សាលាដំបូងរាជធានីភ្នំពេញផ្ដន្ទាទោសបុរសម្នាក់រឿងសរសេរឌឺដង «ទិញម៉ាស់ពាក់ឲ្យកូនមាន់» ជាប់ទោស ១៨ខែ និងពិន័យជាប្រាក់ចំនួន ២លានរៀល
សាលាដំបូងរាជធានីភ្នំពេញប្រកាសសាលក្រមផ្ដន្ទាទោស លោក នី ណាក់ អតីតមន្ត្រីក្រសួងកសិកម្មម្នាក់ ដាក់ពន្ធនាគារ ១៨ខែ និងពិន័យជាប្រាក់ចំនួន ២លានរៀល ក្រោមការចោទប្រកាន់ពីបទ ជេរប្រមាថជាសាធារណៈ និងញុះញង់ឱ្យមានការរើសអើង កាលពីថ្ងៃទី១៨ សីហា។
លោក នី ណាក់ បានផ្សព្វផ្សាយពីការទិញម៉ាស់ពាក់ឱ្យកូនមាន់ និងត្រៀមដាក់ទ្រុងមាន់ក្នុងគ្រាមានអាសន្ន ខណៈកម្ពុជា និងពិភពលោក ផ្ទុះជំងឺកូវីដ១៩ កាលចុងឆ្នាំ២០១៩។
លោក នី ណាក់ បានសរសេរលើហ្វេសប៊ុក ឈ្មោះ អាយមែន-ខេអេក ( Iman-KH) ថា៖ « ខ្ញុំបានត្រៀម ឬព្រាងលិខិត និងឯកសាររួចរាល់អស់ហើយ ក្នុងការស្នើដាក់ទ្រុងមាន់របស់ខ្ញុំក្នុងភាពអាសន្ន ព្រោះមូលហេតុ មានមេរោគផ្តាសាយរលាកផ្លូវដង្ហើម កំពុងតែរាតត្បាតក្នុងកសិដ្ឋាន។ ខ្ញុំមិនចង់គិតដល់ចំណុចនេះទេ ព្រោះវាធ្វើឱ្យខូចខាតសេដ្ឋកិច្ចរបស់កូនមាន់យ៉ាងធ្ងន់ធ្ងរ ។ ខ្ញុំសង្ឃឹមថា កូនមាន់នឹងចេះពាក់ម៉ាស់គ្រប់គ្នា ហើយដេកនៅក្នុងទ្រុង កុំចេញក្រៅឱ្យសោះ បើគ្មានការចាំបាច់ » ។
សមត្ថកិច្ចនគរបាលនាយកដ្ឋានប្រឆាំងបទល្មើសបច្ចេកវិទ្យា បានយកសារនេះជាមូលដ្ឋាន ក្នុងការចោទប្រកាន់ និងចាប់ខ្លួនលោកបញ្ជូនទៅតុលាការកាលថ្ងៃទី១១ ខែធ្នូ ឆ្នាំ២០២០។
ចៅក្រមជំនុំជម្រះសាលាដំបូងរាជធានីភ្នំពេញ លោក សុង ប៊ុណ្ណារិទ្ធ បានឲ្យសារព័ត៌មានក្នុងស្រុកដឹង កាលពីថ្ងៃទី១៨ សីហាថា តុលាការបានសម្រេចដាក់ទោសបុរសម្នាក់នេះ ដាក់ពន្ធនាគារ ១៨ខែ និងពិន័យជាប្រាក់ចំនួន ២លានរៀល តាមមាត្រា៣០៧ មាត្រា៤៩៤ និងមាត្រា៤៩៦ នៃក្រមព្រហ្មទណ្ឌ។
ទោះយ៉ាងណាក្ដី សាលក្រមនេះ បើកផ្លូវឲ្យប្ដឹងឧទ្ធរណ៍តាមកំណត់ច្បាប់ បើជនត្រូវចោទមិនសុខចិត្តនឹងសេចក្ដីសម្រេចរបស់តុលាការនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។