អ្នកនាំពាក្យស្ថានទូតសហរដ្ឋអាមេរិកប្រចាំនៅទីក្រុងភ្នំពេញ លោក អេរិន ឆ្វាសចេស (Erend Zwatjest) ប្រាប់អាស៊ីសេរីថា ពលរដ្ឋខ្មែរអាមេរិកាំងចំនួន៣០ទៀត ដែលបានប្រព្រឹត្តិបទល្មើសឧក្រិដ្ឋ ហើយអនុវត្តទោសនៅសហរដ្ឋអាមេរិកហើយ ត្រូវបានរដ្ឋាភិបាលអាមេរិកបញ្ជូនមកដល់កម្ពុជាវិញហើយ កាលពីថ្ងៃទី២២ សីហា។
របាយការណ៍អង្គការគាំពារពលរដ្ឋខ្មែរគ្មានទីពឹង ឲ្យដឹងថា ចំនួនពលរដ្ឋខ្មែរដែលប្រព្រឹត្តខុសច្បាប់ធ្ងន់ធ្ងរ ឬបទឧក្រិដ្ឋ ត្រូវបានរដ្ឋាភិបាលអាមេរិកបញ្ជូនមកកាន់វិញជាបន្តបន្ទាប់ មកទល់ពេលនេះ មានចំនួនជិត៧០០នាក់ហើយ របាយការណ៍អង្គការឲ្យដឹងទៀតថា ពលរដ្ឋខ្មែរដែលបញ្ជូនមកកម្ពុជា មកទល់ពេលនេះ មានចំនួន ២៩នាក់ស្លាប់ ក្នុងនោះ២នាក់ស្លាប់ដោយសារធ្វើអត្តឃាត។
សហរដ្ឋអាមេរិក កាលពីថ្ងៃទី១៣ ខែកញ្ញា ២០១៧ សម្រេចដាក់ទណ្ឌកម្មមិនផ្ដល់ទិដ្ឋាការធ្វើដំណើរប្រភេទ B1/B2 ដល់មន្ត្រីការទូតកំពូលនៃក្រសួងការបរទេសកម្ពុជា និងក្រុមគ្រួសាររបស់អ្នកទាំងនោះ។ ការសម្រេចដូចនេះ ព្រោះកម្ពុជា បានផ្អាកមិនព្រមទទួលយក ពលរដ្ឋខ្មែរនៅអាមេរិក ដែលត្រូវសហរដ្ឋអាមេរិកចាប់បញ្ជូនមកវិញ ដោយសារតែពួកគេបានប្រព្រឹត្តខុសច្បាប់ ក៏ប៉ុន្តែចាប់ពីថ្ងៃទី១៤ កញ្ញា ឆ្នាំ២០១៧ មកដល់បច្ចុប្បន្ន របបលោក ហ៊ុន សែន ក៏ចាប់ផ្ដើមទទួលយកពលរដ្ឋខ្មែរសហរដ្ឋអាមេរិកបញ្ជូនមកឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។