អង្គការសង្គមស៊ីវិល ពលរដ្ឋសហគមន៍បឹងកក់ និងគ្រួសារអ្នកស្រីទេព វន្នី សម្ដែងការសោកស្ដាយដែលរបបលោកហ៊ុន សែន មិនព្រមដោះលែងអ្នកស្រី ទេព វន្នី ឲ្យមានសេរីភាពជួបជុំគ្រួសារ ក្នុងឱកាសបុណ្យវិសាខបូជា។ ការលើកឡើងនេះ បន្ទាប់ពីក្រសួងយុត្តិធម៌បន្ធូរបន្ថយទោសដល់ទណ្ឌិត៣៣រូប និងលើកលែងទោសទណ្ឌិត ១រូបក្នុងឱកាសបុណ្យវិសាខបូជា តែក្នុងនោះមិនមានឈ្មោះអ្នកស្រី ទេព វន្នី ឡើយ។
ក្ដីរំពឹងថា នឹងមានសិទ្ធិសេរីភាព ជួបជុំក្រុមគ្រួសាររបស់ស្ត្រីមេម៉ាយកូនពីរ និងជាសកម្មជនដីធ្លីដ៏ល្បីឈ្មោះ គឺអ្នកស្រី ទេព វន្នី កាន់តែស្ថិតនៅឆ្ងាយដូចជើងមេឃ ខណៈដែលរបបលោក ហ៊ុន សែន មិនខ្វាយខ្វល់នឹងការឈឺចាប់ និងសំឡេង ស្រែករកយុត្តិធម៌របស់ពួកគេ។
សកម្មជនដីធ្លីតំបន់បឹងកក់ អ្នកស្រី បូ ឆវី សម្ដែងការសោកស្ដាយដែលរបបលោក ហ៊ុន សែន មិន ព្រមដោះលែអ្នកស្រី ទេព វន្នី ឲ្យមានសេរីភាពឡើងវិញ ទោះបីជាពួកគាត់ ព្យាយាមដាក់ញត្តិសុំកិច្ច អន្តរាគមន៍ជាច្រើនលើកហើយក្ដី។ អ្នកស្រីបន្តថា ការឃុំឃាំងអ្នកស្រី ទេព វន្នី ជិត២ឆ្នាំមកនេះ គឺវា ពិតជាអយុត្តិធម៌ណាស់ ព្រោះថាអ្នកស្រីមិនបានប្រព្រឹត្តកំហុសដូចការចោទប្រកាន់នោះទេ។ អ្នក ស្រី ស្នើសុំឲ្យរបបលោក ហ៊ុន សែន និងក្រសួងយុត្តិធម៌ គួរតែដោះលែងអ្នកស្រី ទេព វន្នី វិញ។ «»
រីឯបងស្រីរបស់អ្នកស្រី ទេព វន្នី គឺលោកស្រី ហួត ច័ន្ទសុវណ្ណ រៀបរាប់ថា អ្នកស្រីមានការខកចិត្តយ៉ាងខ្លាំងដែលរបបលោក ហ៊ុន សែន មិនដោះលែងអ្នកស្រី ទេព វន្នី ក្នុងឱកាសបុណ្យវិសាខបូជានេះ ខណៈដែលអ្នកស្រី ទេព វន្នី និងកូនៗទាំងពីរនាក់របស់គាត់ជួបទុក្ខលំបាកទាំងផ្លូវកាយ និងផ្លូវចិត្តយ៉ាងធ្ងន់ធ្ងរ។ ទោះយ៉ាងណាក្ដី អ្នកស្រី បានដឹងជាមុនថា របបលោក ហ៊ុន សែន នឹងមិនដោះលែង អ្នកស្រី ទេព វន្នី នោះទេ ព្រោះគេមានចេតនាសងសឹក។ «»
ការលើកឡើងនេះ បន្ទាប់ពីពួកគេបានដាក់ញត្តិសុំអន្តរាគមន៍ ពីក្រសួងយុត្តិធម៌ និងខុទ្ទកាល័យលោកនាយករដ្ឋមន្ត្រី ហ៊ុន សែន កាលពីថ្ងៃទី២៣ ខែមេសា ដើម្បីឲ្យជួយដោះលែងអ្នកស្រី ទេព វន្នី ក្នុងឱកាសបុណ្យវិសាខបូជា ប៉ុន្តែទីបំផុតនៅតែមិនមានការដោះលែងដដែល។
អ្នកនាំពាក្យក្រសួងយុត្តិធម៌ លោក គឹម សន្តិភាព បានឲ្យដឹងតាមបណ្ដាញទំនាក់ទំនងសង្គមតេឡេ ក្រាម (Telegram)នៅថ្ងៃទី២៩ ខែមេសាថា គណៈកម្មការជាតិបានពិនិត្យ និងសម្រេចស្នើសុំការអនុគ្រោះទោសដល់ទណ្ឌិត សរុប៣៤រូប (ស្ត្រី ១រូប) ក្នុងនោះបន្ធូរបន្ថយទោសដល់ទណ្ឌិតចំនួន៣៣រូប (ស្ត្រី១រូប) និងលើកលែងទោសដល់ទណ្ឌិតចំនួន១រូប សម្រាប់ឱកាសបុណ្យពិសាខបូជាឆ្នាំ២០១៨ នេះ ក្នុងចំណោមបញ្ជីដែលបានស្នើសុំពីគណៈកម្មការក្រសួងមហាផ្ទៃ និងគណៈកម្មការរាជធានី ខេត្តចំនួន ២២៨រូប (ស្ត្រី ១៨រូប)។ ប៉ុន្តែលោកមិនបានបញ្ជាក់ថា ក្នុងបញ្ជីនោះមានបញ្ចូលក្រុមអ្នកទោសនយោបាយ អ្នកទោសមនសិការ និងអ្នកទោសរឿងដីធ្លីឡើយ គ្រាន់តែគេដឹងថាទណ្ឌិតដែល លើកលែងនិងបន្ធូរបន្ថយទោសទាំងនោះ គឺពាក់ព័ន្ធនឹងសំណុំរឿងចម្រុះ ដូចជា អំពើឆក់ ប្លន់ លួច រំលោភ ឆបោក ឃាតកម្មជាដើម។
មន្ត្រីស៊ើបអង្កេតជាន់ខ្ពស់សមាគមអាដហុក (ADHOC) លោក សឹង សែនករុណា បានចូលរួមសម្ដែងការសោកស្ដាយជាមួយសហគមន៍បឹងកក់ និងក្រុមគ្រួសារអ្នកស្រី ទេព វន្នី ដែលតែងតែព្យាយាមតស៊ូដាក់ញត្តិ សុំឲ្យមានការលើកលែងទោសដល់អ្នកស្រី ទេព វន្នី ទោះបីជាមានការបដិសេធជាច្រើនលើកក្ដី។ ម្យ៉ាងវិញទៀតលោកសោកស្ដាយព្រោះថា សំណុំរឿងអ្នកស្រី ទេព វន្នី ត្រូវបញ្ចប់រួចហើយ តាមអំណាចសាលដីការបស់តុលាការកំពូល និងមានលក្ខខណ្ឌសាកសមដែលគួរទទួលបានការលើកលែងទោស ប៉ុន្តែអាជ្ញាធរ នៅតែគ្មានសន្តានចិត្តគិតគួរអំពីសិទ្ធិសេរីភាពអ្នកស្រី ទេព វន្នី។
លោក សឹង សែនករុណា យល់ថា ការមិនដោះលែងអ្នកស្រី ទេព វន្នី នេះ អាចដោយសារតែមានការរើសអើងលើអ្នកស្រី ទេព វន្នី ព្រោះកន្លងមក អ្នកស្រី ទេព វន្នី តែងតែធ្វើសកម្មភាពតវ៉ារឿងដីធ្លី រឿងយុត្តិធម៌សង្គម ហើយចុងក្រោយបំផុតលោកស្រី ទេព វន្នី បានឈឺឆ្អាលនិងចូលរួមតវ៉ាទាមទារ យុត្តិធម៌ សម្រាប់លោកបណ្ឌិត កែម ឡី និងមន្ត្រីសមាគមការពារសិទ្ធិសិទ្ធិអាដហុក។ «»
ជាគោលការណ៍ច្បាប់ ទណ្ឌិតដែលបានអនុវត្តទោស បាន ១ភាគ ៣ អាចស្នើសុំបន្ធូរបន្ថយទោសបាន។ ចំណែកឯទណ្ឌិត ដែលបានអនុវត្តទោស ២ភាគ ៣ អាចសុំលើកលែងទោសទាំងស្រុងតែម្ដង។ ជាទូទៅ ការស្នើសុំឲ្យមានការបន្ធូរបន្ថយទោស ឬការលើកលែងទោសទាំងស្រុងនេះ គឺធ្វើឡើងក្នុងឱកាសនៃពិធីបុណ្យប្រពៃណីជាតិ ដូចជា ពិធីបុណ្យចូលឆ្នាំប្រពៃណីខ្មែរ ពិធីបុណ្យពិសាខបូជា និងពិធីបុណ្យអុំទូក អកអំបុក សំពះព្រះខែ និងបណ្ដែតប្រទីប។
លោក សឹង សែនករុណា បន្តថា ការបន្តឃុំខ្លួនអ្នកស្រី ទេព វន្នី ទៀតនេះ គឺបង្ហាញពីចេតនានៃការ អនុវត្តច្បាប់ មិនស្មើភាពគ្នា ដោយសារពលរដ្ឋផ្សេងទៀតដែលប្រព្រឹត្តបទឧក្រិដ្ឋ អាចមានឱកាសទទួលបានការលើកលែងទោស ខណៈអ្នកស្រី ទេព វន្នី មានហេតុផលគ្រប់គ្រាន់ក្នុងការលើកលែង ទោស តែមិនត្រូវបានគេលើកលែងទោស។
កាលពីឆ្នាំ២០១៧ ព្រះមហាក្សត្រតាមរយៈការស្នើសុំរបស់លោកហ៊ុន សែន បានលើកលែងទោស ដល់អតីតអភិបាលខេត្តរតនគិរី លោក ខាំ ឃឿន ដែលតុលាការកាត់ទោសកំបាំងមុខឲ្យជាប់ពន្ធនាគាររយៈពេល ១៧ឆ្នាំ ពីបទ "ទទួលសំណូកបំផ្លាញបរិស្ថាន និងក្លែងរបាយការណ៍នគរបាល” ក្នុងរឿងកាប់បំផ្លាញឈើនៅតំបន់កន្ទុយនាគខេត្តរតនគិរី ទោះបីជាលោក មិនដែលជាប់ពន្ធនាគារមួយថ្ងៃក្ដី។ រឿងអាស្រូវកាប់ឈើដ៏កក្រើកនេះ ក៏មានជាប់ពាក់ពន្ធនឹងអតីតស្នងការខេត្តរតនគិរីលោក យឿង បាលួង និងមន្ត្រីរដ្ឋាភិបាល ទាហាន និងនគរបាល១៤រូបទៀត ប៉ុន្តែពួកគេសុទ្ធតែត្រូវបានលើកលែងទោស។ ដោយឡែកអង្គរក្សលោក ហ៊ុន សែន ចំនួន៣នាក់ ដែលបានវាយទាត់ធាក់យ៉ាងដំណំលើតំណាងរាស្ត្របក្សប្រឆាំងពីរនាក់នៅមុខរដ្ឋសភា ក៏ត្រូវបានដោះលែងវិញ និងដំឡើងឋានៈតួនាទីដែរ។
កាលពីដើមខែកុម្ភៈកន្លងទៅ តុលាការកំពូលបានសម្រេចតម្កល់សាលក្រមតុលាការក្រុងភ្នំពេញទុកជាបានការដដែល ចំពោះការផ្ដន្ទាទោសអ្នកស្រី ទេព វន្នី ឱ្យជាប់ពន្ធនាគារ ២ ឆ្នាំកន្លះ ពាក់ព័ន្ធនឹងសំណុំរឿងហិង្សាលើសន្តិសុខសាលាខណ្ឌដូនពេញ ក្បែរផ្ទះនាយករដ្ឋមន្ត្រី កាលពីឆ្នាំ ២០១៣ កន្លងទៅ។
ដោយឡែកសាក្សីជាច្រើននាក់ និងអ្នកស្រី ទេព វន្នី បានប្រាប់តុលាការម្ដងហើយម្តងទៀតថា គាត់មិនបានប្រព្រឹត្តដូចការចោទប្រកាន់ទេ។ ពួកគាត់ជាស្ត្រីទៅទាមទារតវ៉ាមានគ្នាប្រមាណ ៣០នាក់ និងមានត្រឹមតែបដា និងផ្កាឈូកប៉ុណ្ណោះ ដោយគ្មានដុំថ្ម ហើយក៏មិនបានប្រើហិង្សាលើក្រុមសន្តិសុខឡើយ មានតែក្រុមសន្តិសុខទេ ដែលប្រព្រឹត្តហិង្សាលើពួកគេរហូតធ្វើឲ្យបាតុករបាក់ដៃ បាក់ធ្មេញ និងរបួសជាដើម នៅក្នុងហេតុការណ៍នោះ។
អ្នកស្រី ទេព វន្នី ត្រូវបានអាជ្ញាធរចាប់ខ្លួន កាលពីខែសីហា ឆ្នាំ ២០១៦ ខណៈដែលអ្នកស្រីធ្វើយុទ្ធនាការថ្ងៃចន្ទពណ៌ខ្មៅ ទាមទារឲ្យដោះលែងមន្ត្រីអាដហុក ៤រូប និងមន្ត្រី គ.ជ.ប ១រូប រួមទាំងជំរុញឲ្យរដ្ឋាភិបាលវែកមុខរកអ្នកនៅពីក្រោយការបាញ់សម្លាប់ លោក កែម ឡី។ គិតត្រឹមខែមេសា ឆ្នាំ ២០១៨ នេះ អ្នកស្រីបានជាប់ពន្ធនាគារអស់រយៈពេលប្រមាណ ១ ឆ្នាំ ៨ខែហើយ៕