តុលាការរបបក្រុងភ្នំពេញ បានដោះលែងសកម្មជនសង្គម បរិស្ថាន និងសកម្មជននយោបាយ ចំនួន១៨នាក់ រាប់ទាំងលោក រ៉ុង ឈុន ផងចេញពីពន្ធនាគារហើយ កាលពីថ្ងៃទី១២ ខែវិច្ឆិកា បន្ទាប់ពីពួកគាត់ជាប់ពន្ធនាគារចន្លោះពីជាង ១០ខែទៅជាង ១៥ខែ។ ប៉ុន្តែទាំងលោក រ៉ុង ឈុន និងសកម្មជនទាំងអស់ ដែលត្រូវបានដោះលែង រិះគន់ថា ការដោះលែងដោយភ្ជាប់ជាមួយលក្ខខ័ណ្ឌតឹងរ៉ឹង ជាច្រើននេះ នៅតែអយុត្តិធម៌សម្រាប់ពួកគាត់។
សកម្មជនទាំង ១៨នាក់ ដែលតុលាការបានដោះលែងជាបន្តបន្ទាប់ កាលពីថ្ងៃទី១២ ខែវិច្ឆិកា រួមមាន មេដឹកនាំសហជីព លោក រ៉ុង ឈុន ប្រធានគណបក្សខ្មែរឈ្នះលោក សួង សុភ័ណ្ឌ និងសកម្មជនគណបក្សសង្គ្រោះជាតិ ២រូប គឺលោក ប៉ែន ច័ន្ទសង្គ្រាម និងលោក តុន និមល សមាជិកសហជីពការងារ កញ្ញា ស កណិការ ក្រុមយុវជនខ្មែរថាវរៈ ២នាក់ មានលោក ហ៊ុន វណ្ណៈ និងលោកស្រី ឈឿន ដារ៉ាវី។ រីឯក្រុមយុវជនចលនាមាតាធម្មជាតិ ៦នាក់ ក្នុងនោះ មានលោក ថុន រដ្ឋា កញ្ញា ឡុង គន្ធា កញ្ញា ភួន កែវរស្មី កញ្ញា ស៊ុន រដ្ឋា លោក លី ច័ន្ទដារ៉ាវុធ និងលោក យីម លាងហ៊ី ក៏ត្រូវបានដោះលែងផងដែរ។
ក្នុងចំណោមអ្នកដោះលែងពីពន្ធនាគារ នៅថ្ងៃសុក្រ ទី១២ វិច្ឆិកានេះដែរ ក៏មានក្រុមស្ត្រីក្លាហានចំនួន ៥នាក់ គឺលោកស្រី លឹម សាន លោកស្រី យ៉យ ស្រីមុំ លោកស្រី ហុង អាន លោកស្រី ប៉ៃ រ៉េន និងលោកស្រី សាន ស្រីនាថ។
សកម្មជនទាំងនោះ ភាគច្រើនមានរូបកាយស្លេកស្លាំង និងស្គមស្គាំងដូចៗ គ្នា ប៉ុន្តែពួកគាត់នៅតែបង្ហាញស្មារតី និងជំហររឹងមាំដដែល។ ពួកគេមិនសប្បាយចិត្ត ដែលរងអំពើអយុត្តិធម៌ ដែលត្រូវបានចាប់ដាក់ពន្ធនាគារ ដោយសារបញ្ចេញមតិ ស្របតាមច្បាប់រដ្ឋធម្មនុញ្ញ។
មេធាវីការពារក្ដី លោក សំ សុគង់ ថ្លែងថា កូនក្ដីរបស់លោក នៅតែចាត់ទុកថា ការសម្រេចក្ដីនេះ ជារឿងអយុត្តិធម៌ ហើយពួកគាត់ បានប្រាប់លោកភ្លាមៗ ដើម្បីដាក់បណ្ដឹងជំទាស់ទៅតុលាការកំពូលទៀត៖ « នៅពេលប្រកាសសាលាដីកា បែរជាកូនក្តីរបស់ខ្ញុំទាំងបីនាក់ នៅតែមានឈ្មោះថាជាអ្នកមានកំហុស និងផ្ដន្ទាទោស និងថែមទាំងដាក់លក្ខខណ្ឌ ៧ចំណុច ដែលធ្វើឲ្យការសម្រេចនេះ មិនបានផ្តល់យុត្តិធម៌ចំពោះពួកគាត់ » ។
ការដោះលែងលោក រ៉ុង ឈុន នេះ គឺបន្ទាប់ពីប្រធានក្រុមប្រឹក្សាជំនុំជម្រះសាលាឧទ្ធរណ៍ភ្នំពេញ លោក យន់ ណារ៉ុង កាលនៅព្រឹកថ្ងៃទី១២ ខែវិច្ឆិកា បានសម្រេចតម្កល់ការផ្ដន្ទាទោសលោក រ៉ុង ឈុន ប៉ុន្តែបានបន្ថយទោសជាប់ពន្ធនាគារមកនៅត្រឹមរយៈពេល ១៥ខែ និង ១១ថ្ងៃ នៃទោសពន្ធនាគារសរុប ២៤ខែហើយទោស ដែលនៅសល់ត្រូវបានព្យួរ។ ចំណែកកញ្ញា ស កណិការ វិញ សាលាឧទ្ធរណ៍សម្រេចឱ្យជាប់ពន្ធនាគារចំនួន ១៥ខែ និង ៥ថ្ងៃនៃទោសសរុបចំនួន ២០ខែ ដោយទោសដែលនៅសល់ត្រូវព្យួរ។ ចំពោះលោក តុន និមល ត្រូវបានសាលាឧទ្ធរណ៍សម្រេចឱ្យជាប់ពន្ធនាគារចំនួន ១៤ខែ និង ២៤ថ្ងៃនៃទោសសរុបចំនួន ២០ខែ ដោយទោសដែលនៅសល់ត្រូវព្យួរ។ បើគិតពីថ្ងៃចាប់ខ្លួនមក គឺលោក រ៉ុង ឈុន កញ្ញា ស កណិការ និងលោក តុន និមល បានជាប់ពន្ធនាគារគ្រប់ចំនួនកំណត់ ដែលត្រូវដោះលែងនៅថ្ងៃទី១២ ខែវិច្ឆិកា។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ស្វាគមន៍ការដោះលែងសកម្មជនជាបន្តបន្ទាប់នេះ ប៉ុន្តែលោកនៅតែស្នើឲ្យតុលាការ ទម្លាក់ចោលការចោទប្រកាន់លើពួកគាត់ទាំងអស់ ដើម្បីឲ្យពួកគាត់មានសេរីភាពពេញលេញឡើងវិញ៖ « សាធារណៈមតិ និងប្រជាពលរដ្ឋ ក៏គេយល់បែបនេះដែរថា ជាធម្មតាការដោះលែងមនុស្សដោយភ្ជាប់នូវលក្ខខណ្ឌ គឺស្មើនឹងវាស់វែងនៅសិទ្ធិសេរីភាពឲ្យដើរនេះហើយ ដូច្នេះវាអត់សមស្របនឹងសិទ្ធិសេរីភាពរបស់គាត់នៅក្នុងសង្គមប្រជាធិបតេយ្យទេ » ។
អ្នកវិភាគសង្គម បណ្ឌិត សេង សារី ក៏ស្វាគមន៍ការដោះលែងនេះដែរ ប៉ុន្តែស្នើឲ្យកម្ពុជាត្រូវកែលម្អលទ្ធិប្រជាធិបតេយ្យឲ្យល្អប្រសើរឡើងវិញថែមទៀត ទើបកម្ពុជាមានមុខមាត់ ដឹកនាំកិច្ចប្រជុំកំពូលអាស៊ាននៅឆ្នាំក្រោយបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។