ក្រសួងមហាផ្ទៃ គ្រោងនឹងធ្វើសិក្ខាសាលាមួយដែលមានភាគីពាក់ព័ន្ធចូលរួមដើម្បីទទួលបានមតិចម្រុះក្នុងគោលដៅធ្វើច្បាប់រក្សាការសម្ងាត់ជាតិ។ ទោះមិនទាន់កំណត់ពេលវេលាជាក់លាក់ក្តី ប៉ុន្តែមន្ត្រីជាន់ខ្ពស់ក្រសួងមហាផ្ទៃអះអាងពីការបើកទូលាយនេះថា គំនិតពីភាគីពាក់ព័ន្ធនឹងធ្វើឲ្យច្បាប់នោះបម្រើប្រយោជន៍ច្រើនដល់សង្គម។
ភាគីពាក់ព័ន្ធដែលក្រសួងមហាផ្ទៃ អញ្ជើញចូលរួមដើម្បីផ្ដល់មតិលើការបង្កើតច្បាប់ស្ដីពីការរក្សាការសម្ងាត់របស់ជាតិនោះ រួមមាន អ្នកច្បាប់ អង្គការសង្គមស៊ីវិល ស្ថាប័នអន្តរក្រសួង និងមហាជនទូទៅ។
ថ្លែងនៅថ្ងៃទី៧ ខែកុម្ភៈ អ្នកនាំពាក្យក្រសួងមហាផ្ទៃ លោកឧត្ដមសេនីយ៍នាយក ខៀវ សុភ័គ ឲ្យដឹងថា ដើម្បីឲ្យការបង្កើតច្បាប់រក្សាការសម្ងាត់របស់ជាតិមានលក្ខណៈត្រឹមត្រូវគ្រប់ជ្រុងជ្រោយ ក្រសួងមហាផ្ទៃ ត្រូវការមតិយោបល់ពីភាគីពាក់ព័ន្ធនានាផ្ដល់ជាគំនិតលើដំណើរការនៃសេចក្ដីព្រាងច្បាប់នេះ។
លោកបន្តទៀតថា ដំណើរការនៃការធ្វើច្បាប់នេះ បន្ទាប់ពីទទួលបានគំនិតពីអ្នកពាក់ព័ន្ធនានា ក្រសួងមហាផ្ទៃ នឹងទៅជជែកជាមួយអន្តរក្រសួង ហើយនឹងដាក់ជូនទៅគណៈរដ្ឋមន្ត្រី និងចុងក្រោយស្នើទៅសភាដើម្បីអនុម័ត៖ «យើងប្រមូលទាំងអស់ មិនមែនធ្វើតាមតែនឹកឃើញទេ ព្រោះច្បាប់ល្អទើបសង្គមល្អ»។
ទោះបែបនេះក្តី មន្ត្រីសង្គមស៊ីវិលមួយចំនួនបង្ហាញក្ដីបារម្ភថា ច្បាប់រក្សាការសម្ងាត់ជាតិអាចនឹងរឹតត្បិតសេរីភាពបញ្ចេញមតិ សេរីភាពសារព័ត៌មាន និងជាឧបករណ៍ដាក់ទោសអ្នកដែលហ៊ានបញ្ចេញព័ត៌មានពីភាពមិនប្រក្រតីរបស់ស្ថាប័នរដ្ឋមួយចំនួន។
ស្រដៀងគ្នានេះដែរ សមាជិកសភាមកពីគណបក្សសង្គ្រោះជាតិ លោក សុន ឆ័យ មានប្រសាសន៍ថា ប្រសិនបើមានឱកាសលោកនឹងចូលរួម ហើយអ្វីដែលលោកលើកឡើងក្នុងសិក្ខាសាលានោះ គឺទាមទារឲ្យបង្កើតច្បាប់ស្ដីពីសិទ្ធិទទួលបានព័ត៌មាន មុននឹងបង្កើតច្បាប់រក្សាការសម្ងាត់របស់ជាតិ។
មន្ត្រីជាន់ខ្ពស់នៃគណបក្សប្រឆាំងរូបនេះយល់ថា ច្បាប់ស្ដីពីសិទ្ធិទទួលបានព័ត៌មាន គឺចែងច្បាស់លាស់ពីព័ត៌មានបែបណាដែលពលរដ្ឋអាចដឹង និងព័ត៌មានប្រភេទណាដែលត្រូវការពារដោយច្បាប់៖ «បើយើងធ្វើការច្បាប់រក្សាការសម្ងាត់នេះមុនវាអាចនឹងធ្វើឲ្យប៉ះពាល់ដល់សេរីភាពនៃការទទួលបានព័ត៌មាន»។
កាលពីចុងខែមករា កន្លងទៅ មន្ត្រីជាន់ខ្ពស់អគ្គស្នងការនគរបាលជាតិ បញ្ជាក់ថា សេចក្ដីព្រាងច្បាប់រក្សាការសម្ងាត់ជាតិ នឹងត្រូវចងក្រងឡើងដោយក្រសួងមហាផ្ទៃ ក្រោមជំនួយឧបត្ថម្ភពីប្រទេសវៀតណាម។ អ្នកនាំពាក្យក្រសួងមហាផ្ទៃ លោក ខៀវ សុភ័គ មិនទាន់បង្ហើបឲ្យដឹងថា ច្បាប់នេះអាចនឹងមានប៉ុន្មានមាត្រា ឬក៏ត្រូវចំណាយថវិកាប៉ុន្មានលើដំណើរការនេះនៅឡើយទេ។
លោកមេធាវី សុក សំអឿន ស្វាគមន៍ការអញ្ជើញឲ្យចូលរួមរបស់ក្រសួងមហាផ្ទៃនេះ។ លោកមេធាវីយល់ថា ការធ្វើច្បាប់ដែលបើកចំហឲ្យមានភាគីពាក់ព័ន្ធចូលរួម គឺធ្វើច្បាប់នោះកាន់តែមានប្រយោជន៍ដល់សង្គម។ សម្រាប់លោកមេធាវី សុក សំអឿន ទាមទារឲ្យច្បាប់នោះត្រូវតែចែងឲ្យច្បាស់លាស់ថា តើអ្វីទៅជាការសម្ងាត់របស់ជាតិ៖ «បើសិនជាបានគេហៅចូលរួមមែននោះ គឺជាការល្អហើយដើម្បីអាចបានចូលរួមនិងផ្ដល់មតិ»។
អ្នកនាំពាក្យក្រសួងមហាផ្ទៃ លោក ខៀវ សុភ័គ បញ្ជាក់ថា តាមការគ្រោងទុក ការបង្កើតច្បាប់នេះឡើងដើម្បីរក្សាការសម្ងាត់របស់ជាតិ ប៉ុន្តែមិនបានការពារការសម្ងាត់របស់សង្គម ឬឯកជនទេ គឺមានន័យថា ច្បាប់នេះមិនបានរឹតត្បិតព័ត៌មាននានារបស់សង្គម ឬក៏ហាមឃាត់សេរីភាពនៃការប្រើបណ្ដាញសង្គមឡើយ។ លោកថា ក្រសួងមហាផ្ទៃ ត្រូវការពេលវេលាច្រើនទៀតដើម្បីធ្វើការងារនេះ ហើយនៅក្នុងពេលនេះ ច្បាប់នេះស្ថិតក្នុងការគិតគូរនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។