សាលាដំបូង​ខេត្ត​កំពង់ឆ្នាំង លើក​ពេល​ប្រកាស​សាលក្រម​ ម្ចាស់​ស្ថានីយ​វិទ្យុ និង​គេហទំព័រ​កាសែត រិទ្ធិ​សែន

0:00 / 0:00

សាលា​ដំបូង​ខេត្ត​កំពង់ឆ្នាំង សម្រេច​លើក​ពេល​ប្រកាស​សាលក្រម ចំពោះ​ម្ចាស់​ស្ថានីយ​វិទ្យុ និង​គេហទំព័រ​កាសែត «រិទ្ធិ​សែន» លោក សុខ ឧត្ដម ដែល​ជាប់​ចោទ​ពី​បទ​ញុះញង់ ពាក់ព័ន្ធ​នឹង​ការ​ផ្សាយ​ព័ត៌មាន​ជម្លោះ​ដីធ្លី​នៅ​ស្រុក​ទឹកផុស ក្នុង​ដែន​ជម្រក​សត្វ​ព្រៃ​ភ្នំ​ឱរ៉ាល់។ អ្នក​ឃ្លាំមើល​សិទ្ធិ​សេរីភាព​សារព័ត៌មាន​រក​ឃើញ​ថា ការ​ផ្សាយ​នោះ គឺ​ត្រឹមត្រូវ​ទៅ​តាម​វិជ្ជាជីវៈ​សារព័ត៌មាន ហេតុ​នេះ​តុលាការ​គួរ​ដោះលែង លោក សុខ ឧត្ដម ឲ្យ​មាន​សេរីភាព​វិញ។

ភរិយា​របស់​លោក សុខ ឧត្ដម គឺ​លោកស្រី នុត សុវន្ធូរ ប្រាប់​អាស៊ី​សេរី នៅ​រសៀល​ថ្ងៃ​ទី១៧ វិច្ឆិកា​ថា មន្ត្រី​តុលាការ មិន​បាន​បញ្ជាក់​ហេតុផល​ នៃ​ការ​លើក​ពេល​ប្រកាស​សាលក្រម​ទេ ដោយ​គ្រាន់​តែ​ប្រាប់​ថា សំណុំ​រឿង​នេះ ត្រូវ​លើក​ពេល​ប្រកាស​ដោយ​គ្មាន​ការ​កំណត់។

លោកស្រី សោកស្ដាយ​ចំពោះ​ការ​លើក​ពេល​នេះ និង​ទាមទារ​ឲ្យ​តុលាការ​ដោះ​លែងលោក សុខ ឧត្ដម ឲ្យ​មាន​សេរីភាព​ឡើង​វិញ។ លោកស្រី​បន្ត​ថា ការ​ចាប់​និង​ឃុំ​ខ្លួន​ប្ដី​លោកស្រី អស់​រយៈ​ពេល​កន្លះ​ឆ្នាំ​មក​នេះ គឺ​ជា​រឿង​អយុត្តិធម៌ និង​មិន​អាច​ទទួល​យក​បាន។

លោកស្រី​ឲ្យ​ដឹង​ថា លោក សុខ ឧត្ដម បាន​ចុះ​ទៅ​យក​ព័ត៌មាន​ជម្លោះ​ដីធ្លី​មួយ​កន្លែង​ តាម​ការ​ស្នើសុំ​ពី​ប្រជាពលរដ្ឋ​ជា​ច្រើន​គ្រួសារ ដែល​មាន​ទំនាស់​ដីធ្លី​ជាមួយ​មន្ត្រី​យោធា​នៅ​ក្នុង​តំបន់​ដែន​ជម្រក​សត្វ​ព្រៃ​ភ្នំ​ឱរ៉ាល់ ​ទំហំ ៩០ហិកតារ នៅ​ជាប់​ព្រំដែន​ខេត្ត​កំពង់​ស្ពឺ​ និង​ខេត្ត​កំពង់ឆ្នាំង។

លោកស្រី​បញ្ជាក់​ថា នៅ​ពេល​លោក សុខ ឧត្ដម ចុះ​ទៅ​យក​ព័ត៌មាន​នោះ មាន​អ្នក​សារព័ត៌មាន​ក្នុង​ខេត្ត​កំពង់ឆ្នាំង ជាង ២០​ស្ថាប័ន ក៏​បាន​ចុះ​ទៅ​ដែរ ប៉ុន្តែ​សមត្ថកិច្ច​បែរ​ចាប់​ខ្លួន និង​ចោទ​ប្រកាន់​ ប្ដី​​លោកស្រី​តែ​ម្នាក់​គត់៖ «ជាទូទៅ​ក្នុង​ខេត្ត​កំពង់​ឆ្នាំង ប្ដី​ខ្ញុំ​គាត់​ហ៊ាន​ផ្សាយ​ជម្លោះ​ដីធ្លី​រវាង​អាជ្ញាធរ​ជាមួយ​ប្រជាពលរដ្ឋ រវាង​អ្នក​មាន​អំណាច​ជាមួយ​ពលរដ្ឋ។ ប្ដី​ខ្ញុំ​តែង​តែ​ផ្សាយ​ពី​ជម្លោះ​ដីធ្លី​ហ្នឹង​ ហើយ​ជួយ​ប្រជាពលរដ្ឋ​ជា​ច្រើន។ ធ្លាប់​បាន​ជួយ​ប្រជាពលរដ្ឋ​ខ្លះ​ត្រូវ​បាន​ជាប់​ឃុំ​ឃាំង​ គាត់​ជួយ​ផ្សាយ​រក​ខុស​ត្រូវ បាន​តុលាការ​ដោះលែង​វិញ។ រឿង​ទំនាស់​ដីធ្លី​ជា​ច្រើន​នៅ​ក្នុង​ខេត្ត គឺ​ប្ដី​ខ្ញុំ​គាត់​តែង​តែ​ផ្សាយ​រឿង​ទាំងអស់​ហ្នឹង តែង​តែ​ជាមួយ​អាជ្ញាធរ​មូលដ្ឋាន និង​មន្ត្រី​មាន​អំណាច​ខ្លះ​អ៊ីចឹង​ហើយ»។

កាល​ពី​ថ្ងៃ​ទី១៣ ខែ​ឧសភា សមត្ថកិច្ច​ខេត្ត​កំពង់ឆ្នាំង​​ បាន​ចាប់​ខ្លួន លោក សុខ ឧត្ដម ដោយ​ចោទ​ប្រកាន់​ថា បាន​ញុះញង់​ពលរដ្ឋ​មាន​ជម្លោះ​ដីធ្លី ក្រោយ​ពី​លោក​បាន​ផ្សាយ​បន្ត​ផ្ទាល់​ តាមរយៈ​គេហទំព័រ​ហ្វេសប៊ុក​ឈ្មោះ «រិទ្ធិសែន» កាល​ពី​ថ្ងៃ​ទី១២ ខែឧសភា អំពី​ជម្លោះ​ដីធ្លី​រវាង​ប្រជាពលរដ្ឋ​ និង​មន្ត្រី​យោធា​មាន​អំណាច​ម្នាក់។

អ្នកនាំពាក្យ​អគ្គស្នងការ​នគរបាល​ជាតិ​ លោក ឆាយ គឹមឃឿន ធ្លាប់​ប្រាប់​អាស៊ី​សេរី​ថា លោក សុខ ឧត្តម ធ្វើ​ខុស​តួនាទី​ជា​អ្នក​កាសែត ហើយ​ទៅ​បំផុស​ប្រជាពលរដ្ឋ ឱ្យ​ប្រឆាំង​ជាមួយ​អាជ្ញាធរ។ មន្ត្រី​ប៉ូលិស​ជាន់​ខ្ពស់​រូប​នេះ អះអាង​ថា ការ​ចាប់​ខ្លួន លោក សុខ ឧត្ដម មិនមែន​ជា​ការរំលោភ​លើ​សេរីភាព​សារព័ត៌មាន​នោះ​ទេ តែ​ជា​ការ​អនុវត្ត​ច្បាប់។

ភ្លាមៗ នោះ រដ្ឋ​មន្ត្រី​ក្រសួង​ព័ត៌មាន លោក ខៀវ កាញ្ញារិទ្ធិ ក៏​បាន​​ដក​អាជ្ញា​ប័ណ្ណ​វិទ្យុ និង​គេហទំព័រ​សារព័ត៌មាន រិទ្ធិសែន របស់​លោក សុខ ឧត្ដម ដែរ។ ក្រសួង​ព័ត៌មាន​ចោទ​ប្រកាន់​លោក សុខ ឧត្ដម ថា ផ្សព្វផ្សាយ​ព័ត៌មាន​បំផ្លើស​ការ​ពិត ញុះញង់​ឲ្យ​កើត​មាន​អំពើ​ហិង្សា បង្ក​ការ​​រើសអើង​ពូជសាសន៍ បង្ក​អសន្តិសុខ និង​ចលាចល​សង្គម ដែល​ជា​ការ​រំលោភ​បំពាន​វិជ្ជាជីវៈ និង​កិច្ច​សន្យា ដែល​សាមី​ខ្លួន​បាន​តម្កល់​ទុក​នៅ​ក្រសួងព័ត៌មាន។

ទោះបីជា​យ៉ាង​ណា នាយក​ប្រតិបត្តិ​សម្ព័ន្ធ​អ្នក​សារព័ត៌មាន​កម្ពុជា ហៅ​កាត់​ខេមបូចា (CamboJA) លោក ណុប វី មាន​ប្រសាសន៍​ថា ការ​ផ្សព្វផ្សាយ​នោះ គឺ​ធ្វើ​ត្រឹមត្រូវ​ទៅ​តាម​វិជ្ជា​ជីវៈ និង​​មិន​មែន​ជា​ការ​ញុះញង់​ឡើយ។ លោក​ស្នើ​ដល់​តុលាការ​ខេត្ត​កំពង់ឆ្នាំង ទម្លាក់​បទ​ចោទ​ប្រឆាំង​លោក សុខ ឧត្ដម និង​ដោះ​លែង​គាត់​ឲ្យ​មាន​សេរីភាព​វិញ។

លោក ណុប វី លើកឡើង​ថា ការ​ចុះ​ទៅ​សម្ភាសន៍​ពលរដ្ឋ​ផ្ទាល់​ពី​ជម្លោះ​ដីធ្លី​នេះ មិន​មែន​ជា​ការ​ញុះញង់ ឬ​បង្ក​ចលាចល​ឡើយ គឺជា​វិជ្ជា​ជីវៈ​ និង​សេរីភាព​របស់​អ្នក​សារព័ត៌មាន។ អ្នក​ឃ្លាំមើល​សិទ្ធិ​​សេរីភាព​សារព័ត៌មាន​រូប​នេះ សង្កេត​ឃើញ​ថា រយៈ​ពេល​ច្រើន​ខែ នៃ​ការ​ចាប់​ខ្លួន លោក សុខ ឧត្ដម ក៏​គ្មាន​អសន្តិសុខ​ណា​មួយ​កើត​ឡើង​ក្នុង​សង្គម​ដែរ។ ឯ​ក្រសួង​ព័ត៌មាន ក៏​គួរ​ផ្ដល់​អាជ្ញា​ប័ណ្ណ ឲ្យ​អ្នក​កាសែត​រូប​នេះ​វិញ​ដែរ៖ «ស្នើ​សុំ​ថា តុលាការ​គួរ​តែ ទោះ​បី​ជា​តុលាការ​បាន​សម្រេច​នៅ​ក្នុង​ពេល​ប្រកាស​សាលក្រម​យ៉ាង​ណា​ក្ដី ប៉ុន្តែ​ខ្ញុំ​គិត​ថា គួរ​តែ​ប្រញាប់​ប្រញាល់​កំណត់​នូវ​ពេលវេលា​ជាក់​លាក់ ក្នុង​ពេល​បំផុត ដើម្បី​ប្រកាស​សាលក្រម។ គួរ​តែ​ពិនិត្យ​ការ​អនុវត្ត​ការងារ​របស់​គាត់​ ជា​អ្នក​សារព័ត៌មាន ហើយ​សម្រេច​ឲ្យ​គាត់​មាន​សេរីភាព​ឡើង​វិញ ហើយ​អាច​បន្ត​ការងារ​ជា​អ្នក​សារព័ត៌មាន​បាន​បន្ត​ទៀត»។

របាយការណ៍​របស់​សម្ព័ន្ធ​អ្នក​សារព័ត៌មាន​កម្ពុជា (ខេមបូចា) រក​ឃើញ​ថា ​រយៈ​ពេល ១០ខែ ឆ្នាំ២០២០ មាន​អ្នក​កាសែត​ជិត​ហុកសិប ៥៩នាក់ រងគ្រោះ​ដោយសារ​ការ​ប្រើ​អំពើ​ហិង្សា ការ​ចាប់​ខ្លួន ការ​ស្លាប់ និង​រង​បណ្ដឹង​តាម​ផ្លូវ​តុលាការ។ ក្នុង​ចំណោម​អ្នក​ទាំង ៥៩នាក់​នោះ មាន ២៧នាក់ ត្រូវ​បាន​ចាប់​ខ្លួន អ្នក​កាសែត ៧នាក់ រង​ការ​ប្រើប្រាស់​អំពើ​ហិង្សា​ពី​ជន​មិន​ស្គាល់​មុខ និង​មាន​អ្នក​កាសែត​ម្នាក់​ស្លាប់ ក្នុង​ពេល​ធ្វើ​ដំណើរ។ ករណី​ទាំង​នេះ​ឆ្លុះ​បញ្ចាំង​ថា សេរីភាព​សារព័ត៌មាន និង​អ្នក​សារ​ព័ត៌មាន នៅ​តែ​បន្ត​រង​ការ​ធ្វើ​ទុក្ខ​បុក​ម្នេញ​ជា​បន្ត​បន្ទាប់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។