សមត្ថកិច្ចនគរបាលរាជធានីភ្នំពេញទទួលបានដីកាពីអយ្យការសាលាដំបូងរាជធានី ដើម្បីតាមស្រាវជ្រាវនឹងឃាត់ខ្លួនបុរស ដែលបើកឡានទំនើប (Jeep) បានបុកមនុស្សម្នាក់ឱ្យស្លាប់ និងរត់គេចខ្លួន។ វិធានការភ្លាមៗ ដើម្បីតាមចាប់ជនសង្ស័យករណីបើកបុកមនុស្ស និងរត់គេចនេះ បន្ទាប់ពីរដ្ឋមន្ត្រីក្រសួងយុត្តិធម៌លោក កើត រិទ្ធ បញ្ជាឱ្យតុលាការចេញដីកាចាប់ខ្លួន។
ចំណែកមន្ត្រីសង្គមស៊ីវិលថា អាជ្ញាធរគួរអនុវត្តច្បាប់ដោយមិនលំអៀង និងទាន់ពេលវេលា ខណៈដែលគ្រួសារជនរងគ្រោះកំពុងរង់ចាំយុត្តិធម៌។
អគ្គស្នងការដ្ឋាននគរបាលជាតិបានបង្ហោះសារនៅលើហ្វេសប៊ុក នៅយប់ថ្ងៃទី១៩ ខែធ្នូ ម្សិលមិញថា សមត្ថកិច្ចបានទទួលដីកាពីតុលាការរួចហើយ ដើម្បីស្រាវជ្រាវស្វែងរកឃាត់ខ្លួនជនសង្ស័យមកចាត់ការតាមនីតិវិធី។
ព្រះរាជអាជ្ញារង ប្លង់ សុផល នៃអយ្យការសាលាដំបូងរាជធានីភ្នំពេញ កាលពីថ្ងៃទី១៩ ខែធ្នូ បានចេញដីកាបញ្ជាឱ្យចូលខ្លួន និងបង្គាប់ឱ្យជនសង្ស័យ ឈ្មោះ ព្រហ្ម វិចិត្រសុសក្ដា បង្ហាញខ្លួននៅអយ្យការអមសាលាដំបូងរាជធានីភ្នំពេញ ឱ្យបានមុនថ្ងៃទី៩ ខែមករា ឆ្នាំ២០២៤។ ដីកាដដែលនេះបានបើកផ្លូវឱ្យមន្ត្រីនគរបាលយុត្តិធម៌ប្រើប្រាស់កម្លាំងសាធារណៈ ដើម្បីបង្ខំជនសង្ស័យឱ្យចូលបង្ហាញខ្លួនបាន។
ចំណាត់ការនេះ ធ្វើឡើងបន្ទាប់ពីមានបទបញ្ជាពីរដ្ឋមន្ត្រីក្រសួងយុត្តិធម៌ លោក កើត រិទ្ធ ដែលតម្រូវឱ្យព្រះរាជអាជ្ញាស្រាវជ្រាវ និងដោះស្រាយឱ្យបានត្រឹមត្រូវករណីកូនប្រុសរបស់មេធាវី ព្រហ្ម វិចិត្រសុភា គឺលោក ព្រហ្ម វិចិត្រសុសក្ដា ដែលបានបើកឡានបុកបុរសម្នាក់ឈ្មោះ សៀង គីមហុង បណ្ដាលឱ្យស្លាប់ និងបានរត់គេចខ្លួន កាលពីថ្ងៃទី១៤ ធ្នូ។
ប្រពន្ធលោក សៀង គីមហុង គឺលោកស្រី គ្រុយ ឈិញលាំង បានលើកឡើងក្នុងគណនីហ្វេសហ៊ុក (Facebook) កាលពីថ្ងៃទី១៨ ធ្នូ កន្លងទៅថា លោកស្រីមិនអាចទទួលយកបានទេ ចំពោះការគំរាមកំហែង និងផ្ដល់ប្រាក់ចំនួន ១ពាន់ដុល្លាររបស់ឪពុកជនបង្កឱ្យទៅលោកស្រី ដើម្បីឱ្យដកពាក្យបណ្ដឹង។ លោកស្រី គ្រុយ ឈិញលាំង ថា នឹងបន្តទាមទាររកយុត្តិធម៌ជូនប្ដី ព្រោះភាគីម្ខាងជាអ្នកបើកបរធ្វេសប្រហែស ហើយរត់គេចមិនទទួលខុសត្រូវ។
វិទ្យុអាស៊ីសេរីនៅមិនអាចទាក់ទងសុំការឆ្លើយតបពីភាគីទាំងពីរបានទេ នៅថ្ងៃទី១៩ ខែធ្នូ។
ច្បាប់ចរាចរណ៍ថ្មី មាត្រា៨៥ ចែងថា ជនណាបើកបរដោយធ្វេសប្រហែសខ្ជីខ្ជា មិនប្រុងប្រយ័ត្នបណ្ដាលឱ្យអ្នកដទៃស្លាប់ ត្រូវផ្ដន្ទាទោសពី ១ឆ្នាំទៅ ៣ឆ្នាំ និងពិន័យជាប្រាក់ ៤លានរៀលទៅ ១០ លានរៀល។ ករណីជនបង្កបើករត់គេចពីកន្លែងកើតហេតុ ដើម្បីគេចពីការទទួលខុសត្រូវ គឺត្រូវផ្ដន្ទាទោសពី ២ឆ្នាំទៅ ៥ឆ្នាំ និងពិន័យជាប្រាក់ពី ១០លានរៀលទៅ ២៥លានរៀល ព្រមទាំងហាមបើកបររយៈពេល ៥ឆ្នាំ។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា មានប្រសាសន៍ថា អាជ្ញាធរ និងមន្ត្រីពាក់ព័ន្ធគួរចាត់វិធានការដោយម៉ឺងម៉ាត់ និងទាន់ពេលវេលាទៅលើជន ដែលប្រព្រឹត្ត ដូចជា ករណីគ្រោះថ្នាក់ចរាចរណ៍នេះឱ្យមកទទួលទោសតាមផ្លូវច្បាប់ ទោះបីជាពួកគេមានលុយ និងបុណ្យស័ក្ដិបែបណាក៏ដោយ។
លោក ស៊ឹង សែនករុណា សាទរចំពោះចំណាត់ការរបស់ក្រសួងយុត្តិធម៌ និងស្ថាប័នអយ្យការលើករណីនេះ។ ទោះជាយ៉ាងនេះក្ដី លោកថា សង្គមស៊ីវិល និងពលរដ្ឋកំពុងទន្ទឹងរង់ចាំមើលលទ្ធផលនៃចំណាត់ការរឿងនេះ និងរឿងកន្លងមក ដែលជនរងគ្រោះមិនទាន់ទទួលបានយុត្តិធម៌នៅឡើយ។
លោក ស៊ឹង សែនករុណា៖«ឱ្យមានការចាត់វិធានការស្រាវជ្រាវ និងការអនុវត្តច្បាប់ឱ្យបានម៉ឺងម៉ាត់នេះ ខ្ញុំគាំទ្រ។ ប៉ុន្តែ អ្វីដែលសំខាន់យើងចាំមើលទៀតថា តើការអនុវត្តបានត្រឹមត្រូវទេ មានការខិតខំដុតដៃដុតជើងចាប់ខ្លួនជនបង្កមកផ្ដន្ទាទោសបាន ឬអត់ បើមិនដូច្នោះទេ ការលើកឡើងហ្នឹង គ្រាន់តែជាការលើកឡើង ចំណែកជនប្រព្រឹត្តនៅក្រៅសំណាញ់ច្បាប់ដដែល។ យើងធ្លាប់ដឹងកន្លងមកដែរ»។
ប្រជាពលរដ្ឋ និងមន្ត្រីសង្គមស៊ីវិល កត់សម្គាល់ថា បើទោះបីជាច្បាប់ចែងអំពីការដាក់ទោសធ្ងន់ធ្ងរបែបនេះក្ដី ក៏ការផ្ដន្ទាទោសកម្រកើតមានណាស់ ប្រសិនបើជនបង្ក គឺជាអ្នកមានលុយ និងមានអំណាច។ ជាក់ស្ដែង ករណីបុគ្គលឈ្មោះ សោម ណូរីទីឃា បើករថយន្តបុកម៉ូតូមួយគ្រឿង នៅលើស្ពានជ្រោយចង្វាបណ្ដាលឱ្យទារកម្នាក់ស្លាប់ និងមនុស្សចំនួន២នាក់រងរបួសធ្ងន់បានរត់គេចពីសំណាញ់ច្បាប់ក្រោយផ្ដល់ ២ពាន់ ៥រយដុល្លារ ដើម្បីបញ្ចប់រឿង។ ចំណែកករណីអភិបាលខេត្តមណ្ឌលគិរី លោក ថង សាវុន ក៏បានបើកឡានទំនើបបុកពលរដ្ឋពីរនាក់ស្លាប់ភ្លាមៗ កាលពីខែកញ្ញា ឆ្នាំ២០២១ ហើយមកទល់ពេលនេះ អាជ្ញាធរក៏មិនទាន់ស្រាវជ្រាវ និងផ្ដល់យុត្តិធម៌ដល់ជនរងគ្រោះនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។