សាលាដំបូងខែត្របាត់ដំបង បានសម្រេចឃុំខ្លួនអ្នកកាសែតក្នុងស្រុកម្នាក់ឈ្មោះ កូវ ពិសិដ្ឋ អាយុ៣២ឆ្នាំ ពីបទញុះញង់ឲ្យប្រព្រឹត្តិបទឧក្រិដ្ឋ និងបង្កភាពវឹកវរនៅក្នុងសង្គម។
សមត្ថកិច្ចខែត្របាត់ដំបងបានចាប់ខ្លួន លោក កូវ ពិសិដ្ឋ កាលពីថ្ងៃទី១៤ កក្កដា ក្រោយពីអ្នកកាសែតរូបនេះបានសរសេរសារនៅលើហ្វេសប៊ុករិះគន់របបឯកបក្សអំពីវិធានការទប់ស្កាត់ជំងឺកូវីដ១៩ និងសុំឲ្យសហគមន៍អន្តរជាតិចាត់វិធានការប្រឆាំងនឹងរបបលោក ហ៊ុន សែន ព្រមទាំងផ្ដាច់ជំនួយផងដែរ។
អាស៊ីសេរី មិនអាចទាក់ទងមន្ត្រីតុលាការខែត្របាត់ដំបង ដើម្បីសុំសួរអំពីបញ្ហានេះបន្ថែមបានទេ កាលពីរាត្រីថ្ងៃទី១៥កក្កដា។ ប៉ុន្តែមេបញ្ជាការរងកងរាជអាវុធក្រុងបាត់ដំបងលោក វរសេនីយ៍ឯក ដួង គឹមសួន ឲ្យកាសែតខ្មែរថាមស៍ (Khmer times) កាលពីថ្ងៃទី១៥ កក្កដា ថា សមត្ថកិច្ចបានចាប់ខ្លួន លោក កូវ ពិសិដ្ឋ នៅឯគេហដ្ឋានរបស់លោកក្នុងសង្កាត់ព្រែកព្រះសេ្ដច ក្រុងបាត់ដំបង។ បន្ទាប់មក សមត្ថកិច្ចក៏បញ្ជូនលោកទៅតុលាការនៅថ្ងៃទី១៥ កក្កដា។ លោកអះអាងថា តុលាការចេញដីកាសម្រេចឃុំខ្លួនភ្លាមៗ ក្រោយពីសាកសួរ។
លោក ដួង គឹមសួន បន្ថែមថា ក្រៅពីសមត្ថកិច្ចបានស្រាវជ្រាវឃើញអ្នកកាសែតរូបនេះ សុំឲ្យអន្តរជាតិផ្ដាច់ជំនួយនោះ គឺលោក កូវ ពិសិដ្ឋ បានថតបង្ហោះរូបភាពជួបជុំមិត្តភក្ដិមានគ្នាបីនាក់ ក្នុងកម្មវិធីផឹកស៊ី និងបង្ហាញរូបកំប៉ុងស្រាបៀរ ដោយសរសេរថា “ យើងទាំងបីនាក់អំពាវនាវឲ្យសហគមន៍អន្តរជាតិ ចាត់វិធានការប្រឆាំងនឹងលោកនាយរដ្ឋមន្ត្រីហ៊ុន សែន និងស្នើឲ្យសហគមន៍អន្តរជាតិផ្ដាច់ជំនួយទាំងអស់” ។ លោកមេបញ្ជាការរងបន្ថែមចោទថា ការបង្ហោះសារបែបនេះជាការញុះញង់ និងធ្វើឲ្យប៉ះពាល់ដល់កិត្តិយសថ្នាក់ដឹកនាំ។
ទោះជាបែបនេះក្ដី ក្រុមអ្នកធ្វើការលើកស្ទួយវិស័យសារព័ត៌មាននៅកម្ពុជាអះអាងថា លោក កូវ ពិសិដ្ឋ សរសេរ នៅលើគណនីហ្វេសប៊ុកផ្ទាល់ខ្លួននេះ មិនមែនជាការិះគន់ទេ គ្រាន់តែបញ្ចេញមតិ ដែលធានានៅក្នុងរដ្ឋធម្មនុញ្ញតែប៉ុណ្ណោះ។
របាយការណ៍របស់ក្រុមអង្គការស៊ីវិលឱ្យដឹងកន្លងថា យ៉ាងហោចណាស់ មានអ្នកសារព័ត៌មានជាង ១០នាក់ ត្រូវបានសមត្ថកិច្ចកោះហៅ និងសាកសួរ ដោយសារតែការរាយការណ៍ព័ត៌មានរបស់ពួកគេកាលពីឆ្នាំ២០២០នេះ។ អង្គការសិទ្ធិមនុស្សថា ការបន្តចាប់ និងឃុំខ្លួន និងការធ្វើទុក្ខបុកម្នេញផ្លូវច្បាប់ ចំពោះអ្នកសារព័ត៌មាន ដែលហ៊ានសរសេររិះគន់ គឺជាការរំលោភយ៉ាងធ្ងន់ធ្ងរចំពោះសិទ្ធិទទួលបានព័ត៌មានរបស់ពលរដ្ឋកម្ពុជា។
អង្គការសង្គមស៊ីវិលជាង ១៣០ស្ថាប័ន ទាមទាររដ្ឋាភិបាលឱ្យដោះលែងអ្នកសារព័ត៌មានកំពុងជាប់ឃុំឱ្យមានសេរីភាពវិញ ដោយចាត់ទុកការចាប់ខ្លួន និងចោទប្រកាន់អ្នកសារព័ត៌មានក្នុងអំឡុងពេលជំងឺកូវីដ១៩ កំពុងរាតត្បាត ជាការរំលោភសិទ្ធិពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។