តំណាងសហគមន៍មានជម្លោះដីធ្លី ចំនួន ៣នាក់ទៀត បានបន្តចូលបំភ្លឺ នៅសាលាដំបូងខេត្តកោះកុង នៅថ្ងៃទី១៨ វិច្ឆិកា ពាក់ព័ន្ធនឹងរឿងញុះញង់ និងបរិហារកេរ្តិ៍។ ចៅក្រមស៊ើបសួរ បានសម្រេចបង្គាប់ឲ្យតំណាងសហគមន៍ ២នាក់ ស្ថិតក្រោមការត្រួតពិនិត្យតាមផ្លូវតុលាការ។ អ្នកឃ្លាំមើលសិទ្ធិដីធ្លី ហៅការសម្រេចនេះថា ជាការគាបសង្កត់សិទ្ធិ និងបំភ័យពលរដ្ឋ កុំឲ្យហ៊ានតវ៉ាទាមទារដីធ្លី។
តំណាងសហគមន៍មានជម្លោះដីធ្លី ក្រុម១៧៥ នៃឃុំជីខលើ ស្រុកស្រែអំបិល លោកស្រី ផាវ ញ៉ើង ឲ្យដឹងថា លោកស្រី សោកស្ដាយចំពោះការសម្រេចរបស់ចៅក្រមស៊ើបសួរនេះ ដោយចាត់ទុកថាជា ការបំបាក់ស្មារតីលោកស្រី និងពលរដ្ឋក្នុងសហគមន៍ មិនឲ្យហ៊ានចេញតវ៉ាទាមទារដីធ្លីរបស់ខ្លួនតទៅទៀត។
ទោះជាយ៉ាងណា លោកស្រីបញ្ជាក់ថា លោកស្រីនឹងអនុវត្តតាមការបង្គាប់របស់ចៅក្រមស៊ើបសួរ ដោយបង្ហាញខ្លួន នៅប៉ុស្តិ៍ប៉ូលិសរាល់ខែតាមការកំណត់ ព្រោះគ្មានជម្រើស។ ប៉ុន្តែទន្ទឹមនឹងនេះ លោកស្រីប្រកាន់ជំហរនៅតែចេញតវ៉ាជាមួយពលរដ្ឋ នៅក្នុងសហគមន៍ដដែល ដោយមិនខ្លាចការចាប់ខ្លួនឡើយ ព្រោះលោកស្រីអះអាងថា ការទាមទារ គឺស្របច្បាប់ និងមិនមែនជាការធ្វើសង្គ្រាម ឬបង្កភាពវឹកវរធ្ងន់ធ្ងរដល់សន្តិសុខជាតិ ដូចការចោទប្រកាន់ឡើយ៖ « នេះគឺជាការគំរាមកំហែង បំបាក់ស្មារតីខ្ញុំ។ តែទោះជាយ៉ាងណា ក៏ខ្ញុំនៅតែតស៊ូ ទាមទាររកដំណោះស្រាយដីខ្ញុំ ដែលខ្ញុំអត់អាចផ្អាកបានទេ។ អត់អាចឈប់បានទេ ព្រោះដី ផ្ទះខ្ញុំ អត់ទាន់បានលទ្ធផលផងហ្នឹង»។
ចៅក្រមស៊ើបសួរ នៃសាលាដំបូងខេត្តកោះកុង លោក ឡោ ក្រឹម នៅថ្ងៃទី១៨ វិច្ឆិកា បានសម្រេចឲ្យ លោកស្រី ផាវ ញ៉ើង និង លោកស្រី សេង លីន ស្ថិតក្រោមការត្រួតពិនិត្យតាមផ្លូវតុលាការ ក្រោមបទចោទបរិហារកេរ្តិ៍ និងញុះញង់ឱ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គមដោយសារពួកលោកស្រី បានដឹកនាំពលរដ្ឋមានជម្លោះដីធ្លី តវ៉ា នៅមុខក្រសួងដែនដី កាលពីខែវិច្ឆិកា ឆ្នាំ២០១៩ ស្នើសុំឱ្យក្រសួងជួយដោះស្រាយទំនាស់ដីធ្លី។ លោក ឡោ ក្រឹម បានលើកលែងការចោទប្រកាន់ លើតំណាងសហគមន៍ម្នាក់ គឺលោកស្រី ផុន ខន។
ចៅក្រម ដែលទើបបញ្ចប់កម្មសិក្សា និងបានចូលកាន់តំណែងថ្មីថ្មោងរូបនេះ ក៏បានសម្រេចឲ្យតំណាងសហគមន៍មានជម្លោះដីធ្លី ចំនួន ១០នាក់ នៅក្នុងសហគមន៍១៩៧ នៅឃុំជីខលើ មានជម្លោះជាមួយក្រុមហ៊ុនឯកជន ហេង ហ៊ុយ អេហ្គ្រីខាលឆ័រ គ្រុប (Heng Huy Agriculture Group) ដែលចូលបំភ្លឺ កាលពីថ្ងៃទី១២ និងថ្ងៃទី១៧ វិច្ឆិកា ស្ថិតក្រោមការត្រួតពិនិត្យ តាមផ្លូវតុលាការផងដែរ។
ក្នុងដំណើរការស៊ើបសួរលើតំណាងសហគមន៍ទាំង ១៣នាក់ រយៈពេល ៣ថ្ងៃ គឺថ្ងៃទី១២ ទី១៧ ទី១៨ នោះ ពលរដ្ឋជាច្រើនរយនាក់ បានប្រមូលផ្គុំគ្នាតវ៉ា នៅខាងមុខតុលាការទាមទារឲ្យបញ្ឈប់ការប្រើប្រាស់ប្រព័ន្ធតុលាការ មកបំភិតបំភ័យពលរដ្ឋ។
ជុំវិញករណីនេះ អាស៊ីសេរីមិនអាចសុំការបញ្ជាក់ពីអ្នកនាំពាក្យ និងជាអនុប្រធានលេខាធិការដ្ឋានរដ្ឋបាលសាលាដំបូងខេត្តកោះកុង លោក ឈិន ឡុង បានទេ នៅថ្ងៃទី១៨ វិច្ឆិកា ដោយសារទូរស័ព្ទរោទ៍គ្មានអ្នកទទួល។
អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា (CCHR) លោក វណ្ណ សូផាត យល់ថា ចៅក្រមមិនគួរកោះហៅ និងបំភ័យពលរដ្ឋមានជម្លោះដីធ្លី តាមប្រព័ន្ធតុលាការឡើយ។ លោកថា ការសម្រេចចោទប្រកាន់ទាំងឡាយលើពលរដ្ឋតវ៉ាទាមទារដីធ្លី គឺជាគំរាមកំហែង និងរំលោភសិទ្ធិរបស់ពលរដ្ឋ។
អ្នកឃ្លាំមើលសិទ្ធិដីធ្លីរូបនេះ អះអាងថា ការបំភ័យ ឬការប្រើប្រាស់ផ្លូវតុលាការ មិនអាចដោះស្រាយបញ្ហាទំនាស់ដីធ្លីរ៉ាំរ៉ៃនេះបានទេ ដូច្នេះ លោកជំរុញឲ្យអាជ្ញាធរ ចុះដោះស្រាយឲ្យពលរដ្ឋ ជាជាងការប្រើប្រាស់ប្រព័ន្ធតុលាការ ឬការបំភ័យពលរដ្ឋ៖ « ខ្ញុំទៅដល់ផ្ទាល់ គឺថា អំពៅអ្វីហ្នឹង មានខ្វិត កន្ទួត ( ដីមានជម្លោះ ) អត់មានធ្វើអ្វីទេ នៅវាល វាលល្ហល្ហេវ ក្នុងព្រៃភ្នំតែម្ដង។ ពីដើម មានព្រៃហ្នឹង ជាព្រៃចម្ការរបស់ប្រជាពលរដ្ឋ។ ប៉ុន្តែឥឡូវហ្នឹង ទៅជាវាលល្ហល្ហេវ អត់មានព្រៃទេ។ ដល់អ៊ីចឹង ហេតុអ្វីត្រូវទុកដីហ្នឹងធ្វើអ្វី បានជាមិនដោះស្រាយឲ្យពលរដ្ឋ។ អ៊ីចឹង បើដោះស្រាយឲ្យពួកគាត់ឲ្យចប់ទៅ ពួកគាត់មានចង់ចំណាយពេល ដើរទាមទារតវ៉ាអ្វីដល់សព្វថ្ងៃ ប្រឈមនឹងការចោទប្រកាន់បទព្រហ្មទណ្ឌ ជាប់ពន្ធនាគារអ្វី គាត់អត់ចង់អ៊ីចឹងទេ»។
ក្រុមតំណាងពលរដ្ឋមានជម្លោះដីធ្លី ទទូចដល់អាជ្ញាធរឱ្យចុះទៅសិក្សាដោះស្រាយទំនាស់ដីធ្លីរ៉ាំរ៉ៃនេះឲ្យបានលឿន បើពុំដូច្នោះទេ ពួកគេនឹងនាំគ្នាចេញតវ៉ាទៀត លុះត្រាមានដំណោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។