ប្រពន្ធសមាជិកគណបក្សសង្គ្រោះជាតិខេត្តត្បូងឃ្មុំ លោក ស៊ូ យាន ចោទប្រកាន់សមត្ថកិច្ចថា បានវាយដំប្ដីលោកស្រី ក្នុងពេលសួរចម្លើយនៅស្នងការដ្ឋាននគរបាលខេត្តត្បូងឃ្មុំ មុនពេលបញ្ជូនទៅឃុំខ្លួនក្នុងពន្ធនាគារខេត្តកំពង់ចាម កាលពីជិតពីរសប្ដាហ៍មុន។ ការអះអាងនេះ បន្ទាប់ពីប្រពន្ធសមាជិកបក្សប្រឆាំង ចូលសួរសុខទុក្ខប្ដីជាលើកដំបូងក្នុងពន្ធនាគារខេត្តកំពង់ចាម នៅថ្ងៃទី២ ខែវិច្ឆិកា។ រីឯស្នងការនគរបាលខេត្តត្បូងឃ្មុំ ច្រានចោលការចោទប្រកាន់។
ប្រពន្ធរបស់អនុប្រធានប្រតិបត្តិគណបក្សសង្គ្រោះជាតិខេត្តត្បូងឃ្មុំលោក ស៊ូ យាន គឺលោកស្រី ស្រី សៀត រៀបរាប់ថា លោកស្រី រន្ធត់ចិត្ត និងអាណិតអាសូរប្ដីជាខ្លាំង នៅពេលដឹងថា សមត្ថកិច្ចបានប្រើហិង្សាសួរចម្លើយលើប្ដីទាំងគ្មានកំហុស ដោយសារតែទស្សនៈនយោបាយ។ លោកស្រី ស្រី សៀត អះអាងថា ក្នុងពេលចាប់ខ្លួននោះ គឺសមត្ថកិច្ចស្លៀកពាក់ស៊ីវិល ៦នាក់ បានវាយប្តីលោកស្រីមួយដៃពេញទំហឹងចំសៀតផ្ការួចរុញបញ្ចូលឡាន ហើយពេលដឹកទៅដល់ស្នងការ គឺប្ដីលោកស្រី ប្រាប់ថា សមត្ថកិច្ច បានវាយដំម្ដងទៀត ដើម្បីសួរចម្លើយ មុនបញ្ជូនទៅឃុំខ្លួនទាំងយប់នៅពន្ធនាគារនៅខេត្តកំពង់ចាម។ ប្រពន្ធសមាជិកបក្សប្រឆាំងរូបនេះ ចាត់ទុកថា ការចាប់ឃុំខ្លួនលោក ស៊ូ យាន ជាលើកទី២ និងការប្រើហិង្សាលើរាងកាយប្ដីរបស់លោកស្រីបែបនេះ គឺជារឿងឈឺចាប់ និងអយុត្តិធម៌បំផុត៖ « មានអារម្មណ៍ថាអាណិតគាត់ ព្រោះគាត់នៅខាងក្រៅ គ្មានអ្នកណាដំធាក់គាត់ទេ ដល់ពេលចូលក្នុងទៅហេតុអីវាយដំគាត់អ៊ីចឹង។ គាត់អត់ប្រាប់លម្អិតទេ គ្រាន់តែខ្ញុំសួរថា គេវាយដែរអត់ ? គាត់ថា វាយ គឺវាយចំគល់ក។ ខ្ញុំទាមទារឲ្យគេ ( រដ្ឋាភិបាល ) ដោះលែងគាត់ទៅ គាត់គ្មានខុសអីទេ » ។
លោកស្រី ស្រី សៀត បន្តថា ក្នុងពេលសួរសុខទុក្ខប្ដីក្នុងពន្ធនាគារខេត្តកំពង់ចាមនោះ គឺពន្ធនាគារកំណត់ពេលឲ្យត្រឹម ៣ ទៅ ៤នាទីប៉ុណ្ណោះ ហើយប្ដីលោកស្រីដែលមានអាយុ ៤៥ឆ្នាំ កំពុងមានជំងឺរាករូស និងឈឺសន្លាក់ដៃជើង។
ស្នងការនគរបាលខេត្តត្បូងឃ្មុំ លោក បែន រ័ត្ន អះអាងថា សមត្ថកិច្ច មិនបានប្រើហិង្សាលើលោក ស៊ូ យាន ដូចការចោទប្រកាន់នោះទេ។ លោកបន្តថា ចំពោះការចាប់ខ្លួនលោក ស៊ូ យាន កាលពីថ្ងៃទី២២ ខែតុលានោះ គឺពាក់ព័ន្ធនឹងបទល្មើសជាក់ស្ដែងដោយសារលោក ត្រៀមដឹកនាំកម្លាំងទៅតវ៉ា នៅមុខស្ថានទូតចិនក្នុងទីក្រុងភ្នំពេញ ចំថ្ងៃប្រារព្ធខួបកិច្ចព្រមព្រៀងសន្តិភាពទីក្រុងប៉ារីស ២៣ តុលា។ ស្នងការនគរបាលរូបនេះ បញ្ជាក់ថា ក្រោយការចាប់ខ្លួននោះ សមត្ថកិច្ចជំនាញក្រសួងមហាផ្ទៃ និងតុលាការ ប្រមូលបានភស្តុតាងមួយចំនួននៅក្នុងទូរស័ព្ទដៃរបស់លោក ស៊ូ យាន ដូច្នេះទើបតុលាការ សម្រេចចោទប្រកាន់ និងឃុំខ្លួនក្នុងពន្ធនាគារ៖ « បើសិនជាមានការវាយតប់មែននោះ ទៅលាក់ស្អីជិត ព្រោះពេលដែលសាកសួរគាត់ គឺមិនមែនមនុស្សម្នាក់ទេ គឺមនុស្ស ៥ ទៅ ៦នាក់ណោះ ហើយទី២ព្រះរាជអាជ្ញារង គេមកសួរផ្ទាល់នៅទីហ្នឹង។យកមកដល់កន្លែងប្រហែលជាពីរម៉ោងទេ គេមកប្រគល់ឲ្យគេ គេសាកសួរអ៊ីចឹងទាំងអស់ គ្មានអ្នកណាទៅវាយដំគាត់ ។ផ្ទុយទៅវិញមានតែគេថែទាំគាត់គេភ័យណាស់ ព្រោះគាត់ជាមនុស្សម្នាក់ដែលអ្នកផងយកចិត្តទុកដាក់ដែរបញ្ហាហ្នឹង ដូច្នេះមិនឲ្យមានទិដ្ឋភាពបែបនេះកើតឡើងទេ » ។
អាស៊ីសេរី មិនអាចសុំឆ្លើយតបពីព្រះរាជអាជ្ញាសាលាដំបូងខេត្តត្បូងឃ្មុំ លោក ហាក់ សៀកលីម បានទេ ដោយទូរស័ព្ទចូលពុំមានអ្នកទទួល។
ប្រពន្ធរបស់លោក ស៊ូ យាន ចាត់ទុកថា ការឆ្លើយតបរបស់ស្នងការខេត្តត្បូងឃ្មុំ គឺជាលេសដោះសារ។ លោកស្រីបន្ថែមទៀតថា ប្ដីលោកស្រី គ្មានបំណងឡើងទៅភ្នំពេញនោះទេ ព្រោះពេលចាប់ខ្លួននោះ គឺប្តីលោកស្រី កំពុងជិះម៉ូតូឌុបលោកស្រីទៅព្យាបាលជំងឺនៅមន្ទីរពេទ្យ។ លោកស្រី អំពាវនាវដល់រដ្ឋាភិបាល ដោះលែងលោក ស៊ូ យាន ឲ្យមានសេរីភាពឡើងវិញ ព្រោះប្ដីលោកស្រីគ្មានកំហុសនោះទេ និងត្រូវមើលថែលោកស្រីកំពុងមានជំងឺប្រចាំកាយ ព្រមទាំងកូនៗ ចំនួនបីនាក់ថែមទៀត។
អនុប្រធានប្រតិបត្តិគណបក្សសង្គ្រោះជាតិខេត្តត្បូងឃ្មុំលោក ស៊ូ យាន ត្រូវបានសមត្ថកិច្ចខេត្តត្បូងឃ្មុំ ចាប់ខ្លួនជាលើកទី២ ដោយគ្មានដីកា កាលពីថ្ងៃទី២២ ខែតុលា។ តុលាការខេត្តត្បូងឃ្មុំ បានចោទប្រកាន់លោកពីបទ «ញុះញង់បង្កឲ្យមានភាពវឹកវរធ្ងន់ធ្ងរក្នុងសង្គម» និងបញ្ជូនទៅឃុំខ្លួននៅពន្ធនាការខេត្តកំពង់ចាម។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត មានប្រសាសន៍ថា ការចាប់ខ្លួនក្នុងបទល្មើសជាក់ស្ដែង ទាល់តែមានភស្តុតាងគ្រប់គ្រាន់ បើពុំនោះទេ មិនអាចចាប់ខ្លួនដោយគ្មានដីកាបានឡើយ។ លើសពីនេះ លោកបន្តថា ប្រសិនគ្រួសារ និងជនជាប់ឃុំ អះអាងថា មានការវាយដំលើរាងកាយនោះ គឺត្រូវតែមានការស៊ើបអង្កេតដោយឯករាជ្យនិងត្រឹមត្រូវ ដើម្បីផ្តល់យុត្តិធម៌ដល់ជនរងគ្រោះ និងបញ្ចប់មន្ទិលសង្ស័យ ព្រោះកម្ពុជាជាប្រទេសដែលផ្តល់សច្ចាប័នលើអនុសញ្ញាស្ដីពីការប្រឆាំងការធ្វើទារុណកម្ម និងអំពើឃោរឃៅអមនុស្សធម៌៖ « ដូច្នេះបើករណីនេះមានការលើកឡើងពីគ្រួសារ និងអ្នកដែលត្រូវបានគេចាប់ខ្លួនផ្ទាល់នោះថា បើសិនជាមានអំពើទារុណកម្មអ៊ីចឹងមែន គឺវាត្រូវតែមានការស៊ើបអង្កេតឲ្យបានហ្មត់ចត់។ យើងឃើញកន្លងមកដូចនៅបន្ទាយមានជ័យអី ដែលមន្ត្រីកងរាជអាវុធហត្ថ និងអ្នកពាក់ព័ន្ធ បានធ្វើទារុណកម្មទៅលើករណីដីធ្លីមួយរហូតដល់ស្លាប់នោះ ក៏មានការស៊ើបអង្កេត ស្រាវជ្រាវរហូតដល់មានការចាប់មន្ត្រី ដែលប្រព្រឹត្តហ្នឹង ដាក់ពន្ធនាគារទៀតផង » ។
គិតត្រឹមចុងខែតុលា អាជ្ញាធរបានចាប់ខ្លួនពលរដ្ឋយ៉ាងហោចណាស់ជាង ៣០នាក់ ដាក់ពន្ធនាគារ។ អ្នកដែលត្រូវបានអាជ្ញាធរចាប់ខ្លួនទាំងនោះ រួមមាន មន្ត្រីគណបក្សសង្គ្រោះជាតិ សកម្មជន អ្នកនយោបាយ ព្រះសង្ឃ និងយុវជន ដោយអាជ្ញាធរចោទប្រកាន់ពួកគេពីបទរួមគំនិតក្បត់ ញុះញង់ ឬប្រមាថថ្នាក់ដឹកនាំរដ្ឋាភិបាលជាដើម។ ពួកគេភាគច្រើនកំពុងជាប់ឃុំបណ្ដោះអាសន្នរង់ចាំសវនាការ ស្របពេលមួយចំនួនទៀត ត្រូវបានតុលាការកាត់ទោសរួចទៅហើយ។
ក្រុមអង្គការជាតិ និងអន្តរជាតិ រួមទាំងប្រទេសប្រជាធិបតេយ្យ នៅតែបន្តថ្កោលទោសរបបលោក ហ៊ុន សែន ចំពោះទង្វើរំលោភសិទ្ធិមនុស្សធ្ងន់ធ្ងរជាប្រព័ន្ធ និងបានចោទសួរ និងទាមទារឱ្យរបបនេះបង្ហាញភស្តុតាងរឹងមាំទាំងឡាយចំពោះការចាប់ខ្លួនពលរដ្ឋជាបន្តបន្ទាប់ ក្រោយពេលពួកគេ វាយតម្លៃថា ការចាប់ និងចោទប្រកាន់ទាំងនេះ គឺជាការបង្ក្រាបលើសំឡេងប្រឆាំងដោយសារមូលហេតុនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។