សំណុំរឿងពីរដាច់ដោយឡែកពីគ្នា គឺទីមួយរបស់សកម្មជនបក្សប្រឆាំង និងមួយទៀតរបស់សកម្មជនដីធ្លីតំបន់បឹងកក់ អ្នកស្រី ទេព វន្នី ត្រូវបានប្រធានក្រុមប្រឹក្សាជំនុំជម្រះនៃតុលាការកំពូលសម្រេចបដិសេធមិនទទួលយកទៅពិចារណាតាមការស្នើសុំរបស់ដើមបណ្ដឹងឡើយ នៅព្រឹកថ្ងៃទី២៥ ខែមករា។ អ្នកវិភាគមើលឃើញថា ប្រសិនបើតុលាការនៅតែមិនអាចផ្ដល់ភាពត្រឹមត្រូវបានតាមរយៈការជំនុំជម្រះទេ វានឹងរុញច្រានឲ្យពលរដ្ឋកម្ពុជា រស់នៅដោយមិនស្ងប់ចិត្ត ហើយភាពអយុត្តិធម៌សង្គមកាន់តែអាប់អួទៅៗ។
ប្រតិកម្មនឹងសាលដីការបស់តុលាការជាន់ខ្ពស់នេះ ដើមបណ្ដឹងសាទុក្ខក្នុងសំណុំរឿងព្រហ្មទណ្ឌហៅតុលាការកម្ពុជា ថាជាតុលាការដែលបម្រើឲ្យបក្សនយោបាយតែម្ខាង ជាពិសេស រាល់ការវិនិច្ឆ័យលើសំណុំរឿងបក្សប្រឆាំង និងសកម្មជនការពារសិទ្ធិមនុស្សជាដើម កម្រឃើញតុលាការផ្អែកលើភស្តុតាងដោះបន្ទុកម្ដងណានោះឡើយ។
ការរិះគន់របស់សកម្មជនបក្សប្រឆាំង លោក អ៊ុក ពេជ្រសំណាង គឺនៅក្រោយពេលប្រធានក្រុមប្រឹក្សាជំនុំជម្រះតុលាការកំពូល លោក សឹង បញ្ញាវុឌ្ឍ សម្រេចបដិសេធមិនពិចារណាបញ្ចូលឈ្មោះពួកគេទៅក្នុងសំណុំរឿងឧទ្ធរណ៍អំពីមោឃភាពនីតិវិធីទេ។ លោក អ៊ុក ពេជ្រសំណាង ដែលមានវោហារសាស្ត្ររិះគន់មន្ត្រីតុលាការដោយមិនសំចៃមាត់នោះ បានស្រែកតវ៉ាខ្លាំងៗ ក្នុងពេលដែលរូបលោកត្រូវបានឆ្មាំពន្ធនាគារបញ្ជូនចូលរថយន្តទៅឃុំខ្លួននៅពន្ធនាគារព្រៃសវិញ៖ «យើងពុះពារដាច់ខាត! យើងហ៊ានធ្វើអ្វីៗគ្រប់គ្រាន់សម្រាប់ជាតិយើង។ យើងកុំរាថយ យើងកុំចុះចាញ់រាល់សកម្មភាពថោកទាបនៃការដឹកនាំប្រមុខរដ្ឋាភិបាល លោក ហ៊ុន សែន នេះ»។
នៅថ្ងៃប្រកាសសាលដីកានេះ គេសង្កេតឃើញថា សកម្មជន ៤នាក់ក្នុងចំណោមមនុស្សទាំង ៥នាក់ ដែលស្នើសុំមោឃភាពនីតិវិធីគឺអវត្តមានទាំងមេធាវី និងកូនក្តីនៅក្នុងសវនាការ ក្នុងនោះមានលោក មាជ សុវណ្ណារ៉ា លោក អាន បឋម លោក សាន សីហៈ និងលោក ទេព ណារិន បានស្នើសុំមិនចូលរួមស្ដាប់សវនាការទេ។ នៅក្នុងរឿងក្ដីមោឃភាពនីតិវិធីនេះ គឺមានតែលោក អ៊ុក ពេជ្រសំណាង ម្នាក់ប៉ុណ្ណោះបានចូលរួមនៅថ្ងៃសវនាការ។
ភ្លាមៗ លោក សឹង បញ្ញាវុឌ្ឍ បានអានសាលដីកាដោយសម្រេចមិនទទួលយកបណ្ដឹងសាទុក្ខនេះទៅពិចារណាទេ ដោយចាត់ទុកថា សាលក្រមរបៀបរបស់តុលាការក្រុងភ្នំពេញ កំពុងស្ថិតក្នុងដំណាក់កាលនីតិវិធីរបស់សាលាឧទ្ធរណ៍នៅឡើយ។
ទាក់ទិនរឿងនេះ មេធាវីការពារក្ដីឲ្យសកម្មជនទាំង ៥រូប គឺលោក ជូង ជូងី បង្ហាញការសោកស្ដាយតាមទូរស័ព្ទចំពោះសេចក្ដីសម្រេចរបស់តុលាការកំពូលក្នុងរឿងក្តីនេះ។ បើទោះជាបែបណាលោកបញ្ជាក់ថា នឹងដាក់បណ្ដឹងសាថ្មីឡើងវិញទៅសាលាឧទ្ធរណ៍បន្តទៀតប្រឆាំងសាលដីកានេះ៖ «ថ្វីត្បិតតុលាការកំពូលបដិសេធបណ្ដឹងសាទុក្ខ គឺបានន័យថា មិនព្រមបញ្ចូលឈ្មោះអ្នកទាំង ៥នាក់ ទៅក្នុងសំណុំរឿងមោឃភាពនីតិវិធីរបស់សាលាឧទ្ធរណ៍ក៏ដោយ ប៉ុន្តែខ្ញុំជាមេធាវីក៏នៅតែមើលឃើញថា អ្នកទាំង ៥នាក់ អាចដាក់បណ្ដឹងថ្មីមួយទៀតទៅសាលាឧទ្ធរណ៍»។
កាលពីថ្ងៃទី២១ ខែកក្កដា ឆ្នាំ២០១៥ សកម្មជនទាំង ១១នាក់របស់គណបក្សប្រឆាំង ត្រូវបានតុលាការក្រុងភ្នំពេញ ផ្ដន្ទាទោសដាក់ពន្ធនាគារចន្លោះពី ៧ ទៅ ២០ឆ្នាំក្រោមបទចោទថា ដឹកនាំកុប្បកម្ម និងចូលរួមបាតុកម្មកាលពីខែកក្កដា ឆ្នាំ២០១៤។
ដោយឡែកនៅក្នុងសំណុំរឿងមួយផ្សេងទៀត គឺសំណុំរឿងរបស់សកម្មជនដីធ្លីតំបន់បឹងកក់ អ្នកស្រី ទេព វន្នី តុលាការកំពូលសម្រេចក្នុងថ្ងៃតែមួយ ដោយច្រានចោលបណ្ដឹងសាទុក្ខដូចគ្នាដែរ។
ប្រធានក្រុមប្រឹក្សាជំនុំជម្រះ អ្នកស្រី គឹម សុថាវី ចាត់ទុកថា សាលក្រមរបស់តុលាការក្រុងភ្នំពេញ ក្នុងរឿងក្ដីអ្នកស្រី ទេព វន្នី គឺមានលក្ខណៈគ្រប់គ្រាន់ដែលអាចពិចារណាច្រានចោលបាន។ ក្រោយចេញពីបន្ទប់សវនាការវិញ អ្នកស្រី ទេព វន្នី ប្រតិកម្មថា យុត្តិធម៌សម្រាប់អ្នកស្រីនៅតែកប់បាត់ស្រមោលសូន្យឈឹង ទាំងខ្លួនអ្នកស្រីពុំបានប្រព្រឹត្តដូចការចោទប្រកាន់ផងនោះ៖ «តើយុត្តិធម៌នៅឯណា ហេតុអីខ្ញុំហៅមិនឮ មើលមិនឃើញអ៊ីចឹង»។
សកម្មជនដីធ្លីដ៏មានប្រជាប្រិយភាពរូបនេះ ត្រូវបានតុលាការចោទប្រកាន់ក្នុងអំពើហិង្សាក្បែរផ្ទះលោកនាយករដ្ឋមន្ត្រី កាលពីឆ្នាំ២០១៣។ អ្នកស្រី ទេព វន្នី ក៏នៅមានសំណុំរឿងដទៃទៀតក្រៅពីនេះ ដែលតុលាការកំពុងបន្តនីតិវិធីនៅឡើយ។
ស្របពេលតុលាការកំពូល នៅបន្តតម្កល់សាលក្រមរបស់តុលាការក្រុងភ្នំពេញ ទុកជាបានការដដែលនេះ ចំណែកលោកស្រី ហួត ច័ន្ទសុវណ្ណ ដែលត្រូវជាបងស្រីរបស់អ្នកស្រី ទេព វន្នី បង្ហាញការអស់សង្ឃឹមចំពោះប្រព័ន្ធយុត្តិធម៌នៅកម្ពុជា។ លោកស្រីបន្តថា ក្នុងពេលកូនៗរបស់អ្នកស្រី ទេព វន្នី កំពុងឈឺនៅមន្ទីរពេទ្យដែលទាមទារការមើលថែពីម្ដាយ បែរជាតុលាការរឹតតែបន្តចាត់វិធានការបន្ថែមទៀតដាក់បន្ទុកលើអ្នកស្រី ទេព វន្នី៖ «គាត់ឈឺ និងចុកពោះពីរបីថ្ងៃមុនដោយសារថា មានពោះវៀនដុះស្នែងដល់អ៊ីចឹងទៅទាល់តែវះកាត់ទើបជា។ វះកាត់ចូលតាំងពីយប់មិញម្ល៉េះ។ យប់មិញប្រហែលម៉ោង ៩ជាង»។
លោកបណ្ឌិត ឡៅ ម៉ុងហៃ អ្នកវិភាគឯករាជ្យដែលឃ្លាំមើលពីសវនាការនេះដោយផ្ទាល់ចាត់ទុកថា សេចក្ដីសម្រេចរបស់ចៅក្រមជំនុំជម្រះ គឺជាការសម្រេចដែលផ្អែកលើទំនោរនយោបាយច្រើនជាង។ លោកមើលឃើញថា កាលណាតុលាការអនុវត្តស្ថិតក្រោមសម្ពាធនយោបាយ ស្ថានភាពនេះនឹងមិនអាចឲ្យពលរដ្ឋរស់នៅដោយស្ងប់ចិត្តបាននោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។