គ្រួសារនិងសង្គមស៊ីវិល ខកចិត្តនឹងតុលាការកំពូលដែលសម្រេចមិនអនុញ្ញាតឱ្យមន្ត្រីបក្សភ្លើងទៀន ពីររូបនៅក្រៅឃុំ ទោះបីជាពួកគាត់មានជំងឺធ្ងន់ធ្ងរ ត្រូវការពេទ្យជំនាញព្យាបាលចាំបាច់ក៏ដោយ។
តុលាការកំពូលមិនអនុញ្ញាតឱ្យមន្ត្រីគណបក្សភ្លើងទៀន ពីររូបនៅក្រៅឃុំបណ្ដោះ អាសន្ន ក្រោមហេតុផលថា សំណុំរឿងពួកគាត់ត្រូវបានបញ្ជូនទៅជម្រះហើយ។ ប៉ុន្តែសង្គមស៊ីវិល និងគ្រួសារមន្ត្រីបក្សភ្លើងទៀនទាំងពីររូប ចាត់ទុកការសម្រេចនេះថា ជារឿងអយុត្តិធម៌។
ការសម្រេចនេះ បន្ទាប់ពីប្រធានក្រុមប្រឹក្សាជំនុំជម្រះតុលាការកំពូល បានបើកសវនាការ បណ្ដឹងសុំនៅក្រៅឃុំរបស់មន្ត្រីគណបក្សភ្លើងទៀន ប្រចាំខេត្តកំពង់ចាម លោក តូច ថឹង និងមន្ត្រីគណបក្សភ្លើងទៀតម្នាក់ទៀត គឺលោក ចៅ វាសនា កាលពីថ្ងៃទី៦ ខែវិច្ឆិកា កន្លងទៅ។
ប្រធានក្រុមប្រឹក្សាជំនុំជម្រះ តុលាការកំពូល លោក យូរ ប៊ុនឡេង នៅថ្ងៃទី១០ ខែវិច្ឆិកានេះ បានប្រកាសសាលដីកា ដោយមិនដោះលែងលោក ចៅ វាសនា និង លោក តូច ថឹង ឱ្យនៅឃុំខ្លួនបណ្ដោះអាសន្ន ដោយសំអាងថា ការសម្រេចសេចក្ដីរបស់សាលាឧទ្ធរណ៍ជារឿងត្រឹមត្រូវ។
ប្រពន្ធលោក តូច ថឹង គឺលោកស្រី ហាញ់ សុវណ្ណា បង្ហាញការខកចិត្ត ដែលតុលាការកំពូលមិនដោះលែងប្ដីរបស់គាត់ ឱ្យនៅក្រៅឃុំបណ្ដោះអាសន្ន ដើម្បីព្យាបាលជំងឺ។
ក្រៅពីមិនដោះលែងហើយ លោកស្រីថា មន្ត្រីពន្ធនាគារព្រៃសបានប្ដូរ និងបញ្ជូន លោក តូច ថឹង ទៅឃុំនៅពន្ធនាគារខេត្តពោធិ៍សាត់វិញ ដោយមិនបានប្រាប់លោកស្រីឱ្យដឹងជាមុន ដូច្នេះ សូម្បីតែថ្នាំដែលប្រើជាប្រចាំ ក៏មិនបានយកទៅដែរ។
លោកស្រី ហាញ់ សុវណ្ណា៖ «វាប៉ះពាល់ហើយភ្នែកគាត់សំខាន់ ព្រោះភ្នែកគាត់ត្រូវទឹក រាល់ថ្ងៃ ហើយថ្នាំនៅហ្នឹងខ្ញុំទៀត។ ពេលគាត់នៅព្រៃស ឱ្យយកអីវ៉ាន់ មកឱ្យអស់មក គេលែងគាត់ហើយ អត់មានប្រាប់យកគាត់ទៅព្រៃសទេ ឱ្យគាត់ជិះ ឡានម្នាក់ឯង ផ្សេង។ ខ្ញុំតូចចិត្តហើយ តូចចិត្តទៀត ខ្ញុំមកសារមុន អត់ឱ្យខ្ញុំយក ទូរសព្ទ ចូលទេ ឃាត់ទាំងអស់។ ចំណែកយួន ចិនយកចូលបានទាំងអស់ ខលបានអីបានទាំងអស់ ។ ខ្ញុំស្ដាយតុលាការស្ដាយខាងពន្ធនាគារ ហេតុអីធ្វើបាប ខ្មែរម្ល៉េះ បើប្ដីខ្ញុំធ្វើខុស ខ្ញុំអត់ខ្លាចទេ តែប្ដីខ្ញុំធ្វើត្រូវ»។
មេធាវីការពារឱ្យលោក តូច ថឹង គឺលោក ជូង ជូងី ហៅការសម្រេច របស់តុលាការកំពូលថា ជាការសម្រេចដោយខ្វះការយោគយល់ បើទោះបីជា កូនក្ដីរបស់គាត់មានជំងឺភ្នែកធ្ងន់ធ្ងរ ដែលទើបវះកាត់ និងត្រូវការព្យាបាល ជាចាំបាច់ក៏ដោយ។
ក្រៅពីជំងឺភ្នែក លោកថា កូនក្ដីរបស់គាត់ក៏មានជំងឺប្រចាំកាយផ្សេងៗទៀត ដោយសារគាត់មានវ័យចាស់ដែលត្រូវការការព្យាបាល និងអ្នកមើលថែផងដែរ។
លោក ជូង ជូងី៖ «សម្រាប់ជំងឺទូទៅធម្មតាគឺពេទ្យខាងពន្ធនាគារអាចព្យាបាល បានតែពាក់ព័ន្ធជំងឺត្រូវការពេទ្យជំនាញហ្នឹង គឺពន្ធនាគារមិនអាចបំពេញបានទេ ហើយកន្លងមក គាត់ក៏ទទួលការវះកាត់នៅពេទ្យខាងក្រៅ អ៊ីចឹងពន្ធនាគារ ដឹកគាត់មកក្រៅ។ អ៊ីចឹងខ្ញុំយល់ឃើញថា ពេទ្យពន្ធនាគារអត់អាចផ្ដល់ជំនាញបច្ចេកទេស ក្នុងការធានាព្យាបាលភ្នែកគាត់នោះទេបាទ»។
ចំណែកកូនស្រីលោក ចៅ វាសនា គឺអ្នកស្រី ចៅ រតនៈ លើកឡើងថា ទាំងគ្រួសារគាត់ និងមន្ត្រីបក្សប្រឆាំងផ្សេងទៀត មិនដែលទទួលបានយុត្តិធម៌ ពីតុលាការ កម្ពុជាឡើយ ទោះបីជាមិនបានធ្វើខុសអ្វីសោះក៏ដោយ។ ចំណែកអ្នកមានប្រាក់ និងអំណាចវិញ អ្នកស្រីថា ទោះបីប្រព្រឹត្តបទល្មើសឧក្រិដ្ឋធ្ងន់ធ្ងរយ៉ាងណា ក៏តុលាការដោះលែងពួកគេឱ្យនៅក្រៅឃុំដែរ។
អ្នកស្រី ចៅ រតនៈ៖ «យើងលើកឡើង យើងមានហេតុផលរបស់យើង សម្រាប់ទាមទារឱ្យនៅក្រៅឃុំ ប៉ុន្តែដោយសារតែមិនទទួល ពួកខ្ញុំមានអារម្មណ៍ថា គាត់រើសអើង ប្រកាន់ដែលយើងនៅ ក្នុងគណបក្សប្រឆាំង ដែលមិនអនុញ្ញាតឱ្យនៅក្រៅឃុំ។ អ៊ីចឹង ការយល់ឃើញខ្ញុំថា វាជាភាពអយុត្តិធម៌សម្រាប់គ្រួសារខ្ញុំ ក៏ដូចបងប្អូន អ្នកជាប់ចោទមនសិការទាំងអស់គ្នា»។
មេធាវីការពារក្ដីឱ្យលោក ចៅ វាសនា គឺលោក សំ សុគង់ លើកឡើងថា ការសម្រេចរបស់តុលាការកំពូល ដោយសំអាងថា សំណុំរឿងកូនក្ដីរបស់លោក ត្រូវបានសាលាដំបូងខេត្តបន្ទាយមានជ័យ បានបិទការស៊ើបសួរ និងបញ្ជូនទៅ ជម្រះហើយ ទើបតុលាការមិនដោះលែង។
ទោះជាយ៉ាងណាលោកនឹងជំរុញទៅសាលាដំបូងខេត្តបន្ទាយមានជ័យ ឱ្យបើក សវនាការជំនុំជម្រះ សំណុំរឿងនេះ ឱ្យបានឆាប់នាពេលខាងមុខ។
លោក សំ សុគង់៖ «ខ្ញុំមានការខកចិត្តដែរ ចំពោះការសម្រេចរបស់តុលាការ កំពូលព្រឹកនេះ មើលនិយាយពីអាទិភាព ឬលក្ខខណ្ឌកូនក្ដីលើកឡើងនៅពេលសវនាការ កូនក្ដីគួរត្រូវបានសម្រេចឱ្យនៅក្រៅឃុំបណ្ដោះអាសន្ន ឬដាក់លក្ខខណ្ឌ ឱ្យនៅក្រៅឃុំបណ្ដោះអាសន្ន»។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត បង្ហាញការសោកស្ដាយចំពោះការសម្រេចរបស់តុលាការកំពូល ដែលមិនអនុញ្ញាតឱ្យលោក តូច ថឹង និងលោក ចៅ វាសនា នៅក្រៅឃុំ បើទោះជាពួកគាត់មានជំងឺ និងបញ្ហាសុខភាព។
ចំពោះការឃុំខ្លួនអ្នកទាំងពីរ លោកថា វាមិនមានភាពចាំបាច់ទៀតឡើយ ដោយសារ ការស៊ើបអង្កេតបានបញ្ចប់ ហើយសំណុំរឿងនេះ ក៏បានបញ្ជូនទៅ ជម្រះដែរ។
លោក អំ សំអាត សង្កេតឃើញថា ចំពោះសំណុំរឿងសកម្មជននយោបាយ សកម្មជនសិទ្ធិមនុស្ស និងសកម្មជនសង្គមផ្សេងៗទៀត កម្រតុលាការដោះលែង ឱ្យនៅក្រៅឃុំណាស់ បើទោះបីជាពួកគាត់មានហេតុផលគ្រប់គ្រាន់ និងយល់ព្រម ចូលរួមគ្រប់នីតិវិធីរបស់តុលាការក៏ដោយ។
លោក អំ សំអាត៖ «ចំណុចនេះ ដែលគេថា វាជារឿងនយោបាយច្រើនជាង ការអនុវត្តច្បាប់ ព្រោះការអនុវត្តច្បាប់ គួរពិនិត្យស្ថានភាពសុខភាពរបស់ពួកគាត់ និងទិដ្ឋភាព ដែលគាត់បានធានាអះអាងចំពោះ មុខច្បាប់នៅក្នុងកិច្ចសហប្រតិបត្តិការល្អ ចូលរួម សហប្រតិបត្តិការគ្រប់ដំណាក់កាលអនុវត្តច្បាប់ កន្លែងហ្នឹង វាជារឿងមួយដែលត្រូវ ពិចារណា»។
មន្ត្រីបក្សភ្លើងទៀនប្រចាំខេត្តកំពង់ចាមលោក តូច ថឹង ត្រូវបានតុលាការ ចោទប្រកាន់ពីបទក្លែងបន្លំឯកសារ ក្នុងការបង្កើតគណបក្ស បេះដូងជាតិ កាលពីឆ្នាំ២០២១។
ចំណែកប្រធានប្រតិបត្តិគណបក្សភ្លើងទៀនក្រុងប៉ោយប៉ែត លោក ចៅ វាសនា មានដើមកំណើតខ្មែរក្រោម ត្រូវបានតុលាការ ខេត្តបន្ទាយមានជ័យចោទប្រកាន់ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និង ញុះញង់ឱ្យមានការរើសអើង ពាក់ព័ន្ធនឹងរឿង ធ្វើយុទ្ធនាការឱ្យពលរដ្ឋគូសខ្វែង សន្លឹកឆ្នោតកាលពីថ្ងៃទី២៣ ខែកក្កដា ឆ្នាំ២០២៣ ។ ប៉ុន្តែ លោក ចៅ វាសនា បានច្រាលចោលការចោទប្រកាន់នេះ។
លោក ចៅ វាសនា ធ្លាប់ត្រូវបានតុលាការខេត្តបន្ទាយមានជ័យកាត់ទោសជាប់ពន្ធនាគារម្ដងរួចមកហើយ អំពីបទញុះញង់ និងបានចេញពីពន្ធនាគារវិញ កាលពីដើមឆ្នាំ២០២២ បន្ទាប់ពីលោកបានអនុវត្ត ទោសគ្រប់ចំនួនរយៈពេល ៥ឆ្នាំពេញនៅក្នុងពន្ធនាគារ។
គិតត្រឹមខែតុលា មានសកម្មជននយោបាយ សកម្មជនសិទ្ធិមនុស្ស សហជីព និងដីធ្លី ប្រមាណ៤០នាក់កំពុងជាប់ឃុំក្នុងពន្ធនាគារ ដោយតុលាការចោទប្រកាន់ ដូចគ្នាៗពី រួមគំនិតក្បត់និងញុះញង់ ដែលសហគមន៍ជាតិ និងអន្តរជាតិ មើលឃើញថា ជាការធ្វើទុក្ខបុកម្នេញផ្នែកនយោបាយហើយតែងទទូចឲ្យមានការដោះលែងពួកគេឱ្យមានសេរីភាពវិញដោយឥតលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។