តុលាការខេត្តសៀមរាបសម្រេចឃុំខ្លួន ចាងហ្វាងសារព័ត៌មានអនឡាញបណ្ដោះអាសន្ន កាលពីថ្ងៃទី២៤ ខែមេសា ដោយចោទប្រកាន់ពី «បទក្លែងព័ត៌មាន» ដែលបានបង្ហោះសារបំភ្លៃថា សេដ្ឋីបនល្បែង និងជាសមាជិកព្រឹទ្ធសភាបក្សកាន់អំណាច «លោក លី យ៉ុងផាត់ ស្លាប់»។
ស្នងការរងនគរបាលខេត្តសៀមរាប លោក ម៉ៅ ហាក់ បានហៅលោក លឹម ហួរ ទៅសាកសួរនៅសាលាដំបូងខេត្តនេះ ក្រោយពីមានពាក្យបណ្តឹងពីមេធាវីអ្នកឧកញ៉ា លី យ៉ុងផាត់ កាលពីថ្ងៃទី២៣ ខែមេសា ឆ្នាំ២០២១។
លោក លឹម ហួរ មានតួនាទីជាចាងហ្វាងគេហទំព័រ «Boko News» និងគេហទំព័រខ្មែរ 7មករា ឬ Khmer7 News ដែលមានទីស្នាក់ការនៅក្រុមទី៤ ភូមិមណ្ឌល១ សង្កាត់ស្វាយដង្គំ ខេត្តសៀមរាប ត្រូវបានតុលាការឃុំខ្លួនហើយ ក្រោយចៅក្រមបានសាកសួររួច។
ការចាប់ឃុំខ្លួននេះ ក្រោយដែលអ្នកកាសែតរូបនោះបានចុះផ្សាយព័ត៌មានតាមបណ្ដាញសង្គម ឈ្មោះ «ឡាយ ហួរ» ថា លោក លី យ៉ុងផាត់ បានទទួលមរណភាពហើយ កាលពីថ្ងៃទី២០ ខែមេសាកន្លងមកនេះ តែមិនបានដឹងពីមូលហេតុពិតប្រាកដនៃមរណភាពនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។