ធផល ឬភស្តុតាងដែលអាចជឿទុកចិត្តបាន ទាក់ទងនឹងដំណើរការស៊ើបអង្កេតដើម្បីស្វែងរកយុត្តិធម៌ដល់ជនរងគ្រោះឡើយ។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក (ADHOC) លោក នី សុខា មានប្រសាសន៍ថា ពលរដ្ឋគ្រប់រូបមានសិទ្ធិទទួលបានសន្តិសុខ សុវត្ថិភាពផ្ទាល់ខ្លួនស្របតាមច្បាប់ និងគោលការណ៍សិទ្ធិមនុស្ស ហើយសមត្ថកិច្ចមានកាតព្វកិច្ចវែកមុខជនល្មើសយកមកផ្ដន្ទាទោសតាមច្បាប់ ដើម្បីលុបបំបាត់មតិសង្ស័យលើការអនុវត្តច្បាប់។ លោកសង្កេតឃើញថា ករណីបែបនេះតែងតែកើតសកម្មជនសង្គម និងបក្សប្រឆាំង ដែលអាចធ្វើឱ្យពួកគេព្រួយបារម្ភពីសុវត្ថិភាពផ្ទាល់ខ្លួននិងភ័យខ្លាចក្នុងការចូលរួមកិច្ចការសង្គមបន្តទៀត។ លោកចាត់ទុកករណីហិង្សាលើយុវជនខ្មែរថាវរៈនេះ គឺជាការរំលោភសិទ្ធិមនុស្សធ្ងន់ធ្ងរ ប្រសិនបើសមត្ថកិច្ចមិនស៊ើបអង្កេតរកជនល្មើសមកផ្ដន្ទាទោសតាមច្បាប់៖ «យើងឃើញថា មានប្រជាពលរដ្ឋយើងមួយចំនួន ក្រុមមួយចំនួនដែលតែងតែមានមតិជំទាស់ជាមួយរដ្ឋាភិបាលកន្លងមកនេះ រួមទាំងសកម្មជនបក្សប្រឆាំងផង គឺថាមានការលួចវាយឆ្មក់ វាយដំនៅតាមបណ្តាលដងផ្លូវ មិនដែលសមត្ថកិច្ចវែកមុខជនល្មើសឃើញទេ នេះជារឿងមួយប្រសិនបើសមត្ថកិច្ច នៅតែបន្តមិនអាចវែកមុខជនល្មើសឃើញយកមកដាក់ទោសទណ្ឌទេ អាហ្នឹងវាធ្វើឱ្យស្ថានភាពបរិយាកាសសេរីនៅកម្ពុជាមានបញ្ហាធ្លាក់ចុះ»។
គិតមកដល់ពេលនេះ មានសកម្មជនសង្គមនិងគណបក្សប្រឆាំងជាង ៣០នាក់ហើយ ដែលត្រូវជនមិនស្គាល់មុខបង្កហិង្សាបណ្តាលឲ្យរបួសធ្ងន់ធ្ងរ ហើយជនរងគ្រោះខ្លះបានស្លាប់ និងធ្លាក់ខ្លួនពិការអស់មួយជីវិត។ ករណីទាំងនោះច្រើនមានលក្ខណៈប្រហាក់ប្រហែលគ្នា គឺជនដៃដល់ជិះម៉ូតូពាក់មួកសុវត្ថិភាព លួចវាយជនរងគ្រោះពីក្រោយខ្នង ឬធាក់ម៉ូតូផ្តួល ហើយភាគច្រើនបំផុតអាជ្ញាធរមិនបានចាប់ខ្លួនជនដៃដល់យកមកផ្ដន្ទាទោសនោះទេ។ ជនរងគ្រោះខ្លះមិនត្រឹមតែមិនទទួលបានយុត្តិធម៌នោះទេ តែថែមទាំងត្រូវបានជនល្មើសលួចវាយប្រហារផ្ទួនៗគ្នាពីរលើក ហើយអ្នកខ្លះទៀត ថែមទាំងត្រូវបានអាជ្ញាធររបបក្រុងភ្នំពេញចាប់ឃុំខ្លួនក្នុងពន្ធនាគារទៀតផង។
ក្រុមអង្គការជាតិ និងអន្តរជាតិ រួមទាំងអង្គការសហប្រជាជាតិផង បានសម្ដែងក្តីព្រួយបារម្ភជាខ្លាំង ចំពោះអំពើហិង្សាលើសកម្មជនសង្គម និងសកម្មជនគណបក្សសង្គ្រោះជាតិជាញឹកញាប់នេះ។ ពួកគេចាត់ទុក ករណីទាំងនេះថា ជាការធ្វើទុក្ខបុកម្នេញលើអ្នកការពារសិទ្ធិមនុស្សនិងនយោបាយដែលត្រូវតែបញ្ឈប់ជាបន្ទាន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។