ស្នងការនគរបាលក្រុងភ្នំពេញ លោក ស ថេត ប្រាប់អាស៊ីសេរីនៅមុននេះបន្តិចថា សមត្ថកិច្ចបានចាប់ឃាត់ខ្លួនបុរសម្នាក់ពាក់ព័ន្ធនឹងការបង្ហោះវីឌីអូឃ្លីប តាមបណ្ដាញសង្គមហ្វេសប៊ុកអំពីការឆ្លងជំងឺកូវីត ១៩ ដែលសមត្ថកិច្ចចោទថា ជាការបំពុលសង្គម។
លោក ស ថេត បញ្ជាក់ថា នៅថ្ងៃទី១០ មិនា ស្អែកនេះសមត្ថកិច្ចនឹងបញ្ជូនជនសង្ស័យឈ្មោះ កូយ សំអាត ទៅតុលាការដោយចោទប្រកាន់ពីបទញុះញង់ប្រព្រឹត្តបទល្មើសជាអាទិ៍ តាមរយៈការបង្ហោះវីដេអូឃ្លីបរបស់ខ្លួន លើបណ្ដាញសង្គម Facebook អំពីការឆ្លងជំងឺរលាកផ្លូវដង្ហើម Covide-19៖ « ពេលដែលយើងឃាត់មកហ្នឹងដោយសារតែគាត់បំផុសធ្វើឲ្យមានការភ័យខ្លាចពីរឿងកូរ៉ូណាហ្នឹង។ បាទបើតាមបញ្ជារបស់លោកព្រះរាជអាជ្ញាហ្នឹង យើងធ្វើការឃាត់សាកសួរហើយគាត់ក៏បានឆ្លើយសារភាពដែរនូវអ្វីដែលគាត់ឡាយនៅមាត់ទន្លេហ្នឹង ហើយប្រហែលជាស្អែកយើងបញ្ជូនទៅតុលាការទៅតាមនីតិវិធី »។
កម្លាំងនគរបាលខណ្ឌមានជ័យ នៅថ្ងៃទី៩ ខែមីនា ឆ្នាំ២០២០នេះ សហការ ជាមួយកម្លាំងនគរបាលការិយាល័យប្រឆាំងបទល្មើសបច្ចេកវិទ្យានៃស្នងការដ្ឋាននគរបាលរាជធានីភ្នំពេញ ចាប់ខ្លួនបុរសឈ្មោះ កូយ សំអាត នេះ បន្ទាប់ពីលោកបានបង្ហោះហ្វេសប៊ុករបស់ខ្លួន ដែលដាក់ឈ្មោះថា Tep Visal។ ក្នុងវីឌីអូឃ្លីបនេះ លោក កូយ សំអាត ឬ ទេព វីសាល បាននិយាយ អរគុណវៀតណាមដែលរកឃើញករណីជនជាតិជប៉ុនផ្ទុកមេរោគសា COV2 ឬកូរ៉ូណា បន្ទាប់ពីបុរសរូបនេះចេញពីកម្ពុជា៖ « បាទជម្រាបសួរបងប្អូនទាំងអស់គ្នា ! យើងទាំងអស់គ្នាគួរតែអរគុណយួនទៅ។កុំតែបានយួនស្រែកថានៅប្រទេសកម្ពុជាមានកូវីត១៩ ឬ ក៏វីរុសកូរ៉ូណាទេ។ កុំអីប្រជាជននៅទូទាំងប្រទេសអត់ដឹងថាប្រទេសកម្ពុជាមានកូវីត ១៩ ឬ កូរ៉ូណាទេ។ អ៊ីចឹងយើងគួរតែអរគុណ យួន។ នេះសំណាងហើយដែលយួនស្រែកថាប្រទេសកម្ពុជាមានកូវីត ១៩ ឬ ក៏កូរ៉ូណាហ្នឹង បើប្រជាជនធម្មតាស្រែកវិញប្រហែលជាតាមចាប់ទៀតហើយ » ។
លោក ស ថេត បានបញ្ជាក់ថា ជនសង្ស័យមានឈ្មោះ កូយ សំអាត ឬ ទេព វីសាល នេះ អាយុ ៣៥ឆ្នាំ រស់នៅភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ មានមុខរបរជាអ្នកលក់ទំនិញតាម Online។ លោក ស ថេត អះអាងថា ជនសង្ស័យរូបនេះ បានសារភាពពីទោសកំហុសរបស់ខ្លួន តែលោក ស ថេត បញ្ជាក់ថា ទោះបីជាជនសង្ស័យបានសារភាពបែបនេះក្ដី សមត្ថកិច្ចរបស់លោកនៅតែបញ្ជូនជនសង្ស័យទៅតុលាការនៅថ្ងៃស្អែកដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។