តុលាការក្រុងភ្នំពេញ កាត់ទោសគ្រូបង្រៀនម្នាក់ឲ្យជាប់ពន្ធនាគារ២ឆ្នាំ ពីបទរំលោភសេពសន្ថវៈលើអនីតិជន អាយុក្រោម ១៥ឆ្នាំ និងបទជំរិតទារប្រាក់ពីជនរងគ្រោះ កាលពីថ្ងៃទី៩ ខែធ្នូ កន្លងមកនេះ។
គ្រូបង្រៀនដែលត្រូវចោទរូបនោះ ឈ្មោះ សឿង រ៉ាំងសី អាយុ ២៧ ឆ្នាំ បង្រៀននៅសាលាឯកជនមួយក្នុងក្រុងភ្នំពេញ។ សាលាដំបូងរាជធានីភ្នំពេញ ក៏បានបង្គាប់ឲ្យជនល្មើស សងប្រាក់សំណងចំនួនជាង ៣ម៉ឺនដុល្លារ ដល់ជនរងគ្រោះផងដែរ។
សេចក្តីប្រកាសព័ត៌មានរបស់អង្គការប្រឆាំងការជួញដូរកុមារ ( Action Pour Les Enfants-APLE) កាលពីថ្ងៃទី ១១ ខែធ្នូ ឲ្យដឹងថា ក្រោយពីក្រសួងអប់រំប្រកាសឲ្យបិទសាលារៀនរដ្ឋ និងឯកជន ជាបណ្ដោះអាសន្ន កាលពីខែមិនា ឆ្នាំ២០២០ ដោយអនុញ្ញាតឲ្យរៀនតាមប្រព័ន្ធអនឡាយ ដើម្បីទប់ស្កាត់ការរាលដាលនៃជំងឺកូវីត១៩មក គ្រូបង្រៀនរូបនេះ ក៏បានចាប់ផ្តើមមានទំនាក់ទំនងស្នេហាជាមួយសិស្សខ្លួនឯង។ បន្ទាប់ពីបានលួងលោមឲ្យសិស្សរូបនោះ បាក់ចិត្តស្រឡាញ់និងទុកចិត្តរួចមក ជនល្មើសក៏បង្គាប់ឲ្យផ្ញើរូបថតអាក្រាតមកខ្លួន។ ក្រោយពីបានរូបថតអាក្រាតហើយ ជនល្មើសក៏ចាប់ផ្តើមជំរិតទារប្រាក់ជាបន្តបន្ទាប់ និងគំរាមថា ប្រសិនបើមិនផ្តល់ប្រាក់ឲ្យទេ គេនឹងបញ្ចេញរូបភាពអាក្រាតទាំងនោះជាសាធារណៈ។
សេចក្ដីប្រកាសព័ត៌មាន មិនបានបញ្ជាក់ពីចំនួនទឹកប្រាក់ដែលបានប្រគល់ឲ្យជនល្មើសនោះទេ ក៏ប៉ុន្តែក្រោយមក ឪពុកម្ដាយរបស់កុមារីរងគ្រោះ បានប្តឹងទៅប៉ូលិស ហើយអាជ្ញាធរក៏បានឃាត់ខ្លួនគ្រូបង្រៀនរូបនោះកាលពីខែកក្កដា ឆ្នាំ២០២០។ ឪពុកកុមារីរងគ្រោះ សំណូមពរ ឲ្យតុលាការផ្ដន្ទាទោសជនល្មើសឲ្យបានយូរជាង២ឆ្នាំនេះ ដើម្បីជាការព្រមាន កុំឲ្យប្រព្រឹត្តអំពើអនាចារបែបនេះ ទៅកុមារីផ្សេងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។