សាលាដំបូងរាជធានីភ្នំពេញពន្យារពេលសវនាការសំណុំរឿង អ្នកវិភាគនយោបាយ លោក គឹម សុខ បទបរិហារកេរ្តិ៍ជាសាធារណៈ និងញុះញង់បង្កឲ្យមានភាពវឹកវរធ្ងន់ធ្ងរដល់សង្គម។ អ្នកឃ្លាំមើលសិទ្ធិមនុស្សជំរុញតុលាការឱ្យទម្លាក់បទចោទ ជាជាងបើកសវនាការ ព្រោះការលើកឡើងកន្លងមក ជាសេរីភាពសម្ដែងមតិរបស់ពលរដ្ឋ។
តុលាការសម្រេចពន្យារពេលសវនាការលើអង្គសេចក្ដី ទៅតាមសំណើរបស់មេធាវីដើមបណ្ដឹង ហើយខាងក្រឡាបញ្ជី នឹងកំណត់ថ្ងៃបើកសវនាការសំណុំរឿងនេះម្ដងទៀត នៅពេលក្រោយ ។
មេធាវីការពារក្ដីឲ្យ លោក គឹម សុខ គឺលោកមេធាវី ជូង ជូងី លោកមិនបញ្ចេញយោបល់ បែបណាទេ ក្នុងករណីនេះ។
ចំណែកលោក គឹម សុខ លោកប្រាប់អាស៊ីសេរីថា លោកមិនខ្វល់នឹងដំណើរការក្ដី នៅតុលាការទេ ព្រោះ ហ៊ុន សែន ប្រព័ន្ធយុត្តិធម៌មួយនេះ ស្ថិតក្រោមបញ្ជារបស់លោកនាយករដ្ឋមន្ត្រី ហ៊ុន សែន។ លោកចោទថា ដំណើររឿងក្ដីប្រឆាំងនឹងរូបលោក ពាក់ព័ន្ធនឹងបទបរិហារកេរ្តិ៍ និងញុះញង់នេះ គឺតុលាការ បានបំពានរដ្ឋធម្មនុញ្ញ។ លោក គឹម សុខ អះអាងថា លោកកំពុងខិតខំរកគន្លឹះ ផ្លាស់ប្ដូរ អំណាចផ្ដាច់ការរបស់គ្រួសារត្រកូល ហ៊ុន នៅកម្ពុជា ហើយលោកចោទថា លោក ហ៊ុន សែន បានប្រើប្រាស់តុលាការនយោបាយ ដើម្បីព្យាយាមបំបិទសិទ្ធិតស៊ូមតិរបស់លោកនៅកម្ពុជា ហើយតុលាការ ដែលស្ថិតក្រោមឥទ្ធិពលនយោបាយនេះ ដំណើរការរឿងក្ដីរបស់លោក មិនផ្អែកលើមូលដ្ឋានអង្គហេតុ អង្គច្បាប់ និងភស្តុតាងទេ គឺធ្វើតាមមាត់របស់លោក ហ៊ុន សែន សុទ្ធសាធ៖ « ជារឿងគួរឲ្យអស់សំណើចបំផុត។ ឋានៈកំពូល២ របស់លោក ហ៊ុន សែន គាត់ប្រើប្ដឹងខ្ញុំទាំង២។ បណ្ដឹងទី១ ដែលកាត់បង្ខំឲ្យខ្ញុំជាប់គុក យ៉ាងអយុត្តិធម៌ ១៨ខែ លោក ហ៊ុន សែន ប្រើឋានៈរបស់គាត់ ជាប្រធានគណបក្សប្រជាជនកម្ពុជា និងបណ្ដឹងទី២ ដែលកោះហៅខ្ញុំនៅពេលនេះ គឺលោក ហ៊ុន សែន ប្រើតំណែងគាត់ជានាយករដ្ឋមន្ត្រី។ សម្រាប់ខ្ញុំច្បាស់ណាស់ នេះគឺជាតុលាការនយោបាយ»។
តំណាងអយ្យការអមសាលាដំបូងរាជធានីភ្នំពេញ លោក ស៊ិត វណ្ណៈ បានចេញដីកាកោះហៅ លោក គឹម សុខ កាលពីខែវិច្ឆិកា ឆ្នាំ២០២០ ពីបទបរិហារកេរ្តិ៍ជាសាធារណៈ និងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ពាក់ព័ន្ធនឹងការលើកឡើង កាលពីឆ្នាំ២០១៧ ថា រដ្ឋាភិបាល បានបង្កើតប្រព័ន្ធសម្លាប់មនុស្ស ហើយរកឃាតកមិនឃើញ ក្នុងសំណុំរឿងឃាតកម្មបណ្ឌិត កែម ឡី។
អាស៊ីសេរី មិនអាចសុំការបញ្ជាក់បន្ថែមពីអ្នកនាំពាក្យតំណាងអយ្យការ លោក គុជ គឹមឡុង និងអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ នៅថ្ងៃទី២៦ មករា។
លោក ហ៊ុន សែន ធ្លាប់ប្ដឹងលោក គឹម សុខ ឲ្យជាប់ពន្ធនាគារ រយៈពេល ១ឆ្នាំកន្លះម្ដងហើយ កាលពីឆ្នាំ២០១៧ ក្នុងសំណុំរឿងបរិហារកេរ្តិ៍ និងញុះញង់ឱ្យប្រព្រឹត្តបទឧក្រិដ្ឋជាអាទិពាក់ព័ន្ធនឹងការថ្លែងរបស់លោក គឹម សុខ ថា គណបក្សកាន់អំណាច នៅពីក្រោយសំណុំរឿងឃាតកម្ម បណ្ឌិត កែម ឡី។ លោកត្រូវបានដោះលែង កាលពីខែសីហា ឆ្នាំ២០១៨ ក្រោយអនុវត្តទោសពន្ធនាគារគ្រប់ចំនួន តែលោកនៅមិនទាន់បង់លុយសំណងជំងឺចិត្ត តាមការបង្គាប់របស់តុលាការ ចំនួនប្រាំបីរយ (៨០០) លានរៀល ឬស្មើប្រមាណពីរសែន (២០ម៉ឺន) ដុល្លារ ឲ្យលោក ហ៊ុន សែន ទេ។ លោក ហ៊ុន សែន ក៏ធ្លាប់ព្រមានចាប់លោក គឹម សុខ ដាក់ពន្ធនាគារឡើងវិញផងដែរ ប្រសិនបើអ្នកវិភាគរូបនេះ មិនព្រមបញ្ឈប់រិះគន់របបដឹកនាំរបស់លោក។
អ្នកនាំពាក្យសមាគមអាដហុក លោក ស៊ឹង សែនករុណា យល់ថា បទចោទប្រកាន់ថ្មីទាំងពីរនេះ មិនឆ្លុះបញ្ចាំងពីការប្រព្រឹត្តិរបស់លោក គឹម សុខ ទេ ដោយសារអ្នកវិភាគរូបនេះ បានប្រើប្រាស់សិទ្ធិសម្ដែងមតិ ក្នុងនាមជាពលរដ្ឋ។ អ្នកឃ្លាំមើលសិទ្ធិមនុស្សរូបនេះ ជំរុញតុលាការឱ្យទម្លាក់បទចោទ។ លោកបន្តថា បើតុលាការបន្តនីតិវិធី នឹងមិនអាចផ្ដល់យុត្តិធម៌បានទេ ព្រោះភាគីម្ខាងទៀត គឺលោក គឹម សុខ មិនអាចចូលរួមសវនាការបាន៖ « វាជានីតិវិធី ជាការសម្រេចរបស់តុលាការ។ ប៉ុន្តែ គ្រាន់តែដំណើររឿងនេះ យើងឃើញហើយ លោក គឹម សុខ មិនមានវត្តមាននៅក្នុងស្រុកទេ គឺលោកបានចេញទៅប្រទេសទី២ ទី៣ ទៅហើយ។ អ៊ីចឹង ដំណើរការនីតិវិធី ហើយបើសិនជាមិនមានភាគីពាក់ព័ន្ធចូលរួមដេញដោយឲ្យបានគ្រប់ជ្រុងជ្រោយទេ ការរកយុត្តិធម៌ នៅក្នុងរឿងហ្នឹង វាមិនអាចឆ្លុះបញ្ចាំងពីភាពត្រឹមត្រូវ ក្នុងការអនុវត្តនីតិវិធីទេ»។
ទោះជាយ៉ាងណា លោក គឹម សុខ អះអាងថា លោកមានបំណងចង់តតាំងរឿងក្ដីនេះ ក្នុងតុលាការ។ លោកអះអាងថា លោកនឹងវិលត្រលប់ចូលប្រទេសវិញ បើរបបក្រុងភ្នំពេញ បើកផ្លូវឲ្យលោកបានចូលទៅតតាំងក្ដី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។