កូនប្រុសពៅអតីតនាយករដ្ឋមន្ត្រី ហ៊ុន សែន គឺលោក ហ៊ុន ម៉ានី ដែលរងនូវការរិះគន់ថាសម្បូរណ៍ទៅដោយរឿងរ៉ាវអាស្រូវស្នេហាផ្លូវភេទបែបហិង្សានិយមលើនារីខ្មែរនោះ បច្ចុប្បន្នកំពុងត្រៀមដឹកនាំយុវជនរៀបចំព្រឹត្តិការណ៍«អង្គរសង្ក្រាន្ត»ឆ្នាំ២០២៥នៅលើទឹកដីខេត្តសៀមរាប។ ព្រឹត្តិការណ៍នេះ ត្រូវបងប្រុសរបស់លោក គឺលោកនាយករដ្ឋមន្ត្រី ហ៊ុន ម៉ាណែត ថ្លែងការពារថាធ្វើឡើងមិនមែនជាការចាយវាយលុយជាតិឥតប្រយោជន៍ ឬដើម្បីមុខមាត់ត្រកូល«ហ៊ុន»នោះឡើយ ក៏ប៉ុន្តែគឺដើម្បីជំរុញកំណើនភ្ញៀវទេសចរអន្តរជាតិមកទស្សនាកម្ពុជានៅរដូវកាលពុំសូវមានភ្ញៀវទេសចរ។
ទោះជាយ៉ាងណា គេតែងឃើញលោក ហ៊ុន ម៉ានី បានដើរតួនាទីជំនួសរដ្ឋមន្ត្រីក្រសួងវប្បធម៌ និងរដ្ឋមន្ត្រីក្រសួងទេសចរណ៍ ចេញមុខផ្ដួចផ្ដើមរៀបចំកម្មវិធីជាតិប្លែកៗមួយចំនួន ដូចជាកម្មវិធីឆ្លងឆ្នាំសាកល«សាទរកម្ពុជា» ឬដឹកនាំក្រុមយុវជនរៀបចំព្រឹត្តិការណ៍បំបែកឯតទគ្គកម្មពិភពលោកនានាជាដើម ជ្រកក្រោមស្លាកសហភាពសហព័ន្ធយុវជនកម្ពុជា (ស.ស.យ.ក) របស់លោក។ ទន្ទឹមនឹងនេះ លោកក៏បានបន្សល់ទុកនូវស្នាដៃអាម៉ាស់ដល់ជាតិ ក្រោយពីបានដឹកនាំធ្វើឱ្យឆេះព្រះឆាយាល័ក្ខណ៍ព្រះមហាក្សត្រក្នុងព្រឹត្តិការណ៍«សាទរកម្ពុជា»នៅពេលឆ្លងឆ្នាំចូលឆ្នាំ២០២៥នេះ ខណៈលោកពុំបានសូមព្រះរាជទានទោសពីព្រះមហាក្សត្រឡើយ និងបែរជាព្យាយាមលាក់បាំងព័ត៌មាននេះភ្លាមៗក្រោយឧបទ្ទវហេតុនេះ។
លោក និងសហភាពសហព័ន្ធយុវជនកម្ពុជា ក៏រងនូវការរិះគន់ដែរថាព្យាយាមផ្ដួចផ្ដើមបង្កើតព្រឹត្តិការណ៍ជាច្រើនដើម្បីពង្វក់ខួរក្បាលយុវជនខ្មែរជំនាន់ក្រោយឱ្យគាំទ្រត្រកូល«ហ៊ុន» និងបក្សកាន់អំណាច កុំឱ្យគិតគូរពីបញ្ហាសង្គមជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។