សង្គមស៊ីវិលថា ការមិនដោះលែងនេះ គឺធ្វើឡើងជាប្រព័ន្ធ លុះត្រាតែស្ថានការណ៍នយោបាយធូរស្រាល ទើបសកម្មជនបក្សប្រឆាំងទាំងអស់ ទទួលបានការដោះលែង ក្រោមរូបភាពផ្សេងៗ។
មេធាវីការពារក្ដីឱ្យសកម្មជនបក្សប្រឆាំងនៅខេត្តកណ្ដាល ៣នាក់ គឺលោកមេធាវី ជួង ជូងី ថ្លែងថា កូនក្ដីរបស់ទាំង ៣នាក់ មិនបានប្រព្រឹត្តិបទល្មើសជាក់ស្ដែងទេ ព្រោះពួកគេ បានហូបនំបញ្ចុកច្រើនខែមកហើយ ទើបប៉ូលិសនាំគ្នាទៅចាប់ និងគ្មានដីកា។
លោកមេធាវីឱ្យដឹងថា សាលាឧទ្ធរណ៍បានបដិសេធសំណើសុំឱ្យដោះលែងកូនក្ដីទាំង ៣នាក់ កាលពីថ្ងៃទី១០ តុលា។ លោកហៅការមិនដោះលែងនេះថា ជាការគាំទ្រចំណាត់ការខុសច្បាប់របស់ប៉ូលិស ហើយនឹងពិភាក្សាជាមួយកូនក្ដី ទាំង៣ ដើម្បីដាក់បណ្ដឹងសារទុក្ខទៅតុលាការកំពូល៖ «យើងប្ដឹងឧទ្ធរណ៍ប្រឆាំងនឹងការចាប់ខ្លួន និងការឃុំខ្លួន ពីព្រោះ យើងមើលឃើញថា ការចាប់ខ្លួនហ្នឹង បំពានច្បាប់ ខុសនីតិវិធី គឺទៅចាប់គាត់ហ្នឹង គឺមិនមែនជាបទល្មើសជាក់ស្ដែងទេ។ គាត់ស៊ីនំបញ្ចុកតាំងពីថ្ងៃមុន គាត់ជួបជុំតាំងពីយូរហើយ ស្រាប់តែមកចាប់ភ្លាមៗ អត់មានដីកាចាប់ខ្លួន ដោយហេតុថា វាអត់ចូលនៅក្នុងបទល្មើសជាក់ស្ដែង ស្រាប់តែគេចាប់ខ្លួនគាត់អត់មានដីកា អ៊ីចឹងបានយើងប្ដឹងមិនសុខចិត្តនឹងអាចំណាត់ការហ្នឹង យើងទាមទារឱ្យដោះលែងវិញ។ ឧទ្ធរណ៍ គេបដិសេធ គេនៅតែរក្សាសំអាងថា ការចាប់ខ្លួនហ្នឹងត្រឹមត្រូវ។ ប៉ះពាល់ដល់សិទ្ធិបុគ្គល ហើយនឹងប៉ះពាល់ដល់គតិច្បាប់ ពីព្រោះវាមិនចូលទៅក្នុងលក្ខខណ្ឌបទល្មើសជាក់ស្ដែងទេ ពាក់ព័ន្ធនឹងគាត់ហូបនំបញ្ចុក ហើយគាត់មិនមានហូបទៀតអ្វី ឥឡូវ ហើយពាក់ព័ន្ធនឹងការប្រជុំ គាត់ប្រជុំកាលពីមុន យូរហើយហ្នឹង។ រួចទៅយក លក្ខខណ្ឌមកចាប់គាត់ ថាជាបទល្មើសជាក់ស្ដែង ហើយមកចាប់គាត់ អត់មានដីកា។ អ៊ីចឹង ការដែលមិនព្រមបដិសេធអាការឃុំខ្លួនហ្នឹង បានន័យថា គាំទ្រអាចំណាត់ការប៉ូលិស ដែលខុសច្បាប់ហ្នឹងណាស់»។
មន្ត្រីជាប់ឆ្នោតបក្សប្រឆាំងទាំង ៣នាក់ នៅខេត្តកណ្ដាល ត្រូវបានប៉ូលិសចាប់ខ្លួន កាលពីថ្ងៃទី១៤ ខែកញ្ញា នៅកន្លែងផ្សេងៗគ្នា ក្រោមបទចោទប្រមូលផ្ដុំគ្នាហូបនំបញ្ចុកគាំទ្របក្សប្រឆាំង កាលពីច្រើនខែកន្លងទៅ។ អ្នកទាំង៣ គឺសមាជិកគណៈកម្មាធិការប្រតិបត្តិស្រុកស្អាង លោក លី ម៉េងឃាង មេឃុំជាប់ឆ្នោតឃុំសំរោងធំ ស្រុកកៀនស្វាយ លោក លី លីន និងជំទប់ទី១ ជាប់ឆ្នោតនៅឃុំព្រែកស្ដី ស្រុកកោះធំ លោក ឈុន ថៃយុទ្ធ។ ក្រោយចាប់ខ្លួនបានមួយថ្ងៃ គឺនៅថ្ងៃទី១៥ ខែកញ្ញា សាលាដំបូងខេត្តកណ្ដាល បានសម្រេចឃុំខ្លួនសកម្មជនបក្សប្រឆាំងទាំង ៣នាក់ដាក់ពន្ធនាគារ។
កូនប្រុសរបស់ជំទប់ទី១ ជាប់ឆ្នោតឃុំព្រែកស្ដី លោក ឈុន ថៃយុទ្ធ គឺលោក ថៃ សែនកុសល អះអាងថា ឪពុកលោក មិនបានប្រព្រឹត្តិកំហុសអ្វីទេ។ លោកសុំអង្វររដ្ឋាភិបាលឱ្យដោះលែងឪពុកលោកវិញ ព្រោះលោកមានជំងឺប្រចាំកាយធ្ងន់ធ្ងរ ឯម្ដាយលោកក៏មានជំងឺស្លាប់មួយចំហៀងខ្លួន យូរឆ្នាំដែរ ដែលត្រូវការឪពុកលោក មកមើលថៃជាចាំបាច់។ លោក ថៃ សែនកុសល ប្រាប់ថា ក្រោយពេលប៉ូលិសចាប់ខ្លួនឪពុកលោកមក លោកបានឈប់ពីការងារនៅភ្នំពេញ មកមើលថែម្ដាយ មានជំងឺស្លាប់មួយចំហៀងខ្លួននោះ និងឆ្លៀតរត់ទៅមើលឪពុក ក្នុងពន្ធនាគារខេត្តកណ្ដាលផង។លោកបន្តថា ខាងពន្ធនាគារអនុញ្ញាតឱ្យលោកចូលមើលឪពុកបាន ២ដងក្នុងមួយសប្ដាហ៍។ លោកថា ស្ថានភាពលោក ឈុន ថៃយុទ្ធ ក្នុងពន្ធនាគារ គឺសម្រាន្តមិនបានដោយសារជំងឺឈឺឆ្អឹងខ្នង រលាកសន្លាក់ ហើមក្បាលជង្គង់ធ្ងន់ធ្ងរ ដើរអូសជើងម្ខាង និងមានជំងឺលើសឈាម។ ទោះយ៉ាងណា លោកមិនដឹងថា ឪពុកលោកនឹងមានបំណងធ្វើវីដេអូសារភាព ឬវាយប្រហារបក្សប្រឆាំង ដើម្បីទទួលបានសេរីភាពវិញដែរ ឬអត់នោះទេ៖ «ខ្ញុំមានតែសំណូមពរឱ្យរដ្ឋាភិបាល ជួយដោះលែងគាត់ឱ្យមានសេរីភាពឡើងវិញ ព្រោះគាត់អត់មានកំហុសអ្វីទេ។ គាត់បានឈប់ពាក់ព័ន្ធនឹងរឿងនយោបាយហ្នឹង តាំងពីមានបញ្ហាហ្នឹងមកហើយ។ អ៊ីចឹង គឺរឿងនេះ សុទ្ធតែរឿងចោទប្រកាន់ អត់មានពាក់ព័ន្ធអ្វីថា គាត់បានទៅធ្វើអ្វី ទៅធ្វើចលនាបះបោរអ្វីអត់មានទេ គឺរឿងចោទប្រកាន់ទាំងស្រុងតែម្ដង»។
អ្នកនាំពាក្យសមាគមការពារសិទ្ធិមនុស្ស អាដហុក (Adhoc) លោក ស៊ឹង សែនករុណា សង្កេតឃើញថា សំណុំរឿងចាប់ខ្លួនសកម្មជនបក្សប្រឆាំង ជារឿងនយោបាយ ដូច្នេះការសម្រេចមិនដោះលែងសកម្មជនទាំងនោះ ជារឿងធម្មតា និងធ្វើឡើងជាប្រព័ន្ធ។ វៀរលែងតែមានករណីស្ថានការណ៍នយោបាយធូរស្បើយ ទើបមានសង្ឃឹមទទួលបានការដោះលែង។ សង្គមស៊ីវិលរូបនេះ យល់ឃើញថា ប្រសិនបើសកម្មជនបក្សប្រឆាំងទាំងនោះ សារភាព ឬវាយប្រហារគណបក្សប្រឆាំងវិញ ពួកគេនឹងទទួលបានសេរីភាពវិញ៖ «មិនមានអ្វីចម្លែកទេ ក្នុងរឿងនយោបាយនៅស្ថានការណ៍នាពេលចុងក្រោយហ្នឹង ការច្រានចោលហ្នឹង វាជារឿងមួយ ដែលយើងមើលឃើញហើយ វាសឹងតែ ជាការធ្វើឡើងដោយជាប្រព័ន្ធ។ អ៊ីចឹង តុលាការ កាលណាសម្រេចមួយ ដោយមើលឃើញថា មិនមានឯករាជភាព ឬក៏ពាក់ព័ន្ធទៅនឹងព្រឹត្តិការណ៍នយោបាយហ្នឹង គឺជារឿងដែលអង្គការអន្តរជាតិផ្នែកយុត្តិធម៌ហ្នឹង គេបានរិះគន់រួចទៅហើយ ដែលស្ថាប័នយុត្តិធម៌នេះ គឺមិនមែនជាទីពឹងអាស្រ័យដោយជនរងគ្រោះជាជនក្រីក្រក្ដី ហើយទម្រាំជាអ្នកនយោបាយទៅទៀត ហើយស្ថានភាពនយោបាយអ៊ីចឹង តើគេអាចដោះលែងពួកគាត់ ដោយរបៀបម្ដេចទៅបាន»។
គិតត្រឹមថ្ងៃទី១៣ ខែតុលានេះ គឺនៅសល់ចំនួនតែ២៧ថ្ងៃទៀតប៉ុណ្ណោះ ដែលប្រធានស្តីទីគណបក្សប្រឆាំង លោក សម រង្សី សន្យាថា នឹងវិលចូលប្រទេសកម្ពុជាវិញ នៅថ្ងៃទី៩ ខែវិច្ឆិកា ខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។